為食小白兔的個人專頁

琴日經過旺角, 買完萬家燒餅同肥姐鹵味之後, 就去左呢間新店, 諗住試下!! 去到見到個鋪奇小, 絕對感覺係潛建出來既, 個陣有兩個男人買緊野, 個賣野女人都幾好, 叫我等陣, 又問我試過未, 又俾左一細舊鴨翅骨俾我試, 但細妯舊已經見到有兩粒花椒, 都唔知點食好, 不過個味都ok既, 見個一個男人買左牛柏葉, 另一個就買左100g鴨腸同一條頸, 但25蚊一條頸總覺得貴左d, 又唔係有好多舊, 所以到我就決定買100g ($30)鴨腸試下就算!! 100g其實都幾細包, 不過過下口癮絕對ok, 同埋送酒應該幾好, 因為就咁空口食都幾咸同辣, 食完仲有好耐既花椒after taste, 見到佢用左好多香料, 同埋好多花椒粒, 所以如果唔鐘意呢d味既就無謂試啦, 不過100g $30蚊都幾貴, 可能香港d租真係貴啦, 不過都係覺得如果食呢d野都係響大陸食好d....…查看更多

不嬲都好鐘意食車仔麵, 由於家住元朗, 所以成日都食許祥昌, 永年更加係由細食到大, 今日因為要去耀東村整指甲, 坐van仔落番西灣河去鐵站時見到呢間車仔麵, 記得阿蘇介紹過, 所以咪去試下囉! 叫左雞翼尖, 蘿蔔, 豬腸, 米粉加咖哩, 首先, 咖哩色就有啦, 但又無味, 又唔香, 要自己再加辣椒油; 雞翼尖唔入味之餘, 仲一陣雪味, 好難食!! 豬腸佢係用大腸, 好肥, 麻麻地, 唯一值得一讚係蘿蔔真係幾甜, 總之就名聲大過一切啦!!! 坐得又唔舒服, 個店員絕對懷疑係賓賓, 總之就唔ok啦!!! 仲話自己係人龍鋪, 不思進取遲早死得!!! 之後請得都唔會再去!!!!!!!…查看更多

不嬲都時不時去勝利道食熱狗, 不過果度真係幾唔方便, 同埋坐得唔舒服, 只適合一個人自己去, 所以唔可以成日去食. 之後睇雜誌知道新蒲崗開左間熱狗店, 一直都未有機會試, 今日終於行左去食!! 個熱狗真係幾大個, 絕無欺場!! 我選擇左10號餐, 辣腸熱狗, 加薯條再加熱朱古力, 都係$27, 食到好飽!! 條腸都幾好食, 又有肉汁, 不過略嫌唔夠辣, 加左熱狗醬同酸瓜, 個人覺得加埋茄汁就仲好. 個包好脆, 好好食, 不過生菜就得好少, 差d食唔到!! 個薯條都幾大包, 不過就無薯餅揀, 粗薯條我一般, 同埋唔係好夠茄汁點, 食到最尾好乾, 整體感覺唔錯, 有heart, 不過相比之下都係鐘意勝利道多d!!!…查看更多

　　今日約左大學同學聚會，銅鑼灣雖然有好多日本菜可以選擇，不過最後還是選了這兒！　　大約一點上到去，唔係太好人，GOOD!!去左其中一邊，兩個人，自成一角，方便我地吹水，正！餐牌中有日文，英文同中文，照顧不同人的需要，非常細心，值得一讚！　　其實好多餐都好抵食，經過一輪掙扎之後，朋友點了天婦羅飯（＄１３０）我就點了一個天婦羅刺身定食（＄１５０）響我地點左菜之後，待應送上了一杯桂圓茶，不太甜，很潤，飲下去好舒服！　　朋友的餐來了，包括有一碗天婦羅飯（有兩隻蝦，一件魚，幾件蔬菜）一件薯餅，自製豆腐沙律，前菜，淹菜，蒸蛋同麵豉湯；我的飯與天婦羅是分開上的，更多了一隻蝦，但另有刺身（包括蔥吞拿魚卷，三文魚，帶子同甜蝦），亦有前菜，淹菜，蒸蛋同麵豉湯．　　試了朋友的豆腐沙律，好滑，好埋個汁好好食，好開胃；天婦羅又脆，粉唔太好，材料新鮮，正！刺身雖然唔係貴價貨，但勝在新鮮，好鮮甜！　　　　食完之後，仲有甜品綠茶糕（美中不足是欠了些紅豆，好似寡了一點！），再加綠茶／咖啡，為我們完美的一次聚會劃上句號！　　期間待應們隨便不會打擾我們，但會適時為我們添茶，很細心！…查看更多

