魚毛哥的個人專頁

本身有食開利興的燒味飯，點知越來越差，所以要放棄幫襯佢。今日就過檔試下呢間新開的燒味餐廳，睇左一陣餐牌，叫左個四寶飯試下。叉燒的肉質並非坊間燒味檔的叉燒，唔太好食，我就唔識欣賞。切雞普普通通，唔太鞋，但冇驚喜。紅腸同咸蛋正常水準冇投訴！最唔掂係啲飯，好淋偏爛。奶茶認真係好難飲，茶底苦澀，奶又唔掂，一間餐廳最基本的飲品都唔掂，加上連最基本燒味店的叉燒都唔合格。點搞呢？！第一次幫襯，亦都係最後一次幫襯…查看更多

以前經某些媒體介紹過，得知此店的荃灣分店，一直都未有機會試，但今次見到佢開到嚟元朗，咁就一於試試係咪咁好食。今日去到只得一枱人食緊，但門外不斷有外賣客，看來生意不錯，不知是否聞風而來幫襯。我一入店，只得一名樓面幫客人落外賣，明顯人手不足，要等一段時間先有人幫我落到單，再加上目測到廚房只有一人煮米線，我足足等左幾個字先食到，如果堂食真係要有心理準備要等好耐。今次就叫左小鍋米線，麻辣小辣，但個湯我唔覺得麻亦唔太辣，可能要叫中辣先真正覺得辣同麻。餸就揀左腩肉、豬大腸。腩肉入味唔靭，豬大腸係切成條狀，彈牙有咬口，不會過淋，冇異味，兩樣餸都唔錯。而飲品凍奶茶都ok，茶、奶、糖比例都適中，飲落舒服唔澀。整體來講唔錯的，但仍需要改善，不過都有下次。…查看更多

好少有一碗吞雲米係令到我經常去食，自從去左傳麵世家食，就變左飯堂，唔知食咩，就直接去食傳麵。佢地啲雲吞大小適中，豬肉同蝦比例適中，唔會好似坊間某啲吞雲咁，一係太多肉，一係太多蝦，搞到大大粒咁，雲吞唔係大粒就代表好。另外，嗌左杯凍奶茶，味道中規中矩喇，不用特別介紹。…查看更多

久聞呢間燒賣皇后係元朗出名，誰不知今日去荃灣路德圍掃街就見到佢，咁就試下係咪咁好食，望左佢個餐牌，有不少食品供選，不過主打都係想試佢既香菇豬肉燒賣，其他野都係普通小食店都有既就冇咩興趣試。燒賣盛為$12蚊5粒，價錢有點偏貴，但冇理照樣試，好最多下次唔幫襯😅燒賣味道真係極之普通，只係混有香菇的燒賣，同埋唔係太食得出有豬肉，面粉比豬肉多，就算加埋辣椒油同豉油，係味道上都係冇幫助，主打招牌都搞成咁，真係冇下次了。…查看更多

在搵食咩既時候，無意中發現呢位置新開左一間台式餐廳，咁就望下有咩岩食。餐廳冇套餐嗌，咁唯有散嗌。拌麵伴有主菜的香辣三杯雞同少量鹵豆腐。雖然是香辣，但都唔係好辣，我本以為係連骨既雞，但只係一啲拆碎既雞肉，賣相唔係咁好睇。。。。而且雞肉明顯煮得過老，有啲失敗，麵條亦偏淋，沒有咬口。我寧願叫藥饍米線好過豬大腸充滿濃郁既鹵水味，豬腸彈牙有咬口，不錯。飲品跟主食先可以優惠價加配，朱古力雪香要加$13，檸檬茶加$10。朱古力好飲，配上雪香令飲品口感更豐富。…查看更多

睇食評啲人講到好好食，仲要好評佔多數，咁就搵日去試下係龍定蛇。呢間辛味屋就係札幌隔離，去到門口唔洗等位，即刻坐底望下有咩食，於是叫左個二人餐試下，主食各一款，小食任選三款，指定主食要加$10先有。咖喱味道一般唔辣，冇想像中好食，吉豬比較薄，味道一般，吉列外皮炸過龍偏硬，比較失敗，蛋普普通通無咩特別，成碟咖喱飯食落真係同銀咖喱既質素冇咩分別。拉麵係朋友食既，佢就話好普通，冇咩特別，話以後都唔會試。餃子唔熱，外皮唔脆，餡料冇嚟味道，失敗。。。。炸雞外皮唔脆，略油，雞肉的調味有說不出的怪，同埋個醬都係唔多得。。。三款小食入面比較好少少，魷魚彈牙，味道還好。整餐的食物味道未如理想，如食物味道唔掂，熱度唔夠，五款入面都冇一樣係出色，冇下次。…查看更多

