ninnismile13的個人專頁

早排同中同姊妹聚會，佢不嬲都鍾意食韓國野，見到旺角兆萬呢間Yadllie Plate好似唔錯就OpenRice book左枱同佢一齊挑下機啦！-其實兆萬嘅餐廳真係「威名遠播」，亦唔敢盲目信食評，都係抱住試下嘅心態去。餐廳係11樓，要先上扶手電梯到3樓左右再轉低層lift上去。-餐廳內部都好闊絡，唔會感覺好逼或者坐得唔舒服。我同小姊妹唔洗等，好快就被分派到去一個卡位。-每個卡位都有充足嘅紙巾、濕紙巾、牙籤同手套。-先黎嘅係黃金蒜香無骨雞，超香！用左蕃薯條鋪底，雞件乾身唔係熱氣脆口果種，表面油亮，側邊仲有四塊蝦片，面頭鋪上乾蒜片同蕃茜，淨睇賣相都覺得吸引。-每人嘅碟有一隻匙羹同一支夾，食炸雞一流，完全唔沾污手，仲夠環保。-無骨雞就係食得夠爽，啖啖肉！趁熱食調味一流，面層似刷左層蜜糖咁，甜中又帶有濃濃蒜香，皮薄，雞唔算柴，咬落去仲好juicy，值得我分個獨照比佢🤣-之後因為我食唔到辣，小姊妹遷就我，叫左魚介湯鍋。左上角係係蔬菜格，應該係娃娃菜、白蘿蔔、冬菇、金菇同真姬菇（鴻喜菇）；左下係年糕、雞蛋、魚豆腐；右上邊上下都係唔同類型嘅魚糕串。上面係切絲嘅京蔥同木魚絲。--魚糕串無韓國食果種口感，同埋連豆腐都係魚豆腐，食左一大堆魚味澱粉類，難免有啲膩⋯最無奈係其實個爐只係暖住，應該唔for煮熟，年糕同菇都煮左好一段長時間先熟，但年糕係無味的，而娃娃菜同白蘿蔔甚至係煮極都好生，所以都比較失望。-平心而論，都有可能前面無骨雞濃味得黎又太出色，後者湯鍋屬於淡味，一比較下注定失色。-整個魚介湯鍋份量都大，建議4-8人先好叫，如果唔係真係好dry好濟⋯-中午食飯係OpenRice訂坐有九折，性價比都幾高，坐得都舒服，店員全部都有禮貌，已經同朋友推介佢嘅無骨炸雞。…查看更多

事緣兄弟講我知牛頭角開左間日式拉麵🍜我就黎睇睇點解崇尚日本文化嘅兄弟都會推薦呢間店啦！-一走入木門就係廚師面前嘅吧台，後面有置物籃可以擺物品。-餐牌只有3款雞白湯拉麵，可見廚師係專心一致去做一件事情，有種日本職人精神嘅感覺。-點餐紙畫單，可選白麵定黃麵。除左一般走蔥選項，仲有少鹽選擇，非常細心。-🍴瑪瑙瑙麵，走蔥熱碗上枱，面頭係打成泡沫奶白色嘅雞湯。明顯見到2款唔同嘅雞肉，口感味道都各有特色，再添層次感。-撥開泡沫，是清爽泛黃的雞湯。由於打左泡，湯會較為溫暖，而唔係熱度燙口嘅感覺。-麵身掛湯程度，睇圖都知道。本身仲好擔心會唔會有洋蔥留比我，超開心，真係乜蔥都走晒！☺️-🍴朋友點嘅版本，加紫菜-食完最大記憶點係佢雞湯底清爽，連我前一日腸胃炎都仲食到就知道。的確有種係日本亂入一間拉麵小店嘅感覺。…查看更多

