比比鳥的個人專頁

尖沙咀厚福街餐廳林立，不嬲都係食飯好去處～其中街尾嘅H8更加係每一層都有一間餐廳，今日同男朋友想食邪惡啲😈就揀左十七樓既Outdark😈😈第一樣上枱係要落手落腳DIY既飯團波波，其實只係將所有野撈埋想整成波波就完成🤣有得玩有得食🤣簡單配搭紫菜、飛魚子同芝麻已經非常惹味，滿滿麻油香🍚每枱必點一定係佢Signature既炸雞，除咗炸雞仲有薯條 薯格 脆薯皇，成堆上枱畫面勁邪惡！炸雞外脆內Juicy😋 不愧係招牌菜，仲有多款口味揀 我哋就點左Sweet Spicy同Honey Garlic兩款雙拼😋 個人比較喜歡甜辣既經典韓式感覺～男朋友每次食韓國菜都必點煎餅，剛剛煎好既海鮮煎餅又香又脆🤤 真係會令人不自覺咁樣一路食落去呢🤤 依度煎餅多料到幾乎見唔到餅 全部都係配料，仲貼心切定一塊塊 最適合多人開心share😚餐廳有Cool Summer Menu多左菜包肉同水冷麵兩樣菜式，食左咁多熱氣野，我哋一於叫個水冷麵清涼一下😆 成個賣相同韓劇見到既一樣～啲冰見到都覺得fresh，按照個人口味加入芥末同醋撈埋食，好解膩！最後出嚟食飯點可以唔叫返兩杯飲品，兩杯梳打都好Refreshing，藍檸檬梳打賣相仲好打卡呢！🍻…查看更多

今日同幾個同事一早已經預約咗呢間餐廳，但係嚟到都係未有枱，要等多一陣先有得坐，侍應已經先幫我哋落單。坐低咗之後傾咗好耐計都未有嘢食，等到距離午餐時間完只係得返半個鐘，終於上齊野食，但係仲要落錯單，同事叫嘅牛肉鍋變咗豬扒飯🥴 但由於時間關係都叫佢放低照食啦，我哋發現上菜好慢之後 已經叫定嘢飲，但係上咗一杯檸茶之後另外四杯都冇影，最後只可以叫佢轉外賣拎住走，但係都依然係好慢，去到我哋埋緊單企喺門口，仲要等多一陣先至有得拎嘢飲🙈 食物質素係唔錯，只係對於趕時間嘅人嚟講就唔太適合。…查看更多

