nicolesin02的個人專頁

見開咗間新派點心餐廳，見無咩人等位就去試下，見到點心紙好開心，因為見好少有得買既菲林芝麻卷，即叫啦嚟食啦。跟住點例牌既燒賣，叉燒包和腸粉。首先嚟到係菲林芝麻卷，個樣好靚喎，諗住食埋其他野先食，但等咗好耐都無野食到，唯先食先，一食，無芝麻味，應該係用粉整，好失望。之後叉燒包嚟，個叉燒包咁細，仲以為係雞包仔，仲只得2隻，份量真係細又少，味道一般。跟住輪到鮮蝦腸粉，腸粉很滑唔錯，可惜份量又係好少，得長長一條。最後一次過上埋三色燒賣和雞扎，三色燒賣除咗個皮唔同色外，個餡全部一樣都係無味，唔知係咪忘記調味。雞扎就從未食過咁細塊既魚肚。整體嚟講，點心真係唔多掂，有好大改善空間，而以份量和食物質素嚟講，唔值呢個價錢，怪不知無咩客啦…查看更多

住係附近咁多年都未嚟過呢間酒樓食野，前排經過見有煲仔飯+點心晚肆套餐，今晚終於嚟試下叫咗個鳳爪排骨煲+燒賣+牛肉+菜苗餃，食前無咩期望，估唔到點心幾好味，燒賣爽口；菜苗餃餃皮唔算好厚，可接受；牛肉多芫茜，對我嚟講~正；而個飯OK，普普通通，唔係食落好突出好好食果D，但唔差。食完仲送埋蕃薯雪耳糖水，個糖水雖然係送，但煲得唔hea，夠薑味，好味。整體好食，價錢合理，$98加一 + 茶位每位$7 = $118，同平時茶記食兩個小炒價錢相約，會再嚟食:)…查看更多

次次去太子旺角搭車經過時都話下次去試下食，但次次都忘記，今次專登搭車出去食。去到當然試下最出名既金牌牛肉餡餅和京葱羊肉餡餅，我唔食羊食咗牛肉餡餅，嘩！裡面真係好多汁，啜極都有，味道不錯，仲無九龍城果間咁咸。羊餡餅就由老公食，佢話唔“蘇”，但唔講就真係唔覺D肉係羊，又係勁多汁。見有人推介咕嚕雞球炒麵，即叫，個汁似錦鹵雲吞個甜酸汁，雞肉滑好味:)，個麵好脆，都大碟。另外叫咗咖喱牛腩飯，雖然見人評語普通，但都要試下。OK喎，辣道接受到，食到有唔同香料係入面，初初食唔覺辣，之後D辣慢慢滲出，堅喎，撈少少落飯已夠，食剩好多咖哩，想叫薄餅，但太飽食唔落。食完餐飯，兩人$208，價錢都合理。…查看更多

今晚興起想食點心，點知食咗一餐非常難食既晚餐，呢間舖好耐之前食過一次都唔錯，所以再嚟食，可惜不復之前。叉燒腸粉，腸粉皮好糊口，無咩餡好少叉燒，似食齋腸粉咁；菜苗餃+棉花雞淡而無味；叉燒包算正常，但唔算得上好食；最超難食係蘿蔔千絲酥，我真係未食過咁難食，皮厚得嚟似翻熱，又係無味，唔係睇到有DD蘿蔔絲，都唔知自己食緊咩，想試即人千期唔好叫嚟食。成餐至正常真係似出面酒樓點心，應該得山竹牛肉一樣好食，其他真係似醫院餐，淡而無味，完全食唔出係點心，咁差既質素，無下次啦。…查看更多

今日去大埔墟搵野食，當然要試大埔墟出名既糯米糍:)，果然名不虛傳，皮十分之薄又軟綿綿，餡料夠多有芝麻、花生和糖，甜度適中，甜中又帶少少花生咸香味，夠特別，呢個甜度合晒我呢d唔鍾意勁甜既人，直得推介~…查看更多

今晚專登去食龍蝦喇沙，點知買晒，改食樣樣有d既雜錦喇沙，辣辣地幾惹味，又有少少椰汁香味，湯底好吸引，唯一欠完美係d丸唔熱，食咗一半先記得影相。另外叫咗炒金邊粉，係我鍾意的炒法，酸酸甜甜又濕濕地，好味，推介。唔食辣千期唔好撈碟邊的辣粉，因為堅好辣最後一碟係青炒雜菜，夠味，都好食。下次會早d嚟食，希望可以食到龍蝦喇沙啦:)…查看更多

已很久沒來食，點知一食已唔似以前咁好，簡直一落千丈的差，叫咗4樣野，得一樣牛豬串燒中規中舉，但其中一串豬有d“鞋口”；蝦餅唔彈牙，勉強ok可接受，至於好基本既泰式炒金邊粉就唔多掂，個樣ok喎，點知食落口就，得個咸味無甜酸味，以前都會比1/4個青檸，依家連青檸都無；至中伏係個荔芋南瓜煲，我無諗過個食煲仔可以食到D食材各有各......無味，完全feel到無誠到極點，芋頭和南瓜煮咗好少時間，咬落去仲生生地，跟住滾熱個椰汁湯底就咁放落去，所以和食緊烚芋頭、烚南瓜無分別，個煲上枱已知中伏，煲入面係兩大件南瓜和芋頭，自己好辛苦咁分解為多件，但因實在太難食，最後食咗少少就頂唔順無再食，做咗大嘥鬼。兩個食咗$278覺得唔值，食得太唔開心，最後去咗附近買咗珍珠奶茶飲，開心番…查看更多