入梅窩之前睇左網上玩樂美食推介，知道星期日剛好有得食蟹茄湯檬😋我咁鍾意食蟹，真係唔會放過試佢嘅機會！-店舖要由碼頭行一段路先過到去。網絡寫話係津津食店，好彩店門外掛左隻大蟹嘅公仔，又寫明有蟹茄湯檬，9秒9入左去坐🤓店舖係冰室果種感覺，望下啲地磚同卡位，好有懷舊風味。-點左心心念念嘅蟹茄湯檬，仲點左下火嘅咸檸雪碧。-🍴蟹茄湯檬我嘅走蔥走芽菜版本。首先一上枱，個湯真係好香！話明蟹茄，蟹嘅鮮味絕對突出過蕃茄味，仲有豬肉嘅香味，香濃鮮味食到停唔到口。料方面，有蟹蓋、蟹身、蟹鉗、蕃茄、大大舊豬骨，仲有好多肉碎，都幾豐盛。另外匙羹上放左青檸同辣椒，喜酸開胃同食到辣先加，唔食嘅辣又唔食酸嘅隨便夾返走，單純佢湯底都夠你開心食到清底。屋企人食嘅正常版本。-🥤咸檸雪碧可能係響澳門飲左杯更濃味更出色嘅，只覺得中上，但必然夠清涼，飲一啖即解暑熱咁款。-感覺全部店員連收銀都好友善，員工主動又識補位，連找錢都極好笑容雙手遞出，好感動🥹可能呢種就係離島特色，遠離市區嘅煩囂都比較平和友善啲。-本身仲覺得店舖唔係中心地帶比較難搵，但後來發現呢間店舖左右路口繼續向上行都可以通去瀑布，算係一個中心點。再入梅窩都會想再食呢間店舖❤️…查看更多

我阿姨之前食左北京樓嘅午市北京填鴨餐之後，一直向我強烈推介，所以我都決定帶屋企人黎試下⋯-正常飲茶地方，人流都比較多，剛好星期日，都真係需要等耐啲時間先有位。-叫左我阿姨推介嘅$398震撼午市套餐，有胡麻醬什菜蘋果沙律、時菜鮮魚羹、北京宮爆蝦球、烤北京填鴨半隻、北京人家小蔥伴麵、蟹粉小籠包同香滑椰汁糕，好似幾抵食又豐富！-🍴胡麻醬什菜蘋果沙律沙律菜款式算多，種類豐富，加左少許煙肉同蘋果，松子似乎無烘過，汁醬剛好，多彩但略為失色。-🍴時菜鮮魚羹整體很碎嘅羹，有菜有蛋有魚，口感上可以更好。好似仲加左啲莞茜定蔥，最初食唔到都還好，一食到就怕怕了。-🍴北京宮爆蝦球蝦球大大隻，甜中帶辣，味道出色，配佢較為素淡嘅小蔥拌麵最好。-🍴烤北京填鴨半隻半隻烤鴨份量豐富，上枱又體面，的確幾開心。烤餅薄而不透，鴨香有油，但包嘅配菜不太合我胃口，淨包住鴨肉食都開心😆-🍴北京人家小蔥伴麵唔好誤會佢汁醬少，撈一撈，食落都香，夠味，簡單得黎啲麵唔會一餅野。-🍴蟹粉小籠包小籠包都幾爆汁，但似乎可以再香啲。-🍴香滑椰汁糕食完咁多野食返個椰汁糕真係好清爽。-整體黎講未算超好食，但會覺得幾抵食又體面，菜式又豐富，一個下午食到咁多款，食落都幾開心。…查看更多

