sweetmania的個人專頁

中環最近進佔越來越多地道嘅美食，包括譚仔三哥，同呢一間18座狗仔粉鍾意食嘅朋友相信都對佢嘅超勁辣菜脯唔陌生，我最鍾意食嘅就係佢嘅魚肉翅然之後再加上四羹嘅超級辣嘅辣菜脯，真係食到流晒鼻水同埋眼淚魚蛋同燒賣我會選擇魚蛋，辣汁都好出色，有陣時上晝返工見到啲人咁鬼早就食狗仔粉真係覺得好厲害。中環開咗一間終於就唔使再落深水埗喇中環要比其他地方係貴少少啦，不過呢個係完全可以理解嘅，人之常情始終呢度都係蘭桂坊。但係好可惜外賣平台而家都仲未見到呢間舖頭出現，有陣時想食一碗嘢加少少小食，但係又唔想行落去，冇熊貓同埋袋鼠就真係有啲唔方便，呢一區嘅人有陣時可能寧願比多少少錢都唔想行落去，睇吓店主會唔會考慮吓？…查看更多

茶園呢間餐廳，我記得我細細個的時候還是一間非常出名食下午茶的地方。當時年紀細，沒有咁多錢消費，現在長大了，而且地方裝修完無幾耐，加上特別日子慶祝，就選了這裡一試出名的buffet晚餐同食過的咁多間同級數的酒店比較。茶園特色在於沒有中式熱盤，沒有粉面station，沒有日式壽司刺身，但卻有不少比較需要功夫去預備的西式美食。不如先看看大環境。每桌都有完全足夠的空間，樓底高，沙發夠重，證明不是平價貨色，再看看杯杯碟碟到餐具都感受到酒店的確捨得投資，另外加上現場西裝骨骨的live band，令到層次再昇華。馬上進入食物，海鮮方面，首先每人有一隻龍蝦，有三種不同煮法，大家可以每邊一個味去試試，不過龍蝦真心大份，看見有人外賣打包走，酒店方面都樂意幫忙，所以大家可以留肚試其他菜式。頭盤海鮮自己看相片就不一一寫上。我最愛的生蠔，今日有四款提供，size不大，口感薄薄的，海水味，鮮味是有，只是略嫌不夠質感，有些失望的。雖然如此但我都吃了一打落肚。冷盤蝦，肉質好實，鮮，吃兩隻已經足夠，留肚食其他。其他冷盤仲有，24個月黑毛豬，油封鴨肉蘆筍沙律，亞枝竹配松露蛋黃醬，豬肉起司酥，豬首豬利批，漿果黑毛豬豬肉腸。吃得凍食多，選些熱食，很少會見到自助餐有龍蝦湯，嚐了一下，好結好濃郁龍蝦味，半碗不夠，我們一行四人一起分享。真心不得了。因為要留肚。煎鵝肝，厚身，沒有筋，火候拿捏得好，軟，滑，香。雖然知道自己在進食脂肪，但是我都忍不住吃了兩塊。其他熱葷其實還有很多，分別是威靈頓牛排，啤酒燴羊肉，法式橙鴨，法式白酒燴雞，英式牛腰批，煙燻豬肋骨，法式煎鱸魚，野菌火腿蘇，焗帶子到少有的焗法式田螺都喺度揾到，真的未能盡錄。甜品不算很多款，大約10種左右，而自家製雪糕，口味特別，選擇豐富，有鹹蛋肉鬆味，德國麥啤，芒果糯米飯，新鮮雲尼拿，朱古力，士多啤梨味，另外還有雪芭提供。論環境，呢度無得輸，而食物方面，有無限refill的生蠔，每人一客的龍蝦就提供三種烹調方式，而且還可以帶回家，大家可以留肚食其他。…查看更多

