junkjunktasty的個人專頁

公司附近新開嘅酒樓，收工同另一個同事探方便就試吓。雖然地點唔算好方便，但勝在坐得舒服，嘢食性價比高，同埋最值得一讚嘅係呢度服務員嘅服務真係非常好，每一位都親切有禮，服務周到。嘢食選擇都好多，但因為只係得兩個人，只嗌咗三個餸，但都幾有驚喜～蜜汁叉燒王：叉燒每塊都好厚切，屬於半肥瘦既叉燒，咬落去，外面微微焦香，裡面肉質軟淋淋，一啲都唔韌，仲有少少肥膏係邊邊，入口即化。蜜汁甜度啱啱好，唔會死甜，仲帶少少鹹香，同豬肉嘅鮮味超級夾。薑蔥鮑魚雞煲：嗰煲仔一攞上枱，吱吱聲響，熱辣辣，已經聞到好香嘅薑蔥味。鮑魚size一d唔細，咬落去又爽又彈牙，一啲都唔韌，仲要好入味。至於啲雞件，師傅火候掌握得啱啱好，連雞胸位置都唔「鞋」口，仲索晒啲薑蔥同鮑魚嘅精華，味道一流。蜜汁炸茄子：碟嘢一上枱，賣相已經好吸引！金黃色嘅茄子件排到靚一靚，上面淋滿閃令令嘅蜜汁，周圍有粉紅色嘅米通碎做伴碟，炸茄子外層脆到不得了，係真係酥脆嗰隻，一啲都唔油膩。入面嘅茄子肉居然保持到超軟滑，同外面個脆皮形成超正對比！個蜜汁帶少少酸，好醒胃。雖然係炸物，但食落一啲都唔覺得滯。贈送甜品紅豆沙：一望落去已經知道呢碗紅豆沙一定係又綿又密，一啲都唔水汪汪。啲紅豆煲到起晒沙，口感順滑，係真正嘅「沙」嚟，但係又隱約食到幾粒完整嘅紅豆，增添口感。甜度亦調得啱啱好，係清甜唔膩口嗰種，食完成碗都唔會覺得漏。…查看更多

應該係人生第一次去石門，做完回鄉證順便食埋晚飯，原來嗰頭都好多小店。行過舖頭聞到好香嘅雞煲味，朋友就話不如入去試吓😸✨滋潤椰子雞煲（半隻）：個煲一上枱，睇到啲湯清到見底，店員現場拎咗一個新鮮椰子過嚟，即場開，椰青水即刻倒入湯底，椰肉都起埋，成個一齊放落湯鍋一齊煲👍一路煲都聞到好清甜既椰子味，第一啖梗係飲湯啦！哇，真係甜到呢～唔係死甜，係好天然嘅椰香，飲完成個喉嚨好舒服。跟住落雞，皮爽肉滑！點埋佢哋嘅沙薑，真係冇得頂，個鮮味即刻出嗮嚟！湯底入面本身仲有竹笙都係精髓，竹笙索哂啲湯，咬落去一口爆哂湯汁。✨十優狀元丸：個名改得好特別，其實係由五款唔同口味嘅丸拼成，每款有兩粒，有鯪魚丸、墨魚丸、黑墨魚、蝦丸、黑松露墨魚丸。蝦丸特別爽口彈牙，個人最鍾意黑松露墨魚丸，好濃嘅黑松露味。✨頂級雪花肥牛：呢款雪花肥牛嘅油脂部份比想像中少，啱晒追求健康嘅人士。食落非常有牛味，而且完全唔會鞋。✨脆肉鯇魚腩：呢個係最有驚喜，首先份量比想像中多，每一片都切得夠厚身，然後食落每一啖都真係非常脆同爽口👍✨萵筍片：呢度嘅鍋片就切得比較薄身，所以放落鍋底煮一煮好快就熟，萵筍片夠嫩唔老，唔會食到根。…查看更多