聖誕將至，陪屋企人朋友食buffet慶祝都係一個不錯既選擇～黃竹坑站南灣如心酒店推出嘅「秋冬美饌盛宴」自助餐，價錢超值 提供多款東南亞美食 質素唔錯喎😯 聖誕節就算一家大細一齊慶祝 都唔肉痛呢🤓今日食呢個自助餐係假日Brunch Buffet，刺身Station提供五款刺身（三文魚、馬刀貝、希靈魚、鯛魚同甜蝦），刺身新鮮有光澤 馬刀貝好爽甜呢！另外 凍海鮮都有五種選擇（螺、白蜆、蝦、小龍蝦同青白）雖然唔係提供一啲好貴價嘅海鮮，不過全部都鮮甜 質素唔錯，餐廳仲好貼心咁提供咗幾款醬汁配海鮮 🦐 我自己就最鍾意泰式醬汁🤭下一個冷盤位係Cheese Platter同沙律，有我最愛既Brie~ 沙律除左有五款東南亞口味沙律 最欣賞佢既水耕沙律菜！係看得見既新鮮翠綠 靚到好似假既咁🥹 食落爽脆清甜 靚嘅沙律菜一啲都唔平，我覺得沙律都係呢個自助餐嘅其中一個回本位～另外熱食既選擇都相當多，第一時間梗係衝去肉肉station拎另一個回本之選-即煎鴨肝，鴨肝煎到外脆內軟 一入口油香四溢🥹 仲有啲紅莓汁同黑醋可以中和油膩感 💯 Meat table仲有提供烤西冷 staff比得好大方～🤭 西冷肉味濃郁 都好好食呢～另一個即煮station提供即煮粉麵 好多配料任你夾，如果想食啲菜嘅話就最好不過～湯底都有配合返東南亞主題，我哋揀嘅喇沙湯底好香濃呢🤪 配料方面推介肥牛👍🏻 不過始終份量有啲多 同朋友Happy Share就唔怕食飽咗啦～熱食區中間主要放左多款熱葷，雞鴨牛豬樣樣有 而且好多都係東南亞口味，沙嗲串燒都幾高質 千祈唔好拎漏咗隔籬個沙嗲醬啊😛 另外蜜餞鴨胸厚厚一件好有口感～我到訪嗰日仲有巴東牛肉、烤雞、炆豬手勁多嘢食，至於一啲比較飽肚嘅炒飯我就真係食唔落啦🤰🏻🤰🏻 （唔知係唔係因為brunch，仲有Egg Benedict幾得意！）中間有兩個大湯壺有中式湯同肉骨茶，通常食到飽飽地我都會飲碗熱湯，等個胃舒服啲 然後又可以再戰鬥🤣飽咗八成 終於可以轉戰甜品區，假日自助餐提供兩個full size蛋糕，仲有啲小型嘅迷你撻 馬卡龍 自製班戟等等 有葡撻仔😍 兩個蛋糕水準都唔錯 朱古力Brownie幾香濃濕潤，另一個伯爵茶慕絲蛋糕有茶味海綿蛋糕做底，上面加上慕絲同鏡面layer，簡單得來幾有層次 有茶味～仲有Häagen-Dazs雪糕兩款～完全滿足到我嘅甜品胃～值得一提 千祈唔好miss左門口飲品區（同Häagen-Dazs雪糕嘅雪櫃），咖啡茶同埋罐裝飲品一應俱全☺️整體嚟講呢個自助餐真係幾多嘢食同埋價錢超抵，性價比好高呢！…查看更多

食左好多年既小店，以前記得餐牌淨係米線都有N種湯底，然後再有好多餸菜選擇，有啲全雞全牛全豬全牛餐豐富又好食🤤 無去一排 😧 哇乜變成咁，湯底得翻啲頹野 蕃茄湯清湯豬骨依啲🙄 餸菜選擇又大減少 無曬特色野🙄食物啲份量都唔同曬，講緊雞扒係以前既一半呀大佬😮‍💨 同埋個配方都好似唔同咗，明明以前係又脆又熱好好食⋯⋯🙃 總之成個感覺都變咗一個好頹嘅雙餸麵⋯⋯諗住快啲食完走人啦，點知連入邊嘅配菜粟米粒都變咗，有酸臭味🤧 好彩同阿姐講 佢都好認真處理，換返兩個米線俾我哋，不過成個用餐體驗真係好差。仲未講 其實入門口開始已經見到佢哋人手嚴重不足，唔至冇人安排入座，執枱落單上菜收錢全部都係兩個阿姐一腳踢，仲要個電話不停響，仲有其他外賣平台係咁接單🥴🥴🥴🥴 忙就會亂 隔籬枱杯嘢飲搞到錯晒，又做到兩個阿姐叫晒救命，不過我食完今次之後應該都唔會再幫襯😐 相信阿姐好快就唔會咁忙㗎喇😪😪…查看更多

