Masayuki的个人专页

最近工作太忙，好少機會外出找食，找到都係唔好食多，大大減低寫飲食記錄既推動力！又辛苦多個星期，是晚決定要食餐好！經過一輪篩選，發現有食沖繩料理既餐廳！ 我同朋友都未踏足過沖繩，但從旅遊節目中得知，呢處地方比人一種好relax，好陽光與海灘既感覺！而且有好多特別既菜式！正好為咁辛苦既我地充充電！正想打電話book枱之際，發現餐廳6pm先開始營業，唯有walk-in搵食啦！ 餐廳位於金馬倫道尾，好難令人發現既一個樓上鋪位。到店門，先被一陣好有沖繩風既音樂吸引住，真係未入店內先relax一下你！我同朋友們都相信呢個會係一個好好既開始 步入店內，有一口流利日文既店員serve你，唔識日文都ok~~ 佢地英文都唔錯，而且仲有d香港人既~~ 但是晚serve我地既係一位好nice既日本人！ 因時間尚早既關系，好快我地就被安排入座。店內大都為日本客人，相信此餐廳既老闆都係日本人，大家都因此對是晚抱有希望~~ 我地被安排坐到要除鞋既和式榻榻米間房內，初時友人都比較抗拒，但坐底左又發現間房好relax好有privacy同無咁嘈 tim~~ 正！ 經過一輪研究同介紹，我地點既大多係沖繩特色菜式！ 沖繩地道健康飲品：本名我忘了，係"U"字頭的，起初見沖繩特飲，店員話係帶少少藥味，但此飲品對肝好好，飲酒前飲，可有助減少酒醒後不適；雖我唔多飲酒，見沖繩特飲即管試試！ 同我地既涼茶苦茶有分別，亦較易入口，味道唔苦，有少少甘，唔錯既嘗試！ 我覺得凍飲會較易被接受！ 海葡萄：一味唔食過唔等於去過沖繩既特色食品，口感似食蟹籽，但無腥味，只有海水咸味，點d柚子沙律汁又fresh又開胃！好味！ 當然呢度既海葡萄size，無官小姐係旅遊節目所食既咁大寸啦~~ 冰葉：一種外表無咩特別，但口感好得意，而又好味既沙律！ 例行公事影完相，再研究其好似有少露水 / 短毛毛既奇怪外表後，用手摸似好有膠質既葉，但一口一塊放入口後，便知其神奇既地方！ 入口即溶feel，真係葉如其名，冰葉，認真無改錯名！ 最match係配以柚子沙律汁食，另外，餐廳都提供BB醬，不過都係柚子沙律汁好d~ 六款刺身拼盤：好新鮮！好肥美既salmon, 好甜既帶子，好大隻同爽既蝦，厚切既toro，仲有章紅魚 炸芝士：外脆內嫩！好香好濃好多既芝士！點BB醬一絕！正！佐酒一流！芝士怪最愛！ Agu豚肉餃子：自問對Agu豚肉認識唔深，但肉香無豬臭味，餃子亦煎得香脆，唔錯但無特別！ 苦瓜炒豚肉：沖繩既苦瓜有別於香港既苦瓜，苦味較淡，無甘味，較易入口，適合我呢類唔鍾意食苦瓜既朋友！ 加入蛋同豚肉一齊炒，蛋好滑；惟豚肉有少少蘇味，但整體味道唔錯，送飯一流！！ 豚肉烏冬(小碗)：上枱時見湯底清清既，怕令我地失望…但一試個湯底則令人驚喜！ 清清既湯底，但帶濃濃既豬骨味，唔油膩！而且條條烏冬都入晒味！又唔會太林~~ 好有驚喜既湯烏冬！而豚肉係五花腩，又甘香，又入味！整體味道好好！ 沖繩冷麵：令人有d失落既冷麵…帶甜既胡麻汁，配以青瓜絲、蟹柳絲、蛋絲同雞肉絲，一齊撈拉麵而已…而且胡麻汁好快變水… 總括而言：服務好，出品佳，環境舒服，氣氛夠relax，確係幫自己充充電，加加油，食餐好，既好地方！…查看更多

在香港，專門食Okonomiyaki既店鋪唔多，打正旗號叫噹噹燒，當然要一試！ 可能我地好彩，是晚所點乃全部散叫，店員無不斷sell我地食餐，其service亦無之前既食家所遇到既咁不愉快，而所點既食物都好快就上枱… 超級噹噹燒 (加麵底加蛋)；雖然有少少燶底，但無損整體既味道，噹噹燒較日本既多粉漿，亦較少燒汁同BB醬，而且椰菜絲都切得較粗，但整體味道不錯！ 芝士年糕：芝士份量足，惟年糕有粉粒，唔夠滑同Q.... 可惜 漢堡扒：無牛肉味，但有種似變壞，而且唔討好既怪味… 總括而言：只有Okonomiyaki較為可取，此餐廳只為tea time小食… …查看更多

