on_kei1015的個人專頁

餐廳位於太平山頂凌霄閣2樓, 餐廳一邊係巨型落地玻璃窗, 可以一邊食一邊飽覽整個維港景色。絕對係一種享受! 餐廳風格係日式懷舊風, 配埋日本經典歌同埋搖滾音樂, 感覺彷彿置身係日本當地既餐廳。 因為唔太肚餓關係, 每人叫左碗叉燒拉麵($98) 同4件三文魚壽司($20每件)。 拉麵湯底係秘製豬骨湯,味好濃郁，叉燒肉質半肥瘦岩岩好, 有唔會太薄身, 份量都ok, 拉麵質感幾彈牙,又唔會太鹼水味。 三文魚壽司食材都好優質，油脂分佈勻渾 餐廳價錢相對較貴, 食物質素都幾好, 但又未算太大驚人, 但價錢當然包左食view, 風景位的確一流! 下次會再黎試多幾款其他料理 店舖門口入口處還設有小賣部,專賣日本紀念品, 因為疫情關係無得去旅行, 係度買下D小禮物可以當去左日本旅行。…查看更多

情人節男朋友搵左依間可以欣賞維港景色既日意fusion餐廳黎慶祝, 位於北京道一號29/F。 一共有2層樓高, 而我地坐左係2樓半圓梳化位, 位置好闊落, 但枱卻窄左少少。因為疫情關係, 依度只有brunch meun,而今日係特別既節日, 就有專為情人節而設既brunch set。 套餐只包左soft drink, 如果要任飲champagne同cocktail要再加錢,不過唔知係咪節日關係,送左2杯champagne。首先係前菜, 有枝豆同miso soup。枝豆帶少少咸就無咩特別, 但份量幾多最後食唔哂。面鼓湯唔咸, 但好重胡椒味, 喜歡胡椒既朋友應該會好中意。再黎就係餃子同石鍋飯。餃子既特別之處係配上山椒粉, 食完條脷會有少少麻,喜歡食麻辣既應該會幾中意。 而服務員上石鍋飯時會幫你攪拌, 份量唔算好多, 味道同韓式餐廳差唔多, 不過食落有少少牛油香味, 唔知係咪用左牛油去煮呢然後就上刺身同壽司併盤, 成個套餐最喜歡依個section。賣相不錯, 每樣刺身都係厚切, 同埋食落幾新鮮。 仲加錢叫左生蠔。味道唔錯, 海水味濃郁, 食起黎幾fresh。 Main course 有4款可以揀2款。而我地分別揀左cheese火鍋同牛火鍋。芝士個款主要係配法包同酸瓜去點醬。芝士腔應該會幾中意, 因為個芝士汁十分濃郁。 牛肉個款就配上法包,一細碟牛肉同酸瓜去點牛肉汁。 牛肉幾稔。仲配有4隻醬去點, 最喜歡左邊個隻, 唔知係咩醬, 酸酸地食落好開胃。 最後係甜品環節, 有個朱古力火鍋, 配料有士多啤梨, 棉花糖, 曲奇(勁甜), 仲有厥餅(口感似啫哩糖唔係煙韌個種)。除了朱古力火鍋, 仲有雪葩同cake。因為本身唔中意食甜, 所以依個section 感覺麻麻，因為真係好甜Overall黎講, 主要食景觀, 打卡一流, 不過食物質素又未至於好驚人,所以2者不成正比。上餐速度過快, 前幾道菜未食完已經到下一道菜, 枱又唔大根本放唔落, 最後要同服務員講上菜慢返少少。 服務員態度好好, 除左會介紹菜式, 仲會主動幫我地影相, 有求必應。 另外背景既音樂好似開party咁, 略嫌大聲好嘈,傾計有D辛苦,講野要好大聲。 依方面比較失色…查看更多

依間餐廳位於大埔墟地鐵站附近。大部份晚上都見好會見到有人係出面等位。鋪面唔算好大，有2 層。依間最吸引之處就係不但有好多菜色選擇，而且價錢係好平民，大部份set餐都係around $60-$90。今次點左2款set 餐。是日餐湯係好清甜既薯仔雜菜湯。係幾開胃，不過我覺得略咸左少少。意大利乾酪雞扒($74)可以配飯／意粉／薯菜。而我今次配左意粉，口感好爽滑，唔乾，仲有d咸味。每碟主菜配有沙律，我係好少可會將配菜沙律食哂，蕃茄仔都好鮮甜。個雞扒超級推薦，外皮煎得脆脆的，內裡好juicy, 肉質好嫩口。佢配既乾酪醬味道酸酸的，成個感覺唔會好肥，好油。法式紅酒炆牛尾($80)醬汁夠哂濃稠。撈飯食一流，十分開胃！個牛尾炆得岩岩好，十分鬆軟同嫩口，最重要係骨肉分離！總體黎講，好少可有咁高質既平民西餐廳，食過一定會再翻兜。…查看更多

