AbbyHui的個人專頁

我好鍾意食台灣菜，特別係牛肉麵，個日返工前去開油麻地買野，順便黎食個Lunch。麻辣滿漢大塊牛肉麵諗左一陣食牛肉麵定係食滿漢大塊牛肉麵好，最後決定揀個咩都有嘅！一黎到好香好大碗好吸引，入面有牛𦟌、牛腩、牛筋各兩塊，貢丸、花枝丸各一粒。湯底濃郁得黎唔會死鹹，麻辣味易入口唔嗆喉，一向食麵鍾意飲湯嘅我飲左唔少湯。麵嘅份量好多，麵質滑溜煙靭，唔會過林。美中不足係牛肉麵入面冇左啲酸菜。牛𦟌好軟嫩一啲都唔靭，牛腩相對硬身啲但都唔會好難先咬到，有啲仲連住油脂位好香口，牛筋林得黎食落好有膠質，兩款丸就正正常常冇乜特別。飲品方面揀左熱珍珠奶茶，落單個時唔記得嗌走甜，黎到個時原來係另外有包糖比你自己落，呢點又幾好👍🏻…查看更多

自從得知呢間餐廳有Egg Benedict Souffle Pancake就一直好想黎試下，本身都驚星期六去會唔會好多人，好彩等左30分鐘左右就有位。我地order左3樣野：Iced Mocha一見到杯野飲好開心，估唔到會有Cream，一黎令個賣相加左分，二黎我本身好鍾意食Cream。Egg Benedict Souffle Pancake水波蛋整得好好，一切開係流心嘅，Souffle Pancake鬆軟有蛋香，鹹鹹甜甜咁幾好食，薯條新鮮炸起熱辣辣外脆內軟，而且份量都唔孤寒。Creme Brulee Pancake每一層Pancake都有焦糖脆面，Pancake好香牛油味，口感比較扎實，配上藍莓、香蕉、士多啤梨幾款生果加埋香滑嘅Cream，所有野加埋好正🤤 Cream嘅份量比得好慷慨，加上朋友唔食Cream，基本上我每一啖Pancake都可以配埋Cream一齊食🤣 呢個甜品都幾飽肚，朋友比較細食，食左一塊就停手，我一個人食兩塊有少少滯，但係佢真係好食嘅！另外，餐廳比想像中細，同埋係開放式格局，排緊隊嘅時候可以望到人地食咩。所以自己食嘅時候都唔敢食得太慢，排緊隊嘅人啲眼神會令你有少少壓力。…查看更多

十年都唔去一次屯門嘅我 今日咁啱要同親戚黎屯門有啲野做 搞掂之後就求其搵間餐廳醫肚 見上海菜大家都啱食就黎左謝謝儂酸辣湯我地叫左例牌 即係一鍋 份量都幾多 夠我地6個人每人一碗 酸味同辣味好平衡 亦都幾足料 呢個係第一道上嘅菜式 水準唔錯 冇諗過成餐飯最好味就係佢😆小籠包皮唔算薄 入面有少量湯汁 我覺得小籠包係上海菜嘅代表之一 所以自然期望都會比較高 呢間就做得麻麻地啦謝謝儂炒飯炒得幾乾身同粒粒分明 入面有菜芯 蝦 鴨肉 食落尚算香口又唔會太油酸菜魚魚嘅份量唔算多 有部份係煎香左嘅 下面有好多幼身紅薯粉墊底 味道方面 好清淡 又唔酸又唔辣😟 如果唔食得辣或者追求淡口味嘅可以嗌黎食下仲有幾樣冇影到相嘅分別係：上海粗炒份量幾足 麵夠粗身幾有咬口 入面有菜 肉絲 香菇絲 炒得幾有鑊氣紅油抄手雲呑皮好滑溜 紅油幾香配埋甜甜地嘅汁 辣味好溫和 配埋蔥花同炸蒜食更香口豆沙鍋餅比之前食過嘅厚身 豆沙比例相對少 不過就冇咁甜 餅上面有少少椰絲 幾特別 不過我本身唔鍾意食椰絲 同行親戚話幾香…查看更多

