KCFong102的個人專頁

大圍泰禾美：地道泰國風味！一直都係去開九龍城泰禾美食泰菜，除咗食物惹味之外，都貪佢就腳，而且坐得舒服，就算同朋友一行十幾人去都可以慢慢食。上個禮拜同朋友去咗大圍分店食飯，真係有驚喜！呢度裝修風格同九龍城好唔同，問過鋪入邊嘅姐姐，原來上一手係打邊爐餐廳，亦都解釋咗點解枱面會有個電磁爐😆一入到去就聞到陣陣香料味，即刻令人胃口大開！黃咖喱雞：呢個絕對係必點！咖喱香濃得嚟唔會太辣，椰奶味好突出，但唔會搶左陣咖哩味，仲有少少香茅同其他香料嘅清香，層次豐富，雞肉非常嫩滑，咖喱底稠度非常適中，配合埋蒜蓉包/ 薄餅，好容易食到上癮。燒雞：外皮燒得香脆，肉質鮮嫩多汁，點埋佢哋特製嘅酸辣醬，更加開胃！份量都幾大，如果有其他嘢食嘅話，4個人食半份都綽綽有餘。燒牛肉：牛肉燒得啱啱好，外焦內嫩，咬落去仲有肉汁爆出嚟，好正！佢哋嘅秘製醬汁辣辣地，同牛肉好夾，用嚟送酒係非常之正！軟殼蟹：一道考功夫嘅菜，今次個軟殼蟹炸得金黃酥脆，蟹肉鮮甜之餘又有泰國香料加持，更加惹味！蒜蓉包& 薄餅：雖然係配角，但都唔可以錯過！麵包焗到外脆內軟，蒜香味十足，薄餅亦做得非常鬆軟，點埋黃咖喱汁食，簡直係絕配！當晚其實食咗好多其他嘢，唔特別每樣都講喇，其實每一樣都非常惹味同埋保持到水準，誠心推介！總括嚟講，大圍泰禾美嘅食物質素好高，價錢合理，保留到九龍城嘅水準，而且服務都唔錯，絕對係大圍區食泰國菜嘅好選擇！如果你都想試吓地道嘅泰國風味，不妨去試吓啦！**溫馨提示**：餐廳有2層，但係weekend嘅時候都有唔少人等緊位，所以最好提前訂位。…查看更多

冇咩事都唔好去食，俾錢買難受服務差，慢，冇人理，環境污糟，張枱重有上一手用過嘅牙籤，有隻小強走黎走去....呢個時候我地已經想離開，但無奈已經落左單，廢事搞到咁麻煩。等左20分鐘左石，食物終於黎到，叫左涼伴土豆(薯仔)絲，羊肉粉同埋涼麵，羊肉粉冇咩味，湯底好似清水一樣，涼麵就有一陣奇怪嘅薄荷味，非常一般。我地一路等緊食物嘅時候，不斷有人投訴緊，有人話羊肉串點解係凍嘅，有人嘈點解枝烏龍茶咁耐都唔俾佢，有人嗌極落單都冇人理...希望大家唔好俾錢買難受:(…查看更多

