hotlemonteahk's Profile

由尖沙咀嗰邊搭天星小輪,大約五分鐘左右船程就嚟到灣仔碼頭嘅築地山貴水產市場,幾方便.呢度係由日本東京築地市場嘅批發商經營,落戶香港約一年左右.入面嘅海鮮係由日本同世界各地直送,一直好想嚟試,呢日終於成行.入口附近係零售區,售賣唔少日本產嘅食品同飲品,另外仲有啲外賣壽司.再行入少少就係用餐區域,分別有浜燒海鮮區,海鮮丼區,梅酒區等等.不過我呢次嚟嘅主要目的係最入嘅壽司區,三面都係向住維多利亞港海景嘅落地玻璃窗,加上特高樓底,幾開揚.呢個位仲可以睇到隔離嘅會展新翼,如果遇啱煙花匯演嘅話,應該係個唔錯嘅觀賞位.同埋聽講呢度開業初期只有立食,但呢日嚟到見佢已經加咗高身吧凳,相對而言比企晌度食來得舒服.有見呢度係由日本東京築地市場嘅批發商經營,所以呢次主力試刺身同壽司.檯上面已經預先放咗餐具同醬油壺,筷子係即棄嘅,不過用料就非常高質.先試呢款叫縞鰺嘅刺身,即係深海池魚,厚切三片口感爽甜,魚香味足又唔會過份濃重.另外試咗兩個壽司盛同兩件散叫壽司,由上而下,左而右嘅係Set A, Set D,左口魚裙邊同炙燒左口魚裙邊.Set A即係吞拿魚盛,分別有大吞拿魚腩,中吞拿魚腩,赤身,炙燒吞拿魚腩,香蔥吞拿魚腩蓉軍艦各一件,大吞拿魚腩幾乎入口即化,魚生下嘅壽司飯壓得啱啱好,而且係一啖一件嘅大小,食得幾方便.Set D就有油甘魚,三文魚,海膽,三文魚子,香蔥吞拿魚腩蓉軍艦,海膽幾creamy同鮮甜.油甘魚食落柔軟,三文魚就爽口.左口魚裙邊有嚼勁,同埋有魚油甘香.炙燒左口魚裙邊經火槍輕輕燒過,幾香口.呢度冇免費茶水提供,於是就叫咗杯熱焙茶,溫度暖暖哋咁.同行嘅人就叫咗蘋果汁,味道甜甜哋幾解渴.…Read More

