精精的個人專頁

星期日食個下午茶餐，場景全日落大雨都冇乜客人。問有冇下午茶，才拎餐牌出嚟，唔問咪要食正價餐？叫咗叉燒腸仔公仔麵+冷奶茶。承惠$50。真係冇諗過大排檔格局茶餐廳要咁貴。大尾篤又唔係隔涉山長水遠？如果門口有價錢牌，我寧願去隔離食泰國嘢，反正食公仔麵都咁貴。食物都老實講唔係好食，界乎普通<->難食。凍奶茶冇甜味，好似冇落到糖水咁。腸仔正常，公仔麵係cheap麵，麵質唔好食(大光麵就好食啦)，叉燒好似D炒飯叉燒粒咁大細不一。真係可一不可再吖。餐廳似係家庭式經營，幾個人座埋一邊傾偈講粗口。一係出外面煲煙。冇客，都要等10-15分鐘先煮到碗面出嚟。其他食評都有提及：真係唔優做咁，員工對食客黑口黑面，講嘢粗聲粗氣，打開門口賺人錢做生意都亳無禮貌可言。(之但係咁，我留意到佢對認識/幫襯開既街坊，態度好好多，起碼會講多句，及笑。)呢間嘢都唔當客係客既，你估你係佐敦澳牛咩？起碼澳牛個餐都煮得好食吖，入去被受氣都係自願吖嘛！…查看更多

再次光顧這間小小麵舖，如常叫炸豬扒麵，一推開舖頭門，就會聞到一陣好濃烈既氣味……雖然炸豬扒size成個碟咁大，但係非常超級薄，話雖然好薄，但又好煙韌彈口。炸豬扒灑上好像係淮鹽既粉，倍添惹味，麵-係用蛋麵。外型似車仔麵既油麵，湯麵內會附有少少雪菜。店舖地方狹小，一個長方形見晒，座位不多。今日座近門口，見老闆正喺鋅盆用洗潔精清洗電飯煲，附近放有不同疏菜，有通菜，唐生菜選擇。鋅盆下方的電飯煲還有米線。淥麵水會作最後把關，淥得乾乾淨淨才送上枱。好味道吖！…查看更多

好食。牛肉飯嚟講，好食過吉X家，D醬汁好好味。枱面辛辣醬有D似韓國辣椒醬既味道， 好味。晚上人少清靜，好舒服，店舖簡潔乾淨。我唔用自己手機嘟QR code，叫店務員小姐落單，無問題。有禮貎既。…查看更多

呢間街坊小店，傳統粥店味道。正如其他食評講，係污糟既，枱面污，地下糟，仲會有曱甴仔四圍走添(尤其晚市)。一向食開唔覺，粥上枱前，匙羹已放在碗粥入面。有次食生滾粥，豉油碟及匙羹另上，先發現匙羹有粥，係咪未洗乾淨，換第3集先可以接受到.... Wow.... 雖然情況係一般人會難以接受，BTW，我附近返工都食咗7-8年，無既，真係超平吖嘛，窮人恩物。Honestly, 話污槽，但我又唔覺食完肚痛喎。多年不變食艇仔走皮+炸兩/腸粉，由$16食到$22。$22蚊已經好抵，8年加價只係37.5%，絕對唔係謀取暴利既良心食店。仲要係有米粥，碎牛/土魷多料，唔係將貨就價。所以係我仍然幫襯既原因，就係有heart。(最憎就係連鎖式X皇粥店既冇米粥，搞多兩搞粥變水，幾廿銀食完都唔飽。)…查看更多

下午兩點後就可叫下午茶，點了廈門炒米，諗住下午茶炒粉/麵/飯，一定係比正常午餐既份量少D啦。點知嚟到居然係一般午餐咁大碟，抵食。(或者呢度既午餐可能係再大碟D都唔定)味道係我一向食開既廈門米味道，係有茄汁味。(個人最唔鍾意係加大量咸酸菜調味既廈門米。)有蝦/蛋/火腿絲/叉燒絲.... $35 包熱飲。…查看更多

今日行經禾輋，原來開咗淺草炸雞，隔離仲有日式銀咖哩，兩間都好食。淺草炸雞食過黃大仙及荔枝角兩間分店，今日食埋呢間，三間水準都一樣咁好味，點了我最愛的南蠻炸雞（雞扒），及鹽味果醬炸雞（雞脾肉件）。皮脆肉滑，非常好味。😋😋K記，M記嘅炸雞根本無得比。炸雞應該係即炸，等了十五分鐘才上菜。疫情關係，政府實施二人一枱，無打針又唔入得食肆，又禁六點後堂食，好多食肆都生意難撈，希望佢頂得住唔駛執，否則大眾又少咗個平靚正選擇。…查看更多

