金莎藍罐嘉頓餅的個人專頁

疫情前已經開始食呢間，當年感覺雖然略為有啲貴，但味道同質素都幾好，算係我目心中喺女人街入面頭幾位好食嘅餐廳之一，但今日再去食，已經完全理解唔到個出品質素點解會差咗咁多，今日食完認真唔會再返轉頭。今日叫咗一份年糕+一個套餐+一份薯條小食，年糕非常咸，直頭有味道衝擊，食完個醬汁黏住喉嚨好唔舒服；套餐方面，醃菜都係一如以往味道無乜問題，但個餐湯話就話係栗米蘿蔔湯，但一睇個樣就知係罐頭栗米羹，仲要只係暖暖地唔熱；套餐主菜石鍋飯，飯嘅狀態好漿，除咗得韓式辣醬嘅味道之外，食唔到任何味道；小食嘅芝士焗薯條更令人失望，只係一灘芝士喺一堆唔脆嘅薯條上面，無任何香味，只有好咸嘅咸味。另外就係入座時明明都無乜人，但係都要搭枱咁座，我明白空間有限，但根本有咁多空位嘅時候點解仲要咁樣安排？咁嘅體驗埋單接近$220，呢餐飯非常失望！…查看更多

第一次幫襯，有驚喜感覺！今日放lunch，同班同事喺元朗搵嘢食，見到呢間日本嘢門面幾靚就俾佢吸引咗，主食就正常品質，出餐速度都好快，雖然主食份量唔算好大份，但係佢個自助沙律吧就滿足晒我哋，平時其他餐廳叫一份沙律都要廿幾卅蚊，呢到係只要點午市套餐就可以任食，配料同款式都算多，連沙律醬汁都可以揀調味醋或者芝麻醬，連個味噌湯都係任飲，呢個價格嚟講算係相當驚喜！同埋最緊要係啲食品夠新鮮，有機會一定會再幫襯！…查看更多

第一次幫襯，首先真係好後悔冇影多幾張相，特別係個餃子⋯⋯見呢間舖屹立左喺呢度都有返咁上下日子，但真係冇諗過會出啲咁嘅品質，首先係上海排骨麵，湯底正常普通唔太鹹，麵條都算幾好食，但係塊豬扒乾到好似翻炸過好多次咁，如果就咁食塊豬扒，你完全唔會聯想到係上海排骨。之後先係重點 - 煎餃，我唔知大家心目中對煎餃嘅定義係乜嘢，但如果一份個餃皮仲靭仲冧過蒸餃，咬落口好似香口膠咁，仲要完全感受到喺微波爐叮出嚟嘅，大家又唔知會唔會接受，總之好失望，一定冇下次。😰…查看更多

睇其他人寫到好好食，門口同餐牌食物相又精美，雖然係屋邨商場但都有少許期待，食物上到嚟外觀都係精美，但味道、份量同品質落差太大，如果想打卡影相係唔錯，想食味道同質素就可能要三思一下。…查看更多