等埋朋友收工就去咗銅鑼灣間FireBird,門面睇嚟有啲似咖啡店同酒吧嘅混合體.呢度其實係間日式串燒酒吧,裝修好新派嘅感覺.餐廳有部份食材係產自日本,餐牌寫採用嘅雞肉品種係元氣雞同阿波尾雞.雖然主打係雞肉,不過亦都有提供其他肉類,同埋壽司,刺身,串燒等等日本料理.呢次我哋就試咗幾樣嘢,先嚟嘅係野菜棒配FireBird特製味噌,就咁睇個名以為係用蔬菜打成棒狀嘅嘢,實際原來係冰鎮蔬菜.蔬菜切成粗長條形,俾少少想像力的確可以叫做棒,分別有西芹,甜黃椒,甜紅椒,青瓜,甘筍,車厘茄,粟米同番薯等等,爽爽脆脆咁,蘸埋微甜嘅特製味噌,簡單得嚟又清新.自家製京風冷豆腐,豆腐滑溜,上面有蔥花同薑蓉,可以同埋鹽同醬汁一齊食,又係一個好輕盈嘅菜式.海鮮寶箱壽司,賣相好吸引.帆立貝殻上面鋪咗海膽,三文魚子,蟹籽,牡丹蝦,帆立貝,三文魚,油甘魚,吞拿魚同玉子,下面就係紫菜飯卷.鹽燒鮭魚腩,鮭魚腩外皮焦脆,魚肉綿而同有魚油香,切成四小件,食得幾方便.FireBird雞肉串燒盛合,可以一次過試晒餐廳嘅日本產雞肉串燒,包括雞胸串,雞腿串,長蔥雞肉串,自家製免治雞肉棒配日本鮮蛋黃,另外仲有一串秋葵.佢哋嘅雞肉脂肪含量少,質感比較彈牙,而自家製免治雞肉棒就加咗少少雞軟骨,幾有咬口.秘傳雞肉火鍋,雞湯味濃郁鹹香.配料除咗有軟骨雞肉丸同雞肉之外,仲有豆腐,冬菇,甘筍,娃娃菜等等,都好豐富.鮭魚親子釜飯,鮭魚即係三文魚,親子嘅意思係指三文魚肉同三文魚子,餐牌寫兩款食材都係產自北海道.侍應會幫我哋撈好啲飯,再另外用小碗載住.三文魚肉同三文魚子之間仲有本菇等等,整體嚟講味道冇負擔.炸番薯條,餐牌寫採用嘅係日本宮崎番薯,每條番薯都係厚切,炸得脆口中有粉糯口感,蘸埋黑糖漿嚟食,完全唔覺膩.試埋呢度嘅飲品,Lover Kyoto主要用抹茶,牛奶同糖漿沖調,另外仲有鮮忌廉,抹茶糖漿同白玉點綴,再用雕成玫瑰花咁嘅士多啤梨做裝飾,飲落微甜.Lava Flow就用咗菠蘿汁,椰奶,櫻花糖漿同士多啤梨糖漿混合而成.杯邊同樣插咗雕成玫瑰花形嘅士多啤梨,同埋一片菠蘿,驟眼睇同餐廳嘅公雞圖案有啲似.…Read More

K11最近開咗間食西餐嘅K11 Bora Seafood,佢係晌商場嘅盡頭角落位.入面有唔少同海洋有關嘅佈置,中間仲有個舞台,應該會有live band表演之類.靠邊嘅係一列梳化卡位,可以由旁邊嘅百葉窗睇到餐廳嘅另一邊.走過去睇一睇,呢邊嘅格局就比較似酒吧.仲有電子飛鏢機,俾食客玩樂之用.佢哋仲有室外座位,如果天氣唔熱嘅話應該幾舒服.餐墊紙上面印咗龍蝦圖案同拆殼教學,睇嚟龍蝦係呢度嘅主打之一.除咗海鮮之外,仲有唔同嘅菜式,呢日就試咗幾樣嘢食.日式麻醬煙鴨胸田園沙律嘅煙鴨胸鹹香,另有唔少紫生菜,車厘茄,粟米,彩椒,配埋酸酸哋嘅日式麻醬,幾開胃.黑松露野菌忌廉湯,每啖都係打得細碎嘅野菌,味道貼近原味,可以用牛油多士蘸嚟食,對我嚟講都唔錯,食慣濃味嘅人就可能覺得味道比較輕.呢碟係黑松露西班牙黑毛豬頸肉意大利粉.黑毛豬頸肉上面有啲黑松露醬,口感爽脆.忌廉汁分佈晌意粉表面,入面仲有大量切粒洋蔥同彩椒等等,幾有咬口.雜果賓治,用鮮菠蘿點綴,飲落甜而微酸,幾消滯.朱古力撻,仲有藍莓,棉花糖,朱古力醬,糖霜等做伴碟.撻皮鬆化,中間嘅朱古力餡軟身,濃郁微甜,食完主菜之後食都唔錯.呢次試嘅食物唔講得上非常特別,不過烹調都見用心,加上嗰日啱啱好食客唔多,個感覺都幾幽靜,有機會再嚟嘅話都想試試佢哋嘅龍蝦菜式.…Read More

