YYmanc的個人專頁

石門近期有唔少新開嘅餐廳，不過我對大型連鎖店興趣不大，最吸引我嘅係探索有自己特色嘅小店。咁啱今次食嘅串串川正正乎合哂我嘅口味，有特色、有人情味、有誠意、最重要係超好味！環境餐廳嘅位置有限，所以我同朋友一齊坐吧枱，坐得都舒適，因為下午兩點左右，有啲陽光照入黎都幾寫意，同埋店入面係自助落單，亦冇催落單，啱晒選擇困難症嘅我慢慢諗食咩。食品：本來想叫個至尊新鮮牛肉麵，不過啱啱賣晒，所以就問老闆有咩推介，老闆推介我哋食漢堡同埋豬面肉米線，所以我就叫咗漢堡、麻辣雞米線、仲叫左個牛栢葉小食！我朋友細食啲就叫左豬面肉米線！牛栢葉小食（小辣）：牛栢葉切嘅厚度同面積啱啱好，食落好爽口，份量同口感十足。 調味嘅蒜香唔會重味到搶走本身隻汁嘅味道，隻汁酸中帶酸甜之後辣感再慢慢出，最後餘韻帶住啲麻。勁香脆鮮肉漢堡（雙拼：秘製沙津醬+秘製香辣）：老闆見我地唔知要咩醬好就建議我哋試吓雙拼（老闆超好人）。依個漢堡係我極力推薦大家一定要試！絕對係誠實之作！漢堡嘅包皮有煎過，令外層更香口秘製香辣：肉餅嘅外皮勁脆香，但同時又可以保持到肉餅內層鮮甜多汁，外脆內軟，香辣鮮甜（應該係100%新鮮豬肉嘅威力。 秘製沙津醬：超多醬，沙律醬令到漢堡更Juicy! 小朋友應該會更愛秘製沙津醬，不過我個人更愛秘製香辣！依個漢堡唔止反映到餐廳用料新鮮上乘，仲睇到廚師烹調嘅功架！外脆內軟真係食到我好讚嘆，絕對遠勝其他以香煎肉餅作招徠嘅餐廳！大推！！麻辣雞米線（小辣）麻辣雞表面煎過所以浸住湯水食落都好香口，湯底嘅味道好豐富亦都唔會油淋淋，香辣少麻，食落更唔同其他餐廳嘅味精湯，明顯老闆花足心思去處理過。另外夾左朋友order嘅豬面肉試吓，口感煙韌，而且咬多幾啖肉味會越咬越香。米線嘅份量同軟硬程度啱啱好。古法宮廷酸梅湯：甜酸嘅程度飲得出係真材實料，而且十分解渴，配埋米線嚟食又可以解辣！必點！Ps.食完依餐真係好開心，可以feel到小店嘅用心，烹調嘅方式一啲都唔會馬虎，而且店員同老闆真係親切友善，仲好風趣！最後一定要再點名讚賞多次個肉餅！絕對係世一！…查看更多

係香港，我最鐘意就係掃街！香港小食別具特色同代表性。係海外想食番呢啲小食都唔容易。所以我真係忍唔到一次過買哂想食嘅小食，細路仔先揀，我！全！部！都！要！細細個係讀書時期已經成日食。聽聞都好多年歷史。臭豆腐我最愛。厚實又有d脆嘅臭豆腐，加埋豆瓣醬同甜醬好食，仲可以自選加其他7種調味粉。韭菜豬紅蘿蔔豬腸有意外驚喜嘅韭菜豬紅蘿蔔豬腸， 個湯底有小小胡椒豬肚湯味， 豬腸無豬腥味，豬紅同蘿蔔亦好入味，寒冷天氣食完有溫暖嘅感覺，而且好大碗十分抵食碗仔翅好足料嘅碗仔翅，除左一般常見嘅材料仲有竹芛，加埋麻油胡椒粉同醋真係好香！醋味啱啱好，唔會太酸到蓋左其他味道。烤魷魚燒嘅時候已經聞到好香魷魚味，魷魚唔太靭又有咬口炸脾個炸脾好似塊面咁大，炸得好夠脆！魚蛋燒賣魚蛋係陳皮魚蛋，燒賣係金龍/60士多個種味道同口感。來貨都幾好。炸大腸好乾淨，不過我地放耐左😢。煎釀三寶勁大件，好飽肚。佢哋個辣菜圃餃幾好食！炸西蘭花又好有特色。樣樣小食嘅size都幾大，有種姨姨想將你餵飽嘅感覺🤣🤣🤣。…查看更多

