fooldee的個人專頁

餐廳以黑膠唱片為主題，昏暗燈光配搭頂級音響，再加上當晚駐場DJ康家俊挑選屬於Pulp嘅Different Class大碟，靚酒靚歌靚晚餐，絕對係抵抗疲勞沖喜套餐。🍴燒美國黑安格斯肉眼扒（10安士） HK$368叫咗三成熟，肉質粉嫩富油香，法式伯那西醬帶蛋黃牛油香氣，濃而不膩，日本南瓜焦香甘甜，薑黃花椰菜、法邊豆都好鮮甜。🍴慢煮法國鴨腿 HK$298油封鴨腿肉質柔軟，酥脆甘香，可輕易用叉拆開，沙律有無花果、蜜柑、合桃，配上18個月意大利黑醋汁，清新解膩。🍴Tiramisu HK$138賣相精緻，咖啡同酒味唔算突出，不過不失。🍴Santé by 壞特?te HK$148雞味酒用歌曲命名，以白桃酒混合白玫瑰茶風味伏特加，散發白桃清香同茶香，湯力水嘅氣泡增添口感層次，調配出色。📍Mercury Recalls by Lost Stars銅鑼灣百德新街51號華爾大廈地下A號舖…查看更多

🍴廚師拼盤 HK$148好多餐廳嘅小食拼盤都幾廢下，現成貨炸熱佢就算，所以甚少會嗌。不過呢個拼盤就唔同講法，雞軟骨、水牛雞翼、炸生蠔、炸蝦雖則較為常見，但炸得乾身唔油膩，點少少日式芥末醬，出乎意料咁好食。真正吸引到我嘅係炸口水雞，辣中帶酸，好難唔流口水，雞肉用乳酪醃過，嫩滑多汁，配埋以三種辣椒加蛋黃醬調製嘅四川醬，辣味層次豐富。🍴龍蝦喇沙汁魷魚意粉 HK$148醬汁以龍蝦加上14種香料熬煮四個鐘而成，充滿醇厚龍蝦香氣，亦帶點椰香，而檸檬葉嘅清香更係畫龍點睛，呢個汁如果煮成湯，相信都會好出色。🍴招牌骯髒意大利芝士餅 HK$82咪睇佢成篤嘢咁污污糟糟，一食就知今次實肥死，因為會追住食唔停。一入口就散發濃濃酒香，口感極之軟滑，四周嘅朱古力餅碎增添層次，食極唔厭。🍴藍檸檬梳打 HK$44檸檬酸香鮮明，梳打夠氣唔太甜，清爽。🍴黑糖焙茶 HK$45奶滑香甜，慢慢飲嗒出茶香。📍GoNuts.將軍澳唐賢街29號藍塘傲格林威治村地下4A號舖…查看更多

兩個人坐一角卡位，闊落舒服，未落單就先送一人一碗紅棗雪耳糖水暖下胃，唔算太甜，幾清潤。湯底揀咗鴛鴦麻辣鍋，加錢轉配季節限定羊肉湯。麻辣湯底以多種香料加上牛油熬製，鮮麻香辣，唔會得個油字，普通辣已經幾辣下，忍唔住要叫返碟鴨血過下口癮。羊肉湯羶味唔重，非常清甜，食之前飲返碗暖笠笠。叫咗另一款冬日限定鮮拼九宮格，精選九款重慶特色鮮料，包括鮮黃喉、珊瑚蚌、竹笙、滷金錢肚、滷豬手、牛肉絲、牛丸、豬丸、黑松露墨魚丸。珊瑚蚌鮮甜爽脆，帶海水味。滷味夠入味。鮮肉丸爽甜彈牙。除咗嫩滑嘅十秒牛舌之外，冇再叫牛肉，要留力食方叔叔推薦菜，包括幾款極之爽脆嘅內，稻田毛肚有嚼勁，鮮黃喉過癮，鮮鵝腸彈牙甘香。大刀牛肝口感似豬肝，味道就更濃郁。飲品叫咗Sapporo生啤，凍啲嘅話會更爽，另外仲有衝上雲霄百香果雞尾酒，酸酸甜甜，酒味唔重，大大杯。📍方叔叔重慶老火鍋將軍澳唐俊街9號PopCorn 2地下G49號舖…查看更多

