t3rrylin的個人專頁

唔俾水，唔俾紙巾，只收現金，食物懷疑唔乾淨。之前話係因為環保唔俾水客人。如果係為環保咁唔主動比已經足夠啦，但係客人問佢拎水都係唔肯比，本人就係試過唔舒服想拎杯水食藥都唔俾。而家就要收兩蚊買支水，咁即係唔係為環保啦，浪費一個膠樽喎。見到我買完水口黑面黑，跟住解釋話嗰兩蚊要來助養兒童， sorry我都有助養兒童，你鍾意助養兒童，咪自己出錢助養兒童囉。你批發入啲水返嚟都要錢啦，你嗰兩蚊助養得啲乜？。唔收任何電子支付，仲試過喺客人背後埋怨點解而家啲人唔帶現金出街。今時今日， 印個二維碼已經可以收FPS， PayMe，支付寶，搵部舊電話已經可以收八達通啦，都唔肯做。算數，可能你認為萬惡嘅電子支付會洩漏個人私隱，要捍衛現金交易係你自己嘅事，但係唔好俾人聽到你背後話啲客啦。你自己唔肯改變，就唔好埋怨點解呢個世界唔跟隨你哋唔肯改變。食物質素一般，因為都係一啲簡單烹調菜式，但重點係試過幾次食完肚痛，懷疑係啲生菜沙律唔乾淨。名為Cafe但係咖啡難飲，雖然有即磨咖啡機但係因為唔識揀咖啡豆，只係普通茶餐廳齋啡味道。其實呢啲都可以接受，咁嘅價錢唔expect好高質素，亦都知道唔係做精品咖啡，只不過咁樣其實令我覺得店主冇乜思考過改善食物。叫熱檸水冇檸檬，又話係用咗「手工檸檬汁」，咁就搞到杯野太酸飲唔落，問佢拎杯水諗住溝淡少少飲，於是就收左我兩蚊。講真會重複食純粹係因為全區只有呢間做全日早餐，過咗12點又想食早餐，唯有食佢哋，但係每次都冒着食完會肚痛嘅風險，唯一好處係價錢平。餐廳設有室外用餐區，方便寵物主人，但係其實每次食嘢都好多烏蠅，再次反映衛生風險。總括嚟講呢間餐廳食物質素一般，對客人諸多不便，而且全部都有藉口解釋。正面嚟睇係有原則，但係我個人感覺只不過係一班唔肯企喺客人角度思考嘅腦細，硬將自己價值觀塞俾客人，食物質素亦從來沒有改善。謹餘嘅好處係價錢平，可以帶寵物用餐，同埋係全區12點後仍然有早餐食嘅餐廳，但係再講多次，唔止一次食完個肚唔舒服。小店係值得支持，但係身體要緊，唔會再支持呢間了。…查看更多