haru-lkp的個人專頁

見到openrice 有咁多好評，諗住今晚happy Friday同朋友食餐好嘅，點知食到嬲嬲地，真係要俾人生第一篇openrice差評。到底係我唔好彩，定間餐廳變左？唔滿意地方：1. 鐵板油泡安格斯牛柳13oz 配烤大蒜，由落單到上菜，中間搵店員跟跟張單3次，前後等左成個鐘有多先有（19:59-21:14），期間店員完全無同我地講發生咩事，我地唔再問佢都唔打算覆我。講返塊牛柳，好一般，有塊鐵板淋啲熱油係面，同自己係屋企煮都無乜分別。2. 無花果火腿披薩，都係要店員跟單先有。食落好一般，啲toppings同塊pizza 係無痴實，一拎起就跌，懷疑係咪之後加工（我唔清楚）。切又切到古古怪怪，一塊大一塊細咁。好彩上菜仲熱熱地。3. 員工服務態度真係有好大改善空間，今晚俾我嘅感覺係俾錢買難受。自問已經有禮貌地叫店員幫手跟單，唔明點解可以無回覆，正常睇完個廚房係咪應該同個客講返仲有幾耐到？有咩困難上唔到菜可以講，而唔係由得個客乾等成個鐘。店員最後有道歉，有解釋廚房問題搞到遲左，但佢嘅解釋對我來講都遲左。店員想送兩枝野飲俾我地做補償，我地拒絕左，原因係我地唔係想R著素，亦都唔想飲野。佢後尾又拎左碟包放台面請我地食，不過啲包真係好硬，不了謝謝。其他野食可以略略分享下：1. 滿滿蜆肉蝴蝶粉，蜆肉係多嘅，有沙。蝴蝶粉比想像中少，半碟都唔夠，尚可接受。2. 黑松露起司炸薯條，可接受。3. 全晚最正常係杯手工啤酒。番石榴白桃烏龍茶都係一般。附上落單圖一張：…查看更多

早排星期日同男朋友來到尖沙咀食burger。以前經過都見唔少人食，menu 又多野揀，室外都有幾張台可以坐，睇落幾寫意，今次終於到自己入去食啦。坐低先見到，原來有得QR code 落單，可以外賣送到/自取。我就好八卦咁走去格價啦🤣，外送都係加左少少錢啫，合理範圍。大家有興趣都可以試吓。我哋叫左兩個burger。 因為我真係好鍾意牛油果，一見到menu 有就毫不猶豫咁order 左 牛油果醬芝士雞柳漢堡 （$100）。第一眼見到已經覺得超大個，有啲擔心食唔晒🤣。佢仲要切開一半，睇得到塊雞柳好厚身，就算我口細切開個包食都係啖啖肉。牛油果醬係勁多，又新鮮。整體來講，就算塊麵包好大舊，都仲有牛油果醬同蕃茄中和返，唔會食到口乾，開心🥰。男朋友嘅 蜜糖芥末大烤菇煙肉牛肉漢堡（$120）仲令我驚訝🤣，非常大個漢堡。同埋我哋想食埋薯條就轉做套餐（+30），跟埋飲品嘅，都值得一試。牛肉係非常juicy同香，好厚一舊，單食牛肉都好出色。煙肉好大塊，又係好juicy，唔會咬唔開個種。烤菇同個包一樣大🤣，好有厚度，煮到軟林林，拍得住菇扒🤣。薯條就相對平凡，過下口癮咁解🤣，都脆嘅。食得多肉，都想食返啲菜平衡下。我哋仲食多左一份煙鴨胸沙律（$88），非常大份！飽飽！唔係太大胃口嘅女仔建議落order之前同男朋友講聲🤣，因為我就係食完包已經9成飽，個沙律基本上都係佢食嘅🤣。鴨胸兩大片，厚身好夠汁，無蘇味。沙律菜都好新鮮，唔苦，撈埋佢地嘅柚子汁，都幾開胃，所以我哋最後都係清晒嘅🤣。飲品方面，我飲蜜桃冰茶（$38），上面加左薄荷葉，夠清新，食到飽飽地飲返淡就好夾啦。🥰男朋友個杯熱hazelnut latte係跟套餐嘅，有拉花可以打卡🤣。偷飲左佢一啖，入口甜甜地，又唔會太膩，推介。…查看更多

