tammymot的個人專頁

當天是週年紀念，因為都想試啲新野，係openrice 見到呢間pizza 有個好特別既火爐去焗pizza。咁我哋無錢去意大利，唯有去一間咁有特色既意大利餐廳當去左轉意大利😅🇮🇹由於已經訂好枱，一入去餐廳，侍應已經安排好位置。佢好詳細咁介紹Menu。最後我哋點左3樣野食。1. 意大利Meat Balls (3.5/5)同想像中嘅差唔多，不過味道都有點鹹2. 焗茄子 (4/5)其實個味同meatball差唔多，不過焗得幾好味同埋個芝士好香, 建議揀呢個就唔使叫meat balls3. Margherita pizza (4.5/5)好味！亦十分傳統係個底燶咗少少，所以扣咗0啲分⭐️酒店級服務⭐️食完野，侍應走過嚟問我哋想食咩甜品。因為我懷孕，不能吃未加熱的甜品（因為我們覺得大部分的甜品是未經過加熱的程序），所以就同侍應講唔洗叫。佢個表情好似好出奇，並再次確認我們不吃甜品？我們回答“是”！特然，經理走過嚟同我哋講，因為今天是你們的紀念日，也知道你們的concern，他建議我哋可以試下chocolate walnut cake，會安全啲，而且佢會free畀我哋! 我哋畀佢嘅誠意感動咗最後留低食埋個cake！不用去意大利也感受到當地的熱情和好客之道，值得學習！會同朋友一齊再來！…查看更多

雖然唔記得咗影相，但係叫生煎包之前請諗清楚。因為同小籠包係一樣，只不過小籠包係蒸，生煎包係煎嘅！職員話這個是一口生煎包，所以同傳統的生煎包是有分別的…. 完全違反商品說明條例！大家小心中伏！…查看更多

呢間之前成日喺Instagram見到已經好想去，咁啱今日可以係佢未收舖之前去過嗰度, 就梗係要排隊試吓啦！1) 招牌Good Good飯(4.5/5)個食材幾新鮮，好有日本style，仲係日本珍珠米，係價錢貴咗少少姐！2) 納豆飯 (um....)其實我未食過，所以真係唔知點評價好唔好食，我諗呢個見仁見智啦！3) Tiramisu (4/5)聽講個甜品係會按季節去轉，今次竟然有我最愛嘅Tiramisu， 真係幾飽都食得落！味道唔錯，係冇乜蛋糕多咗少少cream! …查看更多

見到長沙灣呢個角落頭開咗一個文青小店，就梗係去試吓啦！我哋兩個人食完飯就唔係好肚餓, 所以叫咗個小食食吓。雞蛋布丁(4.5/5)見到呢個好多人叫都估應該唔差，所以就叫來試下。呢個真係好驚喜！加埋啲cream好味道, 同埋佢會有杯expresso, 比你按口味去落。咖啡(2.5/5)我哋叫咗凍mocha同埋熱Latte, 貨色真係好一般，唔係太抵因為凍飲有啲細杯，同埋mocha無咩咖啡味有啲似阿華田...不過隻杯就幾靚嘅。如果冇地方去都可以Hea一陣，因為鋪頭環境都好有品味! :)…查看更多

屋企附近見到有呢間餐廳，見到個餐牌好吸引就入去試下。因為夜晚同屋企人食，所以叫咗小菜。叫咗三個餸包括:1)花膠炆雞煲 (4/5) 一放上枱出曬煙熱辣辣。跟住試下個雞。佢有少少三色椒味，但少咗雞味，肉質都結實。但重點係個花膠好冧好入味，好好食。2)菜金銀花肉碎浸勝瓜 (5/5)講下賣相，分量都算多。跟住試下個味道，啲紫菜好爽口，用啲上湯浸住啲菜，好好食！同出面嗰啲唔同。因為落咗紫菜，感覺好新鮮。3)黑松露沙拉一字骨(5/5)面頭有少少黑松露再加上沙拉醬。一字骨炸得都夠鬆化，個味都好好食。成間餐廳都有啲裝修幾有特色同埋呢間已經係第二間分店，所以應該會有一定嘅水準。下次會試其他唔同嘅餸，值得推介。…查看更多

見到附近都好多餐廳都係要等位，但係又好肚餓要搵食喎，所以就諗住試吓呢間，因為只係等幾個位就到我地啦，所以排咗隊都唔係話好耐！馬來蝦湯配手撕雞河粉 (3/5) 其實個湯同埋個河粉都好食嘅。 湯底亦都充滿大蝦嘅味道，但係個蝦同埋啲雞就真係好老... 如果啲配菜係好食嘅話呢一個麵都係滿分㗎！喇沙雞飯 (2/5)個雞同啲菜都唔錯，但係嗰個汁就一啲都唔係喇沙汁。只係一個好普通嘅馬拉味辣汁，所以唔建議叫， 同埋佢嘅汁都唔係好多，好似茶餐廳會抵食好多咁。檳城白咖啡 (3/5)好似一般雀巢白咖啡咁嘅味，不過淡啲，唔知係唔係因為太多冰。…查看更多

