SaSaShu's Profile

小妹本身好少出尖沙咀嘅，多數飯局我都响紅磡搞掂，但由於當晚有Friend搞慶生飯提議去尖沙咀，貪嗰度就腳啲，所以就揀左呢間餐廳。一行8人，一坐低就雞啄唔斷，傾咗成10分鐘都未諗到食乜，於是問Waiter，佢提議不如叫8人套餐，個餐都幾豐富嘅，有餐湯、2個沙律、頭盤、6個主菜、甜品及飲品。餐湯係蕃茄雜菜湯，真材實料，肯定唔係罐頭湯溝出黎；沙律係Caesar Salad，冇乜特別，不過不失；頭盤係炸魚指及薯角，好脆口，不過有啲熱氣！主菜有燒春雞及豬肋骨，個人比較Like豬肋骨，啲肉唔算好乾，甜甜地，又夠Juicy！燒春雞都幾香，但幾細隻，每人分得少少！Pizza分別有大力水手及煙三文魚，大力水手有兩個太陽蛋响裡面，賣相幾特別，食落有蛋汁滲出，好Juicy！至於煙三文魚Pizza就略嫌咸左啲，口感尚可！意粉係肉醬意粉，全牛的，我至愛，正！另外嗰個個汁夠濃，好重芝士味，好味！甜品係朱古力蛋糕，味道就普通咗啲，都可接受嘅。總括，朋友們都好滿意呢餐慶生飯，大家都俾個Like佢！…Read More

呢間餐廳開咗差唔多3年都冇幫襯過，因為佢係要上一層樓梯先可到達，睇唔到入面，硬係唔夠膽入去。不過，個Friend話佢地做緊優惠，好似都幾抵，咁未膽粗粗試吓囉！我地大概1點鐘入到去，成個場得嗰2枱客，心知不妙！唔通中伏？但入咗黎又唔好意思走，唯有頂硬上啦！呢間餐廳個名叫法國餐廳，但居然成個Lunch Menu都冇一樣係法國菜？更奇怪到居然有焗飯食！我叫咗煙三文魚芥末籽扁幼麵，唉！啲芥末食落好苦！煙三文魚咸到好似咸魚咁，至於啲麵就好淋，或者煮得太耐啦！至於我個Friend就叫咗香辣雞焗飯，個汁啲味道好古怪，食落好“Kok”喉，辣係夠辣，但完全唔香，雞又成浸雪味，啲飯又淋晒，可能個飯底炒得唔夠透的關係！我地兩個呢餐食到呀晒救命，雖然唔想浪費食物，但始終都食唔曬，因為真係好難食囉！…Read More

得知前身係舊時紅磡小店，決定去試，據街坊講，以前喺紅磡好細，只有2個人工作，可以話係捱出嚟嘅。今時今日，受最低工資影響，已經冇乜人肯投身餐飲業，老闆仍堅持，已值得欣賞。今日嚟食午餐，叫左“安格斯牛肉漢堡”套餐，有餐湯、餐包，仲包埋飲品。餐湯係蘑菇忌廉湯，好少飲到唔係罐頭湯，飲得出有菇味！買開餸會知其實蘑菇都幾貴。牛肉漢堡食得出並非手打，但呢個價錢加份量，已經超額完成！入面有Romaine菜、車打芝士、蕃茄，食落有肉汁，仲想點？薯條係Outback嗰啲，不過，我覺得偏咸。飲品算唔錯，即磨咖啡上有層咖啡油，味道夠濃，亦不太酸。…Read More

小妹今次第一次寫食評，原因係眼見呢間餐廳其實幾好食，但奈何有啲非善意嘅食評，固此嘗試以中肯的角度嚟寫。今日叫咗肉燥蛋飯及台式凍奶茶。碟頭好夠，以一個午餐黎講，真係好抵！蛋係比較乾同硬(可能由於整咗好耐的關係) ，加上比較咸，但如果送飯的話，係可以接受的。肉燥分量好多，好入味！雖然有啲人話唔夠正宗，但我覺得算係咁啦！又或者要迎合港人口味，不過，小妹想提醒廚師，港人不太喜歡多油，呢個飯偏油，要注意吓！奶茶唔好飲，太奶，但因為跟餐附送，唔能夠太高要求。…Read More