今晚同朋友來到杏花邨運動outlet 行街，見地下有間得得意意嘅餐廳，有埋打卡位🤣，就入去試一試。我地兩個女仔叫左個二人晚餐（$218），自選左2個主菜，連餐湯同沙律、甜品。首先上台嘅是日餐湯係蘑菇湯，蘑菇同忌廉打暈左仲咬到少少口感，菇味都幾香，夠熱👍。田園沙律都係好大一碗，沙律醬夠撈🤣， 菜同蕃茄仔都好新鮮。主菜1: 卡邦尼意大利粉煙肉好有誠意，好多粒😳，意大利粉嘅質地都唔錯，煙韌嘅。卡邦尼同芝士都好濃，唔錯👍。 主菜2: BBQ煙鴨胸意式薄餅個pizza 值得推介👍👍。襯熱食啲芝士拉絲，薄餅皮夠軟身，煙鴨胸都好到位。餐廳已預先切開6份，我哋女仔一人3塊都食得晒就知真係好食啦🤣。甜品跟餐送2份，是日甜品係啫喱，份量多就唔講啦，隻杯嘅外型先係重點😳，用左可愛嘅雪糕筒裝住，連匙羹都係雪糕筒嘅樣，相信小朋友都會鐘意嘅。另一份甜品我地加錢（+$25）轉左 士多啤梨泡芙雪山。有成6-7粒泡芙，加士多啤梨味雪糕同果醬，好甜😋。最後簡單記錄返餐飲（+$15），我地一人一杯：荔枝梳打、雲呢拿冰沙，兩杯嘅份量都絕對夠食成晚兼吹水🤣。…查看更多

今晚放工來到修頓附近食麵，舖面好光猛，睇落好乾淨。平日晚7點左右直接行入去搵位坐就ok。鮮茄牛腩拌麵（$55），牛腩炆得好林，有少少筋，好易入口。腩汁好有誠意，有骨膠原嘅口感。🤣 最緊要係汁夠多，夠撈碗麵。蕃茄都唔少，蔬菜來講已經好足夠了。蔥花好多，成碗撈暈來食就啖啖都有野咬了。🤣油潑辣子魯肉biang biang 麵（$55），Biang biang麵聽落好搞笑，原來係改良版嘅陝西麵，仲要係手工做嘅，聽落好有誠意。🤣 麵身似刀削麵個種粗度，咬落煙韌，亦都沾到好多辣醬汁一齊食，值得推薦！我揀左個小辣試一試，佢係麻辣，好香好好食，連唔識食辣野嘅我都入到口。 魯肉粒都係好林好入口，肥瘦得而，仲有啲菇仔撈左係入面，好豐富的。怕唔夠飽，叫多碟小食 芥香麻醬雞絲粉皮（$42），雞絲好多，啲肉滑滑的，青瓜絲都算多，粉皮偏粗身，夠薄，撈麻醬食一流。👍飲品我就要左杯菠蘿青檸蜜（$24）少甜，清清甜甜嘅，適合天口熱時飲，入面仲有啲菠蘿渣咬下。🤣朋友個杯係滑溜溜香芋鮮奶（$28），口感真係非常滑溜，好香芋頭味，而且一啲都無想像中咁濟，好快就啜晒落肚。🤣總結：我哋兩個人都食得好飽，好滿足，會再複桌。…查看更多