去開九龍城食飯 順便黎買想試好耐嘅酥妃皇后 6:15左右去到已經得返好少款 冇左想試嘅鮮奶撻 朱古力軟心芝士撻等等最後買左呢4款葡撻 呢個係4款入面最好食 仲keep到個溫度 暖暖地 酥皮香口鬆化 內餡細滑有蛋香朱古力脆米酥撻 啲脆米林晒 叫脆米撻但啲脆米唔脆 我寧願你唔好擺脆米🥲 林左嘅脆米下面係生朱古力口感咁嘅朱古力漿 質感唔錯但係甜左啲 而再下面就係朱古力蛋糕 口感上多左變化但冇令個撻加分 最底就係酥皮 個酥皮好實 同葡撻個個完全唔同泡芙(九龍城店限定) 通常見到啲乜乜限定我就會忍唔住買 今次都唔例外 同埋見佢淨返最後一個 一於買埋黎試下 入面非常少餡 個餡亦都唔好食🫠 除左嘥錢 仲嘥左quota去食佢軟心芝士撻 芝士餡食落唔膩 但撻皮唔夠酥 店名叫酥妃皇后 自然會令人對佢個酥皮好大期望 今次真係期望越高失望越大…查看更多

同朋友去銅鑼灣行街 佢比左幾間餐廳我揀 見冇乜同佢食過茶餐廳就揀左四寶食堂一齊試下是日餐湯雜菌忌廉湯 好香菇味 除左好多細細粒嘅雜菌碎 仲有幾粒大粒煮到好林嘅杏鮑菇 個湯清清地帶有少少甜味 如果多返少少鹹香味就更好啦跟餐黑松露薯條一黎到仲係泛住油光 應該係啱啱新鮮炸起 份量都唔少板燒美國頂級封門牛柳揀左五成熟 牛柳煎得好靚 切開係粉嫩嘅五成熟 牛肉味濃 肉質鬆軟 醬汁食落有蜜糖香甜味 唔點汁就咁食已經好好食 少少海鹽襯托下肉味好出 伴碟仲有原粒烤蒜同蘭花苔 蒜同牛又係絕配 蘭花苔口感爽脆 索左肉汁令佢唔係一個平凡嘅配菜朋友嘅跟餐廚師發辦沙律同露斯瑪麗蜜糖天使燒春雞跟餐沙律都唔求其 有煙三文魚配凱撒沙律醬 燒春雞比想像中大隻 雞肉嫩滑唔乾 外皮有淡淡蜜糖香氣估唔到茶餐廳出品嘅西餐都咁高質 絕對值得再訪👍🏻…查看更多

我同朋友都好鍾意食海膽 見滿屋放題有海膽任食 所以就一齊黎食下 我地揀左D SET極致放題海膽有澳洲海膽同加拿大海膽2款 澳洲海膽食落firm啲濃味啲 加拿大海膽就鮮甜啲 三文魚子軍艦又係必食刺身 帶子 甜蝦 三文魚 油甘魚 池魚皇 大拖羅 全部都好新鮮松葉蟹腳刺身 幾鮮甜 肉唔霉辣酒煮花螺 微辣 味道普普通通 但就係會令人想一粒接一粒咁食美國薄燒牛肉 薄薄嘅牛肉入面包住好多炒過嘅蒜 連埋醬汁好惹味香煎鵝肝 外脆內軟 滿滿油脂香 最好趁熱食 不過同青瓜唔係幾夾🤔Encore海膽 我同朋友食到不斷讚嘆汁煮鮑魚 細細隻但好林好入味 個汁食落有少少薑味牛油粟米 幾乎係每次放題必食 粟米全部好甜好飽滿好香牛油味爆谷 Keep到脆口 帶有淡淡嘅焦糖味 朋友話有啲似戲院嘅爆谷最後 食埋杯雪糕就圓滿了 少有地有limited edition嘅口味👍🏻有啲食物冇影到相但同樣出色值得一食 例如 吉列炸蠔 一口芝士 燒菠蘿 燒扇貝 榴槤炸彈呢個D SET好高質 絕對值得豪一次 我同朋友食到都超滿足!…查看更多