約咗人飲嘢，又係決定尖沙咀，唔想去酒吧，上網做咗一輪資料蒐集，決定嚟到呢度lobby lounge Happy Hour。知道呢間酒店逢星期一到星期三，下晝六點到八點， 68款飲品及食品，定價每款HKD68。位置咁闊落，樓底又高，仲要對住一個咁大嘅海景，難怪lounge入面多數都係住客或者遊客。先叫第一round Margarita，酒味檸味做到平衡，沒有將貨就價。好飲。Pina Colada，太甜太甜太甜，就是飲到尾溶冰都仲係甜，你可想而知～Bar food叫左：薯條，其實有三種做法俾你揀，我就揀咗辣椒粉半薯條，分量唔會好大，但足夠你食啦。蝦春卷：3條，我無食到，但味道應該不錯。同伴自己食曬！魷魚圈：真心細份～味道係唔錯的。$68都係一個gimmick～跟飲品上嘅橄欖同埋雜錦豆，橄欖真係好鹹，雜錦豆就不過不失。似乎呢度飲品比食品出色。…查看更多

這裏不大，但分了外廳和內裡的位置。全場可以容納的人數不多，沒有鬧哄哄，只要舒服，寧靜的舊英式氛圍。昏暗的燈光，皮沙發和悅耳的英文歌讓人放空。唯一控制不了是客人的聲浪，有點掃興。小食在你下單後就送上，一個人這三碟，份量不少，再添也做得到。最愛是那綠橄欖，大顆，實在，鹹中帶香，我喜歡。盛飲品的杯好別緻，就算索價不便宜也忍不住要了兩杯。Espresso Martini調的好，咖啡和酒取得平衡，不會太甜，太苦，太嗆。Apple Cider法國的貨，喝著也不錯，也是喜歡的。兩杯埋單近300。值不值，見人見智。…查看更多

見到呢間人氣珍珠奶茶店大排長龍，自己當然唔會排啦！當日黃雨警告，而又有時間，先去看看什麼環境，當然都有人龍，不過就是可以接受的長度，既然來了當然要試最具人氣的飲啦：虎虎生風厚鮮奶！先講清楚，我買完去左個廁所，返黎時候，飲品已經準備好，說好的老虎紋也慢慢褪色，不過味道才做重要！#波霸-好吃，煙韌有咬口。#珍珠-太細粒，無質咁，可以不試。（純粹個人感覺）#甜度冰度-不能改呀，由於人太多了噢～～#厚鮮奶-說白了就是一層油脂，反式與否我不知道。於我來說太油。如果不是等到冰都融化了才享用，我相信一定非常甜。一杯下肚子應該要跑八公里去消耗這三百多卡吧。…查看更多

首先，我第一次的光顧是和一班好友在餐廳臨近改名之際去的，當時對舊餐牌上的食物也有一點印象，但當時以澱粉類，沙拉，冷盤為主，幾個女仔食得唔多。最記得是她的Tiramisu和好多種類的白酒紅酒氣泡酒，當時已經覺得可以再試。餐廳改名之後，餐牌上多咗扒類選擇，同埋仲有tasting menu，而tiramisu也有不同口味選擇。Tasting menu , 每人可以選擇4款食物，再加5款酒，定價都是五百多一人，性價比實在滿分。如果你叫 a la carte menu更免加一，中環餐廳定真係唔知邊度搵。一向都覺得tasting menu的份量都是少少幾口的份量，但係呢個tasting menu係full portion，上菜的時候看到我們目定口呆，心想一定吃不完，唯有打包走。大家睇相就會明白。先講講頭盤，beef tata和parma ham，beef tata好新鮮，好香black peppa的味道和份量都好慷慨，而同伴的parma ham滿滿的一盤，不咸卻香，佢一個人自己吃完一碟。另外想講講餐廳用的義大利黑醋，在這裡食過之後，我已經忍唔住幫屋企添置！而主菜我要了松露pizza配salad side dish，配上balsamic vinegar實在是賞心樂事，salad雖然是side dish但份量一點都沒有欺場，而松露pizza，在店員端上來的時候已經聞到誘人的松露香，實在是叫人食指大動，皮底好脆，好好食，加上蕃茄底和蘑菇在面，實在做得出色。另一款主菜上黎，見到完完整整一塊比手掌還要大的牛扒呈現在眼前，真係心感不妙，因為我地一定食唔曬，商量之下，決定將pizza外賣，慢慢食塊牛扒，同伴話牛扒多汁夠Juicy，肉味濃就咁食都好好味，係某d部分生左d，再配上不同醬料又係另一番風味。而伴菜係蘑菇，你睇睇圖片就知無講大話，份量真心多，不過最後都係食完。 而signature甜品，我要左原味Tiramisu，而同伴就要左Whisky Tiramisu，烈酒版本酒精味的確幾重，我都係喜歡傳統原味，份量不多，略嫌手指餅不夠食，不過其實一餐下來已經飽到上心口。老實講，5杯酒再加大量食物，而且味道都是期待之上，實在無得輸，喜歡傳統義大利🇮🇹食品的朋友真心可以試下。不過當日我去光顧就遇上整棟大樓停電，而且細問之下知道原來已經不是第一天發生，始終係舊式樓，改成三間餐廳，未免電力負荷太大，所以出現問題，食客們想試都要考慮呢個因素，因為聽聞一停就兩個鐘，唔少食客都離場走人。…查看更多