平時都有啲人排隊見。見今日冇，就入去試下。 叫咗個魚柳蝦球忌廉意粉 (4.5/5)嚟咗之後，賣相唔錯 。跟住試下個意粉，個忌廉汁好有奶味，仲有啲三色椒味。茶餐廳有咁嘅味道真係好少有，好味! 跟住試下個魚柳， 肉質好結實，啖啖肉，仲有少少調味，好新鮮，唔似出面平時啲茶餐廳淋bet bet 。再試過蝦球，佢係炸過嘅，同埋調味過，咬落去好爽口好彈牙，好好食。雖然價錢係貴少少，但我覺得合理。因為味道同埋質素符合價錢，值得推薦，下次一定再嚟！…查看更多

呢間餐廳同啲食評一樣完全冇令我失望，係一間好有西餐感覺嘅中東菜。而呢個地方係一個旺中帶靜嘅街上面。成個晚餐嘅感覺都好chill! 我哋兩個人食，叫咗四個菜:1) Falafel (5/5) 同出邊食嘅size有少少細過，但係整體口感都良好，外脆內軟，同埋上菜時仲係好熱辣辣，超級新鮮！2) Hummus (5/5) 同平時嘅差唔多，但係佢嘅pita bread 簡直係一流，超級新鮮超級好食，我諗就算係冇hummus，淨係食個包都回味無窮。3) Wagyu Hanger (5/5) 冇諗過係呢一間中東菜上面都可以食到咁好食嘅牛，個牛煮得啱啱好, 同啲mustard sauce好夾！4) Cauliflower (不過唔記得咗影相添) (4/5) 呢個唔知係咪佢落得太多yogurt, 令到成碟菜都有少少酸，不過整體都好好，不妨一試。小結: 餐廳無收加一，而係按大家嘅意願去比小費，所以服務都比較殷勤。…查看更多

今日行完IKEA見，攰攰地所以就決定順便食埋晚餐先至走。而佢仲做緊一啲瑞典嘅節慶，所以個餐牌都有少少同平時唔同的。我哋今日兩個人就叫咗三碟菜:1) 瑞典凍蝦配羽衣甘藍及薯仔沙律 (4/5)呢一個十開胃，加埋少少薯仔沙律，其實一個人食呢一個沙律都已經飽飽地㗎啦。不過佢個沙律醬就只係得一個選擇，就係千島醬。2) 肉醬千層麵 (2.5/5) 呢度千層麵同出邊嘅有少少唔同就係佢有一層口口嘅芝士係面, 所以食落有啲溜。同埋肉醬稍為有啲少，唔係幾夠。3) 肉丸配薯蓉 (4/5)呢個每一次嚟到都必食嘅，現而家都仲係咁抵食$20有10粒。抵過出面食魚蛋啊！…查看更多

今日見咁好天就即興嚟咗西貢，一落車就好肚餓所以即刻去搵嘢食醫肚。行過呢間越南菜見到有好多明星嘅相，所以就心郁郁入去試一試！我哋兩個人就分別叫咗一人一碗麵:1) 越式牛肉湯河regular size (4/5)有驚喜！因為我本身仲以為只有得生牛肉，點知佢有好多唔同牛嘅部份，包括金錢肚、生牛肉(仲要肉質鮮嫩嘅)， 同埋牛丸、牛柏葉等等。個湯亦都係好清甜嘅，值得一試！2) 豬頸肉湯濛 (3.5/5)個豬頸肉稍為有少少過硬，不過整體啲粉都好有口感，天氣熱嘅話都幾開胃！整體餐廳都幾迫下，不過兩碗野都好大碟，我哋食完係超級飽已經食唔到任何小食。…查看更多

呢間位於長沙灣嘅隱世小店，對於愛好日本沾麵嘅朋友，一定要黎試一試。本人其實一路只會鍾意食拉麵，原因係之前食過幾次沾麵，都冇乜好感，但係呢一間小店完全改變左我對沾麵嘅睇法！櫻花蝦蕃茄沾麵 (5/5)呢個簡直係ICHIBAN! 湯底好濃郁，好有櫻花蝦嘅味道，然後番茄中的酸溜溜令我好有開胃嘅感覺，而且唔似之前食嘅嗰啲咁只係有油膩的感覺。值得一讚嘅係你食到咁上下，店員會主動問你需唔需要加湯，因為好多時我哋沾沾下嘅時候，會好快食到冇晒湯。水準同埋服務都值得一讚，希望小店不久嘅將來可以擴大，令到排隊嘅時間節省！…查看更多