（影片）最近新開咗間黃記煌三汁燜鍋,佢哋晌國內已經有多間分店,就連美國,台灣等地都見到佢嘅蹤影.嚟試呢晚時間尚早,仲未有食客,之後就陸續有人入座.雖然嚟自國內,但裝修唔俗氣,仲幾有特色.每檯都預先放咗金色嘅燜鍋,個蓋設計到好似頂帽,又有啲似棋,幾有趣.餐牌詳細地介紹佢哋嘅三汁燜鍋,係用清代御膳名菜香辣汁魚做藍本,再加入多款蔬菜同藥材等等.呢度嘅燜鍋共有十多款配搭,分咗魚,雞,牛,豬,海鮮類,醬汁就有五款,其中兩款唔辣,另外三款就有唔同程度嘅辣,另外亦有多款涼菜同火鍋料去揀.我哋最後決定叫自選燜鍋,可以自己揀四款指定食材.同行嘅人唔食辣,所以醬汁就揀咗唔辣嘅招牌鹹鮮汁.呢份餐前小食係竹炭花生嚟嘅,賣相幾特別.冇幾耐侍應就拎咗一個好似花樽咁嘅六寶盒嚟,每層都放住唔同嘅食材,之後就即席晌我哋面前煮燜鍋.侍應先開電爐,晌鍋度加入底油,再倒埋西芹,甘筍,紅薯,洋蔥,青椒,紅椒,車厘茄,蒜頭,紅棗等等十款蔬菜同藥材.之後逐一鋪上我哋自選嘅石斑魚柳,白蝦,牛肚,秀珍菇.將食材平均鋪好之後,加少少調味料同調味酒,就加蓋煮一陣.然後,侍應小心翼翼地將非常黏身同杰身嘅招牌鹹鮮汁加入鍋度,再加蓋煮多陣.燜鍋加熱時傳嚟陣陣討好嘅藥材香,非常吸引.最後加啲芫茜,咁就完成.成個過程都由侍應負責,同埋用咗無水烹調法,主要係靠食物自己嘅水分嚟燜煮,咁樣比加水煮更加可以保留原味,又唔怕食物營養會流失去水入面.食物表面蘸滿佢哋嘅招牌鹹鮮汁,幾濃郁美味.自選食材方面,石斑魚柳肉質唔鬆散.秀珍菇吸滿醬汁.當中以牛肚最為爽脆.燜鍋嘅食物食得七七八八之後,就可以請侍應加埋高湯用嚟做火鍋.哈哈,加湯之後又係另一種風味.我哋人比較少,加上啱啱燜鍋嘅肉類份量幾多,所以只係叫咗蔬菜野菌拼盤,入面有金菇,秀珍菇,杏鮑菇,粟米同生菜,正好用嚟中和一下.由網上得知佢哋早前收購咗許留山,所以餐牌入面有唔少相關產品.我叫咗壺銀菊露,一邊食火鍋一邊飲感覺唔錯.同行嘅人就叫咗芒椰芒果爽,頂層有唔少芒果粒,中間有層厚厚嘅椰汁,然後係芒果汁同芒果爽,甜甜哋咁幾好味.之後再叫多份芒之戀,一份就有晒迷你版多芒亮晶晶,多芒小丸子同芒果糯米糍三款甜品,啱晒多心又想試多幾款嘅我.小丸子煙煙韌韌,同埋係沙冰底嚟嘅.芒果糯米糍入面嘅芒果肉甜而唔酸,仲用芒果片伴碟,從外到內都係芒果嚟.雖然同行嘅人唔食辣,所以唔可以一試佢哋嘅辣汁,但呢次嘅招牌鹹鮮汁都夠惹味.服務方面啲侍應非常細心,會不時走嚟換碟.幫我哋煮燜鍋同打開蓋時,仲特登將個蓋向住佢自己嗰邊,以免熱水蒸氣吹向我哋嗰度.加湯時又會特登用手擋住,防止熱水彈出,可謂見微知著.…Read More

