jr913的個人專頁

呢間野想試好耐, 今日終於比我試到!我地大約夜晚8點鐘黎到北角, 店鋪位置都幾隱蔽. 去到見到門口有幾檯食客, 以為FULL哂.. 好彩店內都有一張空檯店內面積不大, 只有大約8張二人檯.原來除左招牌麵之外, 都有好多食物選擇, 分別有串燒, 小食, 甜點. 我地首先叫左牛肉湯扁麵, 羊肉湯扁麵, 孜然雞腎, 孜然烤肉同一罐可樂.原來都幾大碗每碗麵上面都加上大量芫茜湯好濃, 好香, 仲有3-4舊蘿蔔, 但稍嫌蘿蔔唔夠稔.而牛肉就非常足料! 我無數過有幾多片, 我諗都有成6-7片.食落唔韌, 咁足料仲係邊度搵? 而羊肉湯扁麵,雖然羊肉份量無牛肉咁多.但係食落就有羶香, 都唔錯孜然雞腎同孜然烤肉, 兩者都係用孜然粉燒好味. 好香, 唔韌. 但點解辣度差咁遠? 如果雞腎辣度係1粒星既話, 烤肉就有3.5粒星!男友係食唔到辣既人, 食左其中1舊肉就放棄然後比我食, 仲飲左好多啖可樂.奉勸食唔到辣既人就唔好食烤肉喇.食到一半就想叫個蜜燒菠蘿做甜品.侍應姐姐都好好人, 同我地講要等大約半個鐘.好多汁, 好甜, 我唔太鐘意食菠蘿都覺得好好味但係唔似用蜜汁燒既? 定係個名淨係形容個菠蘿好甜呢? 埋單$112, 我覺得好抵食, 會再黎多次! 下次會試埋撈麵+雞排…查看更多

首先一入到去, 間餐廳唔算大, 擺到7-9張檯, 都幾逼夾, 好易就可以聽到隔離檯既傾計內容.左邊就差唔多坐滿人, 但係右邊既幾張檯係有2-3張係無人坐既.有個男人就問我地幾位, 仲問我地有無coupon. 答左之後就叫我地坐係左邊, 跟住有d 奇怪點解右邊無咩人坐, 但係都有人要搭檯..之後我地決定叫左正宗叻沙, 海南雞叻沙, 同一杯青檸梳打然後揮手示意, 疑似老闆娘就隔住張檯好大聲問我地食咩, 而我地都要叫大聲d隔住張檯去應返佢. 個張檯仲要坐左人..叫叫下佢仲去左做第2樣野...感覺個服務已經麻麻地..先講下d野食, 當中最鐘意正宗叻沙入面既獅蛤, 好鮮甜湯底我覺得幾好味, 椰汁味幾濃, 但係有點辣.正唔正宗我就唔知喇...而一向食唔到辣男友係食海南雞叻沙..佢辣到頂唔順. 一路食一路流鼻水.我諗幾隻叻沙既湯底都係一樣既.男友有嘗試過叫少辣. 但係唔成功.期間另一個服務員同廚房定吧檯既人好大聲咁閒話家常, 嘻嘻哈哈全間鋪都一定聽到佢地講咩. 勁嘈. 呢一刻我更加覺得好似去左大排檔咁之後有客人入黎, 坐係我隔離幾張檯, 近門口位.同疑似老闆娘叫左某款叻沙. 但係老闆娘就講"隻麵無哂喇, 同你轉另一隻麵啦"呢句說話都無咩問題..個客都好似ok無所謂跟住佢返入廚房, 個廚師應該係同老闆娘講"隻麵無哂喇喎"點解我會知?  因為我聽到廚房入邊既老闆娘話"轉另一隻囉, 唔係點呀? 賣哂都無計架"態度係幾悔氣, 我唔知佢係咪鬧廚師啦, 但可唔可以唔好比客聽到如果我係果個客..聽到會唔好意思, 好似阻住人做生意咁走左之後, 不嬲唔太在意服務態度既男友都同我講 呢間野d服務好唔得咁我就覺得野食係ok既,如果你地接受到極有中氣既老闆娘, 大排檔式既嘈雜環境同服務, 你地可以黎呢度一試(分分鐘大排檔d服務仲好過佢地!)…查看更多