入新界區感受下大自然氣息，上網睇到呢間餃子店門面餐牌都有少許設計，加上餃子圖片好似煎到金黃色幾吸引，二話不說揀左佢做午餐。-店舖座位唔算多，但坐得寬敞，午市時間人流較多，都幾旺場，由學生到上班族都有。店員落單好熱心同友善，服務態度優良。-🍴黑松露香菇鮮肉餃由於煎餃需時，都等左一段時間，見到餃子煎到金元寶咁嘅樣就更加肚餓。一咬落去，夠脆夠香口，但又唔會乾到覺得好熱氣。食落皮夠薄身，肉同菇味會較黑松露突出，黑松露嘅香味似慢慢滲出黎，稍稍提鮮調味嘅感覺，唔會好霸道，整體都好符合我口味。-🍴蕃茄薯仔魚湯上枱時明確聞到湯嘅香味，蕃茄味略有不足，勝在整體鮮甜，搭配煎餃幾好。-🍴麻香三椒鮮肉餃先後發生煎錯餃同漏咁隻嘅意外，但店員上菜時都會好快發現同即時處理，對客人亦好有禮貌咁應對，值得一讚。屋企人就叫左另一款麻香三椒鮮肉餃，有麻香但唔麻，亦唔辣，三色椒甜味突出，好似濃味中嘅清泉，配搭新奇又吸引。相對上，呢款餃會比黑松露餃更濃味，千祈唔好誤會佢清淡。-🍴酸辣碗仔素翅叫得酸辣湯都真係辣嘅，唔食得辣嘅人真心可以放棄唔需要試，真係會食唔到。佢辣會比酸明顯，但呢碗翅好足料，每啖都會食到荀、肉、翅，只可惜酸辣湯真係唔適合我。-整體食物同餡料配搭都吸引，服務又好，煎餃脆得黎，食完唔會覺得喉乾上火，路過會考慮覆桌再食😂…查看更多

次次見一幻都要排隊入店，有次下午路過見佢唔洗等，入去試試佢先！-幾鍾意佢呢種座位，好有日式感覺。-原來海港城分店14:30-17:30係下午茶時間，店員亦有主動提醒，非常貼心。-🍴茶餐招牌蝦湯拉麵揀左原味、味噌、幼麵、無蔥同有麵酥。湯底除左有濃濃蝦味之外，仲有啲蒜味，算係濃而唔膩⋯叉燒較肥，幼麵只係正常粗幼，稱唔上係幼麵，有100g夠晒我呢種食量細嘅女仔食，而麵酥薑味好香甜，可增加口感同味道層次。總覺得佢嘅麵太普通，只係喜歡蝦湯嘅人會比佢湯底吸引左，對於我呢啲唔係特別好蝦嘅人黎講，整體我只會評佢一般。-🍴茶餐餃子🥟小食揀左餃子，好基本嘅日式菜肉餃，但煎得幾香口。-🥤茶餐可樂基本可樂，高身罐樂靚，但對於極少飲soft drinks嘅我真係偏甜，間唔中飲一兩次好啦⋯如果佢可以唔要可樂，似日本咁比杯冰水我，其實我都唔介意，畢竟我對茶餐呢個價錢份量都很滿意😂-平時餐牌拉麵基本上就$78-88左右，選擇上麵都比較簡單集中，有種日本人專注嘅感覺係到。-有次我照午餐時段入去，被安排坐吧枱，行到入去發現，吧台居然係海景！望住呢個景，自己一個食都食得開心啲。-同場加映，正常份量比較多，食量細嘅就盡量揀返茶餐啦！至於無糖綠茶，真係無糖，淡口的，應該唔係我杯茶🫣-茶餐對於食量細嘅我係有一定吸引力😆雖然同我理想中嘅拉麵有一段距離，但係值得帶喜歡蝦嘅朋友黎試下，相信佢哋會好喜歡個蝦湯🤭…查看更多