荃新天地二期對面開咗間叫Catee嘅餐廳,門面睇落幾有特色.餐廳入面有唔少用貓做主題嘅佈置,就連logo都同貓有關.水吧嗰邊嘅瓷磚全部都係貓圖案,好吸引.環境燈光昏暗,幾有氣氛.其中一幅牆度仲掛咗好多幅用貓做主題嘅畫.陳設都好用心.我都幾鍾意呢度嘅環境.呢度嘅晚餐有十幾款,包沙律,湯,飲品同甜品,亦都可以散叫,呢次我哋就叫咗幾款嘢食嚟試.店員拎咗兩隻碟俾我哋share嘢食時用,上面嘅圖案好靚呀!然後又拎咗籃麵包嚟,仲有黑醋橄欖油用嚟蘸麵包用,不過如果佢哋將麵包烘暖一下嘅話應該會更加美味.晚餐沙律入面有橄欖,紫生菜,紫椰菜等等,而上面一粒粒嘅嘢其實係蘭度豆嚟嘅,少見多怪嘅我係第一次食呢種豆,幾有咬口,醬汁就酸酸哋幾醒胃.餐湯嘅湯質creamy,同埋有少少粉粉哋嘅口感,味道同我晌其他餐廳飲過嘅餐湯有啲唔同,問過店員之後先知原來係蘭度豆湯,對我嚟講都真係幾特別.雙影帶子配黑魚子嘅帶子分咗熱食同凍食兩款,前者焦香惹味,後者就突顯咗黑魚子嘅鹹鮮.晚餐主菜我哋揀咗香煎挪威三文魚扒,用咗露筍,藤茄,薯蓉等等做伴碟,賣相吸引.三文魚扒魚皮煎得香脆,魚肉有油香,水準唔錯.Catee炸三文魚蛋,店員話呢款菜式係佢哋用咗唔少時間去研發,雖然話係魚蛋,但同平時嘅魚蛋絕對唔一樣.吉列外皮薄而脆,切開之後仲清楚可見一絲絲三文魚肉,食落鬆化兼帶汁,蘸埋個醬就酸酸辣辣.晚餐嘅甜品芒果芝士餅酸香滑溜,仲用龍珠果伴碟,幾消滯.另外叫埋朱古力布朗尼蛋糕,餐廳特登將佢切成一片片,食落更加方便.質感脆同帶啲濕潤感,仲跟埋朱古力醬,味濃唔澀,又唔會過份甜膩.晚餐仲包飲品,驚喜嘅係配Latte唔洗加錢,其他嘅mocktail等等亦只係加$15左右,同同類餐廳相比,改其他飲品嘅收費可以話係幾平. 嚟之前以為係間賣外表嘅餐廳,估唔到食物有一定水準,烹調亦見用心,仲俾我見識到蘭度豆呢樣嘢.另外大部份西餐廳提供嘅清水一般都加檸檬片,而呢度就係加青瓜同青檸葉嘅,飲落既香口又清新,同樣係坊間比較少見.…Read More

銅鑼灣明記甜品係西灣河老店嘅分店,雖然同大部份港式甜品店一樣,檯同檯之間分佈得比較近,但個裝修都幾光潔企理.原本想食芒果系列入面嘅香芒小丸子,不過最後都係試咗其他甜品.招牌芒果凍餅即係冰凍版木糠布甸,上面鋪咗芒果粒同芒果汁,凍餅中夾住大大粒芒果肉,食落冰感重.抹茶心太軟配雪糕,賣相OK.切開心太軟之後,中間嘅流心度唔係好強,但都唔錯.外皮有少少脆口,入面抹茶味濃甜,旁邊仲有抹茶醬,抹茶雪糕同原粒紅豆蓉,幾有咬口.…Read More

