味之神的個人專頁

自從此舖位交吉之後，一直等待會否有新餐廳開，最終開了檸檬冰室。雖然本身都有不少分店，但之前都未幫襯過，今次終於幫襯了他們的旗艦店。先講餐廳的裝修，很光猛(因為周圍都係俾鮮黃色包圍住)，整體感覺好似比之前的要大(不過其實都係同一舖位，應該唔會大左)。食物方面，都幾多選擇，有炒粉麵飯、碟頭飯之餘，亦有小菜。今次叫了一個冰鎮蜜桃咕嚕肉、黑松露脆蝦炒蛋飯、凍檸茶及凍奶茶。食物上枱都幾快，先嚟係黑松露脆蝦炒蛋飯，黑松露味都幾香，蝦都爽口，食落口都唔錯。冰鎮蜜桃咕嚕肉，好大碟吓(因為要冰鎮)，將啲咕嚕肉放落去冰入面雪一陣先食，會變得更脆口，而啲肉又唔韌，無諗到茶餐廳都會食到，唔錯。至於杯凍奶茶，飲落口幾香奶味，茶味就唔算太濃。不過凍氣就凍咗啲，好快啲飯餸都變凍咗，需要改善一下啲出風口位。另外個餐牌有啲特別，同一般茶記唔同，唔係傳統的分類，幾新。同埋餐廳啲職員都幾有禮貌，比其他一般茶記有啲唔同。整體嚟講都可以再幫襯，試吓其他食物。…查看更多

好耐無嚟太安樓，所以今晚專登返嚟食宵夜，一來就搵返魚蛋佬。今次買咗兩串魚蛋，一串墨丸，一串牛丸。先講主要的咖哩汁，味道較淡，沒有以前的濃香味亦沒有了以前酸酸甜甜的特別味道，味道同以前相差甚遠，大失水準，而家變得同一般街邊的完全無分別。至於魚蛋，整粒都好硬，無彈牙的口感。牛丸尚算可以，不過都偏硬，反而墨丸咬落去有蒜香味，比較突出。整體嚟講大不如前，跟以前的味道相差甚遠，把排隊的時間花去買其他嘢食更值得。…查看更多

其實呢個都食過好幾次，覺得唔錯。今次叫左一個日式玉子鰻魚飯。先講件鰻魚，都幾大件，同埋個汁都幾香。飯又唔會太多，啱啱好。不過特別一提嘅係，個飯叫左日式玉子鰻魚飯，以為啲「玉子」係日式玉子，不過上枱時見到嘅係香蔥炒滑蛋，雖然食落去都唔太差，不過就唔係太襯個名。…查看更多

尋晚去咗呢間餐廳度食飯，分別叫咗德國鹹豬手，手撕豬肉配墨西哥芝士粟米薄脆，牛油帶子番紅花意大利飯。先講隻鹹豬手，好大份已經切好埋，同埋佢食落唔係太鹹，啲皮都好脆，同埋配埋酸菜食幾好食，仲有啲烤薯仔同埋甘筍，食落去好香同好熱。至於個手撕豬肉配墨西哥芝士粟米薄脆，本身以為唔係好大份係小食，點知原來佢有主菜咁大份。粟米薄脆配芝士食落去好香，啲豬肉食落去鹹鹹地，加上芝士有啲煙韌，配合脆卜卜嘅薄脆幾好食。到過牛油帶子番紅花意大利飯，估唔到反而份量佢係最少，不過食落去都好香，因為好重牛油味。如果兩個人食嘅話唔需要叫呢個意大利飯，淨係隻豬手同埋個薄脆都已經足夠。整體嚟講三樣嘢都幾好食，可以下次再嚟過。不過有一樣嘢值得留意就係，唔知係咪間餐廳嘅設計問題，成間餐廳都好嘈，食客講嘢好大聲，好大回音，搞到好似去咗大排檔咁。…查看更多

今晚想食煲仔飯，不過工廠區唔係太多地方有，行過經過見到廣告牌有得食，於是入去試吓。選擇係幾多，叫了個北菇滑雞同滑蛋牛肉，仲有個魚皮。先講魚皮，有啲咬口，都幾爽，同埋唔算太辣，都ok。但至於煲仔飯，兩個都超唔得。首先啲雞唔滑，又韌，同埋超重雪味。而滑蛋牛肉，隻蛋係預先打咗落煲飯入面，蛋黃都熟埋。不過最唔得嘅係啲飯，一來面層啲飯太淋，但煲底啲飯又好似未煲熟咁，啲米仲好硬，而且又無飯焦，所以整體嚟講超唔得，亦唔會有下次。…查看更多

