Mingdon的個人專頁

做嘢做到三點都未食晏，於是冇諗太多就入咗呢間鋪。三點開始有早餐/下午茶menu 供應，所以叫咗個mini breakfast （$50），個餐本身跟黑咖啡或茶，但我加咗十蚊要Flat White，再加四蚊轉大杯。一見到份餐係用普通方包有少少失望，但係份炒滑蛋真心係好，滑得嚟非常夠熱，慢慢食都唔會凍曬，如果腸仔都再熱啲就正曬。煙肉唔係脆口果類但唔會覺得好油，放係塊包上面食啱啱好，等塊包豐富啲，又冇成啖肉果種罪惡感。雖然鍾意飲咖啡但唔算好識品評，總之係飲落舒服同開心嘅咖啡啦。五十蚊一個餐係尖沙咀有呢個水準都叫做冇咩可以嫌，希望下次幫襯可以試到啲驚喜菜式啦！…查看更多

是晚O大T，趁六點收鋪前衝落去Lungo買個Bagel 救一救命。入去見個Bagel格空曬以為售罊，真係嚇死寶寶，呢個霉紋食唔到真係會想喊。原來啲Bagel 只係收起咗。可惜，我想食嘅焙茶味都係買曬。（之前食過佢嘅焙茶味Bagel 真係好正，冇想像過Bagel同茶香咁夾）今次揀咗玉桂Bagel ，一拎出嚟就聞到香味，略帶甜味嘅玉桂香會令人有種特別暖嘅感覺，Bagel冇因為臨收鋪而影響質素，個邊脆脆地，質地濃厚有飽足感。拎到返公司仲好夠熱。入面啲cream cheese 一啲都唔孤寒，質感幼滑綿密，一啲都唔膩，食完口有餘香。今日趕得滯冇叫埋咖啡， 唔係加多杯Dirty就完美。講真對咖啡冇咩研究，惟一可以講嘅係，每次飲完Lungo嘅dirty都會覺得開心同滿足，就係咁。…查看更多

呢間新新地嘅西餐，環境好似唔錯，價錢又唔算超貴，一直唔明點解成日坐唔滿，話曬都係九龍灣工業區呢啲多人返工嘅位置丫直到親身入去，先發現中伏，仲要係一個隱藏得好深、睇外表點都估唔到嘅陷阱。先睇下呢個早餐，個樣係咪好正？正當我白痴地以為自己搵到隱世美食時，惡夢就開始⋯⋯係隻蛋出事呀！點解炒蛋都可以有一陣咁恐怖嘅味架！係腥味！血！腥！味！好似細個流鼻血然後鼻血倒流入喉嚨嘅感覺⋯⋯童年回憶（陰影）返曬嚟⋯⋯我真係恭喜我自己。其實，我地平時食嘅蛋即係冇受精嘅卵子，以及為受精預備嘅營養，以人類嘅情況嚟講，即係大姨⋯⋯媽呀！點解我要咁聯想呀？呢個世界仲有千千萬萬好味嘅雞蛋等緊我去品嚐架！唔係想玩自己，但真係控制唔到由味覺直衝大腦嘅思緒⋯⋯跟餐果杯咖啡，係我絕望中僅餘嘅一點希望，濃濃嘅咖啡，點都可以沖走果陣腥味掛，答案係唔得，即使將搽牛角包果啲果醬直接塞入口，再飲多枝綠茶，陣腥味都跟足我成朝。咁老老竇竇，啲蛋滑唔滑、牛角包同咖啡又得唔得先？蛋係滑嘅，但滑加腥先係最可怕嘅組合，我寧願佢鞋。咖啡冇咩大問題，我飲果杯係Dirty，附近有太多鋪頭好飲過佢。臨華街Lungo嘅Dirty正好多，有機會再講。牛角包我真係冇咩印象，唔難食囉，冇享樂烘焙果啲咁鬆脆。我估好多人出去食早餐，都會以隻蛋做靈魂，而一個暗黑嘅靈魂，足以令你跌入深淵⋯⋯後記：一星期後，我竟然想俾多次機會佢，然後經歷返一模一樣嘅事，同日，我發現間嘢係富臨嘅結論：我潛意識入面應該好憎自己…查看更多

雖然每次去Beans都會見到大排長龍，但實際等起上嚟又唔算好耐，通常15到20分鐘左右就可以入座。今次叫嘅係軟殼蟹松露意粉、蜜糖芝士薄餅、同北京填鴨漢堡。蜜糖芝士薄餅係屬於厚批，甜甜地幾好味。軟殼蟹松露意粉係咁多樣入便最好食嘅，軟殼蟹香脆、松露汁香得嚟又清爽，食完只會滿足唔會膩北京填鴨漢堡好得意，食落去真係北京填鴨一樣味，個包比普通漢堡細，同奶黃包差唔多，但加埋薯條、沙律都算夠食。因為堂食可以加25蚊換cake，所以我地又叫左兩件餅。呢個雪山我以為都係得個樣，然樣好甜好假嘅味，結果完全唔係！雪山外殼唔會超甜，內層係好香嘅咖啡味蛋糕！拿破崙蛋糕原來先係終極大佬！啲吉士好好味，比其他地方食到嘅吉士好食好多，酥皮亦都好出色。總括而言，今餐嘅贏家係拿破崙同軟殼蟹意粉！…查看更多