依間新開韓式cafe係時代廣場，位置好方便。 環境以淡木色為主調，幾有文青風格，俾到一種好清新既感覺。黎到依度食dinner, 叫左一個二人晚餐 set 加 厚蛋三文治。個套餐有韓牛或黑毛豬揀,我地今次試左黑毛豬。二人黑毛豬套餐($448)比我地想像中大份，下面有個爐熱住，裡面有黑毛豬五花肉，炸雞，年糕，每樣份量都好多。仲有一舊好厚既芝士漢堡扒，上面鋪左塊好邪惡既芝士。底部係d泡菜同芝士。全部都好邪惡，但好好味。另外套餐仲可以配塔2款主菜，聽講依度主打蛋包飯，所以揀左牛肋骨蛋包飯同埋炸豬里脊扁意粉。原條烤牛肋骨蛋包飯成個牛肋骨d肉已經幫你切好一舊舊，好貼心。醬汁有d似紅酒燴牛尾，好入味。口感唔錯，好似食緊叉燒。😂另外就係令人期待既蛋包飯。一上菜時店員會幫你𠝹開蛋皮，一切一反，嫩滑半熟既蛋漿就會流出黎，見到都流口水，飯係泡菜炒飯食得好開胃。極上炸豬里脊扁意粉個炸豬里勁好食，外皮好酥脆，食到有d胡椒味，味道有別平時食開既炸豬扒。韓式厚蛋三文治($68)另外一款既熱門主打，個三文治會切開成2份。個蛋真係超厚，嘴唔夠大無法一口咬落去。中間夾既係玉子蛋，塗左一層薄薄既甜芥末醬，仲有淡淡既蛋香味。同埋依個蛋治真係超飽肚，食左一細舊已經覺得佔左半成胃。我地總共4個女仔，一個set 餐加2 份三明治已經勁飽肚。係底食之選！…查看更多

第一次品嚐湯咖哩同男朋友係鰂魚涌食晚餐， 係太古坊附近做晚市既餐廳唔算多， 咁岩俾依間北海道料理店吸引左。外觀望上黎好似一間文青風格既cafe 店。而裡面係日系淺木色裝橫，牆上仲畫左色彩繽紛既北海道地圖。係一間好清新而又有日本地道風格既小店。裡面既枱唔算好多，但唔會覺得逼，好舒服。細問之下， 原來依間係由一對日本夫婦開既， 周圍好多枱都係日本人食客，𣊬間仿似黎左日本食野。我同男朋友都有選擇困難症，望左餐牌一陣子，而老闆娘就好親切同我地介紹左唔同特色既餐，佢會話如果想食得健康d可以揀咖哩湯/蔬菜鍋系列， 如果想share 又想飽d 就可以揀吉列豬扒，勁有耐性介紹左唔同系列。最後我地揀左一個湯咖哩同花魚set dinner，配有前菜同飲品。前菜係薯仔泥沙律，有種好fresh 既感覺。主菜係豚肉湯咖哩我本以為係好濃郁既咖哩汁，但原來係好清甜既湯，唔辣，有別一般既咖哩飯。食落去唔會覺得好肥膩。旁邊仲有一張卡仔介紹食法，十分窩心。湯內既配料都好足，有南瓜，茄子，蘿蔔，薯仔，西蘭花等，全部都好淋，連湯一齊飲好易入口。個湯撈飯食，勁開胃，個飯會好快食哂，仲會好想加飯！第二款set係花魚配飯，係是日晚餐黎。條魚煎得岩岩好，唔油膩，唔多骨，調味適當唔會太濃味。都係配一碗白飯。成個set都算清淡。如果覺得太dry, 個白飯另外仲撈左個湯咖哩，都一流！整體黎講，不論環境，員工服務態，食物質素都好滿意，推薦！…查看更多

聽講joomak係一個中西日韓國fusion 菜，仲有得食素，所以黎試下。裡面環境唔錯，如果好彩可以坐到窗邊位仲可以欣賞到超級維港景色。我地total叫左3款菜色。首先係健康藜麥沙律($128)依款沙律幾推介，唔知係咪落左麻油，有別其它酸酸甜甜既沙律， 但食落好開胃， 好香。上面鋪滿藜麥，有芒果，都幾甜。然後就係韓式辣豬肉4度冷麵（$168)岩岩上菜個下真係勁有仙氣可以選擇2種汁黎塔配，分別係薑柚豉油汁同傳統豆花醬汁。而我地揀左傳統豆花醬汁試下。個味好淡，有點類似豆乳味，其實樽汁都幾多，撈唔哂個面，最好我地仲每人一匙當左豆乳黎飲😂😂食法係放個手拉素麵係碗冰上，然後按個人喜好加入配菜，倒入豆花汁仲有少量麻醬同黃豆粉調味，之後攪拌黎食。個程係幾得意，不過味道其實我覺得一般，因為係攪拌埋d冰黎食，一黎太凍d 味唔會太突出，二黎個冰溶左d水，又會溝淡左d味。同埋有一樣野可以改善係，佢有3 啜面，咁岩我連埋朋友3個人一人一啜岩岩好，但佢只係俾2 碗冰，咁好難平均分。依款菜色我覺得係睇得玩得不個味道就好一般啦。最後一樣係川香麻辣炸雞（$228)對於我鍾意食辣同食得辣既人黎講，都覺得係超勁辣。十級辣的話我覺得佢有8,9級既程度。如果好食得辣既人可以試下，係幾過癮。不過佢既辣又唔似四川麻辣，反而似新疆個種。但如果唔係好食得辣既就唔多建議去試啦，我另外兩位朋友食左幾啖就食唔落去，辣到出哂汗，食一啖就要抖一抖，仲要飲岩先冷麵既豆花汁黎解辣🤣🤣。最後又唔想浪費佢，就決家去左d皮黎食，咁樣就會無咁辣，不過就會無左d風味。總體黎講，菜色係幾有新意同睇頭， 不過味道又唔係話好突出。下次可以再試下其它菜色。環境唔錯，係一班閏蜜既聚腳點。…查看更多