一直都好想試吓家後出晒名嘅芝士蛋糕，今晚終於有機會食了。舖頭主要都係做街坊生意，舖面唔算好大，但可能星期日，排隊等位同等外賣嘅食客就一直keep住有，想坐低食嘅話建議早少少到啦。今晚兩個人叫左唔少野食。第一份係紅燒豬腩飯 （$42），跟餐有是日例湯或飲品，但因為天氣太熱，揀左罐凍可樂。 呢度嘅豬腩炆得好淋，好易入口，都好入味。肥膏同腩肉嘅比例亦都好好，好香。碗豬腩肉都有成8-10舊，下面仲有好大舊薯仔，同埋菜。白飯就無咩特別評論啦，好大碟囉，總之撈汁食就非常正。第二份係出名嘅手工水餃。揀左雲耳椰菜豬肉湯餃，加套餐B要埋個是日飯團，再加罐凍忌廉（$51）。個水餃皮薄薄地，入面塞滿餡料，有成8隻咁多。湯底有啲蓮藕嘅味道，飲落都好正。是日飯團寫到明係用日本米整嘅，用保鮮紙包住，暖暖地，好方便拎上手食。餡料都好豐富，有啲菇、豬肉等等。細食嘅女仔基本上夠曬嫁啦。小食都叫左兩份。麻辣雞腎（$20），都比想像中大碟。食落爽口嘅，辣汁就真係幾香辣下！好似我咁唔太食得辣，但又想試下過癮嘅話，可以將啲雞腎浸一浸落頭先嘅水餃湯度。🤣浸完再食都仲係好爽。🤣另外再叫左碟滷水雞翼（$25），有4隻。啲雞肉好容易就骨肉分離，睇得出啲滷水都浸得好夠味。 一人兩隻當加餸就岩岩好啦。最後！重點！呢度嘅芝士蛋糕真係一定要食！自家製嘅日式芝士蛋糕，幾乎個個落單都聽到佢個名嫁啦，手快有手慢無。我哋要左一件原味嘅做飯後甜品（$25），芝士味濃，唔膩唔濟，個蛋糕邊濃濃地好正，入面入口即溶，好幸福的感覺！😍😍 見舖頭個雪櫃有寫有其他味道嘅芝士蛋糕，但都俾人清晒了，真係好搶手！總結我地叫左咁多野食，都係$160左右，食得超飽，最後個芝士蛋糕簡直係一個完美句號！…查看更多

今晚平日放工，同同事一齊來到灣仔食牛牛，決定月頭食餐好嘅。因為人仔細細怕食唔晒，就叫左份200g excel牛柳 （$110），份量對女仔來講係岩岩好的！牛柳望落都唔細塊，配合埋塊鐵板上，熱辣辣咁切，感覺爽爽的。最緊要記得開刀之前拎條圍裙遮一遮！牛柳肉質好林，解牛工程係非常容易嘅，仲切到咁多粒添。啲肉好juice ，好香牛味。個人鐘意落粉紅喜馬拉雅鹽，除左啲講到悶嘅豐富礦物質之外，佢係同啲牛味最夾嘅，食落有少少口感，咸得來又唔會遮左啲牛鮮味。另外，牛極有樣野最岩啲大胃王食嘅，就係佢地嘅自助餐吧！有沙律、白飯、味噌湯全部都係任添嘅。怕食太多肉唔平均嘅大家，可以食返多幾條沙律啦🤣。白飯同味噌湯都唔錯嫁，以我個人來講，一前菜一餐湯一飯，再加個200g牛，絕對係食到捧住個肚走。性價比亦都算高，所以平日晚都見有唔少街坊來食嫁。…查看更多

今日星期日，同朋友兩個人來到深水埗食左2個brunch set 。🤤 店舖離旺區有少少距離，唔難搵；假日亦唔算迫爆人，計埋餐廳嘅性價比，非常推薦大家來食。來呢度當然要試下佢地嘅主打漢堡啦。 A4和牛漢堡伴薯條（$90），漢堡製作需時，上台時熱辣辣，大大塊好厚身嘅和牛，鬆鬆軟軟的，肉汁好美味呀。🤤 芝士係半溶狀態，黐實啲和牛同菜。🤤 生菜同蕃茄都好新鮮，食落zap zap聲。🥰 薯條就好大碗，可以同朋友慢慢坐，慢慢些牙食。☺️三文魚明太子茶漬飯（$80），極力推薦！！茶漬飯係香港好似都唔常見，聽到隔離台落單個時都問茶漬飯即係點樣食。🤣 呢度嘅茶漬飯啲茶類似高湯咁嘅味道，就咁飲落偏咸。將茶平均地倒落飯入面，味道就會變得平均晒。簡單啲來講，就類似湯飯咁，不過係日式版。🤣 成壺茶鐘意倒幾多就倒幾多，任君選擇，我地就倒左半壺。佢三文魚其實有好多塊嫁！係我影得差，俾啲木魚絲遮住晒。😤 （木魚絲超級多！） 三文魚浸過茶之後變成半生熟，一啲都唔韌，我地兩人分都食到2-3塊。😍 明太子都好好食，撈埋飯食好快清晒。 值得一提嘅仲有佢地嘅wasabi，朋友怕辣，但佢都話好好食！好食在佢入口第一啖係甜甜地，食到落喉嚨先有陣陣嘅攻鼻，好過癮咁喎。🤣食完兩個set 仲有啲口痕，加單要左個Tiramisu（+$30），比較實淨，但芝士味好足，做為飯後甜品好滿足。🤤飲品我地要左熱/凍鮮奶咖啡各一（$10/15），個人覺得好似凍飲大杯啲抵啲。🤣🤣 我就鐘意偏甜嘅，加少少糖醬就岩岩好。…查看更多