出乎意料之外咁多款式的齋菜，雖然無我最愛齋滷味，但野食多款到我未試晒已好飽。值得推介係煎藕餅，唔係切片，係粒粒，咬落好軟棉棉，外脆内軟，好味。其次係雲吞，無論係炸定烚，都好食。另外一口蘿蔔糕又係好味之一，四邊微脆又唔乾，不錯。豬腳薑夠味，唔錯。咸菜蘿蔔胡椒湯，個味好似胡椒豬肚湯。飲品有橙汁，但橙汁似細個時，用粉開的橙汁味。因為都多炸物，我選咗飲羅漢果茶清熱氣。飲品和甜品都唔太甜，合我口味。試過幾間齋buffet，暫時呢間最合我口味和最好味。…查看更多

上次食完下午茶，今晚嚟食下夜晚，酸梅粥仍是首選推介，我都係鐘意食呢個粥再嚟。鮮竹齋卷都是另一個推介，係我覺得好食之一，内裡的素菜很多，爽口之餘，味道調得好好味。至於其他野食，西芹炒素帶子辣辣地好野味，素帶子口感很彈牙，有驚喜。仲有個魚柳飽，未見過齋館有魚柳飽，又幾好味喎、青椒炒素羊肉，個羊肉都好入味，口感唔錯。甜品有南瓜西米露，對我嚟講甜咗少少、豆沙鍋餅薄薄地又帶少少甜、桂花糕清而微甜，唔錯、香蕉蛋糕很重蕉味，但我一向對香蕉類麻麻地，我老公就讚仲添食、仲有紅豆糕和馬豆糕，可惜是今晚無咗我食齋必食之愛的酸齋，問職員原來已無供應幾個月啦，有少少失望，除呢樣外，其他都滿意:)…查看更多

環境不錯，座位不迫，很怕擠迫環境食野，5：15pm到，連埋我呢枱，只得兩枱，非常靜又舒服，正，到我7：15pm走，開始d人嚟食。落單用手機apps，環保又可以睇番自己落過咩野食，方便快捷，點食物仲係單隻/個送嚟，唔似其他放題，點d平野點一份就比一大堆，呢到單隻咁點十分好，自己可以就到食幾多點幾多，食物點好全部送齊又快，可能少人啦。食物都唔錯，肥牛無加錢換貴d既牛，但都好味，最值得一讚係自助bar的菜，唔似出面成堆亂草咁，呢到係每棵菜搣好和放得好整齊，比人感覺d菜係洗乾淨先放。因為我唔食生野，魚生真係無法評分啦。整體都好好，個人嚟講會再嚟食:)。…查看更多

原先諗住食lunch，因為見14：30後有折，心想有折後可能少咗野食，點知搭車都遲晒，最後過咗14：30先到。去到店員好有禮貌咁溫馨提示我們現在有折和食物會不斷加添，因今日人手唔夠，可能會遲少少先補到食物。食物種類對我來說已好足夠，味道唔會好咸，好有住家菜feel，我個人來說合我口味，雖然坐位較迫，但以咁平價錢來說，已很好啦。推介酸梅粥，好有驚喜，今日咁熱，個粥微微酸好開胃好好味。店職員話晚餐仲會多甜品，聽完會再搵日試下晚餐。…查看更多

$124, 有燉湯，時菜，兩碟小炒加熱飲，小炒和白飯份量夠，最值得讚係小炒唔太咸，京都排唔太酸，味道剛剛好，紅燒豆腐又夠滑又有濃濃豆味，熱奶茶夠熱又夠滑，下次會再嚟食其他小炒…查看更多

唔食生野既人，呢間真係必食既自助餐，熟食非常多，仲有好多唔同國家既熟食，未食齊已好飽，食唔落。甜品有好多款，細細件可以試多幾款，款款都好味。最抵食係生日免費，兩人價錢一人收費，抵加正。…查看更多

叫了沙沙合桃糊和紫薯雪樂冰芋圓西米露。紫薯雪樂冰很失望，唔多覺有紫薯味，可能比椰漿蓋過紫薯味，芋圓有口感。反而好驚喜係估唔到個沙沙合桃糊咁好味，有很多合桃碎係面，勁有口感，加埋合桃糊，食落勁有合桃味，超正，值得再食。…查看更多

麵底可選紅菜頭麵和菠菜麵，雖然兩隻麵都食不出和普通麵有什麼分別，但都是健康之選。分別叫了鹵水汁湯底和腩汁加小辣湯底，兩者夠味，但我食開淡味，覺得較重味。之於唔食辣既我，小辣已頂唔順，所以唔食得辣千期唔好要辣。飲品叫了自家煲竹蔗水和鮮檸檬汁，兩隻飲品都好好飲，不錯。…查看更多