成日經過都比門口大大張既開心果甜品poster吸引，而且餐廳裝潢風格清新簡約，睇返餐牌價錢都相當合宜。今次叫咗個二人餐都好抵食👍✨是日餐湯-甘筍湯：湯色橙橙黃黃，一睇就知好足料。口感順滑，完全冇渣，應該係打得好細緻。味道方面係好濃郁好天然嘅甘筍甜味，飲完成個口都係甘筍嘅餘香，好舒服。✨田園沙律：配黑醋汁嘅沙律菜好清新，好啱餐前食。✨風乾火腿伴哈密蜜瓜沙律：火腿嘅鹹味非常突出，帶住油脂嘅甘香，但一咬落清甜多汁嘅哈密瓜度，個味覺即刻平衡返。哈密瓜嘅甜味好似爆出嚟咁，完美中和咗火腿嘅鹹，加埋少少黑醋汁，就令成個沙律嘅層次再豐富啲，唔會覺得膩。✨波士頓龍蝦龍蝦汁意大利飯：一上枱成個擺盤已經好吸引，半隻開邊嘅波士頓龍蝦鋪喺飯面，重點當然係個意大利飯！飯粒煮到啱啱好，外軟內韌，有咬口，掛滿咗濃稠嘅龍蝦汁。龍蝦肉亦肉質飽滿彈牙。✨炭燒澳洲肉眼牛扒：肉眼部位本身油脂豐富，入口軟嫩得嚟帶點咬口，牛味非常濃郁，充滿成個口，簡單調味已經足夠。配菜入面既焗薯都好出色，配埋沙律醬食一流啊！✨自家製開心果麻糬提拉米蘇：本身就係衝着呢個甜品嚟嘅，果然冇令人失望。首先個賣相已經好靚好啱打卡。面頭鋪滿好多開心果碎，另外最有驚喜既係個麻糬，令到傳統提拉米蘇嘅口感即刻升咗呢。軟糯Q彈嘅麻糬，開心果忌廉同濕潤嘅餅底，個配搭真係好夾。✨芝士蛋糕：蛋糕糕身偏紮實，食落口感Creamy，芝士味濃郁，唔會太甜。…查看更多

今次已經係第二次嚟呢度食飯，上次同朋友嚟食嘅時候試咗幾個菜式都冇令人失望，所以今次再嚟又叫咗幾款唔同嘅菜式試吓，依然有水準。✨麻辣香炸鳳尾魚：雖然個名叫麻辣，食落偏甜口，只帶微微辣味，非常適合做開胃前菜鳳尾魚炸得勁酥脆，根本停唔到口，係成餐飯最有驚喜嘅一個餸。✨小籠包（4件）：一口爆汁小籠包，而家個皮做得夠簿，一定要趁熱食。✨蟶子泡飯：呢個泡飯可以話好足料，成碗有好多蟶子，而且完全冇沙，處理得好乾淨，蟶子口感爽口，夠肥美。成個泡飯食落夠清甜，又有海鮮嘅鮮味。✨外婆紅燒肉，流心蛋：賣相好吸引，舊舊五花腩都方方正正，最特別嘅係仲有墨魚，深啡紅色既醬汁睇見都知夠晒火候。聞落去超香，除咗醬油香味，仲食到墨魚香味，呢個配搭好特別，好有傳統嘅風味。紅燒肉肥瘦部分層次分明，肥膏入口即化，一啲都唔油膩。流心蛋火候控制得啱啱好，做到流心嘅效果。✨高力芒果奶黃（4件）：出面好多時候食到嘅都係高力豆沙，但呢個係芒果奶黃餡，好有新意。蛋白外皮鬆軟，芒果奶黃餡呢個配搭做到一個好好嘅平衡，唔會太漏同太甜。✨丫頭：俾呢杯飲品個外型吸引咗，非常打卡able，呢杯飲品口感層次好豐富，面頭鋪左層有椰汁味嘅芝士，最底有一粒粒啫喱，成杯飲品都係好清甜嘅番石榴汁味道，好清新。✨香茅檸檬薏米水：一拎上手就聞到好清新嘅香茅同檸檬味，味道超有層次，除左有酸甜嘅檸檬味，仲會飲到香茅獨特嘅清香。最緊要係唔會死甜，甜度調得剛剛好，飲完成個口都好清爽，薏米煲到夠淋得黎又有少少咬口。…查看更多

