Patloyc's Profile

喺網上見到呢間蘭桂坊嘅法國餐廳有任食生蠔，魚子醬，海鮮+5個course嘅套餐，於是就喺KKday買咗套票去試吓。首先要強調生蠔，魚子醬及海鮮並唔係自己去攞嘅，而係你要先落order，等佢上菜，而上菜嘅時間亦比較慢，所以如果你諗住可以食好多生蠔嘅話其實係有困難嘅。生蠔分三種，分別係來自日本，法國及澳洲。每次上六隻，每款兩隻，唔可以選擇指定要某一種生蠔。日本同法國嘅生蠔都算唔錯，體型比較細同薄身，少許爽口同帶少許甜味。但澳洲嘅生蠔就好一般，太大隻同太Creamy，食得兩三個order就已經覺得有啲滯……。魚子醬嘅品質十分之差，體積細小，一啲魚子醬應有嘅鮮味都欠奉，口感亦都欠爽脆。 但係咁嘅價錢有魚子醬俾你食都可以預期到啲魚子醬嘅品質唔會高，不過冇諗過係咁差。至於另外嗰五個course嘅食物，老實講就真係好麻麻啦，唔應該係一間所謂法國菜餐廳嘅出品。整體嚟講質素只屬一般，但價錢（喺蘭桂坊嚟講）亦都屬於合理。如果你係追求高質素嘅食物，呢個唔係一個好嘅選擇，應該俾多兩三佰蚊去五星級留返俾我酒店嘅自助餐會比較更好。 …Read More

喺YouTube睇到關於呢間小店嘅報道，覺得佢嘅蟹肉忌廉湯，手工意粉同意大利飯幾吸引，再加上係一間小店，覺得有需要多多支持，於是專程搵一日去試吓，卻發覺無論係服務質素同埋食物質素都未如理想。首先係大部份餐牌上嘅嘢都係冇嘅，包括蟹肉忌廉湯係冇嘅，意大利飯亦都冇（老闆話因為做啊時間太長😢），就連牛角包都係冇嘅。 如果餐牌上面大部份嘅嘢都係冇(可能因為生意唔好，所以唔想買太多食材），我覺得咁樣做生意嘅態度同諗法就唔會做得太長久啦。 最終只可以齋點意粉- 明太子海鮮意粉，同埋牛肋肉意粉。 呢間小店標榜即製手工意粉，但係個意粉做唔到意粉應有嘅效果。 理論上好嘅意粉應該做到Al-dente, 即係意粉表面有少少腍，core係煙靭，但係佢做出嚟嘅意粉只有硬，而唔係煙韌，應該同佢用嘅材料及recipe有關係，同佢煑意粉嘅時間無關。除咗個意粉本身做得唔係太好之外，明太子海鮮意粉嘅醬做得太過Creamy同太甜，食咗唔夠一半就冇辦法再食落去 。相反地，牛肋骨意粉就做得有點太酸(酸味並非來自蕃茄，因為佢冇用鮮蕃茄，好大機會係來自喼汁）。除此以外，由於只有老闆一個人做晒所有嘢，所以上菜嘅時間十分之慢。再加上佢並唔係跟你落order嘅先後次序嚟出菜（有兩枱俾我們遲入坐嘅客人都比我哋先上菜，但奇怪係佢哋點嘅意粉同我哋點嘅意粉係一樣嘅），所以你真係要有充足嘅時間同耐性先至好去食。整體嚟講食物質素不如理想，而價錢絕對係屬於偏高(加上亦都冇服務可言），性價比係屬於低嘅。…Read More

呢間位於荃灣嘅西餐小店真係唔容易搵到，就算去到舖頭門口都搞唔清楚點樣入去😅。舖頭內嘅座位唔多，坐得頗為逼夾。點咗兩個Eggs Benedict，Cappuccino同Flat white。 兩個咖啡都做得頗有水準 - 咖啡夠熱夠濃，啲奶同咖啡Integrated好好，好balanced。個Eggs Benedict 亦都做得好有水準，特別係個醬汁做得夠濃。唯一覺得可以改善嘅就係個Sourdough麵包係凍嘅，同埋太腍。如果可以先toast咗佢就更加好啦。整體嚟講質素屬於中上，但價錢就十分親民性價比高，絕對係日常西式早餐嘅上上之選。…Read More