唔好以為酒店大堂酒吧定價就一定高，今日我就帶大家睇睇呢間酒吧 happy hour時段到底有幾抵。首先，好多酒吧happy hour都係做緊折頭，可能正價七折咁樣，當然買一送一坊間都有好多選擇，而呢度就唔需要你去計數，因為呢度有一本happy hour特定menu。首先happy hour時段係1730-2000，而且列出價錢就係一杯飲品價錢，唔需要話一定要飲同一款飲品兩杯，可以試多幾款，呢個已經係advantage。其次，叫嘢飲之後，就送上免費的meat loft，本人唔食肉，留返比朋友慢慢享用，我聞到好似午餐肉咁既味道。而我就主攻雜豆，份量都好大方，而且仲主動幫我添左一次，服務好到位。睇番飲品價錢，我都有小小嚇親，五星級酒店，有live band樂隊表演，舒服的環境，輕鬆的氣氛，竟然最平飲品定價HKD50，我敢講一句比起灣仔酒吧街的酒吧定價還平。今時今日隨便行入一間酒吧，cocktail定價都近百元或者更高，真的有點後悔，點解宜家先發現一個咁優質的酒吧。第一次Espresso Martini太甜，經過提出意見之後，第二杯明顯酒味濃好多，值得一讚。唯一就係要到出面露台食煙，無戶外位置，呢個可能對煙民黎講有小小唔方便，不過講到咁平價錢，行幾步又有乜所謂。無論環境，服務，氣氛，價錢我都比幾高評價，我真系會多d黎飲嘢。唯一要留意返，happy hour時段係唔接受任何會員會籍折扣優惠，或者使用現金券。不過三杯飲品都係200幾埋單，比cash都無所謂啦。…查看更多

其實依家開始多店舖供應素食選擇。我不是一個純素者，只是有得選擇之下都以素食行先。不過始終覺得香港素食未夠台灣同內地咁普及。呢間餃子舖已經係第二次光顧，素食選擇就得一種。要了一份中份素灼餃子，純天然味道。餃皮薄而饀料唔算特別多，素餃唔會話好似肉餃咁多汁，已經係意料之中，不過都係油少少。中份餃子有7隻其實都幾飽，加埋醋食係唔錯。涼拌黑木耳又係我最愛的小食之一。味道都唔錯，木耳爽脆有咬口，份量唔多，一個人就啱啱好。最後埋單$70，想要一個簡單晚餐呢度都係唔錯，不過留意返，店內不提供水。呢樣就好似差d～…查看更多

幾次行過都係大排長龍，老實講，我唔係拉麵fan，當年豚王黎香港我都係行過有得食就食，今次亦都係一樣。麵舖細細嘅一幻，入到店內已經股蝦頭湯味道，賣嘅都好專，就係麵，餃子，飯團，溏心蛋，想要筍都無～坐低無耐門外已經開始排隊，仲要微微細雨，真係少d熱誠都唔會排隊。我要左原味，鹽味，幼麵，有蔥（HKD88+10%) 等左13分鐘總於出現。眼睇湯面一陣油，心裏已感不妙，麵食在嘴裡是帶點韌性，好食的。我只敢食麵，湯都不想沾一點，因為對於我來說實在太鹹了。溏心蛋好味，流心蛋黃好香，由於我每日早餐兩隻蛋，所以只可以食多半隻，如果鍾意食當然可以再另外order。而叉燒我唔食肉就唔評論了。最後我加了胡椒，蒜蓉同一味粉，食了五大啖就放棄了。賣單HKD97。希望廚師唔好覺得我不敬，只係唔啱我口味～…查看更多