今晚同家姐來到誠品就緊係食台灣菜啦。放工好肚餓，於是叫左2個小食同2個飯share。台式鹽酥雞（$30），好大粒雞，啲雞仲要好嫩滑，外層皮好脆口，調味都唔錯，唔會咸過龍。 極力推介！台灣古早味香腸（$25），切左片嘅，估計有4-5條。甜甜地，脆皮，上面有芫茜正🙈。見餐牌個鮮蔬米漢堡餐（$34）幾得意，飯煎到脆脆地，入面夾住素食食材：菇、紅蘿蔔、西蘭花、豆卜等等，好健康。醬汁好足夠，一人份量食呢個剛剛好。 佢地仲講到明係用台灣東部嘅米，真係食得安心。滷肉飯便當（$55），超級大碗！白飯同粉絲都佔左半邊，滷肉粒粒都大份，半肥半瘦，唔錯。 蛋有半隻，椰菜同粟米都好多，幾健康。個人覺得佢哋俾嘅滷肉汁份量幾好，岩岩好撈晒飯同粉絲。野飲跟餐，想飲啲特別啲嘅，揀左 芋頭豆乳小芋圓，半糖（+$26）。芋頭蓉超級多，真係要搖勻先好飲。豆乳就比較健康啲，小芋圓亦有好多粒，細細粒好好咬口。因為半糖左，所以飲落都唔算好heavy 。另一杯要左 黑糖珍珠仙草鮮奶（+$21），珍珠都係屬於偏細粒嘅，仙草好大塊，黑糖味都好重，建議大家揀半糖。滷肉飯便當真係好大碗，加埋啲小食又唔細碟，飲埋杯野我哋都飽死左。🤣🤣 …查看更多

最近都繼續食緊外賣🤭，今晚自己一個搵食就來到旺記冰室試試佢。叫左個 野菜蕃茄麵豉湯讚岐烏冬（$56），見餐牌寫住150g特多蔬菜，覺得好吸引。 怕唔夠飽，店員就建議我叫雙倍菜（+$10），非常健康。先講佢啲野菜，因為係雙倍菜，所以外賣盒著左三分之一全部塞滿菜。 入面有木耳絲、火腿絲、蘿蔔絲、超級多洋蔥、超級多椰菜同埋粟米粒粒。個人鐘意撈埋蕃茄湯來食，濕濕地好易入口。鮮蝦整得幾乾淨，爽同埋有蝦味。 滑蛋亦都好大塊，好好食，真係非常滑。最重點嘅讚岐烏冬塞滿左個外賣盒，拎到返屋企食都仲好彈牙，就算浸住湯都唔會變成一pat pat 🤣🤣。蕃茄麵豉湯幾好飲，唔知係咪因為加左麵豉醬，佢入口一啲都唔酸。 撈完野菜同烏冬，唔好嘥野，成盒拎起飲埋啲湯。跟餐有野飲，天口熱叫左杯凍檸茶（+2），碎冰、檸檬唔苦。Menu張相無呃秤，真係有咁多料。以一個女仔嘅份量來講，可以話係食到飽飽。出餐快，店員nice，會再回頭。…查看更多

