星期六趁大姨由加國回港渡假，小姨提議到沙田龍華品嘗乳鴿，回味童年往事。登入「開飯喇」查詢訂位電話，卻見食評彈多讚少，頓然卻步。幸舅仔及姨甥女極力推薦，終可成行。幼時曾隨父親到此名店用膳，當時家貧，日常飯餸，菜多肉少，得初嘗獨食全鴿，滋味無窮，記憶猶新。餐前父與友人雀戰，孩童們無聊，便跑過店前鐵路，到海邊劃艇耍樂，轉眼四旬，鄉郊不再，只見石屎森林。今經營環境艱巨，此等老店生意定必因難，重遊此地，未敢期望過高。入座人齊，商量點菜，初定每人乳鴿一頭，家人多選原隻免切，亦心儀多款懷舊小菜。侍應卻提議化算套餐，湯餸飯俱全，再加乳鴿，配合人數。再參閱菜牌，套餐菜色一般，又欠風味情懷，如此選擇，何必遠渡前來，固堅持散叫。當晚客似雲來，全場爆滿，侍應招呼確有不周之誤，酒水久待，需親到水吧拿取。但見多位上年紀侍應，四處頻撲、落單、沖茶遞水、上菜、擺檯執檯，一腳踢，不忍責難。乳鴿先到，見狀可人，我等急不及待，手到拿來。油炸火路適中，皮身略肥，卻不燶不膩，又因全鴿上檯，皮保肉濕，汁豐味濃，軟滑可口，未幾盡嚼腹中，此際十指油脂，不在話下，幸好洗手茶缽及時送到。其他小菜，生炒排骨、西檸軟雞、魚腐雜菜窩、薑蔥焗魚雲煲、魚肚浸時蔬，分量味道，中規中矩。拙荊好粥，席上雞粥不可缺，粥底綿滑，雞味馥郁，一窩不夠需添食。主餐用畢，叫一窩招牌甜品豆腐花。片刻一碟蒸釀百花豆腐出現，甚感疑惑，查單後，知侍應弄錯，豆腐花變豆腐蝦，惹來大笑一場，但見賣相不錯，雖肚已飽，亦樂意受下。終見甜品前來，豆腐花一大窩。腐花不熱不冷，起初有點懷疑，食落尚算滑口，加點桂花糖漿，錦上添花，瞬間全清，欲添食兩桶，但傳菜員通知沽清，落單侍應不信，親到廚房提取。三句鐘飛逝，肚滿腸肥，承惠每位佰八，雖不算便宜，但地方鬆動，又不迫客人限時還檯，適合家人共聚聊天。飯後又到前園流連，拍照盡興，樂極忘形。結數忘記對單，回家才悉誤點的「豆腐蝦」不在單內，雞粥來兩窩計一窩。心中承諾，下次光顧，會多付小賬。順帶一提，店內露天處處，我非煙民，卻戥好此道者安慰，欲嘗飯後煙之樂，無需遠跑。雍雅山房已去，容龍別墅、山頂餐廳，不復前貌。香港商場林立，連鎖食府充斥市場，重效率輕人情。龍華酒店，碩果僅存，未遭地產海嘯蹂躪，希望良心老闆，多守一天，食客多點幫襯，好等老員工得保飯碗。…查看更多
