PansyTsoi的個人專頁

今日經由某外賣apps叫咗兩個午餐分別係芙蓉蛋飯同乾燒伊麵。因為實在太好味，掛住食無影相。首先芙蓉蛋飯非常足料，蛋唔老，鹹淡適中，仲好貼心將豉油分裝，送到黎仲係熱辣辣起好食👍🏻👍🏻好耐無食過一盒咁滿足嘅碟頭飯。另外叫乾燒伊麵，乾濕啱啱好，啲麵無炒到爛哂/淋哂，味道同芙蓉蛋飯一樣咁無得彈。一碟幾十蚊嘅碟頭，無諗過可以食到酒樓級樓嘅味道，同區嘅茶餐廳入邊絕對係最好食👍🏻👍🏻希望繼續保持水準😋😋…查看更多

第一次食係成班人食所以叫咗超多樣野，試咗手撕雞拉麵/烏冬，手卷，口水雞，土豆絲，大雞脾同多春魚串燒。首先，個外賣等咗一個鐘，我係店內等左足足一個鐘，試問有邊個打工仔會為咗個外賣浪費一個鐘？lunch time時間已經短，我淨係等外賣都等到完咗lunch time，如果一早講定要等咁耐我地根本唔會幫襯，好唔緊要，我地公道地去評論野食質素。因為串燒燒好之前店主已經煮好所有拉麵烏冬，所以全部都係凍嘅，手卷個紫菜都已經霖哂，串燒更過份，我地曾經要求大火啲燒個串燒因爲等得太耐，店主話因爲個爐嘅問題如果太大火會著，所以只能用細火燒，本人奉勸各位如果午餐時間去食千萬不能食串燒。口水雞—味道唔錯，夠辣夠麻而且份量足，但無配飯要另外+$8加個白飯。手撕雞—同事話幾好食不過真係凍哂所以都唔太夠辣，本身個調味都唔夠咸。土豆絲—中規中矩，唔夠咸同辣手撕雞手卷—同事話超多雞，唔夠辣不過幾好食，以量制勝多春魚—無問同事好唔好食，不過等咗成個鐘雕花咁雕難食極有個譜雞脾—同事話調味好食，而且都幾大隻，不過又係凍哂上述經驗令各位同事都唔敢再幫襯🤷🏻‍♀️🤷🏻‍♀️但我身為一個勇士決定比多次機會佢。今次試咗上次無食嘅手撕雞喬麥麵(因為店主話口水雞要等三個字我有陰影，雖然上次無講要等)，令我決定今次真係最後一次食呢間野。首先，手撕雞嘅雞一食就知係雪藏雞扒肉，呢一點真係厚x愉記做得好過佢，起碼大家都係專做手撕雞但人地係用冰鮮原隻雞🤷🏻‍♀️🤷🏻‍♀️。我唔明點解口水雞係用冰鮮雞但手撕雞係可以完全無雞味。味道方面辣同麻都夠，但因為係雪藏雞本身啲雞肉係無乜味，咸味亦唔夠，即係得個辣字。個麵係完全無咸味只有辣味，麵嘅粗幼不一，我要自己加蕎麥麵汁先食到，有相為証。我奉勸各位就算食，食口水雞就算🤷🏻‍♀️🤷🏻‍♀️真係不可一不可再，我都係食返厚x瑜記算。…查看更多

呢間餐廳都開左一段時間，印象中係接左手改左名。開左咁耐都未試過，反正係屋企附近就嗌左個外賣試試佢，呢一篇野係我第一篇係開飯寫嘅食評，亦專登為呢篇野登記左個帳號。我嗌左個麻辣米線餐 $45 三個餸包杯野飲，其實呢個價錢都偏貴，不過無所謂，反正附近都無得食麻辣米線，就算有都山哂門，所以就試試佢。因為我係外賣，碗野黎到嘅時候我仲覺得咦ok喎有分湯。一打開已經有啲無奈，三個餸我嗌左牛丸貢丸同午餐肉，午餐肉只有一塊而且都唔係厚，丸就每款得兩粒，呢個價位啲餸竟然得咁小我已經扣左好多分，不過都算諗住好食就ok。我再打開埋個湯就已經知我深深地中左伏，所謂麻辣湯底係無任何香料(即係花椒辣椒個類)，一睇就知全味精，有一層辣油浮左係面，呢隻味就同李x記嘅麻辣火鍋湯包一模一樣。其實唔在行整麻辣湯大可以唔整，而唔係咁無誠意，餸已經唔多連個湯都唔落多小小功夫，真係唔會再幫襯第二次😅雖然唔知店家其他野好唔好食但我個人黎講食完呢碗野，個感覺其實都幾cheap因為湯又是但餸又小，就算其他野可能好食都唔敢再幫襯，因為唔知下次又唔知會中咩伏。下面補上湯嘅相片…查看更多