今日放工來到西營盤買個外賣返屋企食。店舖非常近地鐵站出口，好易搵到。今晚就叫左2份麵同啲小食返去同屋企人share。香酥排骨湯麵+蕃茄湯（$58+6），因為係外賣，佢地會幫手分湯、排骨、麵咁樣pack，唔洗驚焗到淋晒。 排骨有好多塊，肥瘦適中，個皮就算係外賣焗過都係脆脆地的。 麵幾煙韌，仲有好多肉碎、青瓜絲同生菜，幾清新健康。。蕃茄湯我覺得好好飲，少少酸甜，入面仲有啲蕃茄肉咬下，送完麵就咁單獨飲都好味道。花枝丸撈麵（$58），佢係醬油撈麵來嘅，個人覺得幾夠味，唔會話好咸食到口乾乾。 花枝丸都幾大粒，好彈牙，表皮上面啲香料都好味道。麵就同樣地跟肉碎同生菜。台灣野一定要食嘅梗係 鹽酥雞（$38），脆皮，炸漿唔多，所以一啲都唔呃秤。 雞肉亦好嫩滑，份量又多，絕對推介。原本仲怕唔夠飽，所以叫多份 台灣拼盤（$45）。入面包埋：鹽酥雞、花枝丸、台灣腸仔、炸豆腐。台灣腸真係非常好食，個腸仔皮好好咬。🤤🤤 炸豆腐都好出色，有木魚絲係上面，再有甜酸醬，好開胃。野飲方面就跟餐叫左杯凍冬瓜茶（+8）、凍百香果梳打（+10）。🌟 總括而言：抵食！食得好飽！…查看更多

見到屋企附近開左間新小食店，係印度孟加拉特色嘅；加上依家晚市基本上都係要外賣，今晚就一於買返去試試佢。呢度新開張，鰂魚涌地鐵站一出就係，算幾方便。樓面唔算大，主要做外賣生意。廚房就好大，開放式，睇住佢地即叫即整。我叫左3款野食，等大約5-10分鐘就有喇。 舖入面都有台有櫈可以坐住等嘅。Chicken zinger ($65) 最注目嘅係佢好大塊雞，炸得好鬆脆，啲肉唔會老左，又唔會油淋淋。garlic mayo 同炸雞都好夾，咬落好開胃。生菜同蕃茄都好新鮮，咬落去zap zap 聲。上下兩片包就算係外賣包起左，都仲好軟林林。Chicken poppers ($48) 個人覺得非常好食！ 雞粒一啲都唔細粒，有咕嚕肉咁上下大小。外面個層食落落酸酸甜甜，入面啲肉夾雜住辣醬，好開胃。 佢地嘅雞粒會落蔥一齊食，鐘意蔥、唔鐘意蔥嘅朋友，可以試下同店員講聲。Masala chips ($30)啲薯條好大份，粗身、微辣嘅，好好食。😭 個人覺得佢嘅house sauce 調味似泰式辣醬，印度香料masala mix 都好野味，就算唔另外點茄汁都已經好足夠，送啤酒汽水應該會好夾。 個人覺得1個人食的話真係會幾大份，2個人share 食嘅話就岩岩好。外籍店員好貼心，怕我外賣啲炸雞同薯條會焗林，專登係盒度留返啲窿位透氣。 整體來講，好滿意食物質素，價錢都合理，店員亦好nice，真心推介！…查看更多

今日收工同同事來到天后食台灣麵。由於我地6點幾就去到，唔需要等位，探下熱就入得去。呢度好貼心，門口有紙袋俾我哋拎來袋口罩。🙈來到想食啲特別啲嘅，我叫左碗椰子雞湯米線（$58），揀要手工拉麵（+2）。好多粒紅棗同紀子、圓肉、木耳；椰味濃，食落甜甜地。拉麵幾彈，好好吸😂。成隻雞脾咁上🤤，滑滑。同事要左台灣藥膳古早牛肉湯麵（$65）。同樣有好多紅棗紀子；好多好大舊牛腩🤤，煮得好淋好易咬，唔多筋。仲有2大舊蘿蔔，煮得幾入味🤤。我地再跟餐追加左一碟菜share食，上湯浸時蔬（$19）。菜都幾新鮮，又係超多紅棗，好補，真心推薦女仔食。不過碗麵真係好大碗，胃仔細細嘅未必食得晒🙊。野飲叫左蜂蜜綠茶、柑桔檸檬（@$8）。非常鐘意佢杯蜂蜜綠茶，甜得來唔會好飽個種，飲落喉嚨都舒服，好好飲🙈。…查看更多