　　之前去開金鐘個間，點知執左之後都有少少掛住，琴日去海運又再見到，一定要再去食啦！　　一行三人，六點去到留左張檯八點開餐，去到本來坐門口，之後見到入面有張卡位，問可否換檯，ｄ待應好有禮貌話Check下有無人book左，之後亦好快幫我地換檯，態度值得一讚！　　之後三個人點左三個餐，一個要左照燒法國雞排，配柚子沙律、立魚湯、白飯，d雞排好好食，個皮好脆，又無乜脂肪，正！立魚湯好夠味，可惜細碗左d，如果可以大番ｄ就好啦！　　另一個點了阿拉斯蟹腳海鮮鍋，都有幾多海鮮，連蟹柳都好好味，蟹腳簡直係正！啖啖肉，配料仲有好多蔬菜，個湯亦好甜，另外再配餃子、南瓜豆腐湯同野菜手打烏冬，好飽好滿足呢！　　最後一個點左鐵板餐－－神戶和牛厚燒，雖然要$398，但有好多野食架！先有野菜沙律、再配有鵝肝（足足有一隻手掌咁大！）、燒銀雪魚、炒什菜同炒飯，和牛厚燒真係入口即溶架！正！　　份量都唔算太少，大家Share來食，好飽好滿足，之後仲有Vanilla雪糕或紅豆糕做甜品，紅豆糕唔太甜，好滑，整體坐得又舒服、待應服務態度又好，見到餐牌上有個$880三人餐，見隔離檯食好似好正，下次再試！…查看更多

　　今日同阿嫲做節食飯，因為她的老人院在附近，所以在就近搵食，見到門口ｄ伙計不斷介紹，況且見佢都有幾多小炒食，所以就一試！　　一行八人，叫了八個餸，包括蟹（一隻辣蟹、一隻薑蔥炒）、蠔餅、啫啫黃鱔煲、沙薑雞、蟹油炒麵、炒菜心、咸肉炒韮菜花、炒聖子。　　辣蟹係招牌菜，叫了小辣，但都幾辣，但辣都超好味，又唔油，ｄ炸蒜勁正，食完仲好好咁提我地可以打包返屋企撈麵食，好細心！　　蠔餅超大碟，都係賣$48，而家度度都咁貴，咁既價錢真係算係咁。炒聖子好惹味，雖然細碟ｄ，但好甜。黃鱔煲ｄ鱔係爽架，好大驚喜！　　雞好有雞味，加埋沙薑，正！蟹油炒麵，好香蟹味，有少少辣，但好乾身，食左勁多！　　一句講哂，樣樣都好好味，又有鑊氣，ｄ伙計又細心，老細兼大廚，掂呀！…查看更多

　　近來拍拖知道鳳翔街多左好多食肆，所以今日本來諗住去試下越南菜，點知要十二點先開，當時只是十一點半，所以誤打誤撞就去左小茄子。　　當時時間尚早，所以只有我們一家，我們叫了咖哩海鮮包、牛丸湯河、蝦醬炒飯、青木瓜沙律、青咖哩雜菜、香芒糯米飯，很豐富吧！　　其中咖哩海鮮包最正，ｄ汁超好味，個包又新鮮又脆，仲有海鮮又多，有軟殼蟹、大蝦、青口、魷魚，最後連個包都差唔多俾我地食哂咁濟，因為真係好好味！　　牛丸湯河有好勁既香料味，本人對香料一般，阿媽就話好正，湯都飲埋！　　青咖哩雜菜用火爐上，食到最後都好夠熱，又夠汁，最後食唔哂打包返屋企再加菜煮都好正！　　最後四個人捧著肚子離開都只係$268，好抵食！（其實呢度仲有午餐，廿幾蚊有交易，有湯有飯有埋特飲！）…查看更多

