lawtszyue的個人專頁

呢一間餐廳已經係又一城嗰度開咗好耐㗎喇，不過就唔係食過好多次。今次同朋友嚟到呢度，見到好多餐廳都排緊隊，所以就揀咗呢間啊，可能今日係星期日掛所以好多人。呢間餐廳呢就係溜冰場隔離，如果好彩坐溜冰場附近嘅位，就可以近距離睇到啲人溜冰。佢哋呢度嘅Pizza係長方形，兩個人食嘅話呢可能就多咗小小，建議三個人嚟食啦。除咗呢一個番茄pizza之外，好似仲有三四款嘅pizza。另外仲叫咗個疏乎厘，我自己都係鍾意pancake形嘅多啲。…查看更多

元氣又轉左新餐牌啦，極上優惠出咗幾款壽司，期間限定9月26日至10月16日，其中最令人吸引嘅係隻炙燒一本穴子壽司，長度我諗大約都有10 cm到。今次我叫咗炸多春魚，佢哋啲多春魚唔會話落咗好多炸粉，熱食來講都算係幾好嘅選擇。…查看更多

朝頭早呢度好多人排隊食早餐，算係德福入面食早餐其中最好嘅一間，佢嘅早餐餐牌有好多好多嘅選擇。平時鍾意食開羅宋湯雞肉煙斗粉配多士炒蛋，今次等我試吓佢嘅吉列魚柳炒蛋先。佢嘅吉列魚柳呢係比普通嘅集團餐廳大塊，通常啲集團餐廳嘅魚柳份量只係會係佢嘅一半，仲要好多時候都係好多粉，食到好多魚皮多過肉，呢度嘅吉列魚柳切開都見到有層好厚嘅肉，就知道冇偷工減料。佢哋嘅炒蛋都好滑份量都好大。如果呢個餐可以好似普通集團餐廳咁可以加幾蚊加碗通粉就好啦。…查看更多

通常夜晚嘅時候諗唔到食咩、又唔想去咁遠又唔想食太貴嘅話，我就會預先係屋企打電話黎呢間餐廳叫定想食嘅外賣，佢哋有張外賣餐單總共有10幾款飯揀，之前我試過叫肉醬意粉、忌廉芝士魚柳飯等等。今次我就叫咗5餸嘅麻辣米線，可能因為有少少遲先叫外賣啦所以唔係得返好多餸揀，當然啦，啲餸呢都唔係好似專門食米線店嘅咁多花款，多數係得魚蛋、魚腐、豬皮、腐皮等等嘅選擇，如果你叫雞翼嘅話，一隻雞翼已經等於一款餸㗎啦，所以都唔係話好抵。勝在佢呢個餐係會包一罐可樂嘅。…查看更多

第一次食眾志堂樓上嘅食物，上面主要買日式嘅午餐同埋台式嘅飲品，但多數人都會喺樓下食飯，因為下面嘅飯嘅款式比較多亦都比較平。之前有提到好多男士都好鍾意食特價飯，所以樓下午飯嘅時間係長期爆滿嘅。今次我哋嚟到樓上，除咗霸位易啲，午飯嘅質素亦都好啲份量亦都多啲。例如我哋叫咗個日式咖哩吉列豬扒飯，佢啲飯係珍珠米，飯嘅份量亦都比樓下多啲，除咗吉列豬扒外，佢都俾咗半塊豬柳我哋，由於份量都算大，所以我同朋友share左一碟嚟食。另外，亦都叫咗碟豆花鮮奶。從來都未試過飲呢一款飲品，佢隻藍色真係好靚，叫咗3分甜但係飲出嚟嘅感覺好似半糖咁。…查看更多

深夜時分，同家姐都覺得好肚餓，諗住叫外賣嚟醫下肚仔，由於我同佢都好少叫外賣，亦都唔清楚附近有啲咩外賣可以叫，所以我哋上網搵咗一搵，見到秋月居啲嘢食嘅相好吸引，於是就決定叫秋月居嚟食喇家姐鍾意食章魚小丸子，可能係外賣啦，所以冇咁熱，不過都好好食，我諗都係堂食叫嘅話會熱辣辣會好食啲。另外，我哋都叫咗玉子燒，燒熱左嘅玉子燒配搭芝士每一啖都好有味。我哋都叫咗日式煎餃子，入面啲肉都幾多，啲餃子皮亦都唔會太硬，同章魚燒一樣，我諗都係堂食叫嘅話會好食啲因為熱啲。食日本野，當然唔少得叫刺身啦，三文魚刺身同普通壽司店嘅差唔多，帶子刺身就有驚喜啦～…查看更多

