kwfong73的個人專頁

帶貓睇醫生，要等，唯有坐低食個T。求其嗌兩個無生命既下午茶餐，乾炒肉片河，雖肉片少少韌，但即炒，幾有鑊氣，唔係炒定，無生命咁。雞翼餐，即炸，雖要啲時間等，但生炸得好脆。今時今日咁嘅服務態度，真係算好有心，好耐都無食啲即整嘅下午茶餐，抵讚。…查看更多

老闆是如何，店舖就是如何。從前喜歡嚟呢間潮州鋪，因為食到傳統潮州味道，前老闆是個瘦瘦的潮洲老人家，食物亦得地道唔花巧，但好味。近兩年，轉手另一個老細（其實是個常落嚟打躉嘅女人，一頭五色六色拖住隻松鼠狗，非常粗魯）轉手後再去，開始有異樣，變成一班裝修師傅玩大話骰嘅地方，與此同時，老闆會set喇叭再搵啲有鄉音嘅中年阿閃唱老歌，開心不移（佢哋），到今日再去，發現好不對路，居然食飯地方set咗簡陋咪與喇叭….重有五顏六色嘅隔音棉…幾枱裝修師傅震耳欲聾地玩大話骰⋯⋯好似去咗廟街同啲阿叔唱老歌咁…如果好好地食嘢，我諗大家都唔好嚟喇….…查看更多

午市經跑馬地，路過見餐廳人不多，地方算闊落，又唔駛等位就入去試吓，坐低嗌個set，紮肉生牛河，有小食，有杯嘢飲。等咗廿分鐘（本身四枱人每枱得一至兩個人，兩枱都食緊），期間無嚟小食、無嚟飲品。服務員行過嚟：你係咪嗌咗喇沙？我話唔係吖…佢話：吖～我都唔知點解個電腦問番我？（問番你？？？）跟住我又再講一次我原本嗌乜嘢，又等咗兩三個字，佢嚟咗碗錯嘅嘢…跟住佢又問我嗌咗乜嘢…我講完，佢話去厨房切番啲生牛肉俾我，攞到出嚟，係大概三支筷子咁闊，三份一筷子咁長嘅三大塊生牛肉…..牛河湯又淡如無味…誠惠$128（未加一）聽聞晚市火鍋唔錯，但不了。…查看更多

其實百幾蚊食all day breakfast 有更好嘅選擇…牛扒上枱係凍嘅又乾、茄汁豆凍上、凍black coffee又溶晒冰好淡咁上枱，同佢講要太陽蛋，佢無語氣地答：無喎！我哋袛做炒蛋！炒蛋上枱又係唔creamy，好似屋企事但炒咁…無服務，企咗喺度等十分鐘明明有空枱都無人俾你坐，叫完嘢又等廿幾分鐘，明明又唔多人，無俾水（我唯有自己攞），嘢食嚟咗，無人俾刀义你（唯有自己攞），無人俾茄汁你（唯有自己攞），咁不如自己番屋企整算啦好無？太子區食過日式同西式嘢，真係大部份都係港式做法，我建議喺太子食中式嘢最安全。…查看更多

特登訂坐想食吓太子啲日本餐廳有無好轉點咗三樣嘢，實在非常難得，超級差，連服務與厠所清潔度都一樣咁嘅水準…1) 炸餃子—-炸完出嚟皮又厚又硬，𥚃面舊豬肉重乾掙掙…2)串燒雞翼—-明明擺正旗號賣串燒，出到嚟串雞翼唔係燒…食落去重應該係餣過，因為𥚃頭啲肉係咸…3)豬骨濃湯豬軟骨拉麵(一人前)—-平心而論，豬軟骨兩舊算ok，但真係接受唔到個好濃嘅味精湯底同個好冧嘅味千拉麵，重要$98⋯⋯4)服務質素與衛生問題—-由頭至尾，唔好話要杯日本茶，連水都無杯俾過我，喺張枱見到有隻蚊之，後來終於知道喺邊嚟….一打開個厠所(男厠係一人坐厠)，有成五四隻蚊喺度周圍飛，真係唔敢入去…呢間所謂日本餐廳…係我食過咁多間之中最差嘅一間。…查看更多

