sttommy的個人專頁

記得以前細個去茶餐廳，家長最常點蛋治比我食，食埋食埋，咁大個人食咗無一千都有八百件蛋治，蛋治點先好食，絶對稱得上係專家！行經天后食街，發現一間新開冰室，叫得冰室，份蛋一定要得，食完飯無耐，就叫蛋治。蛋治好快就到，打開麵包睇睇份蛋，蛋色水好好，用蛋的級數應該不馬夫，，炒得大份兼微濕，目測過關。再入口食，包軟蛋香，蛋的厚度理想，有牛油及奶味，加埋蛋香濃烈，一份久違的靚蛋治，再度重逢。飲品點蓮子冰，用玻璃冰杯上，有誠意，甜度洽當，蓮子鬆化，無蓮芯，懷舊到極點。另一欣賞此店之處，係懷舊壁畫，好多童年偶像都見到，例如陳百強、張國榮、中森明菜等，呢間我會常來!…查看更多

上星期睇完AMXXX免費報紙的食評專欄，推界呢間餐廳仔的雞脾，比5粒星，撼贏我喜愛的紅磡時新？呢間無乜食評，今日即管去試試佢個雞脾。一入到去，與一般茶仔差唔多，格局當然贏時新，而又幾爆場，正如食評說，伙食話要等，好.......等啦！點左個雞脾紅豆冰Set，等足20分鐘，雞脾送上，隻比色水好理想，夠熱夠脆，咬落去塊皮脆到Short Short聲，咸味適中，肉夠入味，好滑唔講得，但係有肉汁流出，以同類雞脾來計，絕對好掂！結果，未食完要叫多隻，費時等咁耐！呢隻雞脾咁好味，無乜人推薦係時運未至，今日等我幫佢一把！:) …查看更多

有時餐廳的環境配合，會今食客加分，星期日送完個仔去童軍後，都好喜歡去潮民嘆個早餐，秋涼天氣，將車停在門口，坐在舖外用餐，要走鬼抄牌都無問題！我係牛王，無牛不歡，通常會點鑊仔牛扒炒蛋，用料好OK，牛肉味濃，厚度稱心，烹調火路恰到好處，掂！老婆就點番茄湯安格斯牛肉通粉，番茄湯香濃得來有香草味，唔似勝香園咁寡，又有橄欖油香，唔係一般茶仔水準，所以我每個Sunday Morning都係呢度搞掂！:)…查看更多

行經禮頓，見到這間新開別緻小店，個仔話要食，咁就一家四口入左去，先叫Waffle Stick 配Cream加芒果茶，個仔話咁快就食晒，我係咁咦食左一啖，就覺得好有癮咁叫多隻熱狗，佢條腸好味得來與別不同，真係識入貨！試問0靚仔又點少得薯條呢，我鐘意薯條係香脆熱辣得來有肉，呢度D合晒心水！最後唔少得的甜品，原味Froyo在朱古力Cone上，呢樣加D果樣加D，香甜脆，好滿足！又多個大細都0岩的好去處!…查看更多

雙拼河粉加凍檸茶少甜收$27，灣仔譚臣道不銹鋼招牌食鹵水腩0個間食相同的要$50，仲要送一件美味魚皮，真係識做，貪小便宜係Human Nature！味道係極高分，腩部位靚又夠林，湯又夠香，河粉溫度掌握到家，夫復何求？！:)…查看更多

呢檔0野患上了好生意老店的毛病，就係好招積，問你有乜推界？話明係特登來食，你就話個餐牌有乜就點乜，客人始終係衣食父母，呢D態度真係大逆不道！講番食物品質，呢D咁既鼓油牛腩，依家好少有賣，點解少左？因為唔夠清湯腩同柱侯腩咁好味lor.....牛丸係合格多少少.......紅磡觀音廟0個間就值得讚！D魚皮睇見以為好正，懶係與別不同，食落硬夾無味！咁又唔係一無是處0既，河粉的溫度同軟靭度控制得係有水準，但係呢個唔係賣點，呢個係起碼水準！食品水準一般，但係又要學人招積，相信佢D客都係自細食慣左。奉勸各位準備慕名拜訪的就免啦，免得山長水遠去0徒左D Quota!…查看更多