　　今日出去銅鑼灣食飯，所以特登去會一會瘋薯，看看是否值得一吃！　　去到既時候，見到好多人，都唔知去邊度排隊，初初仲排錯左人地攞野食個條隊，之後先發覺排錯左，又去番左邊，等左一陣又無人理，個個都掛住做野，有點不知所措既感覺！之後終於有人幫手落單，綜合之前網友的意見，所以今日食左蜂蜜芥辣味薯條，仲有汽水送添，Good 呀！　　落單後都幾快有得食，熱辣辣，脆卜卜，原先都驚芥辣味好重（因本人不食芥辣），但發覺唔係，個醬甜甜地，配合薯條，好正，醬又夠多，食到最後都仲有醬淨，不錯！　　值得再下一城！…查看更多

上個星期與朋友聚會，因為想食法國菜，又唔想過海，上左呢度睇話呢間餐廳唔錯，而且朋友甲話食過兩次都覺得唔錯，所以就訂左位上來食。　　一上到去，已經知道不妙，原來呢間係蘇絲黃怒罵過的其中一間餐廳，更叫大廚多學幾年才出來煮野，不過既然來左，算吧！首先，這裏是沒有水供應的，一定要點野飲，所以叫左支有氣水（$32），之後叫左三個Set Dinner，有一個頭盤拼盤，其中有個風乾肉夾蜜梨（人家總是夾蜜瓜的，但這兒夾蜜梨），味道總是怪怪的。　　　之後湯係忌廉露筍湯，點知等Pepper等到湯都凍了仍未有人理我們，灰了！再者是雪葩一小杯。最後到了主菜，那個薄豬柳加煙肉，那塊肉又乾又”鞋”，味道似足麥記既豬柳（朋友乙說連麥記都比不上）；那個大蝦意粉，那些蝦有一陣雪味，最後那個海鮮包，係用威化紙包著焗的，但濕漉漉之餘，仲要無味無道，唉......　　順帶一提，這裏的燈光暗到令人連對面的人都看不見，食完飯簡直頭都痛，仲有11點會變Party場，要注意！…查看更多

　　之前見不斷有雜誌介紹，所以咪特登去試下囉，不過就有ｄ失望啦！　　　首先，我去到Counter個度，個職員淨係俾個餐牌我自己睇，又唔介紹下，攪到我都唔知食乜好，又唔知跟餐有薯角同湯，攪到我散叫勁貴！　　叫左個Classic Cheese Burger，件蕃茄好鮮，幾好食，ｄ洋蔥係熟既，都唔錯！不過個包明顯唔夠熱，連塊芝士都溶唔到，好失望！件牛唔覺同麥記有乜唔同，但價錢就差好遠了。　　加左個炸洋蔥圈，以$14價錢都ｏｋ既，不過就無乜味道，仲有個格格脆薯，得個薯字，無味無道，同哈廸斯差得遠，人家好食得多，仲要平好多，呢度要賣$14，仲要得好少（Less than 10件）！　　最後係杯Mocha，尚算不俗，幾香又不太甜，不過似乎同D burger唔係好夾。 　　叫左個包、洋蔥圈、脆薯加Mocha，要$78，個人覺得都幾貴，下次未必再試！PS：我個日去撞正隔離裝修，好嘈又大陣天拿水味，簡直想死！…查看更多

　　星期六無聊無野做同阿媽兩個人上山頂，一心諗住去試下，因為見到都有好多人介紹呢間餐廳，所以入去一試！　　首先，d店員都幾親切，同埋乜野國藉都有，有個侍應走來問我地係咪第一次來，又介紹個牌既用法，但由於佢既口音關係，所以都唔係好聽得明！　　個日叫左個炸啤酒蝦，有好多隻，好香脆，但就食唔到啤酒味，點茄汁唔錯！件蒜蓉包唔錯，幾好食，又好香！　　叫左個周打湯，好杰，好多薯仔同西芹，本人略嫌太濃！　　　之後叫左個蝦意粉（唔記得個名，總之Menu第一個），都幾清，同埋有成打蝦，ｄ蝦好爽脆，正！　　Cocktail方面，叫左一個Lime xx來飲，好特別用個調酒器來裝，都好大杯，雖然有好多冰，但飲到尾都唔會覺得淡，兩個人飲岩岩好！　　整體來講唔錯，個景好靚，一定會再來！…查看更多