圓方乃回家既必經之地，加上Friday night都不會變得人山人海，確實係食個relax dinner既好地方！繼上次發現好好味既日式鍋物，又試試另一家日本菜！是晚選址丼丼屋係心血來潮之選，無book位，但等了大約15分鐘就被安排到卡位就坐。 看看menu，大多為炸物、定食、釜飯。 炸蠔：炸醬較厚、蠔唔夠肥美，size亦較細，仲係雪藏蠔… 燒雞泡魚乾：搵笨之選…味道同食感同零食魚乾，叮熱加甜味醬油，伴BB醬無分別！！！ 千層豚肉定食：做到"千層"既賣相，但肉質乾且"鞋"，一D都唔juicy…加上炸醬較厚again.... 只有椰菜絲好fresh同清甜… 牛肉釜飯：想象將吉X家牛肉飯放入釜飯既容器再加入較甜既醬汁便成！ 仲要吉X家好食d…而且，釜飯既容器較為污漕… 總括而言：order完先知此乃美心MX旗下餐廳，對此有期望乃係我錯… anyway...無下次……查看更多

早前到大阪品嘗過雞泡魚宴，被個只用一片昆布 加 一盤清水 再加 雞泡魚精華 既雜炊攪到心掛掛，見呢度有人讚個雜炊拍得住日本，當然要一試！ 芝士年糕：外層雖然有微微既脆身，但裡面唔夠多芝士，年糕唔夠煙un.... 可惜.... 蕃茄湯豚肉稻庭烏冬：Again 稻庭烏冬唔夠煙un.... 又唔能夠索到d湯底.... 失望... 加上個 蕃茄湯只有蕃茄"腥"，一d都唔吸引人… 冷稻庭。赤豚肉南蠻汁：gimmick野而已… 一個唔冷唔熱既烏冬加一個唔咸唔甜既熱湯叫南蠻汁… 實物與menu個名比人既感覺差好遠… 點菜時以為烏冬冰冷的，個南蠻汁傑身d，令d汁可掛到烏冬上… 而事實係… once again 稻庭烏冬唔夠煙un.... 咁整又唔能夠索到d汁.... 我寧願個烏冬同個好似湯既汁一齊煮好過… 鍋物。廣島蠔：鍋物。一開始有別於打邊爐，一盤蔬菜全部排得靚靚既放到鍋裡，上枱後，店員會加入湯底，湯滾後，可放蠔。廣島蠔圓圓的，白白的，好吸引人！ 放入鍋後，廣島蠔既size不會有太大改變！無由廣島蠔變袖珍蠔！ 食入口又好鮮甜！正！ 蔬菜方面，有娃娃菜，金菇，鮮冬菇，大蔥，豆腐，香菜。 雜炊：待食完鍋物中既食物後，店員會好細心將鍋中既食物碎同泡泡不走，務求無"雜質"影響雜炊既美觀。湯底，再加上蠔同雜菜煮製而成既濃湯，加入飯，雞蛋，蔥粒，一碗簡單，但又香又鮮味既雜炊完成！飯吸晒湯底既鮮味，超好味！ 加幾滴日本醬油更能提升鮮味！總括而言：稻庭烏冬大多係gimmick野，加上烏冬質素麻麻，比較失色；反觀，鍋物加雜炊比較特出！ 話雖店員製作雜炊過程既一絲不苟同日本遇到既大都相同；但話晒日本既禍物，由一片昆布同清水再加入肉類由零整出，相比下，呢到既雜炊始終無日本食到既咁amazing；不過，都算好出色！…查看更多

第一次走入內，有點驚訝，因為內部裝潢與宏偉外牆的對比係如此的…大分別… 從外面金碧輝煌的外牆來看，再加上果粒米芝連星星；少不免會有少少幻想內部裝潢都有番咁上下… 點知…裡面係好"古色古鄉" feel.... 是日想要個叉鵝飯行街，通過"外賣部"的出入口，一步入就到了為外賣專設的收銀處，同埋長長既人龍… 半肥瘦叉燒併燒鵝飯：飯盒份量與大家x相比明顯細一半，但這size剛好為女士而設 但係… 我要既係半肥瘦叉燒，但用眼睇同用口點食都係瘦叉燒，仲要係柴皮果隻… 再試燒鵝… 不外如是… 我明白一個 $31既外賣雙併飯 既燒鵝同原隻既"飛機燒鵝"係無得比…但都唔好比d又唔脆皮，又無鵝味既燒鵝我食丫… 總括而言：只此一次……查看更多