呢晚嚟到Me Bar+Grill,係間酒吧餐廳嚟.呢邊牆就用咗名畫蒙娜麗莎嘅圖案做裝飾,環境幾有特色.抬頭一睇先發現天花板都有乾坤,掛咗唔同嘅霓虹燈字句.餐牌方面,由前菜,小食,主菜,意粉,甜品都有,同一般西餐廳冇太大分別.酒精類非常豐富,亦有mocktail等非酒精類飲品去揀.而且推廣期內即場讚好餐廳嘅facebook或instagram仲會有九折優惠,即係變相唔洗加一.先試飲品,呢杯Mango Smoothie係mocktail嚟,另外仲有熱情果,士多啤梨或椰子味去揀,飲落解渴.餐牌寫呢杯Gaarden Rose係用Hoegaarden Rosee,冧酒,士多啤梨汁同青檸汁調成,拎到嚟之後侍應先將一整支Hoegaarden Rosee倒轉,杯邊仲蘸咗鹽粒,賣相唔錯.Hoegaarden Rosee即係桑莓味啤酒,飲落微酸消滯,幾啱女仔口味.酥焗菠菜芝士釀大啡菇焗得既香噴噴又多汁,上面嘅煙肉香脆,菠菜嫩而冇渣,芝士雖然冇拉絲效果,但加埋一齊食口感唔錯.汁焗水牛城雞腿,起初以為嗰一瓣瓣橙紅色嘅嘢係番茄,睇清楚先知其實係切件鮮橙嚟,另外仲有大量洋蔥.雞腿有六隻,外皮微焦,雞肉唔乾身,食落辣味啱啱好,仲有淡淡嘅鮮橙甜味,感覺討好,不過在我嚟講如果可以多少少酸味就更加好.…Read More

尖沙咀間和牛燒肉純,入口附近陳列咗多款日本出產嘅酒精,睇落都幾吸引.餐廳燈光昏暗,氣氛唔錯.每張檯中間都嵌入咗日式網燒燒烤爐,而用嚟燒肉嘅鉗就設計得比較幼身,末端位置就比較尖,拎上手感覺比一般嘅鉗慳力.其中一本餐牌封面印咗熊本熊,好得意.呢個餐牌入面嘅肉類都係嚟自熊本縣.呢次我哋試咗四款和牛,先係汁燒和牛赤身肉,放晌爐上面輕輕燒兩邊就得,食落鬆化.鹽燒日本產和牛牛肩眼嘅牛味幾濃郁,對於嗜牛嘅人嚟講幾滿足.鹽燒特選日本產和牛牛排肉嘅雪花分佈細密,又唔會太膩.鹽燒特選日本產和牛肉眼,比牛排肉更加肥美,雖然過癮,但如果食得多就可能會覺得有少少膩.食燒肉多少都有啲熱氣,於是就叫埋飲品試試.梅梳打有粒梅晌杯入面,鹹鹹酸酸咁幾消滯.荔枝梳打,相對起嚟就比較甜.…Read More

愉景新城對面有間睇落似酒吧嘅Chalet,原來係西餐廳嚟,呢日我哋就嚟試試.由玻璃大門走入去,係一個設計好似小花園咁嘅位置.用咗單車同藤籃做裝飾,幾得意.裝潢用木材為主,好英倫小木屋嘅感覺,晌荃灣嚟講呢類型餐廳都真係幾少見.午市以套餐為主,價錢由七十幾到百幾不等,而且唔洗加一,都算合理.我哋叫咗兩份午餐,先嚟嘅係餐湯同沙律,呢日係雜菜湯,湯入面有大量切粒椰菜,意大利青瓜等等,大大增加蔬菜攝取量.沙律就淋咗黑醋,幾醒胃.側邊嘅麵包烘到暖暖哋,外面脆入面有少少煙韌,質素唔錯.意大利煙肉芝士配菠菜沙律伴日式芝麻醬,表面鋪滿芝士碎.煙肉煎得香口唔乾身,底下仲有菠菜,咀嚼起嚟清甜爽脆,配埋車厘茄同微酸嘅日式芝麻醬,作為主餐的確好輕盈.澳洲穀飼肉眼扒配有機薯片伴芝士忌廉汁,以呢個價錢嚟講肉眼扒好大塊,食落口感軟嫩有油香.起初以為有機薯片係指炸到脆身嗰種,實際係將薯仔切成片狀,再撈埋芝士忌廉汁,既滑溜又惹味,比想像中有誠意.我哋仲試埋呢度嘅mocktail,呢杯Refeshing係用咗鮮西柚汁,檸檬汁同梳打調成,再用風乾西柚點綴,飲落有果香又可以消滯.Girls Generation個杯好似一個小小嘅擺設咁,非常特別.頂層有塊好似杯仔咁嘅冰塊,上面放咗鮮藍莓同紅桑子,再用竹籤插住檸檬葉同士多啤梨等等,下層就用咗紅莓汁,接骨木花糖漿,薑汁汽水調配,味道微酸清新.眾所周知莓類水果有抗氧化功效,女仔飲多啲或者食多啲嘅話就唔怕好似隻杯個公仔咁生晒皺紋啦!…Read More

