or#ta66784823的個人專頁

由未搬舖之前已經一路買開，琴日天氣凍想走冰，收銀同事一句：「走冰冇咁好飲，少冰啦！」然後一野就撳咗少冰option，我再次有禮貌地表示都係想走冰呀唔該，佢先唔忿氣咁幫我入走冰。到收錢個陣都相當頂癮，佢話冇散銀所以嗌我俾八達通，咁我都表示有散銀想俾現金，佢就繼續指住部八達通機嗌我拍卡。因為低血糖唔太舒服就坐低飲，該位同事大大聲係客人面前用粗口鬧其他客「荃灣舖好搞笑，好多人嗌走冰，走冰嘅都CLS」期間同其他同事傾計嘅時候都夾雜住粗口，雖然講粗口唔代表冇家教，但咁大個人出黎做野連呢啲基本禮貌都冇真係令人咋舌。以前舊舖位啲Staff全部儀容資整，忙極都唔會咁冇禮貌，該位同事儀容同修養都爭一大截好影響店舖形象。…查看更多

食完飯想食個甜品飲杯啡，之前食過覺得OK加上地點就腳就揀咗呢間。入座落Order有個女仔好Nice咁提我地凳低有籃可以擺手袋，嗌咗個伯爵茶疏乎厘加兩杯野飲。然後有個講野鬼食泥咁嘅waiter不停行埋黎想收走我地未食完嘅野同咖啡，第一次收走野食碗碟嘅時候反應唔切就由得佢，橫掂得返少少，但大概到入座30分鐘嘅，我地杯咖啡仲有1/3嘅時候，佢又行埋黎問我地：「係咪唔要？」我真係忍唔住問返佢：「點解你覺得呢兩杯係唔要？」問佢點稱呼叫咩名仲要唔答，淨係敷衍咁講「唔好意思我睇唔到我唔知」同時間我地後面個檯客人早過我地入座都未走，但就不停淨係騷擾我地，當有限時60分鐘，但我地先坐得半個鐘加上店內有大量吉檯，門口都冇客排隊，請到呢啲員工真係倒米。…查看更多

好耐冇係香港感受到咁好嘅服務態度，仲唔係強顏歡笑，而係真係好Nice好貼心，Staff開頭見到我凍到騰騰震唔好意思出聲話調位，會主動嗌我地調去冇咁凍嘅檯坐，然後仲斟咗杯熱水俾我🥹（野飲係自助㗎，不過未齊人入座所以唔好意思出去斟）今次嗌咗Set C，一開頭會先上頭盤有齊唔同款式嘅肉，俾我地先試咗鍾意邊隻先再Order，啲牛肉都真係新鮮，都冇用強烈嘅醬料醃製，所以食得出牛味唔會食完鹹到洗腎，加返pink salt+炸蒜片已經好好味！炸物都好出色！！真係即叫即炸酥脆冇油臆味，我先生平時對炸物好挑剔都忍唔住嗌咗幾Round😆見到Lunch同晚市都有優惠，加上服務態度咁好+牛肉新鮮！絕對會回訪呀…查看更多

被人呃到試呢間垃圾，嗌咗外賣自取，問個Staff大概幾耐有得拎我可以預時間行過去，個阿嬸勁冇禮貌：「你十分鐘之內好黎了喎。」然後就秒速Cut線，冇提及過任何付款方式嘅野。去到舖頭見到大大部八達通機擺係檯面，就諗住俾八達通，然後個阿嬸又呼呼喝喝咁：「唔收八達通喎，淨係現金。」唔收又擺部八達通機出黎？仲拗堂食先可以俾八達通，外賣唔得。輪到野食嘅部分啦，嗌咗兩份雞都係雞骨居多，得2舊仔五蚊銀咁大嘅肉，重點係死鹹，鹹到要洗腎嘅程度；碗例湯直頭成碗抌咗，鹹海水扮雞湯，間野叫雞味濃唔知係指啲咩呢，不如改名做味精濃啦！…查看更多

見旺角人流密集嘅舖位開咗間Coffee Shop，但長期拍烏蠅冇人入去都知有伏，今日咖啡癮起飲開個間又冇開就試試佢嘩真係聞名不如見面，難飲到講粗口驚中伏已經嗌相對易整嘅Mocha，杯底係肉眼可見嘅可可粉，你冇睇錯我冇講錯，係可可粉，第一次見用可可粉沖Mocha（都可能係我見識少）製作方法咁標奇立異暫且不說，成杯野係冇任何咖啡嘅香味，飲落粉感十足完全就係可可粉溝水嘅味道，飲咗幾啖都係決定唔好折磨自己，請垃圾桶飲算…查看更多