WinnieTsang1201的個人專頁

第一次試呢間新開嘅cafe，用咗Openrice嘅8折訂座優惠。一入到去已經覺得餐廳好闊落好舒服，無論係情侶撐枱腳定三五之己小聚都適合！今次兩個人嚟，嗌咗香煎法式鵝肝多士、菠菜三文魚薄餅同菠菜龍蝦蟹肉意粉卷三樣嘢。首先出場嘅係香煎法式鵝肝多士，冇諗過90幾蚊就有兩塊咁大嘅鵝肝！鵝肝入口即溶，充滿油香味。夾埋水蜜桃同蒜香多士唔會太膩，作為前菜啱啱好。跟住輪到菠菜三文魚薄餅，好鍾意呢度個pizza底做到咁薄，唔會太頂肚。佢嘅芝士同一般餐廳唔同，味道比較淡，同幾軟熟。最後嘅係菠菜龍蝦蟹肉意粉卷，係最令人驚喜嘅一道菜！意粉皮入面包住嘅係啖啖龍蝦肉！塞得滿到連切開都要花啲力氣。忌廉蕃茄汁味道濃郁。下次應該會約多幾個朋友，咁先可以試多幾樣嘢。…查看更多

終於有機會試呢間台灣過江龍啦！叫咗招牌燈籠滷味王子麵、Shake Shake海苔鹽酥雞、甘梅香脆地瓜條同清新冬瓜仙草檸檬。滷水麵可以車仔麵式咁嗌餸，既然食緊台灣嘢，梗係要揀啲特別啲嘅餸啦！今次揀咗台灣直送水蓮菜同百頁豆腐。水蓮菜香港人比較少機會食，口感爽脆，味道好清新，大推薦！百頁豆腐非常軟嫩。雖然滷水底較鹹，但加埋啲餸就OK。另外仲嗌咗台式地道小食鹽酥雞同脆地瓜條。鹽酥雞酥脆可口，一啲都唔油。但可能因為唔油，佢比嘅海苔shake shake粉唔係好痴到上去😂。地瓜條粗身、外脆內軟，番薯肉味道香濃，梅子粉有啲太甜、梅味唔算香，個人認為唔點梅子粉仲好食。會再返嚟食止台灣癮！下次試吓叫抗疫二人套餐。…查看更多