一間bookmark 左好耐既餐廳，趁住打風前試下。雖然餐廳賣既係傳統點心同中菜，但環境裝潢就好新式，一d都唔老派，餐廳望出去就係大海景，亦都有戶外座位，係度慢慢飲住茶食下點心，真係好chill~✨窩貼蝦多士（5件）：麵包炸到金黃色，一啲都唔油膩，一口咬落去勁鬆脆，面頭鋪個層蝦膠又彈牙又鮮味，仲要夠厚身，真係真材實料，配埋沙律醬一齊食都好夾。✨明火例湯（一碗）：味道清甜，飲落都冇咩油膩感。老黃瓜煲到淋哂，但係又唔會爛溶溶，仲食到啖啖瓜肉，清甜得來帶少少豆香。飲落個口感到正，好順喉。✨松露雜菌餃（3件）：一上枱陣黑松露香味已經攻過嚟，香到呢～ 外皮夠薄唔會糊口，仲有少少煙韌。入面啖餡係雜菌碎，咩菇都有，口感好豐富，又爽又滑，仲索滿晒松露油嘅精華，勁濃味！✨鵪鶉蛋松露燒賣：鵪鶉蛋松露燒賣真係夠哂邪惡，燒賣頂鋪左黑松露，一啖咬落去係溏心鵪鶉蛋！濃郁蛋香同黑松露嘅霸道香氣撈埋一齊，個口感同味道層次豐富到癲！成個配搭又豪華又夾，完全冇違和感。✨韭菜金錢蟹盒：外形好特別，睇落真係好似一個盒咁，炸到金黃色，好吸引！一咬落去，外皮脆到不得了，完全係輕薄酥化，一啲都唔油膩。入面嘅餡係韭菜，另外面頭鋪左一層蟹肉，絕對真材實料，韭菜味香得嚟唔會攻鼻，仲帶出蟹肉嘅鮮甜，最重要係夠哂juicy! 點少少喼汁,酸酸地更加吊到個鮮味出嚟。✨蟹肉大良炒鮮奶：呢個真係考師傅功夫嘅經典粵菜！上枱賣相已經贏晒，白雪雪一碟，睇落好靚。一啖食落去，口感超級神奇！好似食緊一舊舊軟滑嘅奶凍，又滑又嫩，仲帶住濃濃嘅奶香同蛋香。啲鮮奶炒到剛剛好凝固，一啲都唔老，入口即化。蟹肉絲絲鮮甜，完全冇雪藏味，成個味道好溫和，唔會太濃味。…查看更多

尖沙咀出名多韓國餐廳，但好多其實價錢都偏貴。呢一間主打係自家製嘅刀削麵，價錢合宜，性價比高👍✨牛骨湯刀削麵：本來就係衝住刀削麵黎，果然冇令人失望。刀削麵煙韌彈牙，煮得亦軟硬適中，牛肉片有香濃牛味，肉質偏有嚼勁，配埋香濃牛骨湯食一流。✨醋雞刀削麵（凍）：今個夏天不斷試唔同既冷麵，估唔到刀削面都有凍食，而且醋酸味恰到好處，配埋爽口蘿蔔絲同青瓜絲，食落好清新好開胃。✨五花肉泡菜煎餅：外皮煎到金黃脆卜卜，咬落去好香口，入面泡菜酸辣夠味，估唔到佢既五花肉係成大塊夾係煎餅中間，肉嘅油脂香爆出嚟，同煎餅配搭好夾。…查看更多

呢間放工經過經常見到好早已經排長龍，餐廳本身座位唔多，今次未夠六點去到，都要等位🤣不過食完覺得都值得👍招牌炸豬排菜飯：塊豬排超大塊，炸到金黃色，外皮香脆，但入面啲肉竟然仲好嫩好juicy，一啲都唔乾硬！菜飯既菜粒爽脆，唔會太油。生煎包：一咬落去，個包底脆到「咔」一聲，正！入面嗰湯多到爆出嚟，熱辣辣要小心燙親。豬肉餡鮮味十足，肥瘦適中，完全唔會膩。皮薄餡多，食落去好滿足！豆漿：呢度既豆漿係可以無限續杯👍豆漿比出面飲到既更有豆味，而且唔會甜，飲多幾杯都唔會太有罪惡感。招牌炸雞扒拌麵：麵質煙韌，咬落好有嚼勁，掛汁能力一流，伴有好香嘅乾蔥乾蒜，葱油真係靈魂所在，香到不得了，唔會太油膩，鹹度啱啱好，仲帶少少甜味，同麵撈勻之後每條都沾滿油香。雞扒炸得酥脆，肉質保持鮮嫩。蟹黃生煎包：同普通生煎包最大分別係蟹黃嘅香味好出，仲食到一絲絲蟹肉，鮮甜得嚟唔會腥。豬肉餡同蟹黃比例啱啱好，唔會搶咗蟹嘅鮮味。…查看更多

