II123的個人專頁

朋友BOOK咗枱食晚飯，第一次落單果陣喺個男人，佢SELL海鮮，我哋唔啱食就話唔要海鮮，同佢講緊要乜果陣就黑口黑面，走前又無覆單，要問佢叫咗幾多樣嘢先答有幾多樣，佢走咗之後我哋自己數下發現佢寫少咗一樣，問佢拎單睇下少咗乜嘢啦，另外叫咗個姐姐補落，但個餸一直都無黎，要追咗三次先成功落到單。另外，我哋有個餸係生菜煲，但上枱果陣變咗椰菜花，我哋問點解係椰菜花，果個男人就話佢改咗椰菜花，係咁問我哋要唔要，係咪唔要，我哋為免比人加料就無換到，真係惡過惡人谷。食物質素大多都可以接受，擺盤係靚嘅，味道可能要睇彩數，朋友話之前去食都唔會好咸，但果晚隻雞咸到食唔到。其他餸菜唔難食，但又唔可以話好好食，只可以話食得落口，但呢個價錢可以有好多選擇，唔需要嚟睇人面色囉。唔會叫佢哋時價海鮮嘅真係要諗下先決定好唔好去。…查看更多

早兩星期同幾個朋友去左一間米芝蓮級(好似曾經係)既京川餐廳食，一食個冷盤就已經火起，所以即時打電話比一個好耐好耐無搵既朋友(真係無事不登三寶殿)尋好食既川菜餐廳，佢介紹左呢間比我。我既生活小區都只係o係荃灣區，要過海真係已經一個挑戰，西灣河對我黎講真係好鬼死Q遠囉。不過食完真係唔會後悔亦都唔會嫌煩怕遠。今天同一個好朋友一齊去，我十二點左右去到唔洗等位就入得，我地叫左個雞絲粉皮、京燒羊腩、担担麵、小籠包、乾扁四季豆。由於我同呢位朋友都唔習慣相機食先，所以只係記得影左兩款，筷子拎起左就唔記得再拎起電話影相喇。見諒見諒京燒羊腩: 係頭尾比較乾，中間好嫩好多汁，聞落有膻味但係食落唔係好勁。不過我個會鐘意再膻D。張相已經係比我地食左兩件架喇，所以人少真係要諗下先叫，如果唔係會食唔到其他野。雞絲粉皮: 唔知係咪我唔好彩食好多間都唔好食(米芝蓮果間梗唔洗講，根本唔係粉皮係木薯粉)，呢碟我食第一啖真係叫左出黎。本來我睇佢個醬汁唔似好濃咁以為會唔夠味，但食落口.....我唔識形容，個醬真係唔杰不過味道就好濃，好香炒花生味。出面太多好似溝左水咁，淡某某水NAIL NAIL咁。担担麵:  呢個比我朋友食晒，我淨係食左一啖，味道試唔得太真。担担麵我鐘意食林D，呢個同我想要既林度差少少。小籠包:  皮夠薄，不過就未算係我食過最好食既小籠包。乾扁四季豆: 呢個菜無論去度邊都係我飛佛黎既，呢度既都幾好，豆走過油，時間唔會好耐豆身唔會乾爭爭，入面就睇到好嫩口下，味道夠辣但又唔會好咸，唔洗送飯都食得晒一碟。最後，仲有個甜品送，呢個真係不得了，我朋友話下次要帶個壺黎裝，蕃薯南瓜雪耳紅棗糖水，本來已經好飽架喇，但試左一啖之後，連渣都食晒，兩條友頂到上喉嚨咁走。呢餐勁滿足，不過中午就食得咁勁，真係會有D唔係幾好意思，可能無好餐廳餓得太耐喇。我一定會再返黎架!!!!!!!…查看更多

約左三個朋友係灣仔食飯，見到呢度有D好大張既卡位，同埋D野食都好似好吸引咁，就咁....就入左去食喇!!先講環境，入到去見到裝修都OK既，同埋發現成鋪都係用卡位，都幾ARM而家時下人鐘意坐卡位，不過我見到有D卡位既坐位有D凹左，唔知係咪俾人坐得多...=.=|| 另外地毯真係要時不時換下喇，太舊仲擺出黎，真係幾肉酸。我見D員工係街出面拉返D地毯入黎，唔知係咪佢地日日洗以至D地毯一個個洞!再講野食，我地幾個都算大食，所以叫左雞絲粉皮、四川香茅乾煸四季豆、四川乾煸辣子雞丁、水煮牛肉、小籠包同埋一個蒜炒西蘭花，仲有個黃金蝦球。雞絲粉皮: 睇落幾大碟，不過D醬少左D，可能因為我地鐘意花生味重D，不過佢地都肯加俾我地，都幾好!四川香茅乾煸四季豆:好香、好野味，送飯一流，不過多油多D，如果可以少油D既，會好D，會健康D嘛!四川乾煸辣子雞丁: 香口，不過真係要趁熱食，等凍左味道差好遠=.=|| 夠麻夠辣聽講仲好似可以加辣添，ARM晒我地幾個鐘意食辣既人，呢個真係值得一試，我見好幾台人都有點水煮牛肉: 呢個比起個雞丁辣好多，可能有汁掛...係幾好味，不過底下既粉皮可能吸晒D辣汁，真係辣到飛天，我地都要食到擦晒汗....小籠包: 呢個OK啦，見到包入面有湯，不過SIZE唔容許一啖食晒，所以食果陣有D難攪，唔小心會流晒D湯。(呢個比起我之前係加連威老道分店食時有進步，皮薄左少許，同埋終於都見到有湯。之前既真係用黎打波都唔會穿又冇湯>_<)西蘭花: 純粹想食個菜而叫，冇乜期望亦冇乜失望，少D油會好D黃金蝦球: 呢個...俾佢玩死....個送一出到黎係好香，香到你引唔到手想即刻食...不過咁樣好易攪到燙親，我就食完一個之後發現口入面有少許甩皮>_<|| 不過又真係幾香口。至於服務方面......咁大間鋪得兩個人做野，仲可以有咩服務要求可言丫，有人肯落單出菜埋單，我都算囉.... 雖然我都見好多地方都請緊人，可能真係難請人啦，不過咁樣都唔係辦法，好難留得住D客....總括: 食完呢餐要飲涼茶，我同D朋友都幾滿意呢一餐。同埋食完野仲可以慢慢傾計，因為客唔多，唔會太嘈，同埋唔會趕你走..…查看更多