一直都知道有呢個店既存在，不過荃灣太多選擇喇，所以一直都冇試。今次心血來潮就走去試下係咪咁好食，我同朋友各自嗌左一碗牛丼。三色燒牛丼係朋友嗌既，不過我都拎左元祖同辣味牛各一塊試下有咩分別，其中香辣味比較失色，味道辣但個種辣味唔太好食。反而元祖同芝士都好食，形強烈既對比。芝士燒牛丼由於係最熱門，所以我都嗌左佢嚟食。果然不負我所望，芝士配上燒牛肉係幾夾同好食。但係由於成碗飯只係得牛肉冇配菜，食食下會覺得好滯，有點失色，但對於鐘意剩係食肉唔食菜既人就冇咩問題。大阪燒真係最無特別，餡料少，面粉比較多，而且份量少。…查看更多

未有呢間雞排店之前，以前一直都係幫襯開大x大，之後大x大越執越多，搞到得返x大可以幫襯，老實講大x大雞排比x大好食好多。在沒有更好的選擇下一直都係幫襯x大。直到某一日留意有魔法雞排既存在，就check下邊度有分店，竟然荃灣有一間，咁近近地就試下。魔法雞排勝在有幾種炸粉及幾種味粉俾你選擇，可以根據自己口味自行配搭。雞排我就揀左台式加辣椒粉，辣粉都幾辣，唔係講笑，食到我出晒汗，唔食辣既朋友要諗清楚，辣椒粉味道唔稱得上好味，只係死辣，我諗選擇其他口味既味粉會比較好。雞排肉質唔錯，肉質唔鞋兼且唔乾，仍保留少許到肉汁，唯獨雞排唔夠大塊，食得唔夠盡興。其次雞排真係好咸，唔知係咪店員落味粉落得太重手，令到成塊排既味道大打折扣。…查看更多

小曼谷係朋友介紹先走去食，以前從未食過，今次抱住嚐試既心態去食。小曼谷提供的食物種類繁多，總有一款會啱口味，有選擇困難症既朋友會難以決定食咩。炒金邊粉好食，甜甜地，配上花生碎係唔錯，蝦肉新鮮肉質彈牙，不錯。唯獨是蝦既份量唔多，大約得三隻左右。雞肉串燒不過不過，牛肉串燒唔掂，每舊牛肉基乎都有根好韌，實際食到既肉唔多，比較失敗，沙嗲醬平平無奇。≈≈≈≈≈≈≈≈≈≈≈≈≈≈≈≈≈≈豬肉碎生菜包忘記影相，豬肉碎混有一些香料去炒，辣辣地，配上生菜包非常好食，係三道餸入面最好食。…查看更多

老虎堂算係係香港比較出名的台式茶飲店，先後係香港開左多間分店，而這間分店永遠都會keep住有人買佢既主打飲品，店外有不少人在等叫號，咁就証明佢保持著一定既人氣。這杯波霸厚鮮奶都係其中一款熱賣既飲品，杯既招牌圖案都幾好睇，加上以黑糖掛在杯邊，賣相吸引，大大增加杯飲品既吸引力。我見好多人買完都即刻打左卡先😅。當真普通比較大眾既茶飲店真係比不上老虎堂，老虎堂真係比較高質啲，對得住佢所賣既價錢。珍珠有濃厚既黑糖味，珍奶充滿濃郁既奶味，甜度亦剛剛好，但唯獨厚鮮奶即意味著奶太多，蓋過晒茶味，不過整體來講係唔錯。…查看更多

香港雖然係美食天堂，但往往價錢未必同食物質素成正比，反而大陸啲餐廳抵食又好味。夏麵館計埋今次已經係三次幫襯，但質素已經大不如前，三樣食物入面得一份叫還可以。今次晚餐叫左二樣餸一碟炒飯，分別瑤柱蛋白炒飯，蟹黃炒年糕及糖醋魚塊。糖醋魚塊：糖同酸既比例剛剛好，不會太酸亦不會太甜，魚塊內脆內軟，送飯一流，係三樣餸最好的，味道只係還可以，並唔係太出色。瑤柱蛋白炒飯：炒飯味道平淡，唔夠咸。係酒樓食仲好食過佢，難聽啲來講只係一碟有餸既炒白飯，食完都唔知自己食過啲咩。蟹黃炒年糕：年糕混有一些蟹黃同蟹肉一齊炒，年糕無味，全靠蟹黃增添味道，但蟹黃的味道不太濃，而且蟹肉的份量也很少，有點失色。我諗唔會有下次，因為菜式味道真係無咩特別，以一間中菜餸館來講係唔合格。…查看更多