今晚外母生日，與以往不同，一嘗新派中菜。先講環境，坐得舒適，同一般酒樓不同，感覺似食西餐，同埋有bar枱，睇住廚師煮，幾特別。頭盤係幾款小食，分別有「崧仁菠菜酥、桂花叉燒、洛神花山藥」。三款味道都唔錯，特別係桂花叉燒，食落去好香口。跟係到「杉龍蝦桂花沙律」，用左甜筒做底，裝住啲沙律，上面有大大嚿蝦肉，仲有一塊小金箔，幾貴氣。同埋個甜筒夠脆，唔錯。之後到「松茸櫻花燕窩」，個雞湯好濃味，同埋都好多燕窩，加埋松茸落去一齊飲，更加香。下一個係「蟹砵南瓜花金沙」，入面有成隻軟殼蟹，仲脆脆地，幾好食。再一下個係「禪衣龍躉菊花度小月」，這個食落去嚿魚都算新鮮，不過就唔係太特別。然後到「和牛面頰薰衣草春荀」，嚿和牛面頰好入味，同埋唔會好淋，覺得係全餐嘅重點。再下一個係「蟲草花雪裡芹白玉珠」，白玉珠其實係冬瓜波，唔係太有味，反而啲蟲草花就幾好食。跟住到「鴛鴦蚌蒜花椒淮山麵」，啲麵唔淋，食落去就一般，唔算太特別。最後到甜品「桃膠蝶豆花燉奶」，唔係好甜，都幾清，唔錯。整體嚟講成餐都幾特別，都幾好食，而且每道菜上枱前經理都會埋嚟講解用咗咩材料、廚師點煮同食法，服務幾好。…查看更多

之前已經食過一次，覺得唔錯，見今次諗唔到食乜好，於是決定再次幫襯。今次分別點了法式芝士蝦多士、會安炸春卷及冰鎮蜜糖凍蕃茄。先講法式芝士蝦多士，上枱時仲熱辣辣，而且好香。多士表面佈滿芝麻，咬落口好脆，同埋啲蝦膠好彈牙，正！而會安炸春卷，入面都幾足料，好多粉絲，都唔錯。最值得推介係冰鎮蜜糖凍蕃茄，本身無諗住叫，不過老婆話想食，所以先叫，而我本身對佢無乜太大期望。反而佢一上枱時，有一種眼前一亮嘅感覺。因為我未食過，唔知佢個樣係點，原來佢係一個已經剥好皮的原個蕃茄，表面淋滿晒蜜糖，切開食落口時好甜，而蕃茄又多汁，唔會覺得因為太多蜜糖而漏得滯，值得推介的甜品！…查看更多

韓式炸雞成日都想食，但係都無機會試，今次終於去食。今次分別叫左初雪薯片、雙重滋味無骨炸雞同明洞小食派對。先講每款食物份量，款款都超多，得兩個人真係食唔晒。初雪著片食落幾重芝士味，每塊上面都好多芝士粉，幾濃味，不過就唔係好夠脆。而雙重滋味無骨炸雞，全部都好大嚿，而且啖啖肉，又唔靭，同埋甜酸醬嗰款幾好食，甜甜哋幾開胃，而芝士味方面就乾身左少少，不過都唔錯。至於個明洞小食派對，款式幾多，有魚蛋串、炸年糕、酸菜、紫菜飯卷等，而且每款都幾多件吓。整體都幾好食，可以再幫襯。…查看更多