已經有一段時間冇幫襯過麥奀記，今日剛剛路過元朗教育路，發現佢開咗一間新舖，咁蹺又係午飯時間，於是同朋友一齊入去光顧。叫咗一個加大嘅雲吞麵，同埋一個牛筋撈麵。佢雲吞麵嘅份量一向都係偏細，所以叫個加大，一般嘅大雲吞麵應該有六粒雲吞，但係佢只係得食五粒。雲吞嘅湯欠缺大地魚同蝦頭嘅濃味，非常之寡，並唔合格。雲吞尚算可以，面的確係彈嘅，但係整體嚟講絕對唔可以叫做出色。牛筋撈麵就十分之差啦，首先佢嘅份量係小到我以為佢係將人哋食淨嘅俾我食。牛筋冇一條係完整嘅，全部都係碎濕濕，而麵亦都少得可憐。隔籬枱嘅顧客見到我碟撈麵都話有冇咁細碟啊！咁樣做生意實在係太離譜，唔怪得知而家咁多香港人都寧願上大陸食嘢，作為一間 “所謂”嘅米芝蓮食肆,收得貴冇人會怪你，但係食物嘅份量同質素咁差，就真係自作孽啦，祝佢好運！不過我就一定唔會再幫襯佢！…Read More

作為莆田嘅常客，喺亞洲多個唔同嘅地方及城市都經常惠顧，一向都有頗正面嘅評價，但係香港機場嘅莆田真係可以用不知所謂嚟到形容。首先問題在於佢同一間快餐店冇分別，但係佢所出品嘅食品比起一般快餐店嘅水準都不如，價錢卻比其它快餐店貴得多。如果作為遊客第一次喺香港機場光顧過莆田，相信佢唔會有興趣再喺任何地方幫襯莆田，因為香港機場嘅莆田嘅食物質素實在太差，比一般機場裏面嘅快餐廳都不如，我覺得佢哋嘅管理層應該認真對待佢哋不容易所建立嘅品牌同定位，並且監管好佢哋嘅食物質素。…Read More

這家咖啡小店所提供嘅飲品嘅質素實屬罕有的高，但佢嘅價錢又實惠到驚人，完全冇諗過喺灣仔區(甚至係喺香港島)可以搵到一間咁高質素但價廉嘅咖啡店。惠顧當日店內只有一名年青的女店員，沖咖啡及收錢都係佢做。佢雖則年青，但冲出嚟嘅咖啡及其拉花都做得極之出色。與佢閒談間感覺到佢對咖啡嘅熱誠，應該對佢沖出嚟嘅咖啡好有要求。咖啡豆本身嘅選擇及炒豆都做得很好，餘韻極長，與奶混合得好balance，奶亦都打得恰到好處，真係好耐冇飲過咁好飲嘅咖啡啦。同區比佢高檔及貴嘅咖啡店都做唔到佢嘅水準。同區唯一嘅對手只有位於金鐘旁邊嘅Coco,但價格高出近三分一，所以這家咖啡小店實屬灣仔區嘅No. 1👍。一定要繼續惠顧支持呢間小店。…Read More

呢間燒味餐廳的外賣價格比附近一般嘅燒味舖貴出一大截，但其食物質素與其高昂的價錢絕對唔成正比。買過幾款唔同的外賣，包括义燒，燒鴨及燒肉，只屬中規中矩。义燒的味道比較單調，只留在外層，且不夠入味；燒肉味道則偏鹹，燒鵝比較其他燒味做得出色，應該算係呢間餐廳嘅招牌菜。其實附近有好多更好的外賣燒咪檔選擇，例如灣仔道的老舖環球燒味，價格實惠之外，每樣食品的味道都做到恰到好處，燒肉更是一絕。而且又好禮貌，實屬外賣首選！…Read More

早前喺YouTube睇過有關於呢間小店嘅短片，對佢嘅食物頗有興趣。剛巧午膳時間經過附近，所以佢試一試。很可惜的是午餐只有拉麵提供，並且只得兩款，真是有點失望。但反正已經坐下，也就試試吧，心想佢專注做拉麵應該會好食。點了兩款拉麵，分別係豬骨濃湯拉麵及櫻花蝦拉麵。 豬骨濃湯拉麵嘅湯做得未夠濃郁，而櫻花拉麵嘅湯則做得非常濃郁可口，但兩個湯都唔太夠熱。溫泉蛋要另外加$12 ，做得還可以。但因為佢用嘅係幼麵，所以好難拿捏到淥麵嘅時間，結果係拉麵偏淋，唔夠煙靭，影響整體效果。希望老闆可以考慮改用較粗層嘅拉麵，應該對整體效果有所改善。老闆非常健談，對客人有耐性，有禮貌。價格可接受，但在該區可能有些偏高。…Read More