眾所周知！澳門的葡國菜餐廳都係偏貴，但食物質素未必成正比。亦有好多都係名大於實，所以出街食飯都係碰運氣，多人鐘意亦未必好食，只有自己親身體驗先係最真實，往往不抱期望，便不會有太大的失望。這個薯茸並非想像中好食，只係混有馬介休及忌廉的薯茸，味道不算突出，我覺得炸的馬介休應該會比這個好食。葡國雞配有一些雞件、薯仔、切片腸仔等食材及面頭灑了一些芝士粉。它的汁味道還好，適合配上白飯進食，但白飯的份量唔多。蒜茸包算係唔錯既，有濃濃的蒜香及牛油味，熱辣辣。木糠布丁應該係最出色，布丁有濃郁的奶味，不會過甜。以澳門的葡國菜來講，蕃茄屋算係比較抵食，但整體既味道不算突出，以佢既定價算係咁。…查看更多

網上既食評都係一致好評世記豬扒包，所以來到澳門就一定要試下。這間分店位於一條毫不起眼小巷，需要跟著地圖去搵先搵到。奇怪既係隔離賣牛雜的生意比世記還好，所以唔洗點排隊就買到。這裏的豬扒包係新鮮即制的，當客人落order，店員便即時把豬扒放落炸爐去炸，保証客人會食到熱辣辣既豬扒包。唔好就咁睇就覺得豬扒包好細，其實成個包有大約一個手掌位咁大。豬扒包的面包是脆的並塗了牛油，豬扒雖然係炸既，但係唔乾身同埋好有咬口唔un，而且豬扒亦算係大塊，啖啖肉。不過個包食落好似爭咁啲野，就係醬！因為面包剩係塗左牛油，感覺比較單調，如果個包加返啲醬，我諗個包既味道會更上一層樓。奶茶亦係世記其中一樣招牌，奶茶有香濃的茶味，奶既份量亦係剛剛好，不會搶走原有的茶味，值得一試！一邊食包，一邊飲奶茶，人生一樂也。…查看更多

有睇過Running Man既朋友仔應該就會知邊個係劉在錫了！以前門口會放一個劉在錫既紙牌吸引途人既注目，現在卻不見了。但無論在餐牌還是在餐廳內的電視仍然會看到很多的劉在錫。這裏的炸雞是不錯的，分別提供有骨同無骨的，想試多一款口味炸雞的朋友可以選擇雙拼，一次滿足兩個願望。另外，餐廳會提供即棄膠手套，以方便顧客盡情地用手食雞。首先講講炸雞，甜辣醬炸雞的味道如其名一樣，少少甜帶少許辣，適合唔係太食得辣既朋友仔，不過佢的甜辣的味道並唔係咁突出，平平無奇。初雪炸雞？個名幾好聽！究竟咩係初雪呢？即係炸雞面頭灑了很多芝士粉的炸雞及配上炸薯片。這款口味的炸雞真係好好食，同炸雞好夾，令人有種不斷想繼續想食的感覺，完全可以將甜辣醬味的炸雞比下去，炸薯亦炸得很香脆。不過由於真係灑了好多芝士粉，吃太多會感覺很滯。這款芝士炒年糕伴拉麵的味道就好似冇咁辣既泡菜拉麵，只係換左另一種煮法及用鐵板奉上。拉麵的醬汁是有一定程度的辣，幾惹味，如果唔食得辣的朋友可以唔洗試，對於食得辣的我只係小兒科。拉麵伴有芝士在面頭，配菜就有一些年糕，魚片及蛋等等。份量夠兩個人食，不過價錢真係偏貴左，以這樣的食材，不太值得。…查看更多

一諗起打邊爐，我諗吉野家都係其中一個熱門既選擇，因為價錢相宜，而且質素也相對穩定同有保証。所以無論春夏秋冬，每逢晚市都會有好多人打邊爐，坐無虛席，自己一個人打又得，一大班朋友亦得。由買餐到無湯要添加湯底都是全自助，但亦無損其人氣。唯一美中不足就係冇好似其他快餐店咁供應多款佐料俾人添加，比較失色。要說到吉野家的打邊爐，佢既芝麻醬是整個火鍋的靈魂所在，無論你用來點蔬菜還是肉類都會好好味，但一盒真係唔夠，唯有要另外點醬油來食，佢既醬油都ＯＫ架，適合用於打邊爐點食物。另一方面，烏冬都係必食的，雖然是雪藏的，但下鍋煮熟後，它的面質吃起來仍然係彈牙的，亦不需要好像某快餐店要加錢才可以轉烏冬及加錢先有飲品，這正是性價比比其他同樣是提供一人火鍋的快餐店為高。再細看鍋裏的食材，比較突出的只有芝士竹輪，竹輪的質地是彈牙的，咬開竹輪會流出芝士，味道不錯。其餘食材都係正正常常，並不突出，而且份量也不多。肥牛應該係牛肉飯的肥牛，不過不失，牛肉味冇大字開頭的快餐店的味濃。整體來說，以這個價錢算係不錯了，如果晚市要光顧吉野家，我諗吉邊都係我既首選。順帶一提，由於這間分店面積比較細，應該係我見過咁多間分店最細的一間，坐位亦唔係多，所以要來打邊爐既朋友最好早少少來，唔係只有呆企等位的份了。…查看更多