來到西貢，行山行夜咗，都會嚟聚一起茶記食客飯。有湯有小菜有白飯。+$3有冷/熱飲。份量都唔少，男人都夠晒食。曾經食過生炒骨，夠脆。蝦醬通菜炒鮮魷，鮮魷夠新鮮好食。紅燒班腩煲。餸，小碗湯，確係有少少咸咗既。…查看更多

今次已是第四次幫襯。唔知係咪轉咗老細定咩啦！明顯發現間舖頭係改變咗D嘢，我覺得係差咗既，亦都從此唔會再幫襯。改變一：網燒 (以前用鐵板燒，店員話轉咗幾日。)個火好細，打邊爐/鐵板都仲得，網燒就..... 燒雞中翼3隻，25分鐘得一隻熟，2隻食咗中間仲有少少生。雞翼有醃過，但入面可以完全無味。改變二：所有枱換晒新爐，由鐵板變網燒，火細，有排燒。你有110分鐘時間。個火細到你無時間燒到幾多嘢。改變三：加價，唔知係咪換咗爐，所以要加價。見其他食客11月頭都係$238， 我食就$248。加咗 +4.2% (人工有4%加就好囉~)改變四：由劃紙仔變為用顧客自己個手機嘟QR Code落單。問店員攞機自己落單啦! (好似元氣咁比部機我用)，佢話用自己手機，呢個係大催勢，出面好多間店都係咁。個店員唔知係咪曾經有人好似我咁問過佢攞機，所以佢好大反應。轉用電話落單係為咗令顧客方便叫嘢食。我問佢公司無器材比顧客用，咁做乜轉system呢？除咗器材係顧客私人物品，網路安全性係更大問題，嘟個QR code然後開個不知名的第三方網頁。感覺同釣魚電郵比條link 你click 一樣咁危險，都唔知網站背後coding會做咩。別人唔介意係別人既事，我介意你咪比部機我用囉~ 咁簡單。最好笑係店員講我怕私隱問題，可以手機選好食物後，比部手機佢去柜枱跟住入機。我"O"晒嘴，唔知比咩反應佢，比部機過你手？(我咪叫你比紙我剔囉，你又話轉咗system )以前好好食既醬汁豚肉，可能因為轉網燒取消咗，店員話品質問題無入貨。雪花牛切到好細件，燒起收縮，唔係好食到咩感覺。豬腩肉未燒就好肥，燒完又好好食，包菜食好有口感。其他肉都好一般般，無乜特別好。牛仔骨OK，但見到切到好細件，燒起收縮，你唔會食到幾多肉，但又花時間燒喎。海鮮扇貝燒咗成25-30分鐘都唔夠熟，味道普通。蝦OK既，綜合海鮮係唔好食。總結，午餐燒肉任食$200唔係貴，但質素亦唔有驚喜。可以不去。…查看更多

開咗幾年，有一段時間無嚟，點知一嚟就發覺餐廳有D嘢係改咗。午餐：1. )  以前食開既2餸飯$46? or $48 ? 已經無咗，變咗$53 / 3餸，變相==加價。2. ) 未食完，有個男士就走嚟收碗，渴住佢未食完才停手。然後剛剛放低筷子，又有人走嚟收碗，再一分鐘後職員走過嚟講: "先生夠鐘啦。"原來係45分鐘用膳時間。從來未聽過有45分鐘限制的。入座時職員都無講我知。大家唔好食炸雞扒飯，目測到2枱，要制作15分鐘，俾我，就唔夠時間食啦。同其他師兄講既一樣，好鹹..... 點解會咁鹹既......酸菜好鹹，肉臊好鹹，肉臊份量好少。豬軟骨鹹，白飯唔會鹹。綜合，除咗鹹，食品品質係OK既。凍檸檬意米水好飲。變相加價及45分鐘趕人走~ 我就唔會再幫襯俾錢佢賺~  留返個位比其他人食。…查看更多