平時去D2 Place行市集就行得多，原來上多一層3樓有好多餐廳選擇，今日朋友就帶我嚟食呢間日本燒肉，舖頭入邊裝修都幾闊落新淨～坐低之後，就自己用QR code落單，呢度有好多高質嘅和牛選擇 有好多係連名都未聽過嘅部位😛 乜都想試吓最好就係揀拼盤🤣 🐷炎藏和牛極致六點拼盤 $588呢個拼盤包含咗六款唔同部位嘅牛肉，包括和牛內腿肉、和牛友三角、和牛唐辛子、和牛龜之甲、和牛羽下同埋和牛鞍下，有好多都係好稀有嘅部份😮😮 和牛友三角明顯勁多油花 燒完出嚟有晶瑩剔透嘅感覺，配埋Wasabi食就可以中和返和牛嘅油膩感，有一刻覺得好似食緊熱既拖羅咁樣🤭 而其他款式肉質都好柔軟 好好食🤭🐷厚切牛舌芯 $138平時好少食到厚切牛舌 仲要係舌芯位，好容易就燒到外脆內爽彈既口感 仲要爆汁😌 輕輕加啲鹽調味已經好好食😚🐷和牛西冷薄切大判燒 $238呢塊薄切既西冷油花超靚 睇落直頭係粉紅色🌷 成個爐咁長既和牛西冷放咗喺爐面之後 好快就見到啲油脂極速溶化，即刻反轉！輕輕灼一灼就食得，呢個牛肉仲附上一份蘭王蛋 點左蛋汁即刻食😋 蛋香同牛既油脂香平衡得啱啱好 而且口感好滑溜 好似瀡滑梯咁就吞咗🥹 好回味🥹🥹 之後個蛋汁我哋都用嚟點其他牛肉食🤣 就算唔叫呢個西冷 我都好建議散叫一隻蘭王蛋配肉食☺️🐷炎藏沙律 $68雖然呢個沙律嘅結構好簡單 但食落又幾好食！首先蔬菜新鮮爽脆係基本，上面嘅配菜魚仔都幾有鹹鮮味 撈埋唔需要好多醬汁都已經好夠味道，而且呢個沙律嘅性價比都幾高🤣值得一叫🤣🐷石鍋和牛拌飯 $128係成餐飯入邊最唔日式嘅嘢🤣🤣 好似成個韓式石鍋飯咁 不過食咗咁多肉 有啖飯食下真係舒服好多～😌 而且呢個和牛拌飯有菠菜 醃蘿蔔等等嘅配料 口感好清爽，撈埋上面隻靚雞蛋一齊食😚 正😚🐷菠蘿乳酸特飲$42🐷巨峰乳酸特飲$42飲品就正常發揮啦 不過燒肉真係好難唔叫嘢飲🤣 …查看更多

觀塘多人返工就係人都知，好多餐廳都係做午市打工仔食飯嗰一浸，所以通常都會將舖頭入邊啲枱凳放得有幾逼得幾逼，務求入多幾個客人。公司附近呢座大廈嘅餐廳風格就好唔同，幾層都係舒適闊落🤭 特別係呢間西餐 仲好容易搵位～點餐後 先送上餐湯同埋小餐包，今日嘅餐湯有蘑菇湯同雜菜湯，雜菜湯都幾香濃😋 餐包細細個 係軟身都幾易入口～等咗一陣主菜就送到啦，我點咗慢煮安格斯牛版腱～份量幾大 而且肉質柔軟好容易切 好容易咬，味道都有水準😙價錢方面其實都算好合理，有需要嘅話可以另加薯條或者甜品 再開心啲😌…查看更多

同男朋友諗住簡簡單單食個晚餐，就試吓呢間新開嘅茶記，晚膳時間唔算多人 好易就搵到位。舖頭嘅待應立即問我哋要唔要送既例湯～ 例湯比平時嘅大碗好多🤣 飲到底仲見到好多湯料😋我哋叫咗兩個小菜：沙薑雞 XO醬翠玉瓜炒豬頸肉兩個小菜味道都唔錯 而且份量超大🤣連隨餐附送嘅白飯都份量超大 滿滿一碗，難怪呢度叫做大飯館🤣雖然食物質素同服務環境等等都唔錯，不過小菜嘅價錢略貴，兩個人食咗230幾蚊，如果平時區內住戶想當飯堂食飯 呢個價錢相對唔係太吸引🥹 …查看更多