鰲，首位，第一名。獨佔鰲頭，稱皇稱霸，好名；但，係難食既第一位…是日狀態：辛勞工作後既晚上，餓瘋；同朋友補祝生日，心情興奮同relax… 生蠔：南非、愛爾蘭、英國、法國品種，半打以上$24一隻，起初覺得好平，上左枱… 哦，細隻成咁… 由南非食起，幾creamy，無咩蠔味… 起初食都應該，點知…一隻比一隻差，同一隻比一隻細！ 之後有，唔新鮮味、就變壞味、淡化海水 / 蠔味同淡而無味！ $24一隻？呢個實際價格，超貴！ 黑醋汁煎鵝肝：鵝肝油膩我知，鵝肝會蘇我明；但已經用黑醋汁配合，加上有多士放底，仲咁油同咁蘇，我想象同預計唔到。好在唔係人生初嘗鵝肝，否則會以為鐘意食鵝肝既人係咩都放得入口！ 意式生牛肉片：起初無落檸檬汁，每放一片牛入口，只覺將剛才既油膩感昇華而己，牛肉味？找不到。加入檸檬汁後，好d，無咁油膩感，但依然找不到牛肉味…檸檬作用就只係做返其本份，檸檬汁而已。 大蝦墨魚汁意粉配龍蝦汁：起初見價錢要百幾到二百一碟既 大蝦墨魚汁意粉配龍蝦汁，心想，蝦要爽口新鮮，墨魚汁意粉係果種真係加入墨魚汁既意粉，龍蝦汁當然又濃又香！ 現實還現實，上述只限個人想法，食落口既同想象係 TOTALLY 兩回事！！！ 蝦，雪藏既，墨魚汁意粉係instant果種，即意x屋果d 呢… 龍蝦汁先amazing！唔係寫食評呢刻，我都醒唔起原來我叫既係龍蝦汁，而唔係茄汁！ Parma ham pizza：Parma ham只有咸無香。加落pizza…不倫不類…pizza既芝士無芝士味，唔香口，芝士無起絲… 芝士焗龍蝦配蒜檸汁：龍蝦焗得過乾身，但龍蝦無龍蝦味again！個所謂蒜檸汁都無落！成$3xx個龍蝦，我估正常人都會有d expectation掛… 但呢度會令你幻滅… side dish 有焗薯，問題係…個薯仔未焗透囉… tiramisu：算係全晚焦點，但仍然係未到位！首先，一隻匙羹不落去，tiramisu分開三層解體，蛋糕較乾，無mascarpone香，只有咖啡味… 梳夫里： 外皮唔脆，內裡唔香唔滑，仲有怪味…恕我詞窮，我真係唔識用字去形容呢種怪味！總括而言：點解一開始要講是晚食飯既心情、背景同餓既程度？因為要表示，我地既味覺都無其它因素影響而作出呢個評論！ …查看更多

位於the one高層，一出電梯就見到高雅feel既reception，笑容滿臉既服務員亦ready為我倆服務，作為我倆午餐既好開始！步入餐廳，落地大玻璃由左至右將餐廳包圍住，尖咀既海景樓景一覽無遺！加上餐廳用不同既黑白照，畫像做裝飾，高雅feel中又帶點品味，為食客提供一個好relax既用餐環境。set lunch menu 以不同 courses組成，我倆都選擇左，頭盤 bar 加 意粉/意大利飯加甜品。 頭盤bar：無特別，分兩類，一，不同既野菜 加 不同既沙律汁。二，大路小食類，parma ham加melon，南瓜加nuts，火腿盤，煙三文魚，黑醋青椒牛肉沙律… 無吸引既頭盤，有d失望 麵包籃：質素一般，既唔香，又唔軟；既唔特別，又唔精致。 唔飲餐湯好難食得落… 帶子蘑菇粒意大利飯：一個大圓碟，初時驟一眼望，以為係大胃王既份量，食落就知，只係薄薄一層既意大利飯。 意大利飯質感較硬，但未至於似食生米… 因為有頭盤bar任食關係，呢個意大利飯既份量都幾heavy，加上帶子好多，差不多每啖都有帶子！ 白汁就好穩紮，比一般白汁creamy。 意大利肉腸意大利麵配茄汁：先講個汁…好一般，有d失望… 好多好多香草既茄汁，唔係我杯茶！ 而意大利肉腸… 我寧可食返豬肉或牛肉碎… 但，個意大利麵就煮得剛好！唔會過林，但保留咬口！唔錯！ 芒果蛋糕配蜜瓜雪芭：差！我只食左兩口！一口蜜瓜雪芭，超甜既人造蜜瓜味令我味蕾變頓…再食一口芒果蛋糕，只有眼中有芒果，但口中同鼻中都無芒果，而且蛋糕既質地同洗碗海綿無異！ coffee：跟餐既熱咖啡一d都唔欺場，泡泡夠滑同rich，而且附一塊好好味既朱古力cookie 比你做finishing！值得一提，呢塊cookie 比個甜品好食好……多！總括而言：論食物，水準一般，但未到令人要短時間內encore；而甜品係整體出品中既最大敗北… 但舒服既用餐環境，加上貼心既服務配合，令我倆不經不覺食左兩個鐘既lunch都唔知！…查看更多