我地一行4人去食lunch 一於叫個4人餐試多幾樣野食浮雲沙律好色彩繽紛 有生菜 橄欖 青椒 紅蘿蔔 酸青瓜 車厘茄 炸脆片等等 係一個唔錯嘅開胃菜牛肉沙律一上枱 我地都有個疑問 又有沙律? 仲要同頭先個個咁似樣嘅 我地都唔記得左呢個餐有2個沙律🤣 其實就係浮雲沙律加左牛肉 我地因為冇做好功課 又趕時間 所以睇名隨心揀食呢個set嘅 除非你好鍾意食大量菜 如果唔係都建議第一個沙律揀陸州沙律 咁就可以試到兩款唔同香酥茄子夾雞新鮮炸起超級熱辣辣 外脆內軟 兩片茄子夾住一啲好淋嘅雞肉泥 我同同行朋友都覺得唔太啱我地口味咖哩草原牛肉炒飯本身唔太好印度米個類 所以對呢個炒飯冇乜期望 點知有驚喜 食落唔會又乾又硬 除左食到咖哩味仲有啲香料味 有4,5粒大大粒嘅牛肉收埋左係炒飯入面 飯面仲有烚蛋烤野雞肉卷餅/草原牛肉卷餅我食左雞肉個款 雞肉好嫩滑 生菜中和左醬汁嘅膩 忍唔住一啖接一啖咁食🤤 朋友食左牛肉個款就話牛肉有少少乾同會食到筋位 醬汁集中係底部所以尾個個位最好食薩拉風味魚/牛油烤餅/蒜油烤餅辣辣地好惹味 魚柳份量唔少 不過我地有8塊烤餅 如果多啲咖哩汁就更加好🤪 烤餅我鍾意蒜油個款 鬆軟啲又有蒜香 牛油烤餅比較乾身 麵粉味比牛油味重香烤野雞配薯條呢個係超級意想不到咁大碟😮 完全滿足到我呢個薯條愛好者 香烤野雞調味調得好好 加埋少少洋蔥碎 我地食到停唔到口枱上面仲有3枝醬汁 有需要可以因應自己口味加落唔同野食度呢個4人餐好豐盛 我地食到好飽之餘仲要打包 下次會再去試下menu入面其他野食…查看更多

揀左呢間餐廳同朋友farewell 兩個選擇困難症嘅人最後揀左二人餐是日餐湯濃郁順滑嘅南瓜湯配烘過搽左牛油嘅酸種麵包特色主廚拼盤好大份 所有食物都中規中矩 左上角三文魚醬唔係太啱食 配麵包食都偏鹹 最有驚喜係炸黑松露蘑菇球 香脆同埋好濃嘅菇味牛脊肉配法國鵝肝呢個係我同朋友當晚最鍾意嘅菜式 牛脊肉揀左medium 食落好嫩好有肉味 每一啖牛肉配少少鴨肝一齊食 令味道再昇華左 或者係牛肉配蒜 又有另一番風味 就連薯蓉都好香滑好出色香橙烤豬腩有少少失望 肉嘅位比較硬同乾身 皮好脆 近住皮嘅肉軟鬆啲油脂豐富啲 同香橙醬都夾到但略嫌個醬有啲少 羽衣甘藍吸收左肉汁好食冇苦澀味番紅花啤梨蛋糕同想像中好唔同 個蛋糕係暖嘅濕潤嘅鬆軟嘅 質感幾好但味道唔太討好 唔知係咪就係番紅花嘅味 另外啤梨存在感有少少低 我同朋友都覺得一般 雪糕好食過蛋糕 食到最尾蛋糕入面有條膠 因為我地都差唔多食晒所以淨係同左staff講聲 都唔需要換了…查看更多

我地6:10左右到 係當晚第一枱客人 安排左窗邊2人枱 呢度A la carte嘅選擇唔算多 同埋我都係比佢嘅dinner set吸引過黎 所以就order左2份dinner set牛油果有機雜菜沙律有藍莓、無花果、牛油果、蕃茄仔、雜菜等 好fresh好開胃 醬汁清爽唔膩香烤牛骨髓伴多士呢個真係必食 牛骨髓充滿油脂香 配埋炸蒜 放上香脆嘅多士上面 超正🤩乾貝南瓜濃湯好creamy好細滑 飲到南瓜嘅甜味 面頭嘅乾貝令湯嘅味道更有層次法式龍蝦湯好濃郁好鮮味 唔會食到一粒粒嘅龍蝦肉 但絕對唔係好稀好假嘅龍蝦湯味布袋牛柳薄薄嘅牛柳包住蠔肉然後捲左好多層 熟度大概係medium至medium well之間 第一次食 牛肉嘅香加蠔肉嘅鮮 幾特別 鍾意食牛同蠔嘅人要試下🤤慢煮黑豚梅扒好貼心咁為客人切好一片片 食嘅時候再切到適合食嘅大細就易好多 豬扒中間位置鬆軟 邊位爽口唔靭 有2,3片口感似豬頸肉 最後飲埋杯凍檸茶 以自家甜品作結凍檸茶有別於一般西餐廳有一片片檸檬比你自己督 而係已經調較好味道 值得一讚係唔會過甜當晚嘅甜品係柚子cheesecake 好香好清新 唔會令人覺得好heavy食完好有負擔咁嘅價錢食到咁多道有質素嘅菜式真係CP值爆棚 呢間餐廳用心對待每一款食物 小至連伴碟嘅配菜都好好食 絕對冇hea你 同埋好欣賞佢地會根據你嘅進食速度去安排上菜 等你可以好好享受每一道菜…查看更多

