High Tea's Profile

禮拜日有人突然講起海南雞飯，好即興地搜索見到沙田呢家星馬菜，決定來試下。兩個人點左每人一個海南雞飯，加一碟炸蠔餅share食。埋到位當然先飲杯茶，冇料到原來杯茶咁有星馬風味，幾特別喎（有D大鄉里不過之前在外面食星馬菜未飲過呢款茶），哎呀唔知點形容又冇影到相。份海南雞飯都有D份量，有切得大大件的海南雞、雞油飯、雞湯、醬料，自己唔算大胃，起初都擔心食唔曬（ok啦最後只不過比左兩件對面果位），食落其實又ok，但想講呢日個雞油飯好似乾左少少，我將D雞湯淋上去撈埋就非常好，不得不提的係個雞湯味道唔錯，係有雞味架，味精敏感嘅我也並無出現特別反應或者口渴。順帶一提海南雞飯有兩款：招牌及健兒，招牌98健兒108，menu話健兒係雞胸肉，個飯係紅米飯。剛好鄰座兩個旅客share食緊健兒海南雞飯及一碟油菜，細食女生也可以考慮。炸蠔來了！menu照片明明係一底好靚仔的，實際上碟係散曬的一底😮，不過見D蠔仔都算多同大隻就原諒佢啦。跟隨上桌有魚露同一碟橙色醬（酸甜？酸辣？冇點，唔知），我地都鍾意點魚露，其實好鹹但又幾惹味，蠔仔味道ok又夠大粒，整體炸粉可以少返dd 就更good啦。食完濃味野再飲返頭先杯茶清清舌頭，感覺杯茶更加好味，好難得週日午餐時段唔太爆可以坐得舒服，感覺好滿足，下次再來試埋肉骨茶先。…Read More

好幾個月前出左櫻花menu，但係都想補返個食評。過日被櫻花控朋友拉著來試，禮拜六中午來到竟然唔駛等，欣喜若狂！點知⋯兩個儍瓜臨時發現櫻花menu屬於晚餐（晴天霹靂）⋯所以想試期間限定菜式的朋友要注意啦。有段長時間冇來，再訪的第一個感覺是menu帶來的震撼，因為少左好多野，連最愛的炸雞都唔見左（傷心）。由於叫唔到櫻花menu內的紅菜頭壽司卷，於是叫左普通果個紅菜頭壽司卷（入面冇牛油果）。賣相造型都算令人開心，影相都靚，但插在中央的沙律菜並唔係menu照片中的豆芽，有D失色。呢款壽司卷唔知點解入口其實係冇乜味的，點少少碟邊的沙律醬打算提一提個味，作用又唔太，最後個口感係煙靱，問題係塊壽司卷的紫菜，已經淋曬、暗啞兼冇紫菜味⋯收拾心情迎接雞旦梳乎厘，從菜名去理解，應該唔係真係甜品的梳乎厘，而係用幾隻蛋整出梳乎厘效果，topping係煙肉、芝士及魚子。個器皿上桌時好大陣燶味🤭，即刻意會到個底烘燶左，即係舊蛋燶左。撥開topping，個主體係件好大塊的焗蛋，裡面⋯sorry呀好老，係阿媽蒸水蛋失敗過曬火的texture... anyway總之係焗蛋（好似焗嘅炒蛋），一路食一路好大陣燶味的焗蛋，唔可以叫梳乎厘，就算點夾住topping食也難掩失落。本來有打算叫多個菜嘅想法隨住老蛋fade out左，也有諗過為左櫻花menu夜D再去，但呢餐之後我地已經唔清楚個粉紅色可以帶來有多大的驚喜。記得以前來真心覺得ok，今次再訪好可惜，希望可以改善下同有返多少少menu選擇。…Read More

呢度嘅 pancake 係用迷你黑色鐵板 serve 嘅，佢唔似麥記果啲咁薄身，厚身得嚟又唔似 souffle panckae 果種空氣感。試新嘢叫咗一鹹一甜：鹹味嘅有大蝦沙律，甜味嘅有紫薯。前者望落好七彩繽紛，後者嘅紫薯相對顏色比較深沉。食落去果然係甜味嘅紫薯同 pancake 比較啱口味，而且係配有雲尼拿雪糕架！以為佢份量少少，實質好多澱粉質，所以好飽肚。結果我哋食完呢個都食唔落其他嘢食 lu~ 題外話：話說今日係 international pancake day，所以我特登響應下嚟食特色 pancake 嘅！…Read More