　　因為有人介紹，所以琴晚同屋企四個人去食，因為之前訂左檯，所以可以坐窗口位！　叫左好多野食，包括燒鵝肝、燒鯖魚卷、蔥吞拿魚卷、三文魚卷、清酒煮蜆、蟹粥、燒油甘魚頭、燒鯖魚、是日推介－－佐佐木沙律、黑豬稻穗亭烏冬，仲有甜品燒年糕。　　成餐飯都好滿意，又唔貴（可能因為係上樓的關係！），唯一係唔太鐘意個燒年糕，太似夾餅，因為佢係響年糕上加砂糖同花生醬，所以不太鐘愛！　　仲有蟹粥略嫌太鹹，烏冬不太特色，下次考慮食鍋物加烏冬！　　清酒煮蜆真值得一讚，好鮮甜，又夠清，比辣酒索好得好！　　　　琴日其實仲好想試馬肉壽司，不過無人陪我食，放棄左！下次試番，仲有想食鐵板牛柳、鍋物等，總之我一定會再來！…查看更多

　　見到之前ｄ人食評講得咁好，所以今日特登成家人(四個)去食！　　間鋪真係好細，得四張檯度，如果唔BOOK真係比較難有位。今晚叫左好多野食，包括：1) 串燒拼盆(每樣一串, 大約十串到, 但$160有d貴)2) 牛舌(太薄, 麻麻地)3) 薄燒牛肉(唔覺咁出色, 可以吧!)4) 燒雞翼(見檯檯都叫, 所以又叫, 但真係有d d 失望,無乜特別之餘又鹹左!)5) 海鮮鍋仔麵(個湯好清甜, 但d麵唔係稻庭烏冬, 有d失望!)6) 冷麵(唔夠凍, 一般貨式!)7) 燒鰻魚飯團(個飯團好脆,但都係原味好食d)8) 燒飯團(好好好食, d甜醬油好好食, 好似我響日本食個d)9) 燒年糕(好食, 但幾貴, $15一件, 寧願食飯團好過!)10) 由於茶要$10, 唔化算, 所以叫左生啤、麒麟啤酒同日本清酒 到八點幾, 全店爆滿, 煙味、油煙味開始充斥, 好彩我地都差唔多食完, 快走是也! 如果你屬敏感人士,就要小心啦! 題外話: 打電話去訂位時, 聽電話既阿姐講野永遠無語氣, 得兩個字, 如: 幾點, 幾位, 貴姓, 感覺有d愕然!…查看更多

　　今日下午兩點幾去食，因為對set無乜興趣，所以散叫，但都幾貴囉！　　我叫左魚丸魷魚羹冬粉（走青），再加一個涼泮小黃瓜。　　小黃瓜先來，份量極少！完全唔值20蚊，仲有個味怪怪的，總覺有點”壓”味，毓民牛肉麵ｄ涼拌青瓜好食好多！仲有，我碟野都未食完，就不斷有人問我仲要唔要，我都未食完，做乜要收我碟野喎！真奇怪！　　個冬粉話明要走青，來到又係有青係面！唉，咁我做乜要同你講呀！仲有，冬炒份量ｏｋ，但ｄ餸就超少！得兩粒魚丸同兩”舊”魷魚，30蚊喎，有無咁矜貴呀！　　埋單走，$20+$30，加埋一應該都係$55，點知張單係$57囉，後來睇單先知原來冬粉要加$2，餐牌唔覺有講，落單又唔講，原來覺得被人屈囉！　　但更奇怪的是我俾六十蚊佢，佢找番七蚊俾我，都唔知係佢找錯，定係我睇錯單，是但！但整體感覺差了！…查看更多

　　今日心血來潮特登去試，原來由旺角火車站行過去都唔係好遠者．．．　　食左個匈牙利辣腸熱狗加肉醬＋薯條＋飲品，30蚊，本來想換薯餅，點知個阿姐話炸左唔俾換，阿炸野既阿姐個樣好寸囉，後而老闆娘好ｄ！　　個熱狗都ｏｋ既，但無預期中好得咁緊要囉！條腸一ｄ都唔辣，唔記得左有肉醬，個熱狗要左茄汁，覺得好憨居！　　仲有唔知原來熱狗可以加兩種醬，有ｄ嬲！　　薯條麻麻地，我都係鐘意麥記個ｄ多ｄ！　　間鋪的確好細，雖然一般，但我諗都會再去試下既！…查看更多