近住屋企本身都諗住搵日試下 住附近嘅同事食過都話唔錯 聽完我就介紹屋企人食 佢地都話幾好 今次終於到我黎嚐鮮 我地3個人叫左3樣野晚市套餐: 支竹豆卜班腩煲(跟白飯例湯)好足料 支竹都好林唔會食到一舊硬野 但唔知係咪我太重口味 覺得成煲野冇乜味 白飯好大碗 平時食得唔多飯嘅話夠2-3個人share啫啫滑雞煲入面嘅洋蔥好食 雞都尚算滑嘅 同埋印象中第一次食啫啫雞煲係有豬肝 幾新奇 但唔夠惹味惡魔炸雞脾伴薯條呢個組合通常淨係會出現係下午茶menu 呢度晚市都有得食啱晒我呢啲唔中意食飯又中意食薯條嘅人 薯條份量一啲都唔孤寒 熱辣辣好香口 雞脾好嫩唔乾 略嫌唔係好夠味同炸得唔夠脆飲品方面揀左椰汁紅豆冰同紅豆奶茶 兩杯都好多紅豆 唔會過甜 不過唔知應該話個杯太高 定隻羹同枝飲筒太短 飲起上黎唔太就手…查看更多

當日6:10左右去到已經有條小小嘅人龍 不過好快拎到飛 大概等左3,40分鐘就可以入座 Menu嘅選擇多到我地兩個選擇困難症患者頭痛左好耐 最後order左3樣野樣餐包落完order冇幾耐就比左餐包我地(上次食嘅時候冇比到 唔清楚係咪送完即止) 個黑糖包超級好食 濃濃嘅黑糖香氣 擺到凍左都冇影響佢嘅味道 就算好飽都想食晒佢 另一款就係普通法包 比黑糖包硬身少少 身為法包愛好者覺得搽少少牛油都好好食Buffalo Wings每一隻雞翼都均勻咁沾上左醬汁 就咁食酸味好出 辣味反而冇乜 個藍芝士醬好濃 加埋一齊食可以帶出一份咸香同減低少少個酸度Carbonara睇落平平無奇 食落好有驚喜 意粉軟硬適中 蒜香忌廉汁好香好濃郁又唔膩 好食程度係同行朋友將每一條意粉每一塊煙肉每一粒青豆都食晒30週年紀念朱古力芝士蛋糕呢個cheesecake好甜好肥好邪惡 朱古力蛋糕好實淨但朱古力味唔夠純 反而蛋糕上面個松露朱古力忌廉味道好純 cheesecake相對輕盈 兩者幾夾 不過食左兩啖就開始滯…查看更多

前一晚同朋友傾緊食乜好 平時一向冇主見嘅我突然話想食北京填鴨 於是佢就陪我去食前菜超多料 有豆卜 木耳 青瓜 咸菜 花生 辣辣地好好食 邊食邊飲茶邊睇Menu 最後叫左4樣野椒香麻油雞(唔知有冇記錯)見Menu上面有辣椒標誌 而平時又成日都食口水雞 咪諗住試下新野 點知完全唔辣 得少少少少麻嘅感覺 味道Ok嘅但唔係我地諗個樣野小籠包佢個樣已經話左比你知佢係有幾咁皮薄多汁 次次夾小籠包都要小心翼翼 好驚唔小心大力左就會整穿佢 佢呢個皮薄得黎有靭道 輕鬆夾起 佢嘅餡到湯汁冇令人失望 絕對唔係得個樣北京填鴨(半隻)全晚嘅重點!!! 一上台個下覺得半隻原來咁少 唔理啦食左先算 每塊餅皮都有張紙墊住 令佢地唔會痴埋一齊 個皮好軟熟 食到尾凍左都冇變乾變硬 個鴨略嫌皮太少 配料醬汁就正常水準 個醬汁好夠味 啱晒我呢個重口味人士拔絲香蕉個賣相唔係太討好 一夾仲要冇拔絲 到底係憑咩叫拔絲香蕉🤔 唔止賣相 佢嘅味道都唔討好 冇外表冇內涵嘅一個甜品…查看更多