經常出差去星馬嘅我，十分之喜歡當地嘅食物，所以見到有一間標榜地道新加坡風味嘅餐廳，再加上好多好Review，決定馬上去試試。結果係一個重雷區，真係唔知道點樣可以再相信Review去搵好嘢食…….Order咗芽籠蝦麵，蔥餅配咖喱汁及新加坡白胡椒肉骨茶配米飯。蔥餅多油而且黏，一啲都唔鬆，而且咖喱亦一D都做唔到星加坡嘅味道，相差好遠。蝦麵嘅湯底有欠蝦嘅鮮甜味及蝦頭嘅濃味，亦欠椰奶味。所用嘅蝦好明顯係雪藏蝦，既硬亦欠蝦味。豬腩片則有好重嘅油膱味，整體嚟講係非常之差。至於個所謂嘅肉骨茶，就真係同肉骨茶完全扯唔上關係。第一眼見到個好淺色嘅湯就知道唔對路，肉骨茶不但一D都唔熱，而且完全冇應有嘅味道。茶味唔夠濃郁，而且完全冇藥材味，只有胡椒味。肉排乾而且韌，豬腩肉片同樣有油膱味，極之失望。整體嚟講冇一樣食物係可取嘅。雖然呢間食肆所收嘅價錢相宜，但並不代表客人應接受完全冇星加坡食品應有嘅味道嘅食物！…Read More

以往住在附近的時候經常惠顧這間食市晚飯，但已是多年前了。最近再次惠顅是有點失望的飲食體驗。前菜叫了烤芙及鷄絲粉皮，是兩道以前經常吃的前菜。價格約六七十元，與各款湯麵主食的價格相約，但份量卻少得很，與其價格不成正比。味道方面也大不如前。烤芙只有甜味，口感過硬。鷄絲粉皮的粉皮則做得太淋，欠口感。小籠包，此食店的主打，仍然是皮薄多汁，但肉餡有欠鮮味，稍為失色。麵食方面，依然做得出色。湯夠熱，麵做得好煙靭。擔擔面仍然係此店一絕，醬味十分濃郁可口。整體嚟講食物質素不如前，性價比底，特別係前菜，是令人失望的。服務員十分有善及殷勤，值得一讚。希望稍後食物質素會有所改善⋯⋯…Read More

呢間係以往我經常嚟食嘅日本餐廳，無論係午餐或晚餐都屬於高水準嘅日本菜，特別係魚生，好新鮮，價錢稍高，但與品質成正比。上一次惠顧已經係2022年年頭，近期回港再惠顧，可惜食物質素下降咗好多，特別係魚生，份量不單止變細，最大問題係好明顯食唔出新鮮嘅味道，食材明顯較以前質素下降很多，大部份嘅魚生都食唔出應有嘅味道。就算係熱食嘅烏冬，湯唔夠熱，而烏冬亦都煮得太腍。以佢收嘅價錢嚟講，食物質素唔應該咁差，完全唔成正比。已經再唔係一間高質素嘅日本食肆，真可惜，可能會再幫襯佢啦⋯⋯…Read More

呢間位於灣仔譚臣道嘅老牌餐廳，在近年轉手後食物及飲品質素皆有所提升。近月多次於周日及周末午膳時間惠顧，對於佢嘅食物質素感到十分滿意。午餐嘅選擇頗多，價錢相比茶餐廳不算便宜，仲有加壹服務費，但食物質素明顯好得多。午餐一般包括餐湯，可選羅宋湯或忌廉湯。我每次都選擇佢嘅羅宋湯，因為味道非常濃郁，明顯係好足料，有當年嘅新寧餐廳羅宋湯嘅感覺。餐包方面可選擇甜餐包，多士或蒜蓉包。我十分喜歡佢嘅蒜蓉包，係即叫即焗，新鮮熱辣，蒜蓉味十足，而且係用法包，有兩片。至於主菜選擇就更多，所用嘅材料比一般嘅茶餐廳高質素多。佢嘅吉列黑豚肉十分嫩滑，一啲都唔乾或韌。焗牛脷飯嘅牛脷係厚切，而且份量足夠。牛柳粒或牛肉都唔會好似一般餐廳咁醃得太過份，仍然保留有牛肉嘅味道。咖喱牛腩炆得非常之到位，但個咖喱做得太過鹹，希望會有所改善。燒雞做得非常之嫩滑而且唔乾，十分美味。至於餐飲方便，絕對值得一讚嘅係佢嘅咖啡，特別係凍咖啡，可以飲得出佢用嘅咖啡豆並非平價貨，而佢所用嘅奶亦都非常濃郁有味道，唔係一般嘅平價奶，絕對有八成UCC coffee嘅感覺。至於服務方面，如果唔係繁忙時間，其實服務絕對可以。但如果係周日中午繁忙時段就屬於一般，特別係一位主管級嘅女人，面口就真係一般啦⋯⋯整體嚟講呢間餐廳絕對係值得幫襯，雖然價錢稍為貴，但食物質素係比起好多同區所謂嘅西餐好得多。絕對係性價比高，值得幫襯！…Read More