同行朋友們都甚少去澳門，自然地對名咀名食家推介既食肆有麻木既追捧！ 為了一嘗好……出名既誠昌水蟹粥，特登提早過去攞位，希望避開長長既人龍。去到攞位，無飛仔攞，只見店員問你貴姓同幾多位，之後叫你幾點返黎攞佢…有d兒戲同無系統… 有d似玩"埋周"！ 邊個最快contact到個店員，你咪入到去先囉！ 就因為呢個漏洞，雖然我地唔係呢個時段第一批等位既食客，我地就好快有位坐！ 水蟹粥 (大)：一上台，心想用匙羹將水蟹整出粥面，影返張靚相，一筆，眼見水蟹粥比較稀… 聞落，無令人垂涎欲滴之氣味… 食落，莫講話無粥既米香，連丁點蟹甜味都無！ 所謂既蟹膏，只是食粥之前落既卜脆一樣，無同粥一齊煲過，試問d粥點會入到味？？ 除此之外，水蟹肉質一般，唔"削"，但食落都係無鮮甜味！ 去到呢度，我問自己，如果唔用眼睇自己食咩，真係好難估到自己食緊咩！ 當中不得不提下個水蟹粥最足料同magic既係咩！就係 - 味精！！！ 味精既"濃度"，令我食完唔夠一個鐘，我口渴到將一支800毫升既水一口氣飲左超過一半！ 而magic既地方，就係既然味精咁高濃度，但點解d粥都仲係無"鮮味"？咁究竟佢用咩味精？同埋落味精既目的係咩？自問到呢個狀況，我唔敢再想落去！ 椒鹽魷魚： 魷魚係唔"un"既…但個脆漿，一睇就知啦…唔酥、唔鬆、唔脆…… 椒鹽味？唔覺囉… 酥炸墨魚鯪魚丸：黎到呢味…坦白講，我都零期望…呢度既酥炸墨魚鯪魚丸，你同我係屋企都整到！仲分分鐘鐘可以整得好過佢！首先，我食唔到個"酥"字，而鯪魚…我想你是但係香港都買到比呢個好味既鯪魚，墨魚丸... same。總括而言：無謂浪費自己時間排隊喇！呢間餐廳既出品，你食完係搵唔到個【味】字……查看更多

近年，不少新食肆進注元朗，身邊不少住係荃灣同深井的朋友都表示，他們會特登到元朗食飯，原因無他，只因有又平又靚既sushi同刺身。 元朗永遠都令人聯想到，老婆餅、B仔涼粉、韜韜… 但，最近，因為電視節目既介紹，多左個hot item，就係鄧達智 ，而且不少朋友都問起當中介紹既果間西餐廳。因此，自己做下research，發現了元朗既西餐廳，除了幾間元朗老牌港式西餐廳外，近幾年都出現了不少食塊扒都要$2xx既餐廳。呢d 餐廳，除了價格貼近港島、九龍區既餐廳外，當中既服務、食材同出品既質素，都同港島、九龍區既餐廳無大分別。 自己都好鍾意食西餐，最先愛上既，就係元朗"貴價"西餐廳既始祖 --- 品x，坦白講，只看西湯呢一味，鄧生個friend既西餐廳已經無得比；可惜自從品x轉左手後，佢地超香、濃、滑既西湯就消失了… 與此同時，我都消失於元朗既餐廳好一陣子… 是晚，同朋友仔"抽起條筋"相約到元朗，找尋合心水既西餐廳~~ 元朗既西餐廳，除了oyster bar ，好少有主題，見呢度主打龍蝦同海鮮，身為龍蝦怪既我，一定要試試！Boston 1 Seafood & Grill 店面比元朗其他西餐廳開揚，採用落地玻璃，加上水晶條同閃令令金屬片既掛飾，再配上燈光效果，從店外望入店內，感覺又trend又grand 而且，論店內既面積，都係較其他西餐廳闊落，隨便一望，見到店內大概有12 - 13張二人枱，一張三人圓枱。枱與枱之間都有d距離，唔會有背貼背既情況出現。不過，以食西餐來計，二人餐枱既面積就較細，餐枱上又要放水杯、酒杯、蠟燭台、餐具、餐前小食，加埋兩個人main course果兩隻大碟，食起野上黎都有d壓迫感。是晚係平日，餐廳都有六成滿，起初我倆被安排坐二人枱，店員見我倆手袋無位放，店員就好主動提出幫忙我倆轉到近門口既三人圓枱。 人坐得舒服左，睇餐牌都舒服左，加上燈光較明亮，清楚睇到餐牌上既選擇唔算好多，每項有幾個選擇，當然大多以龍蝦同海鮮為主啦！ 餐廳都有提供set dinner，但因為我倆想試既都不列入set dinner，加上又想試生蠔，唯有散叫。 生蠔 (南非 & 法國)：呢度既蠔比赤柱食既還要肥美同大隻！ 選擇亦較多，有六到七款選擇，生蠔大多來自法國同美國。店員開蠔技術都好好，唔會開到有穀碎。而且店員會細心提點你，邊隻蠔較淡口，邊隻濃味d，所以最好順住order食。 大蝦帶子意大利飯配龍蝦汁：好香濃既龍蝦汁！ 龍蝦汁仲加左蕃茄粒以帶出其味道！ 同時，為左增強咬口，加入了露筍粒。不過，龍蝦汁食落都差少少惹味。 如果煮汁前先放洋蔥爆香，再加龍蝦汁的話，那就色、香、味俱全了，而且，加洋蔥比露筍咬口更佳！不過，呢個已經係我暫時試過，最好味既一個龍蝦汁！ 配角既帶子同大蝦都唔錯，其中以大蝦最香口惹味！帶子亦夠肥美香甜，仲唔"un"！！加上成個presentation又靚！整體好吸引！ 銀雪魚菠菜配牛肝菌汁 伴芝士焗薯 [本身係配龍蝦汁的。]：牛肝菌汁帶好香濃既牛油味！配以香滑既銀雪魚同菠菜，成件事好match！而且，焗薯一d都唔馬虎！用一片片薯仔去焗，芝士份量亦好大方！ 心太軟配雲尼拿雪糕：整體presentation被穿左既心太軟破壞左，有d可惜。心太軟既蛋糕外層同內裡既朱古力溶漿，未能做到味道既層次，食落只有一種朱古力味… 水準一般… Tiramisu：雖然知道mascarpone來貨價唔平，無可能唔加cream，但呢度算係良心餐廳無加過多既cream，所以仲食到Mascarpone既味道。 加上，蛋糕浸泡expesso同咖啡酒唔欺場，食得出咖啡味！惟最底層既蛋糕浸泡得過份賣力，有d過甜！ 不過，論價錢、outlook同味道，已算中上水準！服務水準：由主動提出幫我地轉枱，同細心提醒要食邊隻生蠔先，已感覺到餐廳服務水準一流！ 再加上，友人本身對龍蝦過敏，在佢個銀雪魚上枱之際，我倆先發覺，魚係配龍蝦汁的，向店員求證後，店員第一個反應係令人留下好印象！ 店員除了主動提出做過一個唔同口味既汁外，仲第一時間問朋友身體有無任何不適，最重要係，保持微笑。 而且，友人等食期間，店員仍不時行過黎同友人講sorry同示意友人要等多一陣。 呢種服務態度，真係係屯門同元朗買少見少！唔好浪費餐廳一番心機，友人唔食得，都比大家大飽眼褔！ 銀雪魚菠菜配龍蝦汁本身係用牛油紙包住去整，所以銀雪魚食落應該比友人食果個更滑！總括而言：餐廳食物同服務質素偏高！加上雅致裝潢，又夠氣氛，係食餐好既好選擇！…查看更多