（影片）假日下晝同人嚟到尖沙咀,試吓呢間Shine.雖然brunch menu嘅套餐好抵食,但我對佢哋新出嘅龍蝦菜式同甜品仲有興趣,咁就索性散叫啦.Fruits Tea入面有切片鮮橙,青蘋果,士多啤梨同藍莓,聞落清新,飲落有果味酸香.波士頓鮮活龍蝦配焗軟芝士西西里番茄醬圓管粉,賣相吸引.龍蝦肉厚鮮甜有汁,軟芝士焗得外脆內軟滑.底下仲有圓管粉,表面嘅西西里番茄醬微酸,幾惹味.試完主菜就急不及待跳去食甜品,玫瑰蘋果金寶用咗乾冰營造好似瀑布咁嘅夢幻效果,就咁睇已經覺得開心.餐廳將切得透薄嘅蘋果片砌到好似玫瑰花咁,再用雲呢嗱雪糕,鮮士多啤梨,棉花糖,提子乾同朱古力碎伴碟,配搭都幾夾.特濃咖啡雪糕杯用咗奶凍,意式芝士餅,雲呢嗱雪糕同士多啤梨片組成,食之前倒埋啲熱特濃咖啡入去,雪糕冰凍,意式芝士餅軟綿,奶凍滑溜,咖啡甘澀同杯入面嘅甜味互相中和,一杯有齊多重口感,都幾得意.自製威士忌雪糕伴鮮果用原個起咗肉嘅鮮橙皮載住,上面嘅忌廉幾有奶香,下層嘅威士忌雪糕酒味唔重,仲撈埋大量鮮士多啤梨,奇異果,青蘋果同紅蘋果粒,連平時唔太飲酒嘅人都話唔錯.…Read More

由繁華嘅海防道穿過商場嚟到亞士厘道,只係轉咗個彎,但就有種幽靜嘅感覺,呢晚就去咗Amitie Kitchen食晚餐.餐廳入面掛咗好多黑板,上面寫咗當日嘅推介菜式.餐牌嘅選擇都幾多,我哋叫咗份晚餐再加一個散叫嘅主菜試試,我呢次揀嘅都比較輕盈同埋係蔬菜為主.之後侍應就拎咗一板麵包嚟,分別有竹炭麵包,無花果麵包,法式麵包同餅乾條,仲跟埋灑咗黑椒碎嘅牛油同士多啤梨果醬, 無花果麵包入面有唔少無花果乾,食落有咬口,我幾鍾意.然後就係晚餐入面嘅前菜等等,先係大蝦沙律伴甜橙油醋汁,蝦肉燒得香口,雜菜入面就有彩色車厘茄,配上甜橙油醋汁都唔錯.餐湯嘅質感就比較濃,入面仲有少少風乾火腿絲晌度.鮮果藜麥沙律伴蜜糖青檸汁,切粒鮮蜜瓜,菠蘿,士多啤梨,藍莓,青蘋果,紅蘋果同雜菜份量非常多,撈晌入面嘅啡紅色藜麥脆而有嚼勁,加上酸酸哋嘅蜜糖青檸汁,作為主菜的確既高纖又健康.原個菠蘿豬鞍扒伴鮮果酸甜汁就係散叫嘅,烹調方式有啲中菜影子,賣相都幾吸引.豬鞍扒分成兩三啖大小,烤得外脆內軟嫩,酸甜汁又夠多,同鮮菠蘿,士多啤梨,藍莓,青蘋果,紅蘋果同梨撈埋一齊,都真係幾解膩.晚餐包一杯飲品,我就揀咗熱檸檬.最後就試試呢度嘅甜品,伯爵茶奶凍個杯嘅圖案好靚,就係人哋用嚟Afternoon Tea嗰種,上面仲放咗玫瑰花乾同花瓣,下層奶凍滑溜,仲有淡淡伯爵茶香.盆栽伯爵茶木糠布甸嘅頂層就放咗雕到成朵花咁嘅鮮士多啤梨,再用薄荷葉同oreo餅碎扮葉同泥土,加上泥剷造型嘅匙羹,驟眼睇真係好似盆栽,用埋金箔裝飾就更添貴氣.呢個木糠布甸係用oreo餅碎同伯爵茶慕絲相間,由側面睇每層都鋪得鮮明.食之前仲可以唧埋啲伯爵茶入去,整體甜味幾高,但幾過癮.…Read More