經常經過呢間舖頭，今晚心血來潮好想食生蠔，咁就嚟咗試下。今晚叫咗幾樣嘢：1. 特價生蠔 3打2. 西冷牛扒1塊3. 卡邦尼扁意粉1碟4. 德國啤酒1杯(除咗生蠔外，其他埋單8折。)$10/隻生蠔，係細細隻既，不過估唔到有鮮味，又有生蠔味道。(有d酒店buffet相同size既生蠔都無咁好味道。)成$300+ 既一塊西冷牛扒，咁既價錢，size算細塊，仲要係多筋，因為份牛扒貴，切開10件，要成$30一件，所以我將D肉汁啜晒，食盡D肉而吐返嚿筋出嚟.... 張相係肉酸D....  牛扒貴價，唔係應該肉質/部位/大細，都應該係好既咩? 牛扒多筋，肉質可以，咁去食D平價就得啦，做乜要食咁貴。(真心比較，宜家傢俬入面碟$7x蚊既牛扒好食過佢，牛肉味濃過佢。)覺得被搵笨。卡邦尼扁意粉好味，一隻生蛋打在中央，撈均佢好好食。埋單$8XX (8折咗)，有點貴喔。如唔食牛扒，食意大利飯/意粉會D。…查看更多

大圍站前店方便放工買外賣。呢類壽司自助外賣店自己唔太敢食生嘢，怕運送或整理唔夠凍，易變壞。牛肉卷及加州卷係我至愛，好味好食，魚尚既壽司飯做得算係幾好，有D品牌店仲差呢....總括而言算CP值高。(但近來發覺唔知係咪加過價。埋單以前係平D)呢個月發現，豉油轉咗，由以前既"日本制造"變咗"廣東-潮州"，唔知會唔會改變咗食品既味道呢？大圍店咁好生意，七點後去買加州卷多數賣晒，賺咁多仲要改......。…查看更多

好耐無喺創興呢幢大樓內食過飯。誤打誤撞上咗嚟飲茶，裝修普通茶樓格局，場景，客人枱面食品及侍應已令我有心理準備唔係幾好既感覺。見到張點心紙無諗過會咁鬼貴。點了四款點心食完就走了。蒸鳳爪，中點＄30還是大點＄34？忘記了。花生得幾粒，仲要係有怪味，“叔”咗，老婆都話係有味。北菇蒸雞煲仔飯，以為一煲，原來係一小砵。👎$39炸春卷，味道唔錯，夠脆，但炸得膿咗黑咗，輕微硬咗啲。$34。蒸蝦腸粉，$39，真係把鬼。腸粉凍嘅，蝦難食，一夾就散，炸春卷隻蝦好食過佢。4碟嘢，埋單$182，我就覺得又貴又唔好食。點心紙仲寫係手工點心！去唐記，包點先生買外賣都無咁蝕，中晒伏。睇下點心紙，特價$78三碟，但無乜好選擇，揀唔落手。…查看更多

繼食完兩餸飯之後，再試埋佢個車仔麵。$24 包麵底, +2款餸，再加餸都係+$4，冷熱飲品+$4。非常之抵食啦...2餸揀咗時菜，蘿蔔。菜心唔係淥，係3餸飯個counter既菜心，係炒得淋咗嘅。蘿蔔無乜味，食得出係比水浸住，但個湯係無味。+$6 㨂多味牛腩(牛腩係$6唔係$4)，有4小件，味道正常。幼麵好食既。唔好高要求，街坊價非常抵食。…查看更多

呢間餐廳有一段時間無幫襯，強項係兩/三餸飯。現在香港四圍都多咗好多內地人開既兩/三餸飯既店舖，不過呢間已存在多年。味道唔錯既，$35蚊有2餸飯+列湯。好抵食。今日叫咗苦瓜炒蛋，好食，苦呱瓜有苦味，唔會出過水淋晒無苦味。蛋炒得好渦。另一味豬肉釀茄子，茄子過淋變爛，豬肉茄子分離，多油。份糧好多，一個男人食兩餸已夠，白飯都食唔晒。除咗三餸飯，仲有車仔麵叫，即炒碟頭飯/炒粉麵食。…查看更多

新開咗一兩個月既十番屋。平時經過都見到男女老幼幫襯。今日試咗，又唔錯，價錢都好合理。唔想食生冷嘢，見有即煮既熱飯。所以選擇咗牛肉及豬肉飯。牛油炒金菇牛肉飯，好香既牛油味道。黑蒜野菜豚肉飯，豚肉都幾肥。其本上兩款個汁，配料洋䓤，冬菇等等.... 都差不多係一樣。仲有2片醃制蘿蔔跟飯，唔錯。食完一段時間，唔算口渴，(相比買蒸飯或燒味飯食)$3X-$40，仲平過吉X家，街坊街里又多個選擇。…查看更多