呢度同 ATUM 一樣都可以有甜品師傅喺你面前畫畫，但這 service 只限坐吧檯嘅人客。今次未有幸安排到坐吧檯，咁就試下其他甜品先啦～我點咗果份甜品叫 Ruby Peach，淨係聽個名已經知道好食！整個甜品造型特別，本小姐我十分欣賞。首先紅色較搶眼，而分別唔同 layer 就係唔同程度嘅紅色（由淺粉紅到深紅色都有），每層 layer 又有唔同嘅口感。例如，面頭係脆脆嘅，中間嘅 mousse 比較黏，最中心有流心嘅 liquid 狀態，伴碟嘅仲有彈牙嘅啫喱。加添一些食用花裝飾，認真吸引。另一甜品 Chocolate Cigar 只得黑白色，第一下真的比下去了。只要你留心啲望清楚，甜品師傅係做得頗細緻的。Cigar 同實物比例相似，刻意喺點火部份用黑色代表煙灰，同時代表 Cigar 已經點著咗，仲唔小心跌咗少少煙灰出嚟。 …Read More

店舖面積好細，得 10 個座位左右 （仲細間過銅鑼灣果間米芝蓮拉麵店）。排隊等咗 3－4 張枱左右，我諗大概 15 分鐘左右，然後被安排坐門口位置。好彩我哋入座後就無人排隊，否則啲人排長龍望住我食都幾尷尬。大部分拉麵店嘅落單紙都只係黑白色嘅書紙，呢度竟然係雙面彩色印刷，睇得出老闆都幾揼本！不過拉麵嘅款式唔多，連埋每日限定拉麵都只得 6 款選擇。分別點咗兩碗濃湯拉麵 －『極上拉麵 』&『半熟蛋拉麵』。『極上拉麵 』用叉燒鋪滿咗個面，有 6 大塊架，雖然係薄薄嘅。拉麵嘅份量認真太多，建議可以俾人客選擇『少麵』，因為我真係食唔晒又唔想做大嘥鬼。至於個湯，濃湯幾惹味，飲完又唔會口渴，應該無落味精嘅。飲品方面全都是特色梳打，點咗招財貓同埋蜜桃味嘅。招財貓梳打原來係原味梳打，個玻璃樽係幾得意嘅。但係蜜桃味梳打就有少少伏，有藥水味嘅。埋單平均每人都係 $100，仲唔使加一服務費添！…Read More

之前試過晒佢哋嘅甜品店及西餐廳，當然係感覺良好，先會過嚟試埋佢呢間泰國 / 越南式餐廳啦！開咗都一段日子，一直想試，而今日終於約到朋友陪我嚟啦！鋪面裝飾主要以花花草草為主，顏色多為葉綠色及白色。雖然好多花花草草，但感覺上中性（唔會太過女性化)，所以男仔女仔都啱！食物平均都 above average，賣相尤其加分，可謂 IGable。午餐食唔到太多，所以只係揀咗以下兩款輕食同特色飲品。雞肉湯喇沙Brunch menu 入面，大部份都係普通湯粉或飯，唯獨喇沙係比較吸引到我。湯底味道適中而且唔辣，啱晒我。雞肉湯喇沙唔係咩特別菜式，水準令人滿意嘅同時，呢碗嘢係非常足料！食第一啖夾餸時，夾到底都未有麵，然後意外地發現咗有成半碗都係餸！哈哈蟹肉菠蘿炒飯蟹肉嘅份量比較少，好似只係輕輕灑咗啲蟹肉碎喺面頭咁。另外，我哋食完喇沙先食炒飯，可能係用普通碟上嘅關係，放咗一陣就變得唔夠熱。但味道係 OK 嘅，仲好細心將烤菠蘿切好一塊塊，望落又特別啲，食客都方便分享。龍鬚三色冰呢個係跟餐飲品，要加 $18 架。龍鬚糖喺面係特別嘅，仲要黃色、粉紅色咁繽紛（據我所知，佢有一款甜品都有龍鬚糖架）。三色冰嘅奶味好濃，甜甜地幾好味。蝶豆花椰奶呢杯冇得跟餐，只可以散叫。蝶豆花喺好多地方都見到，通常溝酸性嘅檸檬汁或柚子汁令佢變色。青花呢度反而溝椰奶，上面紫藍色加下面綠色共兩層，面頭配搭一朵紫色花花。賣相贏咗，但味道方面佢較三色冰淡，有少許遜色。我覺得佢嘅份量算大，加上飲奶類特飲比較飽肚，我哋食唔晒之餘，仲試唔到佢嘅甜品呀 >.< 食咗咁多特色嘢每人都只係 $150 左右，好化算丫！…Read More