嚟到澳門探朋友，就梗係要問下佢有乜嘢葡國菜好介紹啦，而佢就介紹咗呢一間佢由細細個已經食到而家嘅平民葡國菜。(我諗就應該好似我哋香港人食花園餐廳嘅感覺啦😂)我哋兩個人就叫咗四樣食物: 1) 薯仔菜湯 (5/5) 呢個湯本身冇咩期望，諗住應該好普通，因為都係想飲下例湯姐。點知呢個湯有啲似阿媽平時煲嘅西洋菜湯，再加上一啲薯仔，飲落都幾好味，完全冇菜嘅苦味。2) 炸馬介休球 (5/5) 完全唔油膩，而且外脆內軟，十分推薦，食葡國菜又點少得馬介休呢！3) 豬仔包 (4/5) 呢個豬仔包係要自己將啲燒豬柳擺入個包度，同出邊食嘅有少少唔同，你亦可以唔需要夾住個包去食。記得叫店員俾返啲茄汁你撈埋洋蔥同埋青瓜、蕃茄一齊食啊！4) 辣沙甸魚沙律 (5/5)話就話辣，不過其實都唔係太辣，同枱朋友唔食得辣嘅都完全冇問題。食到咁上下覺得個沙律有啲乾乾地嘅時候，記得問佢攞返一罐葡萄牙牌嘅橄欖油啊！成件事即刻有風味左！…查看更多

因為朋友介紹咗間cp值極高嘅日本餐廳， 所以放工同屋企人一齊食， 攞咗飛之後等咗20分鐘就有位 。我地叫咗:1) 吉列豬扒定食 (5/5) 等咗一陣就有得食! 先睇埋相非常吸引，個皮炸到脆卜卜、金黃色，下面有個網格咗啲油，十分細心。豬扒非常厚身，而且見到有肉汁，口感非常豐富，但最正係個蒸蛋超級滑，落咗雞湯去蒸， 仲有蟹柳同埋菇，非常有誠意！2) 炸雞定食 (4/5) 跟住到炸雞個皮都係炸到好脆， 雞肉多汁， 唔油膩 ，非常值得一試小結: 整體食物味道可以 ，而且有誠意。 只是環境坐得有啲迫。服務都 ok。見到飲我哋飲曬水 都會幫手斟返水。會再食！…查看更多

今日去沙灘之前諗住揀啲健康啲嘅嘢食，所以就去咗銅鑼灣嘅呢一間 elephant grounds! 鋪頭有外同內，但係我哋咁岩入面有位所以就坐咗係入面，如果鍾意曬太陽亦想享受下戶外空氣嘅朋友，不妨坐係外邊因為感覺好有外國feel。我同朋友兩個一人Order咗一碟，分別係:1) Hash brown with beef (4.5/5) 呢碟野其實整體來講都叫幾好食，同喺外國食嘅味道差唔多，但係個份量就稍為細碟左，呢個份量係比平時食嘅一半，一個人嘅話，你預咗要再叫另外一啲嘢來填飽個肚。2) Kale Quinoa Salad (5/5) 成個沙律汁同埋啲菜都幾好食，再加上好新鮮嘅牛油果，成個感覺都好健康。鍾意食沙律嘅朋友不妨一試，我一個女仔食完都已經啱啱好。小結:鍾意飲macchiato嘅朋友留意番, 佢呢度嘅係細細杯，而唔係出邊飲嘅好大杯嗰隻! 成間餐廳嘅環境都好有外國嘅感覺，一啲都唔似人來人往嘅銅鑼灣，雖然食物嘅種類唔算多，但好似每樣野都幾健康咁，下次都會再嚟，同埋要試吓佢個雪糕先！…查看更多

今日行到攰攰地都想搵間餐廳坐低tea 一tea, 之前去過銅鑼灣一間甜品舖食過嘅pancake食過返尋味，所以今日決定嚟尖沙咀呢間咁出名嘅日本pancake店試一試.... 我哋唔係等左好耐，大概過咗20分鐘就到我哋入去啦。比起之前銅記嗰間，哩到等得快好多，因為之前等左大半個鐘咁滯。我哋兩個人，決定一個試甜，一個試鹹:1) 原味疏乎里pancake(4.5/5):成個pancake好鬆軟好似疏乎厘甜品咁, 空氣咁一流，加上佢嘅蜜糖好好食，完全唔膩。不過就稍為太甜，冇咗pancake原先嘅蛋味。2) 蕃茄肉醬pancake (5/5):呢一個係鹹點, 同啱啱嘅完全好唔同, 有少少食緊正餐嘅感覺, 因為有意粉同肉，所以食完都幾飽，如果男仔陪女朋友嚟嘅話，食呢個應該會夠佢哋飽肚㗎啦。總結:個鹹點反而比甜點更加出色，好有驚喜！而甜點就唔知係咪期望太高，始終之前都要排好耐隊先可以入到黎。不過整體來講兩個都好好食，值得一試！…查看更多