星期五去中環飲嘢，兩個字，人多！但係呢間酒吧唔單止人唔多，仲幾抵飲。每日happy hour 3-8pm，買一送一，真真正正買一送一，不過有限酒類，啤酒，紅白酒，氣泡酒同埋經典雞尾酒都係買一送一，各位看官自己再問清楚酒吧waiter吧。我要左一杯Prosseco(HKD98 , BUY1GET1) ，waitress姐姐比左一杯我再比多張飛尾我，係用黎兌換下一杯prosseco既。最愛Prosecco “o既”泡泡，酸酸的味道容易入口，也容易醉，一杯落肚，好像把胃口打開了。同伴要了“Airmail"(HKD98 BUY1GET1) ，酸甜中，甜味偏多，帶果香味，我覺得比氣泡酒更女仔，喜歡果味cocktail的可以試試這杯。也是買一送一。每人喝了兩杯都覺得唔夠喉，之後再要了一杯Keep me up (HKD108，非指定酒類，無buy1get1）Spiced Rum , Espresso , Bailey's and Frangelico融為一體，咖啡，奶油，herbal香溶於這個小小的玻璃杯裡面，好喝也覺得好高熱量，最好用這杯換我朋友的Airmail。對了，最後實在忍不住要了一籃炸薯條(HKD48)，但這個炸薯條真係無敵，每條都是脆的，熱辣辣，每條都是細細的，好大的一籃，我們兩個一條接一條，不停食，最後一條不剩。呢個薯條真的大推！！除了薯條，其實呢度BAR FOOD定價都好親民。只是胃納有限，今次食住chips先。當晚還有現場表演，我在洗手間巧遇兩位表演者，說起自己喜歡BRUNO MARZ的歌，他們沒多久就唱了兩首他的作品，聽完心滿意足離開了。雖然當日人不多，但表演者都落力演出，而且還非常有禮貌，唱緊歌見我地離開仲同我地揮手道別，呢間吧我一定會再黎。下次我要試試四川雞尾酒！…查看更多

呢間餐廳，都睇左一段時間，因為呢度食評好壞參半，想試又未有足夠信心。今日相約友人灣仔飯聚，行到呢條街，有唔少餐廳，而想試的西班牙餐廳爆滿，而Bo Innovation又無book位，上去都未必有得食，最後拍板試呢間，話晒有個app主菜有買一送一，唔好食都覺得好似無咁虧。沿著樓梯行上去，感覺有少少泰式風情。入到去，餐廳主打室外雅座，當晚人都唔少，分開左兩邊，右手邊好多鬼佬已經飲緊酒，最後我地選擇左邊無咩人既位置。兩個人食唔到太多嘢，所以叫左四樣，柚子蝦🦐沙律；泰式炒雜菜；龍蝦金邊粉；泰式鱸魚。先要了一個椰青HKD48，清甜，椰肉好嫩，好味。Lime and Mint Frappe HKD68，呢杯好有薄荷葉味；檸味同酒味欠奉，而且超甜！超甜！超甜！真係好詫異點解可以咁甜，最後要加一杯水落去先可以飲得落，太誇張了！柚子沙律 HKD128--份量唔多，味道可以接受，椰糖味都幾重，柚子新鮮，蝦肉無特別就是雪藏貨色，沒有甚麼鮮味但是彈牙的，可能有人會覺得不划算，但我覺得還可以接收。泰式炒雜菜HKD75，說了要少油，不過上到來都是比較油，不過已經預左，所以無失望，味道也可以，有雲耳；西蘭花；椰菜花；菜心；紅蘿蔔等等，菜類豐富，算收貨啦。PHAD THAI LOBSTER (HKD298) ，呢道菜定價近300大元，如果不是龍蝦的話，最多就是128左右，菜端上來的時候，好彭拜啊，龍蝦已經拆肉了，同泰式河粉炒埋一碟，唔知道係咪足料，check唔到，上面鋪上的芽菜，原味的，沒有加工過，是傳統的做法，嘗了一口炒河粉，沒有特別出色的感覺，不過還是可以一試，當然如果覺得價格太高，可以試試其他炒粉面。Baked Sea Bass (HKD228) 呢道菜有用個apps，所以免費享用，雖然係免費，但一d都無將貨就價，原條海鱸用錫紙和蕉葉包住局，魚身魚肚內都係香茅，南薑，金不換，條魚完全係原味，無用任何調味醃製過，非常好食，而醬汁就非常辣，我都無咩點過，由於太夜食晚餐，最後都係吃了半條就放低刀叉。最後埋單HKD679，都覺得可以接受啦。只係整個食飯過程比蚊咬三啖，坐室外都係要避免短裙。如果有人想知係咩app，留言問我啦～…查看更多