重口味串燒之選。我係好鍾意食串燒送啤酒嘅麻甩人。重口味嘅串燒，重蒜重辣就最啱送啤酒！喺深水埗搵到一個方便就位嘅地方！呢間串燒燒得唔會太燶，調味重口味得來，又保留到食物嘅味道。尤其是係肉類，外層燒到好香口，咬落去仲有肉汁！我最鍾意佢嘅茄子，又Juice又蒜味。雞軟骨夠脆、雞腎夠爽、魷魚夠鮮甜。冬菇都好juice。串燒來講，上菜速度都算快！食完一串下一串都到！整體嚟講，都算高水平。一路送啤酒一路吹水就啱呀！…查看更多

自從冇咗程班長之後，我就只可以寄情於阿木台灣麵。平時去食台灣麵排隊排到癲，晏晝四點幾就可以直接入去食啦。唔使排隊真係好開心。我哋兩個女仔下午茶，所以淨係嗌左一個麵一個小食同嘢飲。估唔到佢個面都真係大大碗，好鬼飽。麻辣牛肉麵雖然係麻辣不過唔太辣，啱唔太食得辣嘅朋友，而且我好欣賞唔會俾個麻辣搶走咗台式滷水汁嘅湯味。如果真係想食辣d，枱面上都擺咗麻辣醬，可以自己加，好人性化。牛肉好「淋」好嫩好入味，碗麵好足料，牛肉多又大份，啲牛肉多到我都嚇親。十分抵食。白桃四季春我哋揀咗微甜，好鐘意佢唔太甜，唯一嘅甜味係本身白桃嘅甜味，唔會搶走四季春嘅茶，仲有粒粒嘅白桃食。鹽酥雞如果炸得再脆啲就好開心啦！枱面上亦都放咗鹽酥粉，啱晒呢啲重口味人士，唔夠味自己㗎。…查看更多

我最喜愛嘅泰式餐廳之一。係海外工作成年無食過泰國嘢，一返嚟即刻幫襯佢。未講嘢食之前，一定要講吓佢嘅氣氛。原來每星期都有駐場嘅歌手，自彈自唱。最犀利係仲可以點唱！令到成個氣氛昇華！好懷念佢嘅咖哩，嗌咗個泰式咖喱炒蜆。啲蜆大大粒新鮮又好食。不過今日個咖哩就粉左少少。後尾走嘅時候同老闆娘傾偈，講起先知原來廚房師傅放假。老闆娘好開明，佢話會同廚房部講吓。海外亦都冇生蝦同埋炸蝦餅食。生蝦大大隻，又新鮮又爽口，加埋蒜蓉片同辣椒片，點埋佢個酸酸辣辣嘅汁，真係好好食！蝦餅大大嚿，好鍾意佢個醬汁。不過呢期唔知點解粉咗少少。老闆話會反映下。…查看更多

呢間係我第一間食嘅黃店酸菜魚，佢嘅酸菜魚價錢都好平嘅！嚟到都排咗半個鐘隊。佢個湯都係夠濃，酸麻辣味都足夠，魚片都好多，魚片冇之前嗰兩間咁滑。佢嘅味道有家庭式啲嘅感覺。好可惜嘅係好似冇得嗌米線同埋薯粉，得河粉。相對地冇咁夾。如果可以有返米線同埋薯粉嘅選擇咁就好啦，再唔係簡繁都係一個好選擇。最印象深刻嘅係佢嘅嘢飲，我係叫咗圓玉杞子蜜，好足料，好好飲！仲可以拎走添。仲有佢嘅炸蝦多士，都炸得好金黃，夠脆，有蝦味。都值得一試。…查看更多

龍城冰室不嬲都係我嘅最愛。佢嘅常餐同早餐嘅沙嗲牛肉麵、炒蛋各樣不嬲都好好食。佢嘅存在完美抵抗到藍店同紅店嘅茶餐廳。好可惜新界牛冇分店。🥲龍城嘅酸菜魚性價比最高， 70幾蚊一個晏晝對於九龍區來講都算係咁上下，送湯、嘢飲同埋跟白飯。佢嘅酸菜魚酸味、麻辣味道足夠，麻味後勁會勁少少。要值得一讚嘅係佢魚片夠滑，仲以為好多塊魚片。我淨係將啲湯攞嚟撈飯食，都食晒成碗飯，真係好好味，一個人食真係好飽！絕對可以再返嚟encore！…查看更多