呢間位於工廈二樓嘅外賣日式餐廳或者未必好多人識，但其實佢所處嘅宏力工業大廈只係距離megabox兩分鐘距離。食商場食到悶嘅，最好就係幫襯吓小店。鹿良便當只有外賣，有9個常設餐，另外有四個每星期更換嘅菜式。大部分款式都係四十幾/五十幾蚊，如果外賣自取再減八蚊，所以我只係用左三十幾蚊就買到一個野菜天婦羅定食（包一盒檸茶），仲可以加十蚊換一份軟骨餃子（四隻），咁嘅價錢，邊度搵？本來以為係天婦羅蔬菜餅，打開後發現係一件件嘅蔬菜天婦羅，其中包括南瓜、椰菜花、茄子、杏鮑菇，其中椰菜花同菇都好好食！炸漿同蔬菜嘅味道都啱唔好，咸度一致，蔬菜食得出幾新鮮。軟骨餃子都唔錯，成餐性價比超高，同出面六、七十蚊貨仔比，一啲都唔輸蝕。加上款式勁多，鍾意食咩啲都可以揀到心頭好（佢地fb每個月會更新餐牌)。…查看更多

享樂烘焙位於九龍灣工業區最接近地鐵站嘅地點，最出名嘅就係佢地嘅得獎長法包：有一種其他店搵唔到嘅香甜味道。今日除咗長法包，我又試咗一款紫薯麻糬包。買嘅時候冇留心，以為係一般嘅紫薯包，點知一咬落去，先知包入面有軟軟嘅麻糬。白色嘅麻糬同紫色嘅紫薯味道勁夾，完全唔會太甜太膩。除咗紫薯麻糬包，享樂烘焙嘅粒粒芝士多士都非常出色，有機會我一定會試埋又靚又香嘅藍莓酥，仲有招牌嘅抹菜卷。每次係度買法包，店員都會主動問我駛唔駛切，切半定切片，又會提醒切咗次後要盡快食，否則個包會變腍，真係非常貼心。…查看更多

是日好鬼懶，唔想煮但又想飲湯，於是嚟到呢間經過幾次都未有機會嘅「大湯家」，入鋪頭時己過咗食晏時間，但係八個座位都坐滿一半。餐牌上有八款湯，各自有標明功效（當然睇完係一個字都唔會記得啦，不過對於選擇困難又唔熟識湯水功效嘅人的確係好有用嘅）。左度右度之下，我揀左椰子烏雞湯（全名唔記得），返去當晚餐嘅一部份。湯倒出嚟份量唔少，有大湯碗嘅大半碗。椰子同雞嘅香味都好強又好平衡。湯水一啲都唔油，好味又清爽。雖然湯料唔算超多，但係係百物騰貴嘅今日，都算係咁啦！…查看更多

由於疫情關係，多左叫外賣，今晚就試咗呢間喵盒子。晚餐主菜只有全日早餐同味噌茄子豆腐椰菜花丼，於是我同老公一人叫左一款嚟試。一打開外賣盒，見到顏色麻麻地（其實睇菜名就知咩色，係我白痴），點知食落非常驚喜！呢個「丼」係冇飯嘅，用椰菜花代替，勁啱唔想食澱粉質嘅人，雖然冇飯，但飽足感絕對足夠！至於啲「餸」，味道剛剛好，味噌唔會太咸，非常之正。…查看更多

第一次嚟呢間餐廳兼日本食材商店，雖然話係工業區，但其實由德福戲院過嚟唔駛5分鐘。麵鼓湯係自助去拎嘅，都好足料。我叫咗汁燒三文魚腩飯（$78），同伴叫左牛肉烏冬（$58）。個飯一上枱，我地就被焦香嘅魚皮吸引住，啲三文魚香滑得嚟唔會好油，魚肉大大舊，但食完唔會有罪惡感。至於伴碟嘅玉子燒，竟然出乎意料咁好食，甜度同咸度剛剛好，食完之後即刻買左一包返去。同伴話牛肉烏冬相當好食但唔及三文魚腩出色，飯後佢叫左一件千層蛋糕（$20），蛋糕入面嘅忌廉超級香濃！食完野我地買左少少食材，店員非常主動幫忙，聽講呢度嘅鰻魚飯好多人叫，下次一於再試！呢度啲小食幾乎都係20蚊以下，有機會點都要嚟食！…查看更多