老實講，有幾可會特登入嚟紅磡？今次真係為左個新酒店同探下路而專程來坐坐，飲杯野。呢間酒店地點唔算特別就腳，不過有個無敵海景既先天條件吸引，就算出地鐵站要特意行過去都覺得值。先講講環境，分開室內室外兩部份，red sugar本身自己就分成兩部份，你到達後，接待員會問你是飲嘢還是中菜。而酒吧區室內都唔細，當日室內唔係太多人，而室外更加大，可以說香港少見這樣大型的室外酒吧，而每個矮桌矮凳之間私隱度都幾高，用了不少喬木植物去分隔每張枱，而高凳高就對正海景，不過要考慮海風直接吹你頭，陽光普照的天氣就不錯，如果好似當日我去的陰陰天，有件披肩都敵不過海風的吹襲。我也因為這個原因最後轉了枱。講講飲品，本來以為happy hour買一送一，原來改了指定飲品折扣優惠。我叫了一杯柚子xxx，名字忘記了，要了走糖水，有西柚特定苦味，證明是真材實料，而且大大杯，可以飲好一段時間。而重點係小食呀，非常好有三種不同小食提供，魷魚絲呢樣好耐無見啦，真的好有誠意，另外還有花生同薯片，當日我一個人到，每一樣份量都唔多，不過唔夠食，話要添，waiter都無拖手掙，咁樣反而幾好，食幾多就要幾多，唔好浪費嘛。唯一需要改善的地方就是，矮枱座位要叫waiter真係有d難，揮手示意好多次都無人見到，少少無奈啦。不過環境同飲品定價都唔貴，唔想落尖沙咀人山人海的酒吧區，呢度都係另外一個選擇。…查看更多

真係要找數，電話相機有太多相，有太多餐廳未寫，奈何呢排工作較忙。盡力去啦。呢間餐廳賣美式早餐由一開業就已經係，24小時更加係剛剛開業時大家互相傳達唔知可以做到幾時。呢間餐廳兩間分店都開在酒吧區附近，自然有捧場客。幾乎一年一會睇睇今次2018年水準如何。餐點種類繁多，有omelette，egg anyway，signature breakfast dishes，kid menu，juice，milkshake，cocktail，beer etc. 最鍾意呢度的雞蛋煮法任君選擇，由炒蛋，煎蛋，太陽蛋，淨蛋白都有得比你揀。今次就揀咗兩款嘢食，蛋類我就揀咗水煮蛋配麥包走牛油，加煎番茄；牛油果；生果再配咖啡。另一款就係奄列配墨西哥辣椒，生果，番茄湯，pan cake。我個份原汁原味，水煮蛋加了醋煮，係為了讓蛋白定型，我自己都煮過，加d黑胡椒已經夠好味，蛋黃好香濃，真係好好味；牛油果🥑剛剛好熟，配上脆麥包，兩塊都覺得唔太夠，不過食埋生果同番茄🍅其實已經係好飽，任添既咖啡都係飲到一杯。而另一款，omelette配墨西哥辣椒，辣椒的確夠醒胃，omelette好大一份，估計有四個雞蛋，加上配料真係好厚實的一份早餐。個pancake好牛油味，加埋藍莓糖漿同牛油，真係小朋友恩物，我就對呢類早餐撒手擰頭。講返個番茄湯🍅真係好番茄味，唔係羅宋湯，唔好搞錯啦。整體水準keep到，無大變化，份量無縮水，都係咁大份！兩人配任添咖啡，埋單二百幾，soho區消費。…查看更多