上網見到九龍城有間餐廳好啱帶小朋友去，仲要係一間火鍋餐廳，餐廳入面有一個小朋友玩樂區，勁多小朋友鍾意玩嘅煮飯仔玩具，啱晒我哋呢啲帶埋小朋友去，但又想有少少me time食嘢嘅人😍帶小朋友去樓上洗手間嘅時候，無意中見到原來樓上有好多獨立房間，私隱度極高，不過今次只係三個人嚟，同埋樓下有玩樂區，所以都係坐返下面啦😛✨鮮味卜卜蜆窩：卜卜蜆煲真係無得輸！一上枱已經聞到好香蒜蓉味，啲蜆滾兩滾就「卜卜」聲開晒口，蜆肉鮮甜到爆，完全冇沙。個湯底係精華所在，蒜香味好出，加個粉絲落去索盡啲湯汁，粉絲煮到啱啱好，唔會太淋又掛到湯，吸晒啲鮮甜蒜蓉湯，一啖粉絲一啖蜆肉，真係超滿足！✨海石蚌（原條）（刺身）：一上枱，個賣相已經贏晒，魚肉透亮光澤，片得薄薄哋，排得好精緻。夾一舊入口，第一感覺係個質地超爽脆，完全唔會霉腍腍，咬落去「索索」聲，好過癮！個鮮味係慢慢滲出嚟嘅，一啲都唔腥，點少少醬油同Wasabi，更加帶出咗魚嘅鮮味✨冰鎖鮑魚（2隻）：本身見到原隻冇切片，仲驚會韌好難咬開，但食落好彈牙，完全唔韌。✨三文魚（4件）：超厚切既三文魚，非常肥美，同出邊放題嘅完全唔同，真係食到三文魚鮮味。✨手切鮮肥牛（小）：適合減肥人士嘅牛肉，聽餐廳職員講係本地新鮮手切牛肉，每一片都超有肉味，放喺湯度煮幾秒拎起就食，又嫩又鮮。✨手打黑白墨魚丸：墨魚丸夠哂彈牙，仲要好紮實，完全唔係粉團咁假。墨魚味超出，鮮甜得嚟唔會腥，仲食到微微墨魚粒粒，真材實料！✨田園菜籃：一個菜籃有齊好幾款唔同嘅蔬菜，西洋菜、皇帝菜、蕃茄、菇，份量啱啱好，如果分開逐樣逐樣叫，又未必食得晒咁多菜😆✨洛神花大大杯：一入口係超濃郁嘅酸甜味，冰涼清爽，飲完成個人醒神晒，解膩一流～最正係甜度剛剛好，唔會死甜。✨大大杯咸檸：呢杯係一杯唔使自己動手篤爛粒鹹檸檬嘅鹹檸七，一上枱成杯已經幫你篤好晒，飲落去第一啖勁衝擊，鹹、酸、甜、氣泡感一次過爆開，超爽！…查看更多

而家天氣咁熱，同朋友想搵間餐廳坐低食吓嘢，但又唔想食完就俾人趕走，上網見到呢間樓上Cafe除咗有嘢食有嘢飲，仲有大量board game提供，所以就book左個星期五晚上去玩下game食下野。Cafe老闆自己一腳踢，雖然忙但非常熱情，而且風趣幽默🤗。老闆介紹咗啲套餐優惠，價錢好抵，而家仲要免加一 ，但可惜我哋人數唔多，最後都冇揀到套餐，決定散嗌。✨匈牙利雜菜燉豚肉：豚肉係用左腩肉既部位，肥瘦相間，燉到超級淋滑，入口幾乎唔使點咬就化開。最正係個汁，酸酸甜甜。入面嘅雜菜都好入味，吸晒湯汁精華。✨韓式牛肋條飯：牛肋條燉得恰到好處，肉質軟嫩又不失嚼勁，煮得好入味，微甜嘅醬汁送飯一流。最特別係佢個飯團嘅鴨仔造型，令到成疊飯即刻好打卡able🤣✨瑞士雞翼：一上枱已經聞到陣甜豉油香，啲雞翼煮到剛剛好，外皮滑溜又入味，唔係求其烚熟就算，咬落去肉質超嫩，一啲都唔柴。個汁簡直係靈魂，甜得嚟唔會膩。✨隱藏菜單—潤喉茶：本身因為有啲起痰，所以冇特別諗住叫嘢飲，老闆主動話有個獨家潤喉茶可以試下，但用咩材料不公開🤣🤣飲落喉嚨真係好舒服，微微甜（羅漢果味），但老闆話冇落羅漢果😂✨特濃朱古力：朋友就叫左杯朱古力飲，本身冇咩期望，但呢杯飲品超有驚喜，絕對係當之無愧嘅特濃朱古力，可能係因為用真正嘅可可粉黎沖，唔會俾甜味蓋過咗朱古力味。…查看更多