屋企附近新開左呢間酒吧，舖頭入邊擺咗三個飛鏢機，成個裝修格調都幾有型😎不過 屋企呢邊係住宅多 通常餐廳都係做啲家庭客生意😮 本身都唔係好明點解佢會開喺呢度😮😮 後來無意中發現原來佢除咗賣酒同串燒，仲有供應好多食物！ 今日8號風球佢都照常營業 落去試吓先🤭我哋每人叫咗一個定食，兩個餐已經跟咗沙律、飯、湯、前菜同汽水🥤 不過為慶祝打風 我哋再叫咗一個章魚小丸子🤭蒜片美國牛柳粒定食 $98牛柳粒定食賣相相當靚仔 炸到金黃色嘅蒜片令人食指大動🤤 啲牛柳粒一啲都唔韌 口感啱啱好👍🏻 花魚定食 $78本來係鹽燒鯖魚 但因為冇鯖魚所以轉咗花魚，魚味都幾香 口感比鯖魚嫩滑少少 但係就會有少量嘅骨🤏🏻 好彩我本身都係識食魚嘅人😛 所以都幾鍾意食呢個花魚～章魚小丸子 $34味道係正常章魚小丸子🤣 不過通常酒吧賣呢啲小食都會好貴 佢呢個價錢有六粒 我覺得算係抵😬唔知係咪因為新開張呢？服務我哋嘅店員態度好好，而且好細心 見我哋就嚟食完 會無聲無息咁樣放啲餐巾喺枱面🫶🏻有機會都會再嚟食佢嘅串燒套餐 二百幾蚊有10款串燒/小食😼…查看更多

公司附近開左新餐廳 一有機會即刻去試，雖然開業唔算耐，但都幾受歡迎 食客不少～ 同坊間大部分石燒牛扒一樣，門口有售賣機可以自助落單 揀選自己鍾意嘅牛扒部位同埋份量，當中最平既招牌牛扒$85就有交易！另外 沙律、飯同湯任食是常識吧～🤭 到訪當日供應既湯品係蘿蔔牛肉湯，飲落都幾清唔油膩 唔知道會唔會轉款式既呢🤔好快牛扒就連同熱石上枱，記得要帶翻圍裙唔好彈污糟😗 我同朋友分別點左180g招牌同200g牛柳，份量已經好足夠食飽🐷 牛柳都幾柔軟多汁 又有肉味，每枱仲有各式調味同醬料 基本既salt & pepper、蒜蓉、燒肉醬同芥末醬都齊備，由於新開業 覺得佢啲醬料用具全部都好整齊新淨 連刀都好鋒利😍 希望佢會keep到🥹另外 餐廳人手好足夠 服務做得好好👍 除咗有員工係售賣機旁邊協助，侍應又細心地另外俾碟仔我地放燒好嘅牛扒，用完石板之後都好快收翻走～安排座位既時候由於叫左我哋轉一次枱 老闆請翻我哋飲野🥹 好開心🤭…查看更多

屋企人帶我黎晚餐，平日夜晚餐廳都座無虛席 似乎有相當實力，即刻有啲期待～ 川味豬手 先上冷盤：豬手惹味而不會過辣 口感爽彈，不錯👍酸菜魚 份量驚人 適合多人分享，我地叫左小辣都有配合翻我地口味，主角魚片都好滑溜可惜內有小碎骨☠️ 内有不少配料 包括豆卜、薯粉、萵荀等吸盡湯底精華，幾滿足～乳鴿正常發揮 唔算特別出色菠蘿拔絲咕嚕肉不愧係招牌菜式😋 採用新鮮菠蘿 咕嚕肉炸得剛好，唔會太乾身 而且有脆皮口感～調味都恰到好處👍小炒王除左常見既魚仔乾同腰果等配料，仲有蝦仁同魷魚🦑 幾豐富 而且炒得好有鑊氣～椒鹽鮮魷個人認為切得太大 而且略嫌淡味，無大排檔咁好食🤣小缺點餐廳上菜較慢 等候時間幾長，食到最尾幾味已經飽左🙈另外 如果打算自行駕駛到訪，酒樓後有個小小自家停車場🅿️ 惟位置不太足夠 好多車要亂泊，食飯中途有機會被叫出去揸車讓位😂 打擾了食飯的興致 …查看更多