今日family day，陪媽咪去咗食滿記，媽咪係一個好鍾意食甜品嘅人，我就麻麻哋鍾意食甜品，媽咪想食嘅話都間唔中陪下佢嘅～有一段時間冇黎滿記，見佢好似轉左個新餐牌，而家所有嘅order加$10就可以有芋圓食喇。平時食開椰汁紫米露嘅我，今次就順便加埋芋圓，睇吓味道如何。本身自己都鍾意食芋圓，去到台灣旅行嘅話一定會叫芋圓嚟食。本身呢我就叫咗凍嘅椰汁紫米露，但職員就俾咗熱嘅我，最後職員都好好肯換返一碗凍嘅椰汁紫米露俾我。啲芋圓好彈牙，好好食呀～…查看更多

如果上堂時間得一個鐘嘅話，好多中大嘅同學都會揀去眾志堂食飯，餐廳入面亦都坐咗好多做地盤嘅男士同埋外國人。佢唔止地下果層有嘢食，去到樓上嘅話仲有日式飯同埋珍珠奶茶等等各式各樣嘅台式飲品賣。我哋試咗個特價飯，可以配搭好多唔同款嘅食物，例如午餐肉、煎蛋、火腿、腸仔等等，其實撈白汁食都唔錯㗎。除咗白汁之外，仲有蒜蓉汁同埋黑椒汁揀，之前試過食黑椒汁，不過就非常辣，辣到完全遮蓋左黑椒味。我諗緊返白汁同蒜蓉汁就最安全啦。…查看更多

今日有啲空閒嘅時間，同朋友嚟咗理工大學扮工，扮咗工成日，到夜晚時間梗係想搵一啲好食啲嘅餐廳啦～朋友介紹咗紅磡嘅一間串燒店，係我人生第一次嚟串燒店食嘢以前讀香港大學嘅時候，好鍾意去西環嘅一間小食店叫炒腸粉，但係嗰間炒腸粉成日都整到好油，食咗幾啖都唔想食，呢一間串燒店製作嘅蛋炒腸粉一啲都唔油膩，我同友人清晒全部腸粉，可想言之係幾咁好食！有少少似土匪雞翼嘅味，咁多串燒之中我最鍾意食雞翼串燒～韭菜肥牛都幾油膩，牛肉都唔夠嫩滑。朋友鍾意食翠玉瓜，我就淨係試咗韭菜，不過太油膩啦，食咗一半都冇食。嚟間餐廳嘅話，建議大家都食佢嘅雞翼串燒！…查看更多

如果你問我中大去邊一度食午餐嘅話，諗都唔使諗一定會答你coffee and paper，除咗佢啲裝修好有咖啡廳嘅感覺，呢棟building都算係中大入面最靚嘅building，應該新開左一兩年到。嚟到呢間餐廳我最鍾意食佢哋嘅炸雞，叫炸雞嘅話有好多醬料俾你去配搭，我最喜歡佢哋嘅柚子醬。炸雞嘅份量都偏多，男孩子唔洗擔心唔夠食！今次第一次食佢哋嘅下午茶餐，menu有好多選擇，唯一令人失望係價錢，蛋餅同烏冬都偏貴啊半份烏冬要三十幾蚊，去隔離餐廳已經買到一個全餐，都係午餐性價比最高。…查看更多