比食評中既「冰燒三層肉」所吸引, 就同男友黎左呢度食 可能係閒日, 拎左飛之後無幾耐, 企門口果位侍應小姐就叫我地入去...點知...一入到門口係無人帶我地去個位度囉  由門口去到我地個張檯, 其實只係行廿幾三十步就到....但係我都要分別問2次唔同既人..我個張檯係邊...仲要我問佢地個陣都無意慾帶我去..基本既服務都無..  咁講下我地叫左咩先, 分別有「冰燒三層肉」, 「蠔油北菇扒津白」同埋「荷香污糟雞」.冰燒三層肉好好食, 皮脆肉嫩唔死咸, 無令我失望   不過78蚊得9塊有D貴...蠔油北菇扒津白係最失望既一碟..D汁好稀好似水咁, 津白掛唔到D汁所以好淡...好似分別食緊蠔油北菇同烚津白 荷香污糟雞一般, 雞好滑, 但只係得少少荷葉味.食飯期間, 侍應都2次主動加茶, 服務方面算係加返少少分.但係好難接受到無帶位咁基本既服務 野食方面, 可能我地叫錯野食..? 得冰燒三層肉係值得推介.同埋真係唔太抵食, 份量偏少, 係銅鑼灣區搵差唔多價錢既上海菜...仲有其他選擇 …查看更多

又係時候食晚餐, 但係唔知食咩好...就同男友係附近搵下有咩岩食. 睇過幾間餐廳掛係門口既餐牌都睇唔岩..直到行到呢間餐廳, 個女侍應好主動推介餐牌上面既野. 我地就決定入去喇.入到去, 幾黑, 侍應比左4人位我地坐, 所以都唔逼 一坐低就研究下食咩, 餐牌上都幾多選擇, 我地又有選擇困難症所以諗左好耐可能耐過頭, 分別有2位待應走過黎問我地食咩. 雖然我地都係講:"睇睇先", 但係佢地都無黑面, 仲要2個都講左句"sorry" 之後行開左比我地繼續諗最後我地揀左酥皮鵝肝牛柳跟薯菜 同埋 芝士汁龍蝦天使麵. 因為2個都係餐, 所以會有湯, 蒜蓉包, 野飲, 仲可以係4款野食入面揀2款, 我地就揀左tiramisu同奶凍.湯係田螺湯, 但係入面d料切得太細碎, 食唔出咩味, 我覺得同平時忌廉湯既味一樣.蒜蓉包我食唔出有蒜蓉味, 反而食到燶味... 酥皮鵝肝牛柳跟薯菜同門口餐牌張相完全唔同, 相入面既係酥皮包住牛柳, 但係出到黎既賣相係一塊圓形既酥皮, 鵝肝, 牛柳同薯菜分別4樣野擺係碟上面, 就好似m記早晨全餐咁 唯一要讚既係牛柳好腍!芝士汁龍蝦天使麵食落係有芝士味, 但係成個麵好乾, 好似麵餅咁, 乾到麵條上面一滴汁都無. 男友就同男侍應講希望要多碗汁黎撈. 本來我地都無咩期望, 以為佢地求其比碗白汁就算. 因為個麵整到咁乾, d芝士汁一定好貴又或者整法好麻煩架喇, 點會肯比多d我地丫.....等左一陣都未見碗汁, 以為佢地唔記得左, 正當我地又想再一次提佢地個陣, 碗汁就黎喇, 仲要熱辣辣出煙架, 同埋真係芝士汁黎添.. 我諗係因為特登整比我地所以需要少少時間 個汁有煙肉味, 撈落麵度即刻唔同哂, 好食好多! 希望佢地當初係整錯份量先整到咁乾啦..至於tiramisu同奶凍...不過不失啦. 我會覺得奶凍既奶味唔夠重, 所以我鐘意tiramisu多dd至於野飲方面, 有幾款台式飲品比你揀. 其實我覺得有少少九唔搭八 我地揀左珍珠奶茶同埋熱茉香珍珠奶茶, 味道一般, 無咩特別.埋單個陣, 女侍應/老闆娘都好nice問我地甜品黎左未 感覺好好總結係服務態度方面10分滿分!! 至於野食方面, 雖然係抵食, 80蚊就有龍蝦/鵝肝, 但係就唔好抱住好大期望喇. 係旺角唔知食咩好, 耐唔耐食一次都可以接受既..…查看更多