今晚想食日本料理，經過見到這間食肆的易拉架，見到食物好似幾吸引，於是入去試吓。一入到去，成間餐廳空無一人，晚飯時間都無人幫襯，心諗會唔會間餐廳唔多掂，但個心又想試吓，所以最終都決定選擇「包場」。職員招呼唔錯，未打開餐牌已經有餐前小食奉上。分別點了銀鳕魚西京燒定食、滑蛋吉列黑豚定食、燒白鱔串燒、雞胸軟骨串燒及玉子燒。首先銀鳕魚定食，魚皮好香脆，而且魚肉好滑，唔腥，同埋無雪藏味。而滑蛋吉列黑豚定食，啲蛋淋喺豬扒上面，但啲吉列皮都唔淋，仲脆，不過食落去就覺得同普通豬扒唔係太大分別，不過不失。至於串燒方面，燒白鱔幾正，啲魚肉有啲彈牙，同埋塊皮幾煙韌，而雞胸軟骨串燒好食，咬落去爽口，雞肉又唔「鞋」，串燒值得推介。而份玉子燒就幾大份，上枱時仲好熱，有煙出，而且中間都幾多魚子。總括這間餐廳值得再幫襯。…查看更多

經過這間餐廳好多次都冇一次去過， 今次終於 訂到位。首先選了幾款小食，薯條、炸雞、大腸特炸物都熱辣辣，同埋好香脆。然後上了蟲草花燉湯，盅湯無味精，同埋都幾清甜。跟住到魚生刺身，同普通的放題刺身不同，這裡的刺身比較厚同大件，特別係帶子同蝦，好甜。然後到酸菜魚，這個強烈建議大家必試，原本我都無咩特別，只見成日喺出面都係食雞煲，於是就揀了酸菜魚食，魚肉好嫩，唔「鞋」，同埋最正係已經吸收咗個魚湯嘅薯粉，超彈牙同入味。食完酸菜魚之後，就到海鮮拼盤，分別有鮑魚、蠔、蟶子、蜆、魚同蝦，樣樣都好新鮮，特別係隻大蝦，真係好大隻，同肉身都彈。之後到任食的牛肉，有好多唔同款的牛肉，同有好多唔同部位，全部都好新鮮，而且好香牛味，全部都好好食。總括成餐真係唔錯，絕對值得再幫襯。…查看更多

本身打算找一間靜靜的餐廳，兩公婆食一餐平安夜晚餐，又諗唔到食乜好，最終決定了去食日本料理。一入到去，餐廳位置寬敞，唔算多人(相信係因為位置問題)，坐得幾舒服。打開餐牌，都幾多不同款式的料理，分別叫了炸魷魚圈、燒花魚一夜干、牛舌串燒、雞肉大蔥串燒、雞軟骨串燒、浜燒海鮮拼盤、刺身拼盤、壽司拼盤及抹茶汽水。炸魷魚圈不算好突出，不過上枱時都燒，以及都做到外脆內軟，尚算不俗。至於燒物方面，燒花魚一夜干的魚肉食落都幾滑，啲魚皮都脆，同埋都唔多骨，而三款串燒都唔太特別，不過牛舌就略嫌硬咗少少。到海鮮方面，浜燒海鮮拼盤由專人在面前主理(不過我鍾意自己燒多啲，雖然應該唔及專人燒得好，但勝在自己燒，好似有得玩咁)。這個拼盤的海鮮有大扇貝、鮑魚、蜆及蠔，而且都幾新鮮，食落時好嫩滑，同埋啲汁好香，好好味。刺身拼盤方面，件件都係厚切，而且好新鮮，唔錯。整體嚟講今餐的食物唔錯，再加上環境舒適，可以再試。…查看更多

之前已經到這裡食過一次，覺得幾好食，價錢又唔貴，於是今日再encore。今次分別叫了一個原隻德國脆皮鹹豬手配意粉跟蒜蓉牛油蘑菇汁、黑椒薄燒牛舌飯伴糖心蛋及椒鹽炸粗曲薯條伴黑松露芝士汁。先講隻德國鹹豬手，真係超大隻，而且皮脆肉嫩，食落去唔算好鹹，啲肉都好香，而個蒜蓉牛油蘑菇汁都唔錯，配埋豬手嚟食幾好。而個牛舌飯，有啲和風感覺，牛舌因為係薄切，所以唔韌，反而啲芝士濃咗少少，變得唔係太重牛味。最後到個炸薯條，真係即炸即上枱，而且係粗薯條，食落去外脆內軟，點個芝士汁嚟食唔錯。整體嚟講係一間唔錯的小店，而且老闆娘好友善，對客人好有禮，雖然間舖就無乜裝修，但以食物同價錢嚟講，佢都算幾抵食，值得推薦…查看更多