🍴蜜汁雞扒炒蛋多士雞扒表面非常焦香，掛滿香甜蜜糖，一切開就爆晒肉汁，食落有燒烤風味，軟腍香口。🍴經典芝士漢堡簡單以牛肉、芝士、番茄、生菜砌成，冇乜整色整水，牛肉唔乾，車打芝士嘅鹹香帶起成個包嘅滋味，麵包亦幾鬆軟。🍴牛角包窩夫雪糕窩夫表面微脆，唔會太乾，配香甜雲呢拿雪糕剛剛好。🍴冰搖咖啡冰爽甘醇，果香鮮明。🍴凍朱古力咖啡朱古力味較重，順滑香甜。餐廳佈置以鹿為主題，室外座位適合帶埋寵物共進餐，室內光線柔和，坐得舒服。📍 Deer Coffee西貢市場街25號地舖…查看更多

耐唔耐就會去牛大人打邊爐，貪佢整體水準幾好又穩定，食過旺角、沙田、銅鑼灣嘅分店，今次食最近新開嘅將軍澳分店，照舊揀咗328蚊加一嘅澳洲極上和牛放題套餐。揀湯底先，試過招牌牛大人紅燒牛骨鍋，牛味甘香，亦試過曾經限定嘅醍醐番茄酸辣鍋，酸辣醒神，今次就叫咗期間限定剝皮辣椒雞鍋。湯底帶較温文嘅微辣，一啲都唔油膩，大啖飲都唔驚，清甜回甘，雞肉亦好彈牙，飲完暖笠笠。套餐包每人兩粒澳洲M9和牛牛丸，彈牙多汁。牛有好幾款，安格斯牛小排、澳洲M5和牛牛肩卷油香較突出，而手切封門柳就肉味較濃，瘦得嚟軟腍。食咗無數沙白，隻隻鮮甜無沙，簡直係海鮮類嘅不二之選，蝦亦都幾彈牙。其他方面，皇帝菜等蔬菜全部都好新鮮。蟹子墨汁漿香甜爽彈。鴨血嫩滑，鵝腸爽脆，非常甘香。飲品除咗汽水同冷泡茶外，仲有幾款特飲，柑桔椰果酸酸甜甜，清爽開胃，椰果鹹鹹哋，層次鮮明幾過癮。📍牛大人將軍澳唐賢街9號Popcorn 2樓PopFood 3號舖…查看更多

🍴煙三文魚沙律沙律菜大大碟，煙文魚同飛魚子增添鹹香，沙律醬毫不吝嗇醬，想減肥嘅話記得嗌少醬或走醬。🍴炸物拼盤有豆腐、雞軟骨、章魚，幾香口唔算油膩。🍴燒雞中翼、雞軟骨、番薯仔、羊腿肉雞翼皮好香脆，燒雞軟骨比炸嘅油香更突出，番薯仔表面帶牛油香。🍴明太子雞翼、金菇肥牛卷、大蔥雞頸肉肥美雞翼包住明太子，香辣惹味，雞頸肉嘅雞皮軟滑甘香，雞肉彈牙有嚼勁，夾雜大蔥清香，層次豐富。🍴最中餅雪糕紫薯雪糕甜度適中，味道自然。📍椈中環榮華里13號榮華大廈A座地下G號舖…查看更多