灣仔酒吧街有不少提供lunch既酒吧，是日同朋友倆，試下呢間有得reserve食雞邊個部份既無骨海南雞飯，而且，仲係菲律賓式既海南雞飯。 一向都喜歡啖啖肉既我，多數都點雞胸，既然無骨，當然點雞髀啦！ 海南雞飯 [雞髀，去骨]：朋友點了雞胸，肉質係滑同唔"un"，我點既雞髀當然一樣都係咁滑同唔會"un" 啦！ 不過，雞胸既件數就比雞髀多d~~ 而配海南雞既醬汁有三款，包含港式燒味既蔥油，仲有薑蓉，同埋酸辣汁。當中既蔥油不用多說，聽落仲有d怪…而薑蓉，就無味道… 剩下只有那個酸辣汁，雖然叫酸辣汁，但帶甜，唔夠酸，唔夠野味。不過，與一般既海南雞醬汁不同，值得一試。 而個雞油飯則太油，份量對一般女仔而言，算係偏多。加上飯質偏林，令整體水平下降。餐飲：比較特別既係有得添飲，無論你叫凍檸茶定可樂；雖然係細細杯，但店員會不時幫你加滿個杯。總括而言：海南雞既做法，好難令雞肉整"鞋"；所以大多以個雞油飯同海南雞醬汁去決高低！呢度既海南雞除左去骨外，仲可以點明要髀，仲要胸髀同價！係一個優點。 雖然個飯較油，但個海南雞醬汁都幾特別，與泰x雞果種酸辣口味係兩回事，值得一試。…查看更多

赤柱係一處幫人充電既好地方！星期六日，公眾假期，熱鬧氣氛cheer up你；風和日麗平日，再加上無敵既海景，份外心懭神怡。好難得有個長假期，決定同一樣悠閑既朋友，到訪赤柱，睇睇赤柱寧靜既一面。 在赤柱大街上既餐廳，無一家特別優勝既view，因全部都有個無敵大海景！決定呢間餐廳，全因佢係新開，裝潢新，我未幫襯過！ 生蠔 - scottish rock：偏咸既海水味，好少好少既creamy，幾甜。 生蠔 - Kxxxxxx：好fresh既海水味！入口好fresh，雖然唔係creamy口感，但好fresh~~ 較之前既有蠔味。 但未知係這品種既蠔殼較易碎，定開蠔人既手勢問題，蠔中帶有少量蠔殼碎！ Fish & Chips：到海邊，有冰凍既beer，就自不然想點一客 Fish & Chips~~~ 呢度既炸魚無嚇人既大size，每條只有手掌長，尾指咁闊既size... 加入香草一齊炸！好香脆，但粉漿太厚，魚就自然少d啦！ 而Chips ，食到尾都係脆！唔錯！ Carbonara 意粉：可能我地同蠔一齊點，食完一碟又一碟，令個意粉煮耐左，令到個Carbonara 汁煮到油脂分離… 可惜。不過，呢個Carbonara唔夠Creamy~~ 幸好上面加左d 芝士薄片！總括而言：蠔同熱盤不是特別既出色！但個靚靚sea view補數，加上餐廳新開無耐，比人新淨清潔感覺，坐都舒服d~~ …查看更多