成日經過駿業街熟食中心，今次終於入去睇吓有咩食。入面其實都幾多食店，見到這間「五月食堂」，個餐牌同門面都幾吸引，於是入去試吓。先講店舖裝修，一定唔係五星級，但同以往去過啲熟食中心食肆唔同，呢度個環境都算幾乾淨。一入到去，相信應該係老闆娘，服務很好，馬上遞上餐牌，見到都幾多選擇，分別叫了個燒春雞餐、無骨咸豬手意粉、鹽燒多春魚同天婦羅軟殼蟹。落咗單之後，即刻送上兩碗湯同煎餃子。碗湯都幾清甜，而隻餃子就正常。，到個正餐方面，隻燒春雞啲肉都幾嫩，同埋都幾香，薯角就熱辣辣，個蒜蓉牛油鮮檸檬汁用來點薯角食其實都唔錯。而無骨咸豬手意粉，啲肉食落好香，皮好脆，唔韌，正。小食方面，鹽燒多春魚又係好脆，而且唔算太鹽，幾好食。天婦羅軟殼蟹就幾大隻，點上沙律醬唔錯，再加上伴碟的生洋蔥一齊食，味道會變得更加濃。整體嚟過間餐廳唔錯，可以再來一試其他食物。…查看更多

本身見到都有幾多正評，於是打電話去訂位，一接通電話，話想訂位，咁好正常食店實會問你日期同時間，當我一講日期，時間都未講，食店就即刻話：得喇，唔駛訂位，walkin實有位。（其實應該聽到呢句之後都覺得怪怪哋，打電話訂位咁多次，第一次聽到咁嘅回覆，一般餐廳就算知道自己個場唔爆，都好少咁講，點都會扮吓嘢幫你訂，佢咁嘅回應即係同客講自己唔多人幫襯。）當晚入到去，個侍應啲態度都已經麻麻，真係覺得一般茶餐廳仲好過佢。個場裝修係幾特別，不過坐得一啲都唔舒服，張枱矮，鐵桶凳，超硬。打開餐牌選擇唔多，於是叫咗個2人套餐，帆立貝同真雪花牛。講到食物，其實都好普通，無咩特別，就算個雪花牛食落口都無肉味。到埋單嘅時候，當然係舉手同侍應講埋單，一般餐廳都會拎張單埋你等你俾錢，但呢度嘅回應係：得喇，出嚟收銀度俾啦，咁樣同茶餐廳真係無分別。不過分別就係，我今餐成千二蚊，但係佢嘅服務仲衰過茶餐廳，而且仲要加一，真係完全唔明喺零服務之下，連俾錢都係自己行出去俾，咁多仲要俾加一服務費，呢間餐廳真係完全唔得，建議大家真係唔好去幫襯，以免中伏。…查看更多

都有一段時間無寫食評，今日入開上水整車，於是就搵吓呢頭有咩好食。老婆知道我在上水，就即刻介紹我嚟呢間雞湯麵。一睇餐牌，有好多唔同款式的雞湯麵，見到有芫荽雞湯麵，諗都唔駛諗一定叫呢個(因為我超鍾意芫荽的味道)。湯麵好快就到，一上到枱，真係名符其實，因為成個湯碗都佈滿芫荽，啲芫荽嘅數量應該仲多過打邊爐的芫荽皮蛋湯。上枱嘅時候已經聞到超濃的芫荽味。首先即刻夾左住芫荽來吃，啲芫荽食落好爽脆，同埋亦都無浸淋，食落口唔錯。然後就入咗啖湯，個雞湯亦都真係好濃，飲落幾鮮甜。而啲雞嘅份量都好多，起碼有成七至八件，而且啲雞肉亦好滑，同埋啲雞本身都好好味(餐廳會有碟豉油俾顧客食雞時用，但相信就咁食已經好正，無豉油都絕對無問題。平時食麵都好少會飲啲湯，但呢個雞湯真係好濃，最後竟然成碗飲晒。整體嚟講，這碗雞麵真係正，唔怪得6點幾都未到晚飯旺嘅時候都已經坐在好多客，而且店外等外賣亦都超多人。如果鐘意食米粉或者米線嘅朋友可以試吓，相信會比麵更加入味。完全值得推介，可以再嚟食過…查看更多