酒吧林立嘅寶勒巷,入面有間叫Cosmos Restaurant & Bar嘅餐廳.由頭盤,主菜到甜品都有提供,仲有多款cocktail,mocktail,酒精或其他飲品等等,以一間酒吧式西餐廳嚟講都算多選擇.先試兩杯cocktail,餐牌寫呢杯Blueberry Pineapple Margarita係用龍舌蘭酒,青檸汁,菠蘿汁同藍莓糖漿調配,仲沿住杯邊蘸咗啲鹽粒晌度,酒味唔算濃,酸酸甜甜幾啱女仔飲.Long Island就用咗氈酒,伏特加,君度橙酒,冧酒,龍舌蘭酒,檸檬汁同可樂調成,外表上有啲似濃茶版檸檬茶.之後試咗幾款食物,西班牙黑毛豬火腿田園沙律伴黑醋汁有紫椰菜,紫生菜,青瓜,車厘茄同櫻桃蘿蔔,黑醋汁酸酸哋幾開胃.燒原隻北海道魷魚表面灑咗辣粉,燒得幾香口彈牙,魷魚鬚嗰部位就仲惹味.烤西班牙黑毛豬,連骨嘅西班牙黑毛豬好厚身,口感爽嫩唔韌,中間嘅肉汁又多,伴碟有車厘茄,露筍,意大利青黃瓜,薯蓉,可以減去肉類嘅膩感.泰式冬陰公軟殼蟹忌廉扁意大利粉,軟殼蟹炸得酥脆鹹香,泰式冬陰公忌廉汁均勻咁蘸晌扁意粉表面,入面嘅香茅味明顯,微辣唔突兀,同埋仲有洋蔥,本菇同冬菇,爽脆又有咬口.最後係甜品綠茶蛋糕,甜味唔高都唔錯.…Read More

