Sergeant CatPaw的個人專頁

今日係紅日，事前一次都冇去過，九點零行過門口，驟眼望唔覺有明顯寫低營業時間，上咗OpenRice望佢紅日營業時間至1030先行入去；-一開始入到去見到唔少人仲食緊，店員啱啱處理緊埋單，我就喺門口位坐底睇menu，大約睇咗5分鐘-隔離枱本身係啱啱走嘅客，所以枱面未執，有個40幾歲嘅女店員行埋嚟執枱，到佢差不多執完（分幾鐘左右），我正想趁佢未走開就問佢「我想請問係點order㗎？」佢一句好掘咁話「我哋閂咗喇喎。」結束我嘅回合。-我心諗你點解你唔行過嚟第一句就話我知？要我坐喺度做傻仔咁耐呢？同埋係完全零禮貌，唔好意思之類一句都冇…大佬我都做樓面，如果截完單再有人行入嚟，我都會第一時間同合客講聲「唔好意思截咗單」，等對方可以即刻搵其他地方食飯啦⋯⋯-咁我見OpenRice 係寫公眾假期收10:30先入嚟，我就問多句話我見OpenRice咁樣寫，佢答我「我就唔知咩OpenRice寫乜，我哋就不嬲都係9:00就截單嘅！」；語氣起哂弶，態度好掘，周圍啲食客都望住我哋我話咁佢哋應該處理一下OpenRice 上面寫嘅錯誤時間，佢直頭就話呢啲唔關佢哋事所以唔會搞，最後我黑人問號咁離開咗現場-雖然話「阻人收工尤如殺人父母」，但係不知者不罪，點解唔一開始好聲氣少少咁話我知？可能佢果日心情唔好，但都唔好咁樣發落我度吖大佬；成件事係果個女店員態度太過差我先忍唔住要打呢篇評價-希望店主/老闆睇到可以叫佢留意返自己當人仇家嘅態度，我唔係有俾錢嘅客人唔代表我下次唔會返嚟食，但咁嘅體驗我直頭會建議其他人都唔好去。…查看更多

喺附近游完水，近近地想食個定食，見到佢有牛舌所以特登入去試吓～我嗌嘅係午餐嘅七味炒牛舌；前菜同湯都算正常，但冇諗過個牛舌會令我食到咁難過😭首先佢嘅牛舌係切到洋蔥絲咁上，部分幼過洋蔥絲嚟炒，所以食落唔會彈牙，然後我諗佢調味太重手同炒得太耐，結果全部都乾爭爭、鞋十十，唔會係鐘意牛舌嘅人想食嘅牛舌😭辣度以我唔太食辣嚟講係少少辛苦嘅，不過有名你叫當然係辣㗎啦，好合理的，所以預咗問題係佢真係有啲鹹過頭💥，食完等車再搭咗15分鐘車，個喉嚨仲係好「拿」好鹹好「確」，真係搞唔掂🥲另外嗌咗個火灸左口魚邊壽司，口感偏彈牙加少少煙韌（食完唔記得影相sor）條魚應該好肥所以油分好高，不過可能因為比想像中燒灸得短時間，所以魚肉表面油分出咗嚟、閃令令白雪雪，只有兩小點嘅燒灸痕跡，食落好有油分但覺得冇燒過果種香，兩件要$40，有少少失望，不過都有諗過可能係驚燒太耐會影響口感、或者係自己唔熟火灸系搞笑嘅係，我忍唔住埋單果陣同侍應反映返碟牛舌嘅食後感；我話覺得好乾好鞋唔好食，點知佢覆我「冇可能㗎喎！好多人嗌㗎喎～」我真係笑咗出嚟😂…查看更多

$52一個下午茶，呢個份量有啲淒涼…我唔抗拒食背，但冇諗過咁少量味道一般，唯二可取係員工有禮同環境闊落（所以佢嘅價錢原來係食環境？）我食咗其中一舊，不過同呢5塊係差不多大細圖中左二果舊已經係最大啖肉喇（食咗一舊先影相係因為平時冇相機食先嘅習慣；但食完覺得太唔抵，唔抵到要俾嚟OpenRice嘅人知道唔好食呢間嘅下午茶）下半部係骨，所以一啖已經咬哂啲肉呢舊最薄，以為我食緊片皮鴨重點係食完唔覺飽，5成飽都冇可能都係要你嗌返正價先俾個正常飯食（正價燒鴨飯就$72）…查看更多

呢間嘢食完唔Gur嘅程度令我的起心肝寫咗我第一篇食評，要俾大家知道有期望食好少少嘅就唔好嚟☄️☄️- - - - -- - - - - 首先本身訂呢間係見到OpenRice上面啲食評相大大個靚盆擺到靚一靚，各種牛肉擺晒牌仔清晰標明，至少你一睇就知你食緊乜；但上到嚟果陣係一個個黑色吉x家方盒形盆擺唔同嘅肉，但又唔同你講邊樣打邊樣；落單嘅QR code網入面又冇圖，所以你係會食到一頭霧水🙃- - - - -- - - - - 味道方面好多肉都偏鹹，連我朋友食開重口味都開聲話食到喉嚨「確確」地🙊唯一好啲嘅係薄切牛舌、雜菌同小食一口豆腐，但係薄切牛舌係可以細塊過五蚊銀🤏- - - - -- - - - - 抱歉冇圖為證但果刻係慶祝朋友生日我唔想太破壞氣氛挑剔嘢食厚切牛舌要特別講一吓，佢切到好似Lego咁嘅長條形，第一舊食落口係完全咬唔開💥，好在唔大塊所以夾硬成舊吞落肚；到第二塊諗住較剪剪開會易食啲，個較剪竟然剪唔開！！！😱要好用力較好角度先慢慢剪到，但佢剪其他嘢係冇問題🥲- - - - - 一路食果陣左右枱嘅客人都不停有嘢需要店員，感覺唔係佢哋態度有問題，而係服務流程/食物問題🙈…查看更多