呢間打着特色西餐嘅樓上舖，食物嘅質素好比一般嘅港式茶餐廳。午餐時段環境極之嘈雜，由於樓底低，噪音之大，好比在一間大酒樓內食午餐嘅感覺。枱與枱之間十分逼夾，本人的餐枱與牆之間嘅距離不足兩尺，侍應在旁邊不停走動送餐，全程直接影響客人嘅飲食體驗。講到食物質素，絕對與正式嘅西餐有天淵之別。賣相看似西餐，但實質與港式西餐分別不大，但價格相比之下卻十分昂貴。首先餐湯係西蘭花忌廉湯，但個湯一啲都唔熱，亦唔夠濃。餐包乾如柴皮而無味。主菜係炆豬肉配炒飯，炒飯尚可以，但豬肉好似係煲湯肉一樣, 乾而且韌，絕對唔似係炆出嚟嘅，而且食得出舊肉本身係好鹹，絕對唔似係炆嘅過程入到嘅味道。另一道主菜係四川風味海鮮意大利飯，結果同炆豬肉一樣，都係十分之鹹，鹹到難以入口。理論上兩道主菜嘅Sauce應該係唔同嘅，但好明顯食得出兩道主菜都係用同一個sauce，只係個意大利飯加咗啲辣椒落去，所以可以睇得出呢間所謂嘅西餐廳一啲都唔專業。最後order咗凍咖啡，但係好不幸，要吹咗三次，最終要20分鐘先上，過程中侍應態度欠佳，而咖啡亦欠水準。總結，呢間係打着特式西餐旗號嘅劣質西餐廳，絕對唔值得幫襯。…Read More

星期日落雨濕濕，唔想買餸煮晚飯，忽然間好想食越南嘢，睇咗Review之後決定去試試呢間越南餐廳。晚上7:20，餐廳只有一兩台客，非常冷清。睇過餐牌，每人點咗一份$98既晚市套餐。套餐包括自選沙律，自選前菜及自選主食（各類湯河，炒河或飯），另加熱飲。自選前菜及自選主食有極多選擇。其中前菜嘅香茅豬扒十分美味，但肉鬆蝦片唔夠脆，應該係用現成蝦片做，並非即炸。生熟牛肉湯河份量頗大，湯唔算太濃郁，但味道算唔錯。牛肉嘅份量亦唔少，肉質可接受，實屬超值！香濃奶茶稍為苦澀，有待改善。服務員態度殷勤有禮，絕對值得再幫襯。下次要試吓佢啲炒飯。…Read More

住咗喺灣仔十幾年，差不多每日都經過春園街，但從來都冇諗過要去呢間舖頭食嘢。近期見好多人喺呢間舖頭未開門就開始排隊，令我覺得自己係咪走咗寶呢？聽人講呢度有兩個招牌菜，一個係乾炒牛河，另一個係咖喱豬扒飯，於是就同朋友去試，叫咗呢兩個所謂嘅招牌菜，結果係失望嘅。首先，中午食飯時間上菜上得非常非常之慢。乾炒牛河十分多油，上色唔錯，但可以用唔夠味去形容。河粉炒唔開。牛肉係算多同大片嘅，但味道過咸，整體絕對唔屬於好食。咖喱豬扒飯嘅份量非常之大，豬扒厚度適中，炸得好Juicy，屬於做得好。咖喱並非馬來亞咖喱或傳統港式咖喱，味道唔錯但並非我口味。其實最大問題係份量過大，眼見絕大部份客人都冇辦法食得完。其實一個咖喱飯要$98屬於唔平，點解唔將份量改細啲收平啲呢？再加上呢間舖頭嘅每人最低消費係$80，冇可能兩個人叫一碟咖喱飯食。我覺得呢間舖頭做生意嘅理念有問題…..冇諗過再幫襯佢。…Read More