見佢新開張 諗住同朋友食個快飯試下佢晚市，到達餐廳嘅時候係夜晚八點三，餐廳門口寫明係收9:30，但係已經封起咗一半嘅座位拖緊地 好似準備收工咁樣，所以我哋都坐得比較迫夾。後來因為越來越多人入嚟食晚餐，佢又開放返嗰啲座位⋯⋯食物嘅種類唔算好多，可能都係一個系列嘅咖喱飯 蔥油飯，有豬雞牛俾你揀 但比起一般嘅茶餐廳算係好少選擇。我叫咗一個果香咕嚕肉飯，上枱嘅時候已經覺得普普通通，成個碟頭飯咁樣。我期望咕嚕肉會有少少菠蘿，但係一舊都冇，不過餐單設計係咁樣都冇辦法。可惜佢嘅味道都係非常之差，醬汁係勁酸，食到後來個口有少少灼痛嘅感覺，最慘係佢將咕嚕肉直接倒係飯上面，連飯都酸埋😞 咕嚕肉嘅份量都好少，有啲時候淨係食到炸皮，肉粒切得好細，炸完之後又乾又硬，係我一生人食過最難食嘅咕嚕肉。見到隔籬枱嘅咖喱牛腩飯 賣相同樣衝擊，我覺得我哋兩個飯夾埋先至可以成為一個兩餸飯，但係佢嘅價錢就比一般嘅貴好多👎🏻 以後都唔會再嚟食飯…查看更多

平日嘅夜晚約咗朋友喺尖沙咀食飯 等到佢收工已經八點幾 街上人流都大大減少，但我哋嚟到餐廳嘅時候 入邊都係坐滿食客 甚至要等一陣位先至可以入座👏🏻 店內嘅日式裝修同熱鬧程度都令到我有種去左日本浜燒水產店嘅感覺～蟹味噌甲羅燒 $68芝士蟹肉甲羅燒 $72甲羅燒賣相好吸睛😻 蟹膏配上色彩繽紛既蟹子、蟹肉、蔥同鵪鶉蛋🦀店員好識做咁樣俾你打卡之後 就會幫你放上爐仔拌勻燒熟，中間我哋都有少少迷惘食得未😹 不過店員差唔多時間就會返嚟幫你上碟 成個過程完全唔需要自己動手嘅 只要放心享受美食就可以啦！熟咗嘅甲羅燒啖啖都係蟹膏 配埋蟹籽蟹肉蟹味十足，我同朋友仲特登叫曬兩款唔同口味share食，芝士味嘅甲羅燒多咗一pat芝士醬 但係入口嘅芝士味比想像中濃好多 而且佢可以做到芝士同埋蟹膏味道並重👍🏻 都幾推介👍🏻烏賊磯燒 $75烏賊好大隻！ 同樣地 會有店員喺你面前幫你燒，睇住烏賊慢慢變立體😂 燒到八九成熟嘅時候掃上醬汁😌 最勁係佢仲會幫你砌返一隻烏賊出黎上碟😲 烏賊口感彈牙 魷魚翼既位置非常爽口 而且醬汁好香 帶出到烏賊嘅味道，呢個菜式仲有好豐富嘅蛋白質 好飽肚😂 抵食～大蝦鬼殼磯燒 $65 each識食一定要連殼燒🦐🦐 一路燒啲蝦殼不停散發香味 真係令人好期待😚 餐廳預先𠝹開左啲蝦殼 好簡單就剝到～ 幾鮮甜～刺身5盛 $280五種刺身包括有吞拿魚、三文魚、油甘魚、海膽同埋帶子，全部都係熱門之選😎 如果兩三個朋友黎叫依個share都應該滿足到大家，魚生款款厚切 口感十足 仲好新鮮添！三文魚壽司拼盤 $108香港人食日本野 點可以無三文魚🫣 依個拼盤好有心思地配搭左五款不同口味既三文魚壽司 每件食落都有不同既味道😛 我個人最印象深刻係火炙三文魚壽司 微微炙熱左既三文魚魚油味大大提升 同蔥一齊食感覺好和諧呢～鹽燒三文魚鮫 $120依個魚鮫份量十足😮 魚皮燒到香脆 仲有大大舊三文魚肉 魚鰭位既肉特別軟滑仲有好多魚油😋 係Omega3既味道😋蟹雜炊 $128成個雜炊都喺你面前煮俾你睇 煮滾咗高湯之後 店員再慢慢加入白米飯同埋其他配料 煮成一個蟹粥，蟹腳已經預先割開左殼 除咗令到更容易食到蟹腳肉 蟹味都可以好好咁樣融入個粥底😌 食到飽飽 有個溫暖既粥落肚 個胃感覺好舒服～青蘋果颱風乳酸 $68白桃玉露 $48兩杯飲品都係餐牌冇㗎🙈 寫左係黑板比我哋偶然發現🤪 冇揀錯👍🏻 我好鍾意青蘋果乳酸🍏係梳打黎 飲落好爽 仲好有造型㗎🤣 白桃玉露都幾清新 好有台式飲品既感覺 係大部分人都會中意既飲品～…查看更多