平日得閒入左赤柱放放風😌入到去都午餐時間，行到美利樓見到路牌指引，Set Lunch又唔錯，就隨便揀左呢間餐廳🍽️-入座時，店員特別問想坐室內還是戶外。室內係木質歐式古典風，擋風較暖；而戶外係望海嘅居高點，部份更加係打卡靚位，風大但有暖爐。入得黎赤柱放鬆，當然望海食野更開心。-戶外枱凳唔錯，唔係劣質木枱。餐具略重。水就感覺似生水，我同朋友都怕怕。-🍴鮮製蕃茄麵包麵包香脆，蕃茄配黑橄欖開胃有特色。-🍴香煎法國鵝肝配黑醋汁我心心念念係尖沙咀日式居酒屋食過好好食嘅鵝肝多士，所以Set Lunch前菜揀左鵝肝。鵝肝厚切，油香濃郁，但羶味較重，需要配合佢嘅黑醋汁平衡味道。-🍴即開生蠔兩隻朋友揀左即開生蠔，當日係南非生蠔🦪厚肉多汁，清新，唯甜味稍有不足。Go ahead & Get Dirty濕紙巾😂-🍴是日餐湯是日餐湯係南瓜湯，香，甜，又夠熱，而我就喜歡加啲pepper調味⋯最欣賞夠熱嘅食物，吹住風，食到底都仲夠熱度。-🍴美國特級肉眼牛扒配自家製砵酒汁美國肉眼當然夠牛味，煎得剛好，亦夠香，配菜略有調味，可惜牛扒中間有筋。-🍴比目魚柳配大蒜燴薯仔魚煎得夠香，皮脆，但略腥，唔知係咪燴嘅湯汁累事。蒜味唔出，大蔥更出，薯仔無乜味。老實講比較失望。-🍴伯爵茶餐茶揀左伯爵茶，Twinings嘅伯爵茶依舊香味撲鼻，一定遠比杯水同魚柳好。-🍴綠茶拿破崙Set Lunch 甜品有半價優惠🎉聽見有綠茶拿破崙當然要試下⋯賣相色睇繽紛，雜果選擇多，應該面頭有淋上芒果糖醬，平衡酸度，但唔會過甜。拿破崙唔係薄身酥皮果種，而係偏厚身近似餅乾果種，中間係吉士加芒果，餡料對比餅身較少，入口偏乾，勝在味道唔錯，唔食芒果嘅我都照食晒落肚⋯-Set Lunch食物質素只算中等，不過餐廳風景優美，坐得舒服，店員有耐性又反應快，服務良好，係個唔錯嘅望海放空之選😌…查看更多

屋企人本身好少提早book枱食飯，都係視乎當日胃口而去決定。由於之前已經同媽媽食左比較油膩嘅日式燒肉，所以當晚揀左緻素坊嘅新派素食，聽聞好難得Walk-in有位，超幸運❤️-🍴粟米豆腐羹本身想試瑪卡湯，但無晒，改試粟米羹。濃稠度剛好，豆腐軟滑唔零散，但粟米疑似罐頭粟米，整體偏甜，略為有點失色。-🍴緻素坊片皮鴨呢度嘅片皮鴨係必食推介，我地梗係叫黎試下！配菜有胡蘿蔔、青瓜、甜椒同哈蜜瓜，色彩同選擇上都好吸引；而素鴨皮素鴨肉，一脆一Juicy，素鴨皮中間仲夾住啲辣椒片帶微微辣度，提升香味。以薄身餅皮包起所有配料，加上適量嘅汁醬，唔止層次豐富，整體又fresh又香口，真係一試番尋味！-🍴有機薯淮山浸時蔬蕃薯有黃心番薯同紫心蕃薯，軟但唔爛，洽到好處，加上爽口嘅淮山，仲有黑木耳同白菜，唔同顏色嘅蔬菜齊集，好有營養，味道清雅。-🍴川式擔擔淮山麵呢個擔擔麵一上枱已經聞到佢嘅辣味同花生香味，面頭有少許素肉、花生同芝麻。麵條唔爛有口感，味道濃郁，辣得過癮，但對於食唔到辣嘅我就需要飲多啖茶，麵條唔爛有口感，有出乎意料之外嘅驚喜⋯-整體評價偏高嘅一餐，色香味俱全，高質新派素食，營養豐富，價錢相宜，會推介比朋友👍🏼…查看更多