前嗰排瘋狂食酸菜魚，因為好鍾意酸酸辣辣嘅味道，加埋啲滑脫脫嘅魚真係好正！朋友介紹咗我食呢間就去試吓。講真佢個酸菜魚係真係幾好食，麻辣味都夠，魚夠鮮滑，仲要係黃店，所以食得好開心。佢最特別嘅係可以揀辣度，要幾辣幾麻幾酸都得。酸菜魚有薯粉跟，如果要大份啲可以再加錢。炸饅頭都好好食，點埋煉奶就一流啦。麻辣拼盤就真係唔夠麻同辣。嘢飲呢就係佢最失色嘅地方，全部都好似溝糖水咁🤣🤣🤣如果真係要飲嘢，可能最穩陣嗌番可樂嗰啲。…查看更多

心血來潮想體驗一下hightea，我比唔起咁貴嘅錢，google search到一間平民high tea !要早一日或之前去餐廳度book位。個英式下午茶餐包左一層嘅鹹點、一層嘅甜點、兩杯指定嘢飲。佢上餐果下真係嚇親我，實在太華麗啦啲乾冰！整得好靚！整體而言，甜點同鹹點都好好食，味道都係做到剛剛好。鹹點方面，我鍾意佢個多士同埋Parma ham！甜點我鍾意佢嘅拿破崙，同埋海鹽雪糕！不過略為失色嘅就係佢嘅嘢飲，佢嘢飲實在太有藥水味啦🙈…查看更多

話說我每次去葵廣都一定會去呢一間，因為佢性價比好高，疏乎厘pancake都真係整得好食，但係我每次都會唔記得咗影相，急急腳就食咗落肚。今次終於記得啦，我叫嘅係奶黃不奶共，簡單來講呢成份就係奶黃同埋鹹蛋黃。呢個味暫時係我食過最好嘅味道，因為佢又好重嘅奶黃味，仲有好重嘅鹹蛋黃味，咁嘅情況之下都仲食到疏乎厘pancake嘅蛋味。加埋個雪糕一齊食，冰火兩重天，真係好好食。而且佢仲係好有理念嘅黃店！大家一定要去試吓！…查看更多

我同男朋友都好鍾意食串燒，經常會出去食串燒，今次都係第一次用呢個自助形式去任食串燒。佢勝在有冷氣，地點方便！已入到黎坐低，用QR code 落單，佢好快就會上菜，等緊嘅時候亦都可以去拎嘢飲。一串串串燒卡落去部燒烤機度就會識得自己燒。枱面仲有好多唔同嘅調味料，有孜然粉、椒鹽、鹽、照燒醬、柚子醬。我最鍾意食佢嘅雞軟骨、和牛、豆卜、冬菇、五花腩、台灣腸。全部都燒到卜卜脆。五花腩落少少照燒醬，再燒到佢脆卜卜，真係好好食。豆卜就將佢燒到脹卜卜之後，再落椒鹽，都好好食！我覺得自己真係一個出色嘅廚師🤣🤣🤣最尾仲有Häagen-Dazs雪糕送！好滿足。…查看更多

同屋企人行街，想食日本餐，經過見到原來呢間舖頭做緊promote ，好似好抵就入去試吓！我哋叫咗兩個和牛套餐。有漬物、刺身、串燒、清酒生蠔、壽喜燒、甜品。侍應同我哋介紹佢哋會不定期轉換入邊串燒、刺身同埋甜品嘅種類。嘢飲方面我哋加$20轉左moctail 同cocktail ，感覺上飲呢啲嘢配居酒屋比較夾。侍應仲介紹佢哋嘅米酒、果汁係自己整無加糖漿。我點左荔枝氣泡特飲，飲落好青甜，真係唔會太甜，而且好重荔枝味。屋企人嘅藍梅乳酸特飲、同埋菠蘿清酒特調都係清清地。送嘢食一流。我最鍾意嘅就係佢嘅清酒生蠔，似西式cocktail 生蠔，將生蠔加落去清酒度10秒之後食，提高佢鮮味。真係好肥美鮮甜。刺身方面，塊塊刺身都係厚切，而且好新鮮！仲有乾冰效果，仲可以有視覺嘅享受。串燒方面，好欣賞佢嘅菠蘿全消，因為菠蘿面有一層焦糖，酸酸甜甜真係好開胃。壽喜燒方面，加$100可以升級和牛，我哋其中一份加咗$100轉食日本和牛 。和牛會比澳洲牛滑，澳洲牛會比較重牛味。食到尾，啲粉絲朔晒啲牛嘅汁好正！我哋另外仲單點左火炙和牛卷同和牛他他其。和牛他他嘅肉味好突出又好滑！和手卷都夠香。…查看更多