新店開張我當然唔執輸要嚟試下啦。見到食評啲人話大排長龍，所以我就有準備用新城市果個 app 預先排隊攞飛，所以唔駛等咁耐。（呢下好想讚下自己點解可以咁醒～哈哈）Menu 款式幾多，有啲花多眼亂。簡單叫咗幾款食物，質素都 OK！鹿兒島和牛漢堡扒見到圓碌碌嘅漢堡扒放咗係鐵板上，淋上秘製醬汁時『炸』一聲有時都幾治癒架，味道亦令我滿意。但早知叫流芝士果款啦，見到隔離枱食緊，勁多芝士流出嚟呀！吉列豚肉咖喱蛋包飯有豐富嘅咖喱汁撈飯，而且豬扒亦炸得啱啱好，恰到好處！草莓奇異果梳打放心啦唔係伏，草莓梳打有草莓味（而唔會係藥水味），仲好多果肉添！但點解自己加糖水咁得意嘅？靜岡蜜瓜 souffle pancake疏乎厘班戟係近期嘅大熱之選，以為佢淨係得芭菲，估唔到連疏乎厘班戟都有（雖然只得一款口味），咁就試下佢嘅水準啦！唔錯喎，都拍得住其他現有疏乎厘班戟嘅水準，呢下係有啲驚喜嘅！個人喜好係鍾意配水果甜甜地啱啲，所以静岡蜜瓜口味就 perfect，但價錢相對上高咗少少。都係果句，食埋甜品果然滿足晒！哈…Read More

今次太晏先過嚟，好多產品都已經售罄，所以我揀咗普通嘅原味芝士蛋糕。店員亦有教落，食之前放入微波爐叮一叮味道會更佳更香。雖然今次未有機會試到特別口味，原味都已經好好味，厚厚嘅蛋糕非常鬆軟。平時食果幾芝士蛋糕感覺比較似海綿蛋糕，Uncle Tetsu 呢個特別在有少少似食緊 souffle 嘅感覺，從此開始對呢類芝士蛋糕有少少改觀。…Read More

新裝修後到係第一次嚟，表面感覺係乾淨咗嘅。我哋揀咗個二人餐，有前菜／餐湯，兩個 main course，一款小食同埋兩杯嘢飲。嘢飲其中一杯試咗藍色特飲，但發現佢冇乜特別。仲有珍珠奶茶添！小食有檸檬雞翼，估唔到佢咁多醬汁。Main course 叫咗蟹肉豆腐煲配薄餅，仲有咖哩豬扒飯。蟹肉豆腐煲值得食，蟹味香濃既足料！我建議配白飯會好味啲！掉轉咖哩豬扒配薄餅！快餐嚟計，呢個午餐都算豐富，只係貴咗少少。其他常餐應該會抵食啲！…Read More

Peak hours 過嚟食飯緊記早少少到步，因為等 lift 上餐廳都要排半條厚福街，真係有排等。（真係等 lift 仲耐過等位）餐單上好多食品都係好容易食到成身污糟晒，所以職員會好貼心地為每位客人準備咗小圍裙。嘢食方面都唔係好記得自己食咗啲咩，呢個係餐前小食：仲有炸魷魚鬚，果幾款 sauce 有幾好味：當然唔少得佢嘅 signature - seafood basket!另外估唔到連 risotto 都係用藍色袋入住：…Read More

呢間餐廳係我嘅好閨密介紹嘅，每次食都保持到應有嘅水準。今次呢，就係同佢嚟慶祝佢嘅大壽！星期五嘅晚上，餐廳嘅座位到爆滿啦，就算我哋預先訂枱都只能坐外面。要慶生嘅話，每人一杯紅酒係少不了嘅。之後再為大家介紹下今日嘅晚餐啦！Tagliere Misto 意大利醃肉拼盤簡單來講就係 Ham & Cheese Platter，份量唔少嘢，真係食完都飽咗一半。分別有三款 ham 同三款芝士，主要係俾我哋配紅酒嘅。Caprese di Burrata 水牛芝士配番茄及羅勒芝士嚟講我係最喜歡 soft cheese，因為奶味比較重，同埋喺口入面溶化嘅感覺。當 burrata cheese 加上酸酸甜甜嘅番茄同埋少少香草調味，清淡得嚟又帶有少許香草味道，唔錯架！Tonno e Cipolla Pizza 意式吞拿魚配紅洋蔥及酸豆薄餅意式吞拿魚原來係中間生生地，面頭 roast 咗，用嚟做 pizza 我覺得係特別嘅。另外配料嘅紅洋蔥及酸豆酸酸地幾開胃。平時我哋應該會多點一個甜品或蛋糕之類，但食完已經非常滿足啦！～…Read More