趁住聖誕假期周圍搵好野食😋 同朋友黎到依間馬來西亞茶啡室🇲🇾 餐廳入面裝修幾雅緻 有部大大留聲機 幾有時代感🤓 朋友一坐低就話一定要食咖央多士 另外再點咗兩個主食同埋兩杯飲品～椰香南洋燒麵包 $34烤至微脆既麵包內夾住咖央醬同牛油 一啖咬落去 甜甜地同時食到椰香又有牛油味 味道充滿層次🤤 想加多啲邪惡 仲可以另外再加鮮牛油🧈砂煲老鼠粉 $88老鼠粉入面係無老鼠㗎🐭🤪 其實係銀針粉 配上肉碎、魚仔、豬油渣等配料 上面打多隻雞蛋🍳 賣相吸睛🤩 老鼠粉用原個瓦煲上菜 熱辣辣出曬煙 即刻趁熱將配料同老鼠粉撈勻 香味完美咁樣融合埋一齊😮‍💨 老鼠粉唔會煮過龍 依然保留咗爽彈嘅口感，而且呢個主菜份量都唔細 足夠三至四人分享 價錢超值👍🏻👍🏻 怡保芽菜雞 薑黃飯 $68 轉雞髀 +$10怡保係馬來西亞既一個舊街場，芽菜雞就係當地嘅一個代表性食物～滑嘟嘟既雞已經預先去左骨 食落啖啖肉，餐廳採用既雞肉肉質比一般有彈性 而且好厚身 口感一百分💯配上香噴噴嘅薑黃飯 已經係令人好滿足嘅一餐😎 而且價錢都相對親民 自己一個人黎嘆個靚雞飯都唔過份啦😎美祿恐龍 $28聽落好經典嘅飲品 但係平時唔係好多地方有供應 真係好耐無飲過😋 同朋友每人都叫咗一杯，係美祿上面再鋪滿美祿粉 雙倍香濃～小朋友既話一定會好中意依隻恐龍👧🏻👦🏻❤️🦖其實餐廳仲有好多好吸引嘅食物 但兩個人食唔到太多嘢🥺🥺 點餐嘅時候好掙扎應該要叫 燒芝士蛋黃奶油波士頓龍蝦配虎蝦🦞🦐定 芽菜雞🐓⋯⋯ 食完之後覺得自己都係冇揀錯😤 雞高質😤 不過下次都要返嚟再食龍蝦😤😤最後送上餐廳牆上有趣嘅圖畫一張～…查看更多

一般串燒店通常都比較細間 甚至只提供外賣選擇，今日介紹依間餐廳裝修得靚靚仔仔 環境舒適之餘，仲有好多座位～黎緊聖誕新年 如果同三五知己想坐得舒服啲 嘆下串燒，依度相信都會係一個不錯既選擇😌😌如果怕淨係串燒唔夠頂肚 打埋邊爐一定夠飽！我哋叫咗半隻麻辣紙包鮑魚雞做是日主菜～連同gas爐上枱 上面密封左既錫紙包係加熱後會慢慢吹漲🤣 之後店員會幫你介開錫紙 煲多一兩分鐘 (影相時間📸) 食得！ 鮑魚細細隻都算彈牙 仲有好多麻辣鍋必備配料 萵荀、蓮藕、木耳、芽菜等等 🤩 辣度方面 我哋點既小麻小辣唔算太辣 如果食得辣嘅人 不妨挑戰更高級數呀🌶️🌶️🌶️🧐餐廳有提供不少火鍋料選擇，仲有得分正常定輕量點單 如果人少少又想叫多幾款配料 就要點輕量 分散投資啦⚖️😬邪惡串里秘製雞皮 $48擺得個餐廳名落去都知係招牌菜☝🏻 上菜時仲有少少煙霧效果 舞台效果一百分🤣 雞皮已經煮到完全乾身 咬落咔一聲好似薯片咁脆口 仲食到本身既油香 😋 如果你係重口味食家 仲可以用枱面既孜然粉同辣椒粉再調味～我就加左辣😈😈 效果不錯喔～燒茄子 $48🍆係我食串燒必點既item，曾經自己屋企BBQ都試過模仿 但總係街既好食好多🐒 依度茄子落爆蒜茸去燒 睇相都知一定香口好食啦🤤 不過茄子要燒到軟熟需時 大家要耐心等候一下🤏🏻燒韮菜 $13茄子係勁蒜風味 韮菜就係濃裂既孜然香氣😮‍💨😮‍💨 食落無渣 仲燒得啱啱好 唔會太乾👍🏻汁燒墨魚咀 $28墨魚咀有四大粒 咬落超爽彈有爆汁效果㗎～汁燒牛仔骨$48…查看更多