餐廳地方唔算好大，好彩有提前book位，估唔到平日嘅夜晚都咁full。成個餐廳氛圍好舒服，好適合三兩個朋友慢慢食飯飲野傾偈。✨巨人蟹子沙律（2人份）：成座山咁高嘅蟹子沙律，蟹子多到瀉出嚟，一啖食落去「卜卜」聲爆晒出嚟，鹹鮮味勁過癮！底層嘅青瓜絲同蟹肉絲夠晒清爽。最正係蟹子多到每啖都食到，完全唔使就住就住食，口感十足。✨秋葵蝦肉：呢款串燒真係有驚喜！秋葵外皮燒到微微焦脆，咬落去仲keep住爽脆口感，入面釀咗彈牙蝦膠，鮮味爆棚，惹味得嚟唔會搶咗秋葵嘅清新，呢個配搭出奇地夾！✨牛舌：燒到表面微焦，外層香脆，內裡保持juicy，口感彈牙。✨鹽燒黑豚腩：肥瘦層次分明，燒到微微焦脆，一啖食落仲有龍龍嘅油脂香，簡單用海鹽吊味，帶出黑豚本身鮮味。✨月見兔治雞肉棒：啱啱燒出嚟嘅雞肉棒，咬落一口爆汁，口感鬆軟。✨吉列炸安格斯牛扒：呢塊吉列牛真係邪惡到極點！外層炸衣酥脆，咬落「咔嚓」聲勁治癒，入面嘅安格斯牛扒肉質鮮嫩，牛味勁濃，仲帶少少油脂香，特別讚個炸漿厚度啱啱好，唔會搶戲。配配埋芥末醬，解膩得嚟仲提升層次。仲配埋鐵板可以自己再燒，咁就唔怕凍咗唔好食。✨刺身（三文魚、帶子、八爪魚、赤蝦）：刺身整體新鮮，三文魚夠肥美，帶子夠鮮甜，赤蝦最有驚喜，蝦頭仲有蝦膏爆出，蝦肉爽脆得嚟帶黏性，甜度滿分！八爪魚片切到透光咁薄，咬落居然又爽又嫩，完全唔會橡筋咁難嚼。✨上壽司盛合：同刺身一樣，海鮮用料夠新鮮，壽司飯粒粒分明，10件壽司款式冇重複，食完好滿足。✨月桂冠完熟梅酒：靠近杯口聞到超濃郁嘅梅子香，甜中帶少少酸，好fresh～入口順滑唔嗆喉，梅味好出，仲有淡淡嘅蜜糖香，飲落好舒服。酒精濃度啱啱好，唔會太烈，加冰飲真係透心涼！最正係佢嘅餘韻，飲完個喉嚨仲有陣陣梅香，好回味。 ✨芒果沙冰：見天氣咁熱，所以叫杯沙冰試吓，芒果沙冰一入口便迎來濃郁既芒果香甜，冰沙質地細膩如雪，入口瞬間融化，透心涼而不刺喉。成杯飲落唔會太甜，尾調帶微微酸香，解膩又醒胃。…查看更多

