ChingYiChan的個人專頁

滷水汁好香，香到食完剩返個盒都仲覺得好香。唔係普通街市檔滷水雞翼嗰種味，而係層次好豐富，帶少少微辣，相信係老闆娘自家秘方（？）試過豬耳、雞翼、腩肉。豬耳好入味，滷到起晒膠質，係我食過最好食嘅滷豬耳，軟骨係爽嘅，好好咬。雞翼同腩肉都好香，再入味D會更好。試業中，加油，感覺係好有心嘅小店，下次再試埋佢地嘅飲品同其他便當。…查看更多

嗌咗擔擔湯+刀削闊麵+鹽酥雞一食好驚喜，冇諗過咁好食！！擔擔湯好濃，好香麻醬味，仲有得揀辣度。食完個麵我仲飲咗幾啖湯，好好味。麵條都中上，有咬口又唔會太韌。滷蛋中上，唔會太乾又夠味。肉燥好食，夠味夠香又唔會太肥，但又唔鞋烚烚。鹽酥雞中上，外皮夠脆，肉唔算嫩但唔鞋，食完唔會好口乾好涸喉。唯一係調味鹹咗少少。飲品揀咗跟餐珍珠奶茶，好香茶味，仲有幼滑嘅口感。珍珠都中上，有咬口香香地，唔係得舊粉。呢間舖頭嘅台式飲品係認真嘅，唔係跟餐就求其沖杯嘢嚟hea你，係真係可以攞出去賣嘅質素，但佢跟餐仲要唔洗加錢，真係良心價😂埋單$58，真心覺得好抵食，每樣item都滿意又夠飽，其實佢賣貴$20都仲得店員仲好好禮貌，雖然座位窄坐得唔係咁舒服，限時又有d短，但咁嘅性價比真係完全唔會令人唔開心！整體嚟講，感受到老闆係識食嘅（因為好多時出街食飯都心諗個老闆係咪冇味覺，咁嘅質素都攞出嚟賣），而且亦都有心去提供好嘅食物同service俾客人。食完好滿足，嚟開西灣河一定會再幫襯！…查看更多

第一次食，試沾麵。沾麵$148蛋$15無糖可樂$25首先要講佢個湯真係好味，好濃厚嘅魚味，而且冇一般豚骨沾麵咁漏。麵係好似台式關廟麵咁，好食，好掛湯。蛋煙燻味好出，但相對地醬油味唔出，係新奇同幾好食嘅。跟住到扣分位。麵冇得揀份量，女仔食一碗好～飽～如果有得揀份量就好。湯裡面有少量切粒嘅魚肉，豬肉，洋蔥，但真係好少量，以呢個價錢嚟講性價比太低。與其用乾冰鋪底標住煙靚靚咁出場，不如用d budget加多幾粒魚肉。豚肉個樣同味道都同港式燒味嗰種燒肉冇分別。雖然呢間舖頭係sell魚，但一係唔好放豚肉，一係俾d誠意整得好味d有特色d。另外就係飲品價錢太貴，可樂一罐都要$25。個人認為食拉麵係必須有飲品refresh吓口裡面嘅味道，先至唔會越食越漏。飲水都得，但冇有味飲品咁有效。而且店內冇酸菜之類提供，只有一舊青檸同一堆炸蒜酥可以轉吓口味，所以就更容易越食越漏。（炸蒜酥好食！）最後係服務好，員工細心有禮。門口嗰位妹妹店員好體貼咁逐個客人提醒小心有兩級梯級。的確嗰個位一轉身就可能唔為意叉錯腳，仆親嘅話都幾應，希望遲d會裝返個欄杆。總結：好食但性價比太低，未必會再嚟。…查看更多

第一次嚟食，真心好食，但有d嘢好重要，寫俾第一次食嘅人睇。本人嗌咗一個黑豚肉沾麵，有以下感想：1. 唔大食嘅女仔揀100g麵就夠！本人係偏大食嘅女仔，原本諗住100g嘅話即係同個大cup noodles size差唔多啦，就算加埋水，佢又有餸，咁100g都夠食啦。但落單時店員話100g比較少，正常份量係200g，咁我就改番做200g。後來真係食咗一半就食唔落...2. 正常地重口味嘅人嗌淡汁就夠！本人一向自問重口味，食親拉麵都鍾意有咁濃得咁濃。但呢個濃汁堅係好漏同好鹹，連我都carry唔起。原本我睇食評話個汁鹹同漏，仲心諗「沾麵係咁架啦」。但如果你只係正常地重口味，應該都會同我一樣carry唔起。呢點希望店家都會睇到，香濃同鹹係兩回事，冇咁鹹嘅話就會多d人飲埋d汁，唔好嘥咗個咁香濃嘅汁。（我聽側邊每枱人都話唔加雞湯，覺得有d可惜。而我本身都食唔晒，當然冇加）另外，麵有麵條香味，豬肉都有燒過嘅香味，油脂好正。筍爽，好食。蛋入味，不過略鹹。特別一提我碗黑豚肉沾麵，放喺麵上面嗰三片肉好好食，係值得加嘅。yam咗汁多咗陣醬油香仲好味。不過因為片肉本身已經有足夠鹹味，食到中途就已經唔可以再yam汁，會鹹死。其實嗰三片肉油脂咁豐富，唔落調味都得，由得我浸汁嘅話我會仲開心。至於本身浸喺汁入面嗰d角切豚肉，一開始食覺得有燒過嘅香味，d汁嘅味入晒去，好好食。但越浸越鹹，又或者係我嘅味蕾開始疲勞，到後期就唔係太想食。建議店家浸一陣就好撈番上嚟，分開上或者放麵上面會好d。總括嚟講，雖然偏貴但可以翻兜。麵好食豬肉好食配料好食汁好食，下次我會揀淡汁同100g。p.s. 店員好有禮貌，服務態度好好。如果嗰個加一係落佢地袋嘅話我唔介意俾。…查看更多