約咗個港女一齊食日本菜，港女朋友話呢間佢食過好好食，所以要介紹我食。我哋晏晝嚟到，叫咗一個晏晝嘅set，網燒西冷牛扒丼。港女朋友仲推薦嗌左，吉列千層豚肉、櫻花蝦炒野菜。然後我哋又再點左汁煮左口魚裙邊、拖羅蓉脆米餅。Well，我真係估唔到原來日本菜都可以咁多變化！成餐飯最令我印象深刻嘅，真係呢一個吉列千層豚肉！！！以前識親啲豬扒包芝士攞去炸，都係炸肉質好鞋。他由於佢用咗豬豚片去代替豬扒，炸出來令到肉質更加滑同埋有肉汁，加埋豐富嘅芝士。呢個真係我食過最好食嘅！櫻花蝦炒椰菜都好出色！有勁多櫻花蝦，好重蝦！重點係我冇諗過日本菜都可以吵得咁有鑊氣！🥰🥰網燒牛扒丼好鬼滑！醬汁偏淡，唔會搶咗牛肉味。汁煮左口魚裙邊口感好豐富！淨係個賣相，都令到我食慾大開。汁煮左口魚裙邊將左口魚燒過再加汁煮，令到左口魚入口即溶又香！拖羅蓉脆米餅口感好豐富！不過略嫌脆米餅搶咗拖羅嘅鮮味。整體而言，正！…查看更多

第一次同男朋友食法國菜，慶祝紀念日。呢間野要提早book定位，佢會介紹當日嘅菜式，係book位嘅時候落單。好鍾意呢度嘅環境，超級寧靜，而且真係可以慢慢享受晚餐，慢慢傾偈。真係覺得book啱餐廳慶祝周年紀念日。以下係我哋嗌嘅菜式。辣肉腸沙律沙律菜配上橄欖、黑醋、辣肉腸，估唔到辣肉腸個味同黑醋都夾到。清新得來有少少鹹香。白酒牛油汁煮蜆呢個簡直係驚喜，白酒牛油汁嘅奶油香配搭上新鮮嘅蜆，再加上香草，好足鮮味。我忍唔住飲咗幾啖牛油汁，不過真係好肥。食到我舔舔脷。我覺得佢同餐包會好夾，好可惜我食完先諗起呢樣野。龍蝦湯依家龍蝦湯絕對係我飲過最好飲嘅龍蝦湯。係會忍唔住一啖有一啖咁飲！佢嘅龍蝦味好出，有浸又香又鮮嘅味道。我飲過好多唔同地方嘅龍蝦湯，個感覺都好化學。黑毛豬扒、燒春雞呢兩個主菜淨係伴碟都好吸引。佢煮得個肉質好好，味道都唔差。心太軟、朱古力慕絲朱古力味勁濃，唔會太甜，真係好怕太甜嘅甜品，呢兩款朱古力甜品就啱啱好！總括而言，我哋兩個人都好滿足，食咗兩三個鐘，渡過左愉快嘅一晚。🥰…查看更多

放假帶媽媽去食飯，佢話想食日本嘢，於是就喺沙田區覓食。喺OpenRice見到呢間嘅Menu好抵食，就決定試吓。我哋嗌左五樣嘢食，四點刺身盛A、黑豚腩燒丼、日式炒野菜、鐵板燒牛舌、芝士軟殼蟹卷。椰菜炒得好入味。勁多菇！刺身有生蠔、三文魚、甜蝦、章紅魚，都好新鮮，尤其係生蠔，加埋佢嘅特制醬料，勁鮮！三文魚好厚切。份量又夠多！黑豚腩燒丼好驚喜，個醬汁同黑豚腩超級襯，有燒烤過嘅味！加埋啲蔥好好味好夾。芝士軟殼蟹卷同牛舌都唔錯。…查看更多