前排喺中環嘅first crack by summer ice飲過咖啡，幾啱我口味，今次嚟到堅尼地城嘅Summer Ice，回味一下咖啡之餘，試埋佢嘅招牌Waffle。🍴Cream Cheese Salad Waffles + Duck Breasts with Garlic Combo先食新推出嘅鹹食，鴨胸非常厚肉，外面煎得夠香，裡面彈牙多汁，特製嘅金銀蒜香而不嗆，食完唔會成口蒜味。🍴Whiskey Apple Crumble Coffee Waffle用威士忌煮過嘅蘋果粒香甜迷人，散發淡淡嘅酒香，脆脆增添刺激口感，微脆嘅窩夫亦夠乾身，充滿蛋香，唔會成口麵粉，再配上冰涼嘅雲呢拿雪糕，果然係Summer Ice嘅拿手好戲。🍴Iced White堅果味突出，奶滑甘香。🍴Apple Cold Brew Cider冷泡啡底甘醇不澀，果香鮮明，蘋果酒令口感更清爽，味道層次更豐富。📍夏雪西環堅尼地城山市街1J號地舖…查看更多

坊間西餐館周末多數要散叫，難得MACRONNIES有SIGNATURE LUNCH供應，當然要嘆返個靚午餐。🍴自家秘製雞翼 HK$68充滿Cajun迷人香氣，辣辣哋好惹味，外層夠乾身，咬落去爆汁，唔使點Ranch醬都好好食。🍴南瓜湯、巴馬火腿卷哈密瓜是日餐湯係南瓜湯，口感絲滑，啖啖香甜。除咗三選一嘅頭盤，另外仲跟埋鬆軟Ciabatta，點埋黑醋、橄欖油風味更佳。🍴鮮龍蝦意粉（半隻） HK$168龍蝦新鮮爽甜，意粉彈牙掛汁，醬汁以蝦煮成，蝦味極濃，帶牛油香，再加上番茄提鮮，確係出色，呢個價錢物超所值。🍴燒美國肉眼扒（8安士） HK$178叫咗三成熟，表面焦香撲鼻，內裡軟腍多汁，略帶油香，相當滿意。薯蓉嘅牛油唔算重手，更顯薯味。🍴Mini Tiramisu HK$26整體偏甜，杏仁酒味較突出，口感頗軟滑。🍴Iced Mocha、Iced Lemon Tea咖啡同朱古力用機攪勻，兩者混為一體，濃郁得嚟唔會互相搶味。📍MACROONIES大角咀嘉善街18號利奧坊地下G706號舖…查看更多

🍴桂花車厘茄店員問完飲咩茶，隨即送上冰涼前菜，紅橙兩色嘅車厘茄浸過桂花糖，甜美酸爽，清香撲鼻。🍴懷舊金沙腰膶 HK$88腰膶只要夠靚，白灼已經好正，火候剛好，爽嫩唔臊。🍴大吟釀煮花蛤 HK$208花蛤大大隻，鮮甜冇沙，大吟釀酒香濃郁醇厚，湯汁飲到一滴都冇得剩，實在醉人。🍴蠔邁燒椒汁 HK$198蠔肉豐厚飽滿，成隻放入口，品嚐奶滑甘甜，湯汁由上湯加上花椒煮成，辣味温和，香而不膩，提鮮唔霸道。🍴煙燻樟茶鴨 HK$168一開蓋，煙燻香氣撲鼻而來，而香氣滲入每一絲鴨肉，絕非流於表面。啡黃鴨皮配上啡紅鴨肉，皮酥肉嫩，鹹香濃郁，更勝法式油封鴨，確係出色。📍龍莊太古英皇道1001號8樓2號舖…查看更多