同朋友放假去食近排幾出名既麻辣風雲😛 餐廳有幾間分店 我地食依間位於荃灣街市附近 上一樓 地方都幾大幾闊落 ～ 餐廳除左食麻辣水煮等川菜 仲供應近年好hit既酸菜魚同螺螄粉 我就初嘗螺螄粉既味道🤣惹味雞軟骨 $38先黎個開胃小食 又真係雞如其名幾香口！有淡淡既孜然香氣又唔會太辣 而且依度雞軟骨有少少肉痴住 有啲肉咬下我幾中意😬😬 係會令人忍唔住夾完一粒又一粒既小食～酸菜魚 $88呢個酸菜魚係午市客飯套餐 睇埋價錢一心以為佢會係一人份量，點知上枱真係哇咗出聲 😱 點解咁大兜既？😨 除左勁多魚片 入邊仲有大量嘅酸菜、好粗好有口感既薯粉、萵筍同菇等配料，兩三個人食都完全冇問題～ （笑死 仲有碗白飯🍚🫢）除左份量取勝 味道都好出色😋 點餐時先按照個人嘅口味 選擇酸同埋辣既程度～ 我哋叫咗小酸小辣 再配合湯底本身既香料，結果好啱我哋口味 有層次既辣而唔係辣到食唔到🥵 魚肉無骨仲好嫩滑 一啲都唔腥 依個餐性價比真係超高👍🏻砂鍋螺螄粉 $48 (配料另加$)螺螄粉係我近年先認識到嘅食物 佢因為喺湯到加入咗螺螄🐚而得名，唔關螺絲事㗎🔩🙊 由於主要材料包括酸筍 令佢有種獨有嘅氣味 鍾意嘅人會好鍾意 唔鍾意嘅人聞到都驚🤧🤧🤣 今日第一次食 原來螺螄粉食落係唔臭㗎！質感好似米線但粗身小小，會比較爽滑～除左酸荀 仲加入木耳 炸支竹 花生等大量配料 大滿足😎 另外我哋仲加配左餐廳推介必食嘅炸蛋 同重口味湯底既絕配：鴨血同埋肥腸～炸蛋嘅外層煎香左 入面就好Fluffy非常索湯 可以吸盡湯底精華，我相信配唔同嘅粉面都會好好食😚 另外兩款配料一啲都冇內臟嘅腥味 處理得唔錯 鴨血仲好滑添！炸饅頭 $36雖然無傳說中既噴煙草船效果😂 但呢個唔係講笑 真係我食過最高質嘅炸饅頭，平時啲炸饅頭好怕佢硬掘掘 但呢個炸完係保持到入邊鬆軟嘅口感 脆皮只係好薄好薄 但已經滿足到想食炸嘢嘅心～（瘋狂點煉奶中🥛）椰汁冰 跟餐+$18花冰蜂蜜綠茶 跟餐+$18食咁多濃味野 唔叫杯飲品真係搞唔掂😩 朋友既椰汁冰有超濃椰汁味～ 花冰蜂蜜綠茶上面放咗有乾花既冰 賣相幾靚，溶到一半嘅時候吉碎啲冰 即刻變成蜂蜜綠茶沙冰🤤 配啲重口味食物仲零舍清新～…查看更多