已經唔係第一次嚟南小館食飯，就算係唔同分店都依然咁好味，真係難得。等咗20分鐘左右就有位，仲咁啱係窗邊位。好啦，咁等我逐一介紹下今晚嘅餸菜：南國薑蓉雞原來係冷盤嚟架，賣相麻麻地，雞肉比啲薑蓉遮住晒，但味道出奇地令人驚喜！乾扁四季豆純粹想點返個菜，感覺一般唔算特別。鮮肉小籠包（5件）上海菜必食嘅點心，揀咗傳統啲嘅鮮肉口味。的確係皮薄多汁，仲幾欣賞佢用自家製嘅蒸籠上菜。 大良炒飯屬於大廚推介亦好多料，包括蝦仁，豬肉同埋果仁。用咗個小鍋上，仲好好咁保持溫度。玩味咕嚕肉賣相係特別嘅，以菠蘿殼盛載，難怪叫做『玩味咕嚕肉』。桂花蜜拉糕（3件）花花造型好靚呀，嚥嚥靭靭嘅口感我鍾意，但桂花蜜嘅份量可以多番少少。原本仲點咗個『清燉牛展湯』，好彩佢漏咗單，否則真係食唔晒呀！…Read More

金坊每次都係大排長龍，就算我哋今次選擇咗預先訂枱，都要等10分鐘先有得入座。叫都一枱都係嘢食，但我我最欣賞嘅都係佢嘅泰式生蝦同埋蠔餅。蠔餅好足料，啖啖都係蠔仔！泰式生蝦就唔洗講啦，基本上係泰國嘢必食嘅！芋頭魚都唔錯架，由細到大都好鍾意佢嘅得意造型！後面嘅雜菇扒西蘭花都可以啦！（咁啱呢兩碟都係素菜）仲有其他食物，不過以下呢幾款就唔夠以上嘅菜式惹味啦。嘢食嚟講，你隨便任點一款都會好好味。但係服務嚟講，我就唔太喜歡佢喺人哋食完就即刻催促你離開。話晒一大班朋友出來食飯都係希望聚聚舊，吹吹水咁。所以想傾計嘅話就唔使揀佢啦！…Read More

通常嚟九龍城都係食泰國菜居多，今次朋友仔帶咗我哋嚟食潮州嘢！首先每人嚟返杯功夫茶先~ Cheers~白飯魚同豬紅（白飯魚好味道食唔停口！）滷水鵝腸（鵝腸肥美，而且配白飯一流）無雞件所以變咗鵝片豆腐，再整番碗苦瓜黃豆湯（唔食苦瓜嘅朋友仲有好多湯品選擇架）仲有花甲（都好味嘅，但個人比較鍾意清淨地嘅油鹽水粉絲花甲多啲）同埋梅菜扣肉（味道剛剛好，而且唔會太肥膩）甜品就係反沙芋，可惜今晚嘅南瓜粿賣晒（第一次食反沙芋，感覺幾特別，仲得知製作方法原來好繁複）晚飯後亦有提供功夫茶。（飯前飯後喝一杯功夫茶，可算係歷代潮汕人的習俗，所以呢度都算係比較傳統嘅潮州菜。）…Read More

朋友仔話佢未嚟過籣桂坊，好啦，咁我帶佢嚟參觀下喇！係呀，就係籣桂坊嘅 Break Street Kitchen! 晏晝嚟到冇乜嘢做，只係悠閒地嘆番個 saturday brunch!先嚟飲品熱朱古力同埋鮮搾蘋果汁。其實店員有特別推介一款 mixed juice，但係加咗 carrot，所以都係唔好搞我。杯熱朱古力係唔錯嘅，味道唔會太甜，仲有棉花糖添！（但比較特別嘅係，棉花糖都最後都唔溶嘅？！）我哋一個叫咗 All Day Breakfast。平時睇 Gordan Ramsay 嘅 videos 成日教整好好味嘅 scrambled egg，特別揀咗配 scrambled egg。果然係好香同好滑溜，值得一試。另一個揀咗 Egg Benedict。朋友大讚呢度嘅 Egg Benedict 係用 ham 嘅，因為大部份餐廳都會用佢討厭嘅三文魚做配料。認真係幾好味，但略嫌隻碟太細，要切開嚟食時有啲唔夠位。下次有機會就一定要試佢 signature 嘅 Beef Wellington!!!!!!…Read More