店內外都有好時尚既裝潢，金屬 x 落地玻璃既外表，食物放在木製餐枱上甚有和風拉麵館feel，配以鮮紅皮餐櫈又帶出fusion feel... 這正與這裡既拉麵走同一風格！ 但店面既面積不算很大，只有9張二人枱加十數個吧枱位，所以想試試既朋友一定要book枱！否則，walk-in可能要坐吧枱或waiting list呀！另有一樣貼心design要提提！在近門口既reception位置，放置兩個高度大約到膝頭位置既暖風機，令客人暖笠笠！ 餐廳既另一特點 [如果你欣賞的話…都算係既…] 就係，將用餐工具同一張寫住不同食材既來源地既紙仔，全都放進坐位既抽屜裡。無論係枱定係吧枱位都係呢個設計！ 而Menu則大大本，得幾頁！ Menu簡單列出 Set Lunch / Set Dinner 、各類拉麵、頭盤、熱盤、甜品 & 飲品。拉麵只有四到六個湯底選擇，與其他拉麵店不同，如果其他拉麵用配菜分類的話：如，叉燒拉麵、九洲拉麵…，那這麵店就以漫底去分類：如，醬油、豆醬、辣味、鹽味 及 兩款 special湯底，special湯底大多在星期五、六、日才提供。是日既special湯底係：豬骨湯同辣半湯底。另外，有叉燒同蛋供食客另加入拉麵。雖然，拉麵以湯分類，無列明配菜係咩，但其實單點既拉麵都有五花腩或叉燒作為配菜，而且份量都不少，所以如食客覺得配菜唔夠食先再另外加叉燒都唔遲！ 頭盤、熱盤 & 甜品，都各提供三至六樣食物選擇，飲品則較多選擇。其中較值得一提，甜品中有供應Awfully Chocolate 既朱古力蛋糕！ 而飲品則有餐廳自家製既 White Ale。 幸福豚什菜沙律： 層層疊既幸褔豚條，伴鮮什菜，配日式醬油沙律汁。好精致既Presentation~~ 幸福豚一定好幸福，因為每一口我都食到好肥美！ 只有一兩條較多脂肪層，其他都肥美程度剛好；惟配日式醬油沙律汁有少少膩，如用柚子醬油會更好。 豬骨湯拉麵 [配五花腩]：拉麵無鹼水味，但麵質較林唔彈牙…有d可惜 … 而且絕不可以睇少拉麵既份量！好大碗！[可能個 豬骨湯底太膩...] 貴為special既豬骨湯，話明係fusion，會與一般既不同：較油 同 唔重豬肉濃香… 但呢個fusion…唔討好我… 我會建議得十度八度先好食…否則好快膩同令人投降… 不過，五花腩則 好好好好好好好 食！ 好香、好林、肉肥相間，齒頰留香!!!! 醬油拉麵 [配叉燒] 另加 蛋：醬油湯底除望落去個顏色同日式醬油相同外，味道可以講與日式醬油係 totally different.... 既無濃濃醬油味，亦無醬油香，可以話呢個fusion不能將日式醬油既優點收埋晒… 相反d叉燒令人驚喜，因另加既關系，會另上，而且叉燒size一d都唔欺場！橢圓形既叉燒較長既直徑有大約酒樓既骨碟 [碗仔下果隻碟] 咁長！ 不過就好薄既~~ 就咁放入口你食唔到叉燒既精髓！要醬佢放入熱湯裡，薄薄既叉燒，入口即溶！ 自家製既White Ale：我非professional既酒鬼，我覺得酒味較淡，而且加入類似梅既果味… 酒亦無厚厚既白泡泡！ 只係一個幾好既新嘗試而已。總括而言：請各位不要作太大既期望，不要抱著食日式拉麵既心情去比較，因為呢度係sell 'arm'外國人口味既fusion拉麵。餐廳以日式拉麵既常見湯底為基礎，加入西洋風，發展出每種不同fusion既"新"口味。惟此嘗試未能突顯日式拉麵湯底既特點，令人失望。反觀配角既幸福豚、五花腩 & 叉燒好出色！幸福豚肥而不膩、五花腩既齒頰留香、叉燒既入口即溶，令人驚喜同回味！ …查看更多