呢日去到旺角嘅街坊Cafe,試吓港式fusion菜.同一般港式餐廳唔一樣,呢度反而有啲咖啡店嘅感覺.佢哋唔係播近年常見嘅K-POP,而係粵語流行曲.一邊櫈用藍色做主色,另一邊就係綠白紅色嘅.啱啱好係下午茶時間,下午茶餐上面嘅選擇都幾啱自己口味,叫呢個就抵食啲.呢次就叫咗幾樣嚟試.素鮑參碗仔翅入面嘅素鮑彈牙,素海參就爽口,無論係外表抑或口感都好像真,估計係用蒟蒻整嘅,湯入面仲有冬菇片,木耳絲,素魚翅,肉絲同蛋花,濃度適中,唔似某啲食店咁整到好似漿糊咁,又唔會太稀淡.檯上面仲放咗堆浙醋,白胡椒粉,鹽同黑椒,不過我覺得佢本身已經夠味,所以冇額外加其他調味.紫薯吉士雞蛋仔伴雪糕係佢哋其中一款港式fusion甜品.最外圍嘅雞蛋仔香脆,中間因為同配料接觸而有少少濕潤感.上面嘅紫薯蓉同吉士醬軟滑同甜甜哋,旁邊就有燒到半溶嘅棉花糖,同埋士多啤梨,藍莓同綠茶雪糕.戀愛大過天用咗玫瑰糖水,士多啤梨同菠蘿沖出嚟,淺紅色咁都幾靚.玫瑰糖水飲落唔算太假, 同埋有啲菠蘿嘅果味,仲用咗乾玫瑰花同鮮士多啤梨點綴.第一次試港式fusion菜以為只係gimmick,估唔到實際味道都唔錯.…Read More

嚟到尖沙咀金巴利道嘅Angry Oppa Restaurant & Bar,呢間賣嘅係比較新派嘅韓國菜.入面用咗韓國燒酒同米酒做裝飾,仲不斷咁播住K-POP MV.餐牌封面簡約得嚟都幾靚.呢次嚟試係因為俾佢哋嘅熔岩芝士系列吸引,目標非常明確.叫完嘢食之後店員就拎咗碟前菜嚟,醃製過嘅洋蔥少咗份辛口感,食落酸酸甜甜,醃甘筍就爽脆,都幾開胃.韓式鮮蜆湯,當日鍋入面大約有十六隻鮮蜆,另外仲有蘿蔔片,洋蔥絲,蔥段同蒜蓉.湯味鮮甜,總算唔錯.佢哋仲有幾款韓國傳統金便當,睇落幾得意咁,於是叫咗醬牛肉金便當試試.拎上手感覺暖暖哋,打開便當蓋,盒入面嘅翠玉瓜,泡菜,大豆芽,醬牛肉片同紫菜飯排列得好整齊,都幾吸引.之後就閂埋蓋,用雙手揸實便當再用力搖勻,不消一會入面嘅食材就混埋一齊.醬牛肉片咬落鬆化,同埋甜甜辣辣咁,米粒又夠煙韌,其他嘅翠玉瓜,泡菜,大豆芽又經醃製過,睇落平凡但幾惹味.韓式熔岩芝士原味比薩批,呢個係我最期待嘅菜式,雖然只有八吋大,但批底比一般嘅意式比薩厚非常非常非常多.輕輕拉起其中一塊,入面嘅芝士份量極多,就好似熔岩瀑布咁,拉絲效果非常強勁.因為芝士太癡纏,食嗰陣顯得有啲狼狽,不過都幾好玩.配料方面係黑橄欖同磨菇片,醬汁就係番茄肉醬,批底鬆厚同埋有啲韌度,食落都唔算太膩.…Read More

嚟到佐敦嘅Bigger Burger Cafe,佢係晌澳牛對面嘅,入面啲牆畫咗唔同食物嘅畫.張檯其中一部份用咗圖案磁磚拼貼而成,都幾靚.店名叫Bigger Burger,當然係用漢堡做主打,款式仲有十幾款.先試黑松露煎蛋安格斯漢堡,個體積都真係好大.佢仲有厚切薯條同雜菜沙律伴碟,賣相都幾吸引.麵包中間夾住煎蛋,芝士,安格斯漢堡扒,番茄,紫洋蔥,生菜,豆苗同黑松露醬,安格斯漢堡扒大約有一吋厚,份量十足,配埋黑松露醬等等,微酸香口,都幾惹味.試埋三文魚忌廉汁意粉,塊三文魚煎得外皮焦脆,忌廉汁就沾晌意粉表面,仲有啲車厘茄,洋蔥絲同豆苗晌度,食落酸酸哋幾啱胃口.兩份餐都包埋飲品,我哋就揀咗熱咖啡同熱檸茶.…Read More