由唔知幾時開始，每個月都會食一次元氣，通常想食壽司嘅時候，第一樣野一定會諗到元氣。其實元氣喺德福開咗好耐，大概八年前，試過食三文魚壽司嘅時候，拎起塊三文魚，見到下面舊飯有橙色嘅痕跡，之後好耐都冇食過，係其他分店推出高速線同埋元氣大改革嘅時候先再試返，啲質素比以前高質咗好多，啲刺身非常新鮮，之後都忍唔住每個月會食一次，好多時候都會自己一個人嚟食添，或者買外賣返去屋企食，元氣有個app可以俾你喺嗰度訂外賣，非常方便。帆立貝刺身係新推出㗎，叫咗一碟嚟試下，都係鍾意叫$17一件嘅帆立貝壽司多啲。以前軟殼蟹手卷師傅都會加青瓜，唔知係咪餐牌轉左少少，今次冇青瓜喺入面，啱晒我呢啲唔鍾意食青瓜嘅人。肥牛烏冬都係新加入餐牌入面嘅，比起其他烏冬來講都算抵食，啲肥牛唔會話太多肥膏，啲肉味都好重，香過嚟打邊爐嗰啲。…查看更多

最近想對自己好一啲，食晚餐都會預先訂枱，揀一啲自己想食嘅嘢。之前試過同朋友嚟慶祝自己嘅生日，嗰次之後已經對呢間餐廳有好深嘅印象，因為佢會用霓虹燈嚟佈置餐廳，燈光昏暗氣氛好好，如果想同朋友嚟傾計嘅話，呢度會係一個好嘅選擇。外面門面同埋入面嘅裝潢都用咗霓虹燈，好配合燈光昏暗嘅環境，亦都好適合女孩子影相。好喜歡呢一句，係我人生其中一個座右銘。生存在世上就係要去享受，笑對生活，懂得去愛身邊嘅人，愛自己。除咗main外，亦叫咗一個輕食拼盤，薯條同炸蝦都幾脆，芝士條就冇咗嗰種拉絲嘅感覺，友人話炸蠔有一啲普通。Main我哋揀咗二人慢煮套餐，除咗有安格斯西冷牛扒，仲有豬仔骨，熟嘅程度啱啱好，平時唔係咁鍾意食肉嘅我，都幾乎食晒全部。套餐另外仲有肉醬長通粉，都算整得幾出色。我哋都order咗兩杯果酒，但酒味就唔係好濃，似係一杯溝淡左咗嘅果汁。建議大家都係叫返啤酒或者紅酒…查看更多

Moko入面好多都係貴價餐廳，想平平哋食餐$100留下嘅午餐，所以選擇去food court食。Food court入面有好多餐廳可以選擇，見到呢一間有好多學生哥排隊，就知道點都有啲水準佢哋嘅午餐餐牌有好多選擇，大部份都係$60留下嘅，今次我就揀咗咖喱魚柳蛋包飯，果然冇令我失望，佢啲咖喱汁好濃，魚柳都好大塊，蔬菜類可以多啲花款，份量嚟講對男仔來講啱啱好，我就最後都唔係好食得哂。下次再嚟moko嘅話，會再試吓呢間餐廳其他嘅蛋包飯。…查看更多

今日晏就喺九龍城有個活動，難得嚟到九龍城，咁就一定要試下泰國嘢食！朋友介紹咗我去Orange Elephant Thai Restaurant 到食晚餐，因為佢每日都有個$1優惠，星期一至日都有唔同唧嘢食㨂，星期一有泰式明爐烏頭魚，星期二有香茅炸豬排等等。六點半到嚟到，都唔洗排隊，去到七點出面就要開始排長龍，就知自己冇嚟錯餐廳喇！我哋兩個人食所以坐咗係門口位，個位都幾闊落張枱又大，如果多啲人食會安排入坐入面小小嘅位。嗰日係星期一，所以我哋以$1優惠買咗個泰式明爐烏頭魚一條魚一啲都唔多骨，肉币都好滑。配埋泰式辣醬都係好開胃！我哋都叫咗個咖喱海鮮脆包盅，會俾埋個鉸剪你去剪開個包，裏面主要有魷魚、蝦同埋魚塊，啲咖喱都好香，本身想叫多一籠包去點咖喱，但係已經好飽所以冇叫喇。亦都叫咗碟西蘭花炒鮮魷，唔會話太乾，鮮魷份量都好多。下次一定會再嚟，同埋試下佢嘅冬陰公！…查看更多