接近中午一時，往上環探友人，友人聲稱帶我找好野食。尾隨友人左穿右插，於人山人海之中行經不少裝潢富時代感，門口排滿放lunch既上班一族既餐廳。行過一間又一間，但都唔似友人既目標；最後，於馬路旁，裝潢不怎麼樣，但一樣門口排滿放lunch既上班一族，店內亦座無虛席既燒味店停下！ 起初心內充滿疑惑，但及後一看，見到一個圓型，紅卜卜既米芝連推介貼紙，貼在門口不怎樣起眼既角落，便明白友人既 "苦心" 見店內坐滿食客，餐廳又近友人家，一於由友人發板，外賣回友人家慢慢品嘗！ 最後友人點了：紅腸、燒腩、乳豬、半肥瘦叉燒 燒腩、乳豬：友人話燒腩及乳豬乃餐廳既 "鎮店之寶"！果真，話晒外賣回家，行幾分鐘既路，到家一食，燒腩及乳豬既皮仍然香脆！ 當中燒腩乃肥瘦肉相間既五花腩燒製，豬油香令人忍唔住一口咬下，肥就肥啦！ 意外地，燒腩無令人有好肥膩，好溜既感覺！ 乳豬更令驚喜延續！ 我一向食燒味飯，大多點叉燒併油雞或燒鵝，乳豬、燒腩大多係去飲時先食既。一向我對乳豬既感覺係 --- 無啖好食！ 因為酒席既乳豬大多有一層好厚既肥肉，再加超薄既乳豬肉，而表皮脆唔脆…就睇你運數喇！ 所以，食燒味飯，我真係好少會揀乳豬。但眼見呢度既乳豬，令我對乳豬有新既睇法！呢度既乳豬，皮脆不在話下，脂肪層好薄，但肉層好厚同肉爽！ 加少少甜甜既乳豬醬，一塊接一塊！ 正！ 半肥瘦叉燒：可能燒腩及乳豬乃餐廳既 "鎮店之寶"，相比下叉燒真係略為遜色一點。但值得一讚係，幾多間餐廳會係lunch time時，真係比到半肥瘦叉燒你？ 可能掛住試燒腩同乳豬，叉燒變得有點凍了，令味道再為遜色。 下次要係餐廳堂食多次半肥瘦叉燒，試真d再評論！ 紅腸：只係我既情意結，好鍾意食紅腸先點！可以不理！後記：於等外賣期間，同友人閒談關於餐廳既背境同最近被列入米芝連推介既威水史，發現餐廳由家族父傳子，世世代代所經營，見店內年老既爸爸，年青既子女，一家人一起忙碌。到呢代，仲有米芝連推介既機會！頓時覺得呢個米芝連推介份外窩心！ 餐廳無美輪美奐既裝潢，無名廚名咀既support，吸引既係果份穩打穩紮既味道同精神。呢個圓圓既米芝連推介貼紙，既回報了上一代既身酸血汗史，亦肯定了呢一代既努力積極保持既精神！ 加上，餐廳賣既係燒味，好地道既廣東食品，份外多一種親切之感。 總括而言：燒腩及乳豬果真餐廳既 "鎮店之寶"！惟外賣回家食，略嫌飯同燒味唔夠熱，下次一定要係餐廳堂食，食清楚當中既各種"味道"！…查看更多