🍴N+ CLASSICS WITH BACON4安士安格斯牛肉壓扁再煎香，表面焦脆，雖然唔厚，但依然充滿肉汁，油香唔算突出，勝在牛味十足。牛肉來自餐廳喺澳洲自設嘅牧場，品質有保證。酸種麵包外面金黃軟滑，內層烘得夠脆，富牛油香，包身較厚，索晒肉汁之後依舊鬆軟。呢個包雖然係原味，即係走醬，但肉汁、芝士再加上新鮮蔬菜嘅汁水，已經夠晒滋味。🍴N+ LIMITED TRUFFLE用上6安士牛腩肉，油香更勝CLASSICS，炒本菇炒得夠透，非常之香，配埋自製松露醬，幽香唔霸道，口感幼滑，味道層次頗為豐富。🍴CRISPY FRIES、WEDGE CUT薯條炸得乾身，連皮外層好脆，咬落軟糯，散發香甜薯味。薯角飽滿厚身，較軟腍。黑椒汁少少辣，香而不膩，調配得相當出色，倒啲落個包度都好夾。📍N+ Burger灣仔汕頭街32號地舖…查看更多

已經食過幾次，覺得物有所值，於是相隔幾個月之後再訪。今次又係食澳洲M5和牛120分鐘吃到飽套餐，418蚊加一。電話QR Code落單非常方便，上菜快兼冇漏單，外面仲有沙律吧、熱食吧、飲品櫃，應有盡有。店員幫忙開爐之後，隨即送上每人一客嘅牛舌芯，呢個牛舌最軟腍嘅位燒到表面焦香就食得，又香又爽嫩。其他肉類亦相繼登場。澳洲M5軟腍且略帶油香，唔會肥膩，而SRF極黑牛就牛味較濃，一次過品嚐晒兩種風格。豬肉又點呢？原住民鹽燒肉充滿台灣風味，以鹽、花椒調味嘅腩肉甘香彈牙，點埋蒜醋仲可以減膩。雖然鍾意燒雞翼，但今次冇叫到，全因想試下之前冇食嘅雞胗，爽脆香口，辣辣哋好惹味。海鮮方面，虎蝦大隻爽彈，生蠔新鮮濃郁。仲食咗幾款台式小食過下口癮，金沙翠玉苦瓜極之甘香，澎湖花枝排等炸物亦香脆乾身。阿里山檸檬紅茶好飲過唔少茶記，紅火冰茶有粒粒火龍果肉添口感。📍安平燒肉旺角彌敦道593-601號創興廣場9樓…查看更多

🍴手打安格斯牛肉漢堡配薯條配Kronenbourg 1664 Blanc HK$168餐廳由下午三點起就供應歡樂時光套餐，我哋叫咗漢堡同花香突出嘅1664，另有Asahi可以揀，海邊飲下酒吹下水都幾爽。麵包鬆軟，富牛油香氣，安格斯牛肉夠厚，肉汁充滿牛味，煙肉炸到脆卜卜，一啖咬落去滋味爆發，唔使落黑松露蛋黃醬都已經好正，薯條亦金黃香脆，唔油膩。🍴辣肉腸炒鮮魷魚（辣）HK$88魷魚鮮甜彈牙，確係新鮮，辣肉腸增添幾分鹹香。🍴新鮮青口配秘魯辣椒汁 （辣）HK$118新鮮青口嘅軟滑的確遠勝急凍貨幾條街，醬汁微辣之中帶點清香，配海鮮幾夾，放粒青口上多士，再淋上辣汁，令人回味。🍴油漬黃油雞賓尼迪（辣）HK$118呢道菜以手撕雞代替常見嘅手撕豬，調味類似熟悉嘅燒烤醬，特別之處係雞肉經過油漬，口感如油封鴨肉般緊緻，味道份外香濃。🍴Iced 85% Chocolate HK$54冇想像中咁苦，順滑易入口。呢間分店仲特設Gelato車仔，鍾意意式雪糕嘅你豈能錯過？📍Urban Coffee Roaster （唐賢街）將軍澳唐賢街29號藍塘傲地下12號舖…查看更多