唔講都唔知原來呢個位有間咁英倫風西餐廳，上網睇食評，一眼就俾佢個肉眼扒吸引左，即刻book位黎試下。餐廳裝潢非常有格調，菜式選擇都好多，而且價錢合理，今次分別叫咗一個598 set同一個398 set。✨自家製生牛肉他他：牛肉剁得夠碎但唔會太爛，仲食到少少肉粒嘅口感。混埋生蛋黃一齊撈，超滑溜！調味啱啱好，唔會太鹹，仲食到有少少酸瓜粒，增加爽脆感，食落完全冇腥味。✨凱撒沙律：凱撒沙律一直都係穩陣之選，羅馬生菜夠晒爽脆，新鮮到不得了～雞柳煎得夠香脆，仲有啲麵包粒脆卜卜，口感超正！最緊要係個凱撒醬，creamy得嚟帶少少蒜香，掛滿每塊菜葉，唔會太漏！✨牛肝菌野菌忌廉湯：湯身夠晒creamy又滑溜，飲落去滿嘴都係野菌嘅鮮味，仲食到啖啖細碎嘅菇粒，口感豐富到爆！忌廉嘅奶香同菌菇好夾，最正係佢個濃稠度啱啱好，唔會太稀又唔會漿住個口。✨龍蝦濃湯：湯底真係夠晒「濃」，一啖飲落去成個口腔都係龍蝦嘅鮮甜，飲得出係用龍蝦殼熬出嚟嘅精華，唔係味精湯。✨OX牛骨髓牛油包：好岩打卡影相，牛油用牛骨髓器皿裝住，好有特色，而且特別牛油帶住鹹香，搽落麵包度食好夾。✨美國頂級PRIME肉眼扒：塊扒夠哂厚身，表面煎到焦香脆邊，切開嗰陣仲見到完美嘅粉紅色5成熟。口感正到癲——外層微脆，裡面軟嫩到差啲唔使咬，PRIME級嘅油花喺口入面溶化，爆出超濃郁牛香。配菜嘅烤蒜頭同蘆筍都好正，成個蒜頭連皮烤到外層焦脆，一拮開啖啖蒜肉軟糯到似薯蓉，完全冇嗆鼻辣味。✨西班牙栗飼黑毛豬鞍配蘋果莎莎：塊豬鞍勁厚切，外皮煎到金黃微焦，口感做到外脆內軟。最正係個自家製蘋果莎莎，清新嘅蘋果粒酸甜爽脆，完美中和豬鞍嘅油膩感。 ✨特濃開心果麻糬杯：食落有超香嘅開心果味，麻糬質地好Q彈，咬落去軟糯得嚟又唔會太黏牙。面頭嘅開心果碎脆脆哋，加埋中間嘅開心果味慕絲同埋脆餅，口感層次好豐富～甜度剛剛好，唔會膩，食完成個都唔覺滯。…查看更多

餐廳裝潢好有心思，而且樓上層係榻榻米座位，有特色得黎坐得又舒適。✨海老穴子天丼（穴子，黑虎蝦，蟹柳，南瓜，本菇，紫菜，四季豆）：配料十分豐富，而且天婦羅個炸漿調得啱啱好，唔會太厚搶咗今物本身嘅鮮味，仲keep到外脆內嫩，不過一定要趁熱食。。✨自選天婦羅定食（冷酢橘蕎麥麵，廣島蠔，鰻魚，蘆筍，冬菇）：夏天必須要食返碗涼浸浸既麵！蕎麥麵條咬落去煙韌得嚟有咬口，仲有陣陣麥香，面頭仲有幾片檸檬，配埋個酸酸甜甜嘅湯汁，食一啖即刻成個人醒神晒！即磨山葵唔會太攻鼻，同麵撈勻真係無得頂。天婦羅配料入面最令我驚艷係廣島蠔，外皮炸到金黃酥脆，入面隻蠔仲係好juicy，完全overcook！蠔肉好鮮甜，一啲都唔腥，仲有淡淡海水味，正到爆！ ✨雞皮餃子（5隻）：第一次嘗試用雞皮取代餃子皮的餃子，外層雞皮煎得金黃酥脆，咬落去一口爆油；內餡鮮嫩多汁，鹹鮮中帶點微甜。✨柚子芝士蛋糕：芝士層好滑溜，質地creamy得嚟又唔會太heavy，蛋糕上面嘅柚子令到成個蛋糕多咗清爽感，柚子味唔會好濃，所以唔會蓋過咗芝士香味。…查看更多