七點左右去到 冇訂枱 幸運地坐到最後一張二人枱 限時個半鐘用餐未點菜已經上左麵包比我地 嗌完野食我就急不及待試食 跟麵包個醬真係加超多分 配埋食成件事唔同晒飲品叫左一杯凍接骨木玫瑰花茶一杯玫瑰泡沫咖啡凍接骨木玫瑰花茶係朋友嘅 我就冇試到至於我就好滿意杯玫瑰泡沫咖啡 首先個拉花真係好靚 飲落奶泡好綿密 咖啡有玫瑰香之餘唔會太甜跟餐個沙律分量都幾多 夠兩個人share食開開胃 味道方面就不過不失 沙律差唔多食完 Appetizer就黎啦新鮮活藍青口伴意大利軟包(刁草忌廉汁)青口乾淨新鮮飽滿 個忌廉汁好香濃好creamy 忍唔住試飲一啖 好似特濃忌廉湯咁 意大利軟包烘過之後好似多士咁脆身 一定要點忌廉汁 超好食 青口食得7788 緊接住就係Main Course炭燒穀飼澳洲肉眼牛扒伴薯菜揀左粗薯條同牛肝菌汁 個薯條熱辣辣外脆內軟略嫌咸左少少 值得一讚係食到最後都仲係脆 牛扒唔算好厚但好大塊 同埋個坑紋好靚 因為朋友食唔到太生所以揀左七成熟 牛扒切開有肉汁食落一啲都唔un 仲有陣陣炭燒香味 牛肝菌汁好香但唔會搶左牛扒個味最後又點少得甜品 好彩冇眼闊肚窄叫太多野食 咁就可以試埋佢個Tiramisu好大件 兩個人食啱啱好 啲cream好滑好輕盈 酒味同咖啡味再濃少少就更加正服務方面員工的確係好有效率 野食上枱時間都安排得好好 不過有時太急 未食完就想收我地啲野 令到我地要不停諗辦法護住啲食物平時好少去愉景新城 因為個段長長嘅路實在令人卻步 但呢間餐廳絕對值得我為佢行多幾步!…查看更多

第一次食 揀左麻辣鍋(小辣)同美人鍋湯底一滾 兩邊都飲左一啖 麻辣鍋入口好順唔嗆 凍豆腐吸晒湯好好味 鴨血好滑冇怪味 我平時食開小辣 但呢個小辣冇我想像中咁辣 下次挑戰中辣 美人鍋完全可以當湯飲 入面有桃膠同半隻烏雞好滋補嘅感覺 趁未淥野食飲多幾啖先極上雪花肥牛 油花分佈平均 肉質嫩滑櫻桃鮮滑鴨片 好特別 未試過打邊爐有鴨片 鴨味好出蜂巢牛肚 就算淥耐左都唔會un即炸脆響鈴 放落麻辣鍋吸湯超正黑松露蝦丸(半份) 好彈牙黑松露味好香 黑松露愛好者一定要試自家製麻辣牛肉餃(半份) 陣辣味Ok嘅 但入面個餡好實 個人唔太中意寬粉條 份量比想像中多 滾一滾好快食得 吸湯一流冰菜 好少見嘅火鍋配料 記得唔好淥太耐 唔係就冇左個種脆卜卜嘅口感呢度嘅火鍋配料幾有驚喜 不過三個人實在食唔到太多 下次再戰 仲要試埋酸菜白肉鍋…查看更多

好多年前已經聽過森美餐廳 但一路都冇去了解究竟係食啲咩 直到前排知道佢有威靈頓牛柳就決定要試下除左威靈頓牛柳之外 仲嗌左個鵝肝牛柳dinner set 先黎一人一個沙律 配黑醋 酸酸地幾開胃再黎就係餐湯蒜茸包 我揀左周打蜆湯 入面除左蜆仲有其他海鮮 一啲都唔孤寒 另一個就係跟餐嘅酥皮海鮮湯 蒜茸包焗得香脆惹味到我最期待嘅主菜—威靈頓牛柳酥皮入面包住芝士火腿 再入面就係牛柳 揀左五成熟 一切開肉汁流晒出黎 正 不過略嫌芝士火腿咸左少少 另外 薯菜都係十分出色鵝肝牛柳 鵝肝好肥美 細細件已經好夠喉 至於牛柳朋友就揀左七成熟 食落一啲都唔un主菜食到半朋友突然醒起佢個餐有個冷盤煙三文魚 應該係忙得滯漏左 提醒之後好快就上返比我地Dinner set包左甜品 印象中當晚有三款可以揀 木糠布甸 tiramisu 藍莓cheesecake 我地揀左藍莓cheesecake 不過不失 食左個咁豐盛嘅晚餐真係好滿足…查看更多