工作完同同事走去登龍街搵野食，行行下見到一間其貌不揚嘅餐廳，但心諗開得係呢條食街都應該有返咁上下水準，見到餐牌嘅藥膳罐湯又幾吸引，就決定入去再慢慢揀⋯-🍴麻辣口水雞罐湯刀削麵口水雞少麻少辣夠香口，仲有啲花生添。而熱鍋上枱嘅藥膳湯同街尾另一間湯麵完全唔同style，街尾嘅偏甜，而呢間就多返幾分藥材味。平時食開幼麵嘅我，意外發現刀削麵呢種粗身麵嘅美好，好有口感。-🍴糖醋魚罐湯年糕魚塊大舊又啖啖肉，夾埋藥膳湯in in un un 嘅年糕，好飽肚。-雖然論裝潢感覺佢就唔吸引，但姨姨們嘅友善勤勞同埋佢嘅熱鍋藥膳湯就係佢嘅賣點。…查看更多

我同朋友幾丁友去大澳虎山行山，入到去都兩點半，諗住隨便入一間餐廳食野，就去返上年去過果間海鮮餐廳求其食下。-🍴粟米魚肚羹魚肚爽口，羹嘅黏結度剛好，唔會太水或者太糊，味道略嫌唔夠，加埋胡椒粉就好好多啦。-🍴海蜇墨魚餅墨魚餅表面夠乾身，無比鋪底嘅海蜇整濕，口感屬於比較實在，實的的嘅，都香墨魚味；而海蜇就爽口，偏淡調味，兩者不過不失。其實海蜇同墨魚餅係真係完完全全兩樣野分開，無互補無加乘，同埋必須講一講果個勁淡口嘅咖哩汁，完全唔知咩事。-🍴酥炸生蠔我上年都有叫酥炸生蠔，生蠔同樣大隻鮮甜唔會腥，好食，但今次個粉厚左啲啲，同埋整體油左啲啲。可能今次休息緊求其煮，上次中午人多時食就比較乾身。-🍴蝦醬炒通菜滿滿蝦醬香，但唔死咸，菜都翠綠嫩口無渣。上年都係有點呢個，因為另一個菜無晒，所以照舊叫啦，但呢碟菜又係比上年落油重手左。…查看更多

