ckeungs的個人專頁

今朝去買粉麵，見到收銀有個四眼哥哥，咁我就叫佢落單豬潤腩米走蔥湯另上，佢就入機，入咗一陣佢又問返我係唔係乜乜乜，咁我就重複一次頭先個order，先至順利出到張單俾我。等咗大約七至8分鐘，見到有人執緊外賣，我以為係我嘅，因為我張單係1號。見佢執完又冇叫我攞，咁我咪等多陣囉。又等咗大約5分鐘，都係冇人叫我攞，我就直接入去睇吓張單，原來真係我嘅，我問佢係咪可以攞得，佢先至話係呀，另外一個男店員好親切咁幫我睇吓有冇執到啲醬，佢話有齊晒，點知返到屋企都係冇嘅，吹到啤一聲。:(…查看更多

參考大家嘅評價，呢一間隱世拉麵店絕對係高性價比。首先舖面設計，一入門口大約有十至十五個bar枱位，後面通道算寬敞。再入係普通枱，大約有廿幾個位，我一個人去需要搭枱。環境十分之乾淨，枱上有一個桶，裝咗點餐紙、marker pen及即棄木筷子。由於只得二人打理，所以坐bar枱落餐會快啲，如果坐曾普通位，女職員會過嚟收點餐紙及錢。我今日去未開舖已經有人龍，入滿後職員會逐張枱收錢，上餐大約需要十幾分鐘都唔算慢。我點慢煮叉燒拉麵另加慢煮鴨肉（十元），魚乾湯底，拉麵已附上溏心蛋及筍，唔夠亦可以再加，拉麵不能選擇軟硬口感，我覺得係偏硬，鴨肉油香味濃，叉燒瘦身清爽，湯底不會太咸，不過唔記得幫我走葱🙂‍↕️，整體來講$65（$10鴨肉）有如此質素值得排隊。…查看更多

有Den San嘅加持，梗係要去試吓啦。一出電梯就俾人潮塞住咗🤣，個位實在太細，又未到開門時間，如果唔想入唔到最好早半個鐘到。到點餐啦，記住，千祈唔好講號碼，要講個餐名，職員唔會記個號碼。我同朋友分別點咗照燒銀雪魚同埋燒牛柳定食，點知轉頭同我講冇牛，咁唯有叫吉列豬定食。首先嚟到嘅係銀雪魚，有飯有前菜有湯有魚，都算幾豐富，但係塊魚細過我同你塊手掌，不過味道係唔差。吉列豬方面，炸得好鬆脆，係肥膏多咗啲有啲油膩感，配菜就唔多講度度都差唔多，個湯就偏鹹，我嗰份份量係算OK嘅。食晒個餐朋友係唔夠飽嘅🥲。然後有個日本侍應問我哋要乜嘢餐後嘅飲品或生果，佢當然係用款鹹淡英文啦😅，咁我朋友聽咗幾次都聽唔明佢講乜，佢就有啲唔耐煩行開咗，咁我唯有叫個香港人侍應落單，原來日本人都會有不耐煩嘅一面，可能係我見識少啦🤪，不過總體上係唔錯但係要我再食下一次應該要隔多一排先去啦…查看更多