平時成日去食燒肉放題，但其實都食得唔多，所以今次決定試吓呢間可以散叫嘅燒肉店，見到佢嘅餐牌都有好多唔同款嘅牛，而且用一個幾抵嘅價錢已經食到黑毛和牛質素，性價比高。✨志盛（2人前）：貪佢可以試到幾款唔同嘅肉，套餐有鹽味牛舌、黒毛和牛霜降牛小排、黒毛和牛上肩肉、厚切牛胸腹柳 、鹽蔥雞腿肉同黑毛豬五花。牛舌打頭陣～薄切但超彈牙，鹽味簡單帶出鮮甜，咬落「唰唰聲」！重點係兩款和牛，肉質非常細膩，油脂入口即化，好似食緊牛肉味棉花糖咁，上肩肉相比起牛小排，油脂更加豐富。相比起兩款和牛，厚切牛胸腹柳就冇咁油，肉質比較有嚼勁，而且好有牛味。鹽蔥雞腿肉燒落就比較普通，但配埋佢個鹽蔥食， 一樣十分惹味。豬五花燒燶少少變脆片，燒嫩啲就油脂香爆炸，食落更香口。套餐再加$25就可以有一個生菜set，有生菜、泡菜、調味醬，用嚟包肉食，清爽又解油膩。✨檸檬冷麵：我會稱呢碗麵為夏日救星，麵條冰鎮過超彈牙，嗦落去「咻咻」聲，食之前再篤下啲檸檬，檸檬汁酸爽醒胃，食完成個人涼浸浸～夏天熱辣辣既時候食返碗，開胃又醒神。…查看更多

不嬲都知尖沙咀特別多韓國餐廳，今次經過見到呢間餐廳裝潢好有特色，配埋霓虹燈光，真係氛圍感十足。行入餐廳已經見到有一面掛滿心型鎖既燈牌，好似去左南山塔咁，問左餐廳職員，原來只要follow左餐廳ig, 就可以免費拎到心型鎖，寫埋野就可以親手掛上去，體驗感滿分。食物方面選擇好多，而且特別地道，今次就揀左一個魚糕湯同埋一個白切肉。✨ 魚糕湯：一上枱就比個陣勢嚇親，成串唔同款式嘅魚糕插住竹籤浸喺湯入面，仲有蔥段、金菇等配料睇落已經覺得好豐富。湯底飲落鮮甜得嚟帶少少海鮮嘅鹹香，完全唔會腥！魚糕有齊唔同形狀，有啲厚切有啲粒狀有d薄片，每款口感都唔同，但全部都好特別，索晒湯精華，十分鮮甜。✨釜山白切肉：一上枱就見到五花肉片排到靚靚，肥瘦層次分明，重點係個肉煮得啱啱好，皮爽肉嫩，一啲都唔柴！夾起一片蘸少少韓式大醬，再加啲生蒜片、青椒圈，用新鮮生菜包住一啖咬落去...嘩！個口感豐富到爆燈。肥肉部分入口即化，瘦肉又夠juicy，配埋爽脆生菜同濃郁醬料，完全唔覺膩！如果生菜可以再refill就完美。前菜方面有六款，但我個人最鍾意嘅都係泡菜，同魚糕湯白切肉夾埋一齊食更加開胃。…查看更多

雖然每日都經過荷里活，但一路冇為意呢度開咗一間西餐廳🤣餐廳環境非常寬敞，座位舒適，啱晒幾個朋友一齊gathering。✨法包薄餅：焗到脆卜卜嘅法包，上面鋪滿薄餅餡料，雖然係餐廳每枱贈送既包，但做得好有心思，好足料！✨蟹膏海鮮墨魚意大利粉：意粉將濃郁蟹膏與墨魚汁麵條完美融合，每一啖食落去都食到龍嘅蟹膏鮮甜！彈牙的墨魚麵裹上綿密蟹膏醬汁，搭配大蝦和魷魚圈，層次豐富。上面再加左新鮮三文魚子，絕對是海鮮愛好者的必試菜式。✨香煎帶子檸檬意大利粉：帶子煎到金黃香脆，一咬落去超Juicy，仲有微微焦。意粉掛滿檸檬同嘅清香，酸酸地好開胃，食落一啲都唔膩。最正係帶子嘅鮮甜同檸檬嘅清新撞到啪啪聲，成個組合好balance，食完仲想encore！如果鍾意輕盈又鮮味嘅意粉，呢個絕對要試！✨WM炸物拼盤：呢個拼盤真係啖啖都係罪惡感！薯條炸到金黃脆卜卜，一口芝士外脆內軟心，勁香濃既芝士香味。雞柳完全唔會乾柴，咬落仲有肉汁！洋蔥圈香脆唔油膩，熱辣辣上枱，份量足料，同朋友share食吹水最啱！…查看更多