有啲朋友特別喜歡食蝦，知道香港有幾間係夾啲游水大頭蝦燒黎食，我地最後揀左呢間蝦蝦燒。-位置都好方便，都幾近佐敦地鐵站。上網訂左位，7點半都唔洗等即時入得。-舖頭地方好大，內部環境都算企理乾淨，見到啲員工每完左一枱就好勤力咁清潔掃地。地下乾淨衛生真係觀感差好遠，感覺好企理。我張凳有啲水，姨姨都好友善咁幫我。-🍴鹽燒大頭蝦一入座已經準備好一盤加左鹽嘅蝦。本身我都驚驚地呢盤會唔會係死蝦，但食落又無咁糟糕，得2-3隻嘅蝦肉係霉嘅，鹽嘅調味好足，燒起黎好香口。都市人好多都有過敏症，食左唔新鮮嘅海鮮就好易起敏感，但so far佢無令我同朋友敏感大爆發。-🍴調味爐邊有粗鹽、辣椒粉、孜然粉同椒鹽，自己選擇。-🍴白鱔訂座送嘅白鱔，已經加左汁醬，味道唔錯，因為肉都厚身，可以燒耐啲。-🍴扇貝人拎我又拎，人地夾好多扇貝，我又跟住拎返隻。人地出面拎配料整左個泰式蒜茸辣椒舖面，我就揀左牛油蒜茸，燒出黎嘅扇貝香甜又多汁。🍴白蜆、蚌定唔知大蜆似蚌定大蜆果隻好味有肉又易開口，白蜆都都可以但有機會有砂，只係唔太識燒，燒到乾水。🍴翠肉瓜我嘅串燒必食之選，翠肉瓜淨燒、椒鹽定加啲牛油都一樣咁好食。🍴雞軟骨、雞皮下面仲有層架可以燒串串，慳左時間，建議分好左右乾濕去燒。雞軟骨同雞皮燒出黎好香口，好好食，早知應該燒多幾串。-🍴游水大頭蝦大頭蝦鮮甜彈牙必食！記得裝半桶半水半冰，凍暈啲蝦去燒。朋友覺得好好玩，啲蝦好生猛，一直會跳，就睇你同隊友點配合啦。-🍴金菇肥牛卷細細卷金菇肥牛，都係串燒必食item，真係會食上癮，佢唔會太大件咬唔郁，呢個size一流。-🍴多春魚加啲椒鹽就好有細個食果種風味，唔會太腥，都真係多春。可惜成日顧住食，好興奮咁不停燒，好多都已經忘記左影相。-🍴雪糕朱古力同雲尼拿基本野都有，仲有士多啤梨同芋頭。我揀嘅朱古力唔會死甜，不過不失，可入口。-場內飲品、海鮮同其他野食款式都幾多，每次出去都搵到好野食埋位繼續燒，連大眼雞魚都有，真係好食又好玩，不過燒燒下時間都過得幾快。抽風系統唔錯，燒完都唔會成身好大陣油燒味。要數唔好嘅，就係爐唔算大，加上海鮮會滴水，要好好分配上下層去燒先會燒得多。同埋本身座位近水又近爐，筷子都表示好熱，要挨住椅背食或者轉坐近走廊就比較好，但同一枱總有人要坐呢個位，而近走廊都會因為勤力嘅員工要清垃圾，經常都會有垃圾車經過，可能我剛好走廊有柱頂住先咁，問題都唔算大。整體感覺都很好，好食又好玩。-人生第一次打食評被退回，話餐廳有用餐款待過比其他OP會員，但我係到強調我地係自費去食架。…查看更多

本身同朋友聚會都去開尖沙咀果間，今次衝出九龍。原先想中午同姊妹去灣仔果間，但因為一啲意外，最後變左夜晚先去銅鑼灣果間食，真係無論點都要食到Pici😂-果日銅鑼灣店比較少人，安排左我地三個坐吧枱位，可以望住廚師們分工即場整意粉煮意粉😆-🍴Bread 包果日嘅包竟然係脆，勁開心，但真心間間平時都會係濕氣重啲，有咬口啲。麵包點啲黑醋加橄欖油真心香，開胃。*第二次食銅鑼灣店時嘅補圖，所以張枱唔同-🍴Mediterranean Salad 地中海沙律(素)由於我腸胃不太好，朋友想叫前菜，遷就我唔叫Tartare，揀左個沙律。除左幾靚嘅生菜同苦苣，仲有蘋果、Pecan同Feta Cheese。蔬果爽甜，加埋Pecan同Feta Cheese嘅香味，口感又好豐富，一試就喜歡上。*第二次食銅鑼灣店時嘅補圖，所以張枱唔同-🍴Tagliolini Truffle 鮮刨黑松露細扁麵(素)每次都無法抗拒呢個黑松露細扁麵，明知有咁多選擇都忍唔住要揀佢。黑松露同醬香不在話下，比起尖沙咀分店，銅鑼灣分店嘅麵身更有彈性同有更豐富嘅蛋香，有驚喜。-🍴Double Ravioli Pumpkin & Ricotta 南瓜芝士雙重意式雲吞配辣肉腸牛油汁朋友揀嘅意式雲吞淨睇賣相已經比尖沙咀店吸引，起碼唔炒車先。朋友都表示好食，但由於佢芝士比較重，要小心會膩。-🍴Tiramisu 提拉米蘇唔少得必食嘅甜品啦，再飽都要裝埋佢地甜品落肚。入口夠凍，香濃，重點係有返啲層次，因為試過好多次尖沙咀店會少左佢中間嘅layer又或者啲層次消失到勁唔分明。-不得不說，無對比無傷害。-兩個星期內即刻帶同朋友再訪銅鑼灣店，第二次去果晚人流比較多，需要等位，但食物依然出色。麵包變返正常冧身嘅，但同樣有食Mediterranean Salad沙律同Tagliolini Truffle松露麵，依然好味。-🍴Pappardelle Beef Cheek 慢煮牛面頰寬帶麵同場加映其他朋友第二晚試嘅意粉，明顯食到呢間牛肉嘅香味同意粉嘅蛋香味比較突出手，麵身真係比較有彈性，連平時唔多喜歡寬麵嘅我都覺得出色。-只能說食完佢地手工意粉真心返唔到轉頭，而家出街唔敢隨便揀食意粉，怕自己內心會比較，心心念念都係手工意粉。…查看更多

