Chuwskat的個人專頁

有一段時間冇嚟呢間舖頭，估唔到今次真係換來一個極差嘅經驗。一坐低想叫嘢食，個資深職員/店長已經叫個淺歷職員「唔使行過去」，暗示叫我大聲落單。Fine。咁我照大聲落單，其實心入邊已經諗緊「如果有啲人喉嚨唔舒服咁點算？同埋行幾步都咁難？點解要搞到自己間店好似街市咁？」落左單後，15分鐘內有野食，呢個ok。野食同野飲到左後，見到碗麵無湯匙，張枱上面個餐具盒又無湯匙，我張枱又無抽櫃。我諗係佢唔記得左比我？於是，我舉手講返想要杯水同個湯匙。個資深職員/店長望左我一眼，無出過聲就走過左⋯ 都唔緊要，我後尾見佢斟緊水，我就無再留意。杯水黎到之後，都係無湯匙⋯ 我於是截一截佢，同佢講差隻湯匙。佢已經癲左咁大叫「你咁多野要架！又唔一次過講！」，我已經無出聲，廢事嘈交啦，好冷靜咁望住佢。跟住，佢隨即拉開我隔離隔離張枱個抽屜（原來有抽屜，我個位置真係望唔到，天地良心）。佢拎左個湯匙出黎，繼續大叫，「呢到咪有湯匙囉！」，跟住我講緊「唔該」嘅時候，佢就將個湯匙掉落枱面，個湯匙係枱面「咚」後，滑行了一張枱嘅長度，撞到我碟雞扒後停低。佢掉完之後，頭也不回咁走左。呢個經驗真係差到爆。返工有情緒，點解要發落去客人到？真係比錢買難受。天地良心，如果我知道隔離隔離張枱有抽屜，我會叫你拎咩？大家都知你態度差，無咩都唔想煩你啦！同埋，唔知道嗰度有湯匙呢啲蝦6野，都唔會係第一次發生啦，有必要咁嬲咩？直頭好似我爭佢一百萬冇還咁。野食質素都直線下降。雞扒有一堆麵粉，個蕃茄湯冇蕃茄味，連譚仔米線個蕃茄湯都有味過佢。我會附加食前同食後嘅相，我食晒唔代表佢好食。（備註：其實第一次食評打完有啲問題出唔到，我都諗住算數。但係呢一刻，我食完之後肚屙，我真係好俾心機咁再打多一次！）其實幫襯左呢間都五年，望住佢有兩間分店變到得返一間，仲要多咗好多劣評。有一段時間冇嚟，態度照舊，甚至再差啲，連嘢食都差埋，真係好失望！…查看更多

首先，其實筆者係去the steak食，只係岩岩坐低未落單，成間野就斷電，店員話可以安排去隔離街嘅另一間分店食，所以筆者同朋友就去左the hangout食。（其實並不是隔離街，路程約10分鐘）星期二嘅晚上，都有好多人食呢間。我地叫左肉眼扒、大啡菇、龍蝦汁大蝦意粉、芝士煙肉薯條拼蕃薯條。雖然係慢煮嘅概念，但野食好快就到～ 肉眼扒（12安士）一到，大家都係到互問頭先到底叫左幾多成熟，原來無人記得叫，而店員都無問到⋯ 個扒無任何汁，有兩粒蒜係側邊，大概5成熟？切嘅時候有粉色血水係碟～ 清晰可見～ 如果喜歡食熟成嘅朋友，建議先向店員查詢。畢竟筆者沒有叫到幾多成熟，未清楚是否可以這樣叫～ 大啡菇（$30，一個），好食多汁。雖然30$ 只有一個，最後還是忍不住再叫多一個食！呢個推薦～原本是叫帶子意粉，不過店員指出有數項並沒有提供，所以叫左個大蝦意粉。都幾好食～ 有龍蝦汁味，不過份量比想像中少⋯大家若喜歡龍蝦汁，絕對可以一試。最後出場嘅芝士煙肉薯條拼蕃薯條（$98），原來係最大碟最飽肚的⋯餐牌上有芝士煙肉薯條，蕃薯條，芝士煙肉薯條拼蕃薯條，所以筆者錯覺以為「拼」會係兩者合併。原來係芝士煙肉醬，鋪在薯條及蕃薯條上⋯？？其實芝士煙肉醬與甜甜的蕃薯條並唔夾⋯ 建議真正鍾意食蕃薯條的朋友可以單叫蕃薯條，勿學筆者因為三心兩意而叫「拼」盤。食完都未飽，於是再叫甜品。想叫的甜品大部分都沒有，是但叫左個。食完甜品，正和朋友聊天時，店員已經拎左張單黎叫我地埋單走人⋯ 而我地由坐低到食完甜品，都只係一個鐘到⋯ 我諗店內生意好繁忙，所以先會一句解釋都無，就係客人未叫埋單之前拎左張單黎催客人立即埋單。介意嘅朋友可以三思。食完岩岩好飽⋯ 每人平均消費要250$。味道與價錢及份量都不成正比…查看更多