最近，我同朋友high tea again again and again~~ 之前為找一間食得過既 high tea，今次為延續 "四季high tea 神話"！ 到了餐廳，一如以往既多人，要排waiting list，幸好，等了15分鐘就call back話有位！lucky [ P.S. 當然此際未知是"惡夢"既開始啦 ] afternoon tea set：底層：羊肉腸、煙羊火腿餅、咖哩蛋沙律飽、一口三文治粒、吉列蝦餅，中層：Scone，頂層：乳酪杯、士多啤梨macaron、花花檸檬泡芙、紅梅撻。 底層：煙羊火腿餅令我食完呆滯既"美食"！ 因無心理準備，貌似pama ham竟會係羊火腿！豪氣都一口吃下！ 羶味好有 "層次" 地 "回甘"，羶味由煙羊火腿及羊芝士中散發出黎！ HELP!!! 羊肉腸… 就放過我吧！ 咖哩蛋沙律飽，好"新穎"！但其實繼"羊 item"後，我想要"平淡"d lor… 吉列蝦餅看似 "穩陣" ，但係另一 "高潮" ！ 吉列唔鬆脆…蝦餅有他他醬在中… 不合我口味… 相比底下… 一口三文治粒簡直係美食！！！ 有煙三文魚、火腿 & 青瓜 三款三文治粒，但當中青瓜三文治粒既青瓜，無清新既味道，換來係 "油林林" 感覺，將呆滯之感再提升！！！ 中層：Scone 無令人流口水既香味，都無發粉味，但唔鬆… 不過不失 但cream 同jam 都唔吸引，食了一個scone就放棄了… 頂層：先提下so amazing既士多啤梨macaron & 紅梅撻！amazing在 士多啤梨macaron，眼中有士多啤梨，但口中無士多啤梨！ 成個點心，只有片真既士多啤梨有士多啤梨味，而個macaron就amazing在，點食都只有糖既甜味！ 另外，個紅梅撻，again ，除左個半粒紅梅"正常"外，下層既雲呢拿 & 奶油 層，竟然amazing到有蛋黃醬既味道！ 無錯！係咸咸地既蛋黃醬味!! 此時此刻，我已投降，花花檸檬泡芙就留比友人試吧… 友人回報：貌似鬆脆既檸檬泡芙竟然amazing地係林既… 泡芙質感就似 Genkx Sushi既泡芙，而且佢寧願揀食Genkx Sushi既泡芙tim lor… 乳酪杯…懷著本死既心態去試… 所以換來驚喜！！！！！ 乳酪杯，由上至下，由 jelly粒、粟米片、原味乳酪、果味乳酪 所組成。雖然粟米片浸林左，果味乳酪 同 jelly粒 都食唔出係咩果味，但佢係全個頂層中，最最最最最最最好味既一樣！ 後加：high tea 後段時間，有甜點refill，服務員拿了八款既甜點過來，細心介紹每款甜點及解釋每人可揀一款甜點。與此同時，我心想：比我都唔想揀多款…因…怕怕lor.... 最後揀了好穩陣既 chocolate truffle cake& 檸檬cake！ chocolate truffle cake果然好穩陣，chocolate truffle夠香夠滑，加入紅梅，唔會過甜！正！正！正！但… 檸檬cake就… 唔可以話差，只係我地唔識欣賞！ 白朱古力外層包住較酸而且帶香茅味既檸檬mousse… 其實幾創新，只係我唔喜歡太酸呢… cream，既淡且無味at all.... jam…雖不易"生水"，但好人工化既果味在中… four seasons green tea, chocolate tea ：chocolate tea 聞有朱古力香，但飲落同普通茶相約。感覺得意！ four seasons green tea 有別於一般green tea味，而加入淡既香草味。總括而言：high tea set中加入唔常見既 "羊肉" 比較 "大膽"，理應在menu列明，無的話都應該落order時貼心提醒！兩者都無做… 服務有欠細心，但服務整體仍算上佳，行過見你個杯無茶會幫你斟茶，加水、high tea用既teaware雖然唔係特別靚，但勝在杯茶都算"水滾茶靚"；但係… Scone唔香~唔鬆~ 咸甜點唔夠精緻，而且過份 "新穎"，最重要set high tea有90%既點心係 唔好味。 以我個人而言，食落肚既high tea點心係最重要！呢度太驚嚇喇… 我接受唔到lor.... …查看更多

High tea again!! 今次揀選座落灣仔既 Crabtree & Evelyn Tearoom ~~ 原因好簡單，d teaware好靚，又剛係附近！>v< 之前都有留意其他食家既食評，知道味道同價錢都ok，所以行遠少少都要試下！由於即興關系，無訂枱，到店內一看，剛好有一枱埋緊單，等左幾分鐘就有得坐~~ lucky! afternoon rea set：底層：雞肉三文治，咖哩酥、腸仔酥，中層：士多啤利撻、什果奶油撻、朱古力，頂層：Scone。 底層：雞肉三文治，no expectation，雞肉片、生菜，加麵包，難食極有限… 另外，咖哩酥、腸仔酥，看似普通，食落"不平凡"！雖然餡料都係腸仔、腸仔 & 腸仔，但個酥做得好鬆，好難想象cafe簡單既廚房可做到，就算留到最後食都係鬆，有驚喜！ 中層：士多啤利撻同什果奶油撻都甜得恐怖，尤其士多啤利撻上既士多啤利糖漿！ 什果奶油撻中既奶油都唔輸蝕！繼續甜、甜、甜！ 而且撻底都變林了… 所以，呢層都係朱古力最穩陣！酒心、咖啡、杏仁、黑朱古力，四款你揀！款款都好味！ 頂層：呢個Scone認真不得了！係硬到不得了！用刀背敲得響！scone既上下層都好硬，只好從則邊既爆開位置拮把餐刀入內！！！ 食到入口，scone有一陣好利害既發粉味！ 仲要令我胃痛！勁 rose tea & earl gray tea：earl gray tea由兩個tea bag沖製，比twinings 淡。rose tea則用玫瑰花沖製，加一瓶全新既蜜糖上枱。rose tea味道偏淡，加入小小帶提子味既蜜糖，別有一番風味。 cream淡口但仍有奶香，jam好甜again，而且好易變水！總括而言：食物整體質素不過不失，好好味講唔上，好難食又唔算。食得你飽，仲有一人一蜜糖 [只限order花茶] 同 hand cream 送比你，將你總共比既錢，加加減減，high tea set 都只係$100內，既有靚靚teaware比你欣賞，唔好要求太多！…查看更多