去港島做野中途走去銅鑼灣中場休息，記得之前去完迪士尼係奧運食過HABITU嘅椰菜花飯，順便去希慎果間食下休息下先。-🍴Garden Lemonade檸檬汁加上香草同薄荷，酸就一定架啦，但又未至於酸到難以入口，反正有種酸爽醒神同清新嘅感覺。-🍴Cauliflower Risotto椰菜花飯一上，勁香。幾款野菌炒過好香，椰菜花有口感，面層應該仲有少許芝士粉，整體略酸同食耐左會膩。好彩我有杯Garden Lemonade 開開胃，配搭起黎都幾唔錯。…查看更多

除左一般香口野，我有時都喜歡食得健康啲架！係銅鑼灣下午想食得簡單健康又有營養，我就會揀Muji cafe嘅三品或四品料理。-🍴餐湯套餐入面會跟埋餐湯，唔係一般淨麵豉湯，會有埋白蘿蔔同菇菌，好豐富。-🍴芝麻醬拌菠菜冬菇好多間餐廳嘅拌菠菜都係我嘅first choice，因為我太喜歡有芝麻香又易入口嘅菠菜。Muji cafe嘅拌菠菜每條都有足夠醬汁，但佢硬身嘅紅蘿蔔絲太多。-🍴烤南瓜雞肉沙律相比之下烤南瓜雞肉沙律嘅南瓜夠香甜，菜夠冧身，驚喜到我連佢紅洋蔥都肯擺入口食埋。-🍴黑醋醬汁炸猴頭菇甜酸中和，味道合心意，好開胃。紅黃椒好吸味，但菇偏硬。-🍴醬燒盲鰽魚魚燒到好乾身，面頭有乾左嘅菠蘿，皮同肉都好有醬嘅香味。-🍴十六穀飯飯係健康十六色米，食唔出全部十六食，但我喜歡健康飯，有啲有啲人會怕健康米煮唔夠軟頂胃，但佢嘅飯身絕對夠軟但又唔會太濕，啱食。-喜歡佢醬汁唔同會盡量分開擺放，一碟慳碗碟但都盡量唔會搞到混醬炒晒車咁。環境略嫌偏凍，熱食都勁快吹凍晒。…查看更多

剛好見大戶foodie介紹呢間，心諗藍田就有分店，梗係買黎試下啦⋯-揀左招牌燒豬手飯。豬手絕對有驚喜！由返到屋企打開食，直到最後一啖都依然脆口。成件豬手肥瘦筋位都剛好，唔會難以入口。味道上唔會太咸，配飯食啱晒，派對送酒做下酒菜都應該唔錯。其實唔洗汁都可以，佢蒜茸汁真心超蒜茸，我有啲怕怕，同埋佢比汁都唔慳家，比得好大方，但下次我會叫無汁比較啱我😂…查看更多