最近同西班牙比較投緣，除咗想去西班牙旅行之外，仲好想食西班牙野。既然約咗朋友喺天后見，就試呢一間小店，有book位，好快被安排入座。店面唔大，所以枱同枱之間都比較近，當日平日人都唔係太多，可以慢慢享受一個靜靜嘅晚餐。兩個人唔係太肚餓，分別點左兩杯飲杯，同埋小食，仲有個西班牙海鮮飯分享。本來想叫一兜橄欖，但係店家見到我哋叫沙律，為免浪費就提議不如唔好叫橄欖先，因為我個同伴係唔鍾意食，而沙律入面都有唔少，由呢個小小嘅舉動， 就睇得出呢間餐廳係相當老實。先講個沙律，黎到嘅時候係非常之多橄欖油，但係我落order嘅時候已經要求左醬汁另上，但係我都冇退照食，但之後真係食唔落食剩好多菜，店員要收嘅時候就問點解剩咗咁多菜，我話因為太油啦。之後佢提議不如我將你剩返菜既份量俾過一碟你但係唔加油，我當然話好啦。又係一個窩心嘅舉動。加分。我哋仲有叫到西班牙海鮮飯，凍番茄湯，蒜片蝦，同埋一杯Mojito走糖水，仲有一杯咖啡調配雞尾酒，朋友好鍾意杯酒，咖啡味濃略嫌酒味差一點。番茄凍湯：凍凍的，酸酸的，開胃西班牙海鮮飯：兩人分絕對夠了，有青口，蜆，魷魚；飯入味，貝殼類鮮味又嫩，最怕韌的魷魚都無出事，好想食曬，不過晚上要控制碳水化合物攝取量，所以嚐了幾口就好了。蒜片蝦：蝦已經預先處理，去掉中間部分的殼，留頭尾方便進食。比較香口，但也是多橄欖油，味道還是不錯的。整餐飯下來，感覺輕鬆，服務都照顧得很好，侍應哥哥還會和你傾計，食物質素是期待之上，埋單最後500多？實數忘記了，Rojo，我有機會一定再幫襯。…查看更多

古裝同餐廳好似大纜都扯唔埋，但係又竟然有人諗到條計將中國古裝作為餐廳裝飾嘅一部份。轉場就嚟咗吱吱朕，入到嚟一眼望晒成間餐廳，場地唔算大但裝修得幾有特色，倒掛嘅油紙傘，掛住嘅清朝服飾，紅色嘅燈光，男女大頭佛公仔，俾人一種又神地又詭秘嘅感覺。唔理咁多點左嘢飲先。Drink list攞到手，竟然係一本武林秘笈？到底今晚耍邊套拳好呢？最後決定：第一式：Fuji Sprit第二式：Golden KimonoFuji Sprit，果然好spirit，酒味濃，幾種hard liquid嘅味道都飲到，而且正常份量真係可以慢慢㗳，好拳！Golden Kimono：細細杯，好似繡花拳咁，無力又甜，屬於觀賞嘅品種，賣相唔錯但味道就唔夠實在，而且份量唔多，個人就唔推薦呢杯。覺得切磋得未夠，再嚟多一杯The Japanese Persuasion. 呢杯就叫得好，味道酸酸甜甜極度容易入口，而且有一種好香嘅日本白桃味，攞個杯一聞，就覺得自己好似食緊啲日本啫喱咁，個種香氣係非常熟悉。呢杯酒drink list介紹我記得有一句係咁寫嘅：點呢杯酒比你嘅女同伴，第二日你會發現佢會係你身邊醒。到底有冇咁功效就真係睇你嘅功力有幾深厚。好奇之下問佢攞咗個Menu睇，發現呢度食物唔貴，下次真係可以試吓。飲到尾段，店家都差唔多打烊，開始收拾餐具，整理好啲清朝服裝，然之後佢哋熄咗部分嘅燈，閂好咗門，示意出邊嘅客人佢哋差唔多收舖啦。就係呢個時候門口突然打開，再睇返油紙傘，同埋掛起墙身嗰幾套清朝服飾，突然間起雞皮，到底咁夜呢D時候，一個咁昏暗嘅環境當中，會唔會有啲朋友仔坐咗係你隔離呢？得返我地一台客，時間都係唔早，我哋決定都係埋單走人。講到呢度唔知有冇人有同感呢？…查看更多