呢排無得去旅行，突然又好想食台灣蛋餅，於是約埋朋友來旺角阿木食lunch。Lunch time 門口等位已經超級多人！留意返要齊人先入得嫁！我地要左碟紅燒牛肉麵（$65），我揀左走酸菜🤣，但有超級多蔥。幾鐘意佢啲麵咬落幾煙煙韌韌。牛肉都好大舊，好多筋。芝士肉鬆蛋餅（$42）多料好食，不過我鐘意個皮再煎燶少少，會脆口啲。😳另外叫左2杯黑糖珍珠奶茶，一凍一熱。個人覺得杯奶茶茶味較重，唔太夠甜😖。不過啲珍珠好好咬口。…查看更多

餓左好耐無出街食，依家去邊度食野都真係要好好揀過至得。今日同家姐來茶墨飲杯好嘅，賀一賀復活節假。我最鐘意飲黑糖飲品，見到有緊係要叫啦。 我要左杯黑糖珍珠芒果鮮奶（$39），店員好好人有提我怕唔怕黑糖本身已經甜，於是揀左少甜少冰，揀用牛奶沖。未撈之前飲啖，芒果味好夠，撈埋黑糖一齊飲都好夾，唔會怕好膩，面頭個層奶都好正好滑的🙈。入面加左好多珍珠，慢慢咬🤤。我見menu有雪糕奶昔系列，下次天氣熱啲可以試試佢。家姐就要左杯黑糖薑桂圓紅棗茶（$38），熱飲來嘅，一打開見到都覺得好補🙈。薑味同紅棗味十足，係呢邊返工嘅話隨時來買杯補下都好。依家咁嘅時勢好難拎住杯飲品行街，所以我地嗌埋雪糕同蛋糕坐低慢慢食。雙球意式雪糕就揀左2款茶味：焙茶+茉莉（$42）。非常之好食，茶味好濃，密度高，唔會話好易溶化。焙茶仲食到佢有少少燶燶的味道，茉莉就好清爽，岩做飯後甜品。蛋糕我地就叫左富士蘋果芝士蛋糕（$28），入面有一粒粒蘋果肉，芝士唔膩，餅底都好好咬😂。個人私心鍾意佢地隻碟，雲石花紋好靚🙈。…查看更多

約左朋友去尖沙咀食lunch ，寛巷子嘅店面裝修好靚，入面個環境氣氛都好好，中華風。我地今次坐左係店中間，如果坐到窗口位仲正，晚上可以打卡添。🙈依家出街食最緊要做足防護，店員全部有帶口罩，入去前都需要探熱，人又唔算坐得密，大家可以安心食😌。我同朋友叫左一人一碗崩沙腩濃湯麵（$158）。份量剛剛好，腩肉都多，有成6-7大舊，食落好淋，好好味😋。麵條似係手打麵，吸晒啲湯汁所以都好淋，好易吸入口。湯就真係好濃嘅，亦都唔油膩，可以飲埋啲湯🙈。小吃賣相都唔差，我地叫左碟醋香貓耳朵（$58）share來食。酸酸地嘅醋好開胃，雲耳細細粒好易放入口，食落亦好爽脆，2個人食就岩岩好，下次多人一齊去食嘅話會試埋其他小吃。飲品我地跟套餐叫（+$15）。我要左杯山渣紅果汁 (左邊)，朋友就要左杯寬巷子玫瑰水果茶 (右邊)。山渣紅果汁好好飲，佢少少酸，加埋紅果既甜味幾夾。晚市打邊爐有得揀山渣飲嘅話我實推薦呢個。🤤朋友嘅玫瑰水果茶好靚😍，佢話好香茶味，甜度剛剛好。我下次都會試下呢杯。佢地menu仲寫住星期一至三，晚市打邊爐有3折優惠添呀🤤，好抵。…查看更多