🍴胡麻豆腐番茄沙律 HK$68豆腐滑，蔬菜脆，清新。🍴拖羅蓉脆脆餅 HK$68拖羅蓉鮮甜細滑，蔥花加強香氣，脆餅有如旺旺燒米餅一樣香脆，一啖放入口，同時享受滑、脆兩種口感，滋味無窮。🍴木子三文魚盛合 HK$88、三色手卷 HK$68、吉列海老手卷 HK$38辣味三文魚軍艦相當惹味。三色手卷有拖羅蓉、海膽、三文魚子，簡直係鮮味爆發。吉列海老熱辣辣，外脆內嫩。🍴清酒煮蜆 HK$98蜆肉大大粒，嫩滑鮮甜，仲要一粒沙都冇，酒味香而不澀。🍴雜錦天婦羅 HK$108有三大隻蝦、魚同幾款蔬果，用料靚，夠新鮮，薄薄嘅脆皮冇多餘油分，盡顯食材原味。🍴日本宮崎腸 HK$38、厚燒豬腩肉 HK$38、豚肉韭菜卷 HK$38、燒飯團 HK$28豬腩肉甘香軟熟，韭菜脆嫩，外層嘅薄豬肉燒得焦脆，加埋醬油相當濃香。🍴自家製梅酒 HK$48、檸檬梳打燒酎 HK$48梅酒酸酸甜甜，酒味適中，清涼唔涸喉，消暑佳品。📍木子居酒屋大圍積富街33號積康樓地下E-G號舖…查看更多

🍴桂花糖番茄湯餐廳每日都會供應唔同嘅湯，當晚嘅湯啱晒悶熱嘅天氣，就係番茄湯，酸甜味突出而不失平衡，每一啖都飲到茄蓉，濃郁開胃，亦散發陣陣桂花清香，食少少其他嘢再飲啖湯，桂花味更鮮明。🍴牛油果蟹肉脆餅脆餅唔係普通餅乾咁簡單，口感似薄薄一片乾身麵包，外脆內軟，蟹肉鮮味十足，搭埋牛油果醬格外香甜。🍴香濃牛肝菌黑松露意大利飯乾、鮮牛乾菌並用，菌香濃得有層次，醬汁亦夾雜黑松露嘅幽香，同埋Pecorino Romano芝士嘅鹹香，飯粒口感煙韌，粒粒分明，盡吸食材精華。🍴傳統美式辣肉腸薄餅表面鋪滿大量辣肉腸同Mozzarella芝士，香辣鹹香，非常滋味，雖然唔係拿坡里式餅，但焗得唔錯，中間夠柔軟，唔會太乾硬。📍Fika 將軍澳坑口村24號地舖…查看更多

🍴24個月意大利巴馬火腿配油漬蛋黃、黑松露多士 HK$128巴馬火腿柔軟甘香，點一點香甜濃郁嘅油漬蛋黃，就好似和牛配蛋汁咁，鹹甜味道夠晒平衡。🍴新鮮青口配檸檬牛油汁 HK$118新鮮青口嘅嫩滑口感絕非急凍貨能及，酸種多士點少少牛油汁，放埋青口上去一啖過，滋味無窮。🍴炭燒安格斯封門柳配燒汁薯條 HK$198表面帶炭燒焦香，切開五成熟剛剛好，肉味頗濃，軟腍少油脂。🍴新鮮波士頓龍蝦意粉 HK$228波士頓龍蝦同樣係新鮮貨，肉質飽滿，手工意粉帶麥香，口感al dente，分量都幾多。🍴Pi Tiramisu HK$128以Single Ristretto作為醇香咖啡基調，Malibu Rum散發椰子堅果風味，Maker's Mark Kentucky Straight Bourbon帶焦糖、雲呢拿香氣，酒味突出，再加上沖繩黑糖、忌廉，入口香甜順滑，出色。🍴Mystical Rosa HK$88由橙、芒果、菠蘿三種果汁混合而成，甜美可口，蘋果洛神花增添香氣，加埋梳打水飲落更暢快，大熱天時飲就啱晒。📍Pentola大埔安邦路12號大埔藝術中心地下G01-02號舖…查看更多