早兩日同朋友聚會，本來諗住去將軍澳食Vortex burger，點知冇開鋪，於是就改咗去呢一間同朋友之間戲稱為 “買一送一” 嘅西餐廳，因為呢間鋪啱啱開張嘅時候做緊星期一至五main course買一送一，所有酒精/ 非酒精類飲品都係，所以計返條數係幾抵食，但係今次同班朋友食完之後，完全顛覆左我對呢間鋪頭嘅印象。買一送一優惠已經完咗，而家係做緊加50蚊多一個main course，送嘅飲品亦都局限左喺非酒精飲品，我最初覺得無所謂，因為我地都覺得呢間嘢係唔錯嘅，不過經過今次之後，我以後都唔會再踏足呢一間鋪頭。我地叫左兩個main course同埋兩款小食。首先有樣嘢好重要，就係所有嘢食都係唔熱嘅！連熟食最基本嘅要求都做唔到。兩款course分別係一個好似叫做 ”咩肉都有pizza” 同埋一個肉類拼盤。個所謂咩肉都有嘅pizza就得幾粒唔熱嘅雞肉，幾塊迷你火腿，少量芝士同一個急凍餅底。廚師連將呢塊pizza放入微波爐叮返熱佢嘅動力都冇，侍應就咁將塊Pizza係室溫咁樣上俾我哋，咁樣有意義咩？塊pizza淡而無味，幾舊雞粒比牛肉乾重乾身，咁樣糟蹋塊pizza又有咩意思呢？而個肉類拼盤包含左兩件羊架，一件豬肩肉，一塊西冷同一塊雞肉；配菜有幾塊洋蔥同薯角，另外重有一細碗gravy同黃芥末。落單時都有個小插曲，個侍應姐姐同我地講話冇曬羊架，可以轉其他肉類，我哋話轉豬肩肉，點知最後上菜嘅時候又有羊架，難道經理，廚房同埋侍應們都唔知道溝通係咩一回事？講返個肉類拼盤，所有肉都睇得出唔係即刻烹調，唔緊要，不過都係果句，廚師連整返熱佢嘅衝動都冇，請問你對得住自己份職業嗎？你對得住食材嗎？個拼盤就咁室溫serve俾我地，成個拼盤惟一有少少溫度嘅係塊豬肩肉，不過塊豬肩肉放入口嘅時候就如同咀嚼緊橡膠，可憐了一塊豬。除此之外，拼盤上嘅肉都係非常之乾身，塊雞肉尤甚，直頭係乾過而家街上嘅枯葉；兩件羊架毫不肥美，而且一啲調味都冇；塊西冷俾廚師燒到well done，如果我要食熟透嘅牛肉，我不如去美珍香？配菜方面，洋蔥係生嘅，幾舊薯角係隨便飛一飛水，然後放少少黑椒喺面，就當係煮好咗，口感同未煮過薯仔其實唔係好大分別。黃芥末醬係現成嘅，而個gravy，我唔知佢地放左幾多日，總知有陣怪味。肉類拼盤最畫龍點睛嘅地方係，廚師好stylish咁將啲肉放喺木盤上面，但出事嘅嘅係，其實返木盤有浸up味，唔知塊木盤有幾耐冇洗過呢？我地重叫左兩款小食，分別係炸魷魚圈同埋薯條，其實我已經冇期待過會係即炸，上到枱，一夾，放落口，當然係一啲都唔熱啦，炸魷魚圈啲粉漿重多過舊魷魚本身，炸薯條係淋嘅，淋過一個瞓左超過10年嘅枕頭，如果瞇埋眼咁食，你會以為自己食緊薯蓉。服務方面亦都係一個亮點，我哋一行四人坐低之後，冇人會比杯水我哋，要開聲問先會有，餐廳入邊嘅侍應行路都係縮頭縮骨，上菜嘅時候唔會講呢個係咩黎嘅，而且佢就咁放喺張枱嘅邊位就算，唔會幫我地整理下張枱上面嘅空間同擺位，做咩啫而家？玩遊戲？睇吓邊個可以將啲嘢擺到最亂？一般來講我係唔會嘥咁多時間打篇文去批評一間餐廳，我試過食食吓嘢，有隻曱甴係天花板跌咗落嚟；亦都試過食到啲嘢係變味嘅，係臭左嘅，但係我都冇好似今次咁樣，打篇千字文發洩自己嘅情緒，但係今次我真係好唔開心同埋好嬲，因為我覺得waalah嘅廚師唔尊重食材，經理唔尊重食客，待應唔知自己做緊乜嘢。一間咁樣嘅食店，不如執左佢啦，唔好喺度獻世啦。PS：由於太嬲，一張相都冇影到，但如果你對於我講嘅任何一句說話有懷疑嘅，你不妨自己去體驗下。…查看更多