本人喺木戶都幫襯過好幾次，佢地食材都講究，所以燒出嚟既雞串燒非常好味，後來同男經理混熟咗。每次幫襯完都好滿意食物與服務質素，直至2021 二月廿四日果晚...當晚都算八成滿座，點好咗食物，由於人多關係，食物出餐當然比平常耐好多，但都無所謂，可以飲酒慢慢等，一到所叫既串燒嚟到，放入口，我同朋友三人都打個突，點解叫既兩串雞心頂、兩串雞心、兩串雞肝，全部都係凍既！？唔係暖，係凍！串燒好味之處其一係要熱辣辣，有乜理由可以俾出黎既串燒係凍！？就算平價串燒店都唔會犯咁低級嘅錯誤啦！同女經理講(熟嘅男經理全晚唔喺度)：點解啲串燒係凍？？可以換過俾我嘛？（一間算係中高級既串燒店，我相信佢唔會去叮過黎俾我）但我意想不到係，嚇咗我地在場三人一跳，經理攞出嚟既係一大碟番燒燒到燶晒既雞心頂、雞心、雞肝，係每一舊都燒到燶既，黑萌萌全部都係燶晒！我係完全無法想像會喺一間咁有質素既串燒店發生咁既事！我同女經理講：你有無搞錯？？你真係覺得呢碟嘢可以俾人食！？佢好似果啲cheap cheap餐廳既經理過唔到骨，死死地氣笑笑口講：咁換過佢啦。我以為荒謬事情應該告一段落，過大概數分鐘後，waitress過嚟話：頭先你地話啲野燶晒，換過俾你，不過依家無晒雞心頂喇！跟住我女友真係好嬲：唔係我話，係事實，你地咁專業，唔係燒出黎啲食物黑萌萌，都分唔到吖嘛？？事實上，一間咁專業既日式串燒店，番熱番食物都唔緊要（雖然知一定會乾咗，但算啦，始終係間好既串燒店，又有啲感情）但都無理由搞出一堆炭出嚟嘛！1）厨師燒到每舊黑萌萌似炭非炭既食物，可以接受，交俾經理，係無要求既大錯。2）經理見到成碟燶晒既串燒，都可以接受俾客人，係對自己本店既質素同形象放棄既大錯。3）當客戶因為對食物不滿，而waitress再用輕佻態度對客人又係一大錯。唯一遺憾既係由於大嬲大愕然，無影低個堆燶晒似炭既串燒俾大家睇，我相信大家見到都會嘩一聲。…查看更多

午市單點咗咖喱雞飯，本人從來未食過一個咖喱雞飯係咁差！一嚟到煲咖喱雞都心知不妙。食落口，啲雞係微暖差唔多係凍，雞肉顏色係深啡色，肉質食落去好似湯渣一樣，好明顯係番煲番煲再番煲嘅肉，飯都係腍到無咬口，服務態度又差，一般茶餐廳都未見過咁差！…查看更多

第一次光顧，眼見雲吞麵個樣唔錯就試試一碗大size(後悔..)，叫來的雲吞麵外表買相唔差，大大粒雲吞上面放上蝦子（雖然唔係傳統既size)麵相也正常。一起手飲啖湯，真係呆咗，無乜味好似水咁，雲吞鮮蝦又無味，𥚃面豬肉又無乜味...麵口感可以但都係無乜麵味。老實講$48碗咁既價錢，我寧願行多六七分鐘去食麥乜記...FIN…查看更多

假日中午經過，純粹肚餓想食碟燒鵝飯，叫咗碟兩拼燒味$62蚊，雖然比其他燒味店（除大家樂）貴少少，但心諗陳記貴啲都無乜所謂啦，但一嚟到啲燒鵝無肉得啲骨同皮（我女友果碗都係..)，飯又係溫...我女友叫左碗燒鵝义燒瀨，食咗兩啖話：其實大家樂好味啲...今餐午餐誠惠$$124.........完。…查看更多

佐敦嘅串燒大部份都去過，其實唔覺邊間特別好味間間都係咁上下。不過由兩三年前差不多每個禮拜都幫襯呢問串串居到依家。原因有4個1) 非常平，三個人去食，每每坐左五粒鐘落樓都袛係每人百幾蚊，食物質素算唔錯（性價比高）。2)  非常親民，從不趕與騷擾顧客，我可以平平靜靜同朋友傾到兩點都無問題，有時重會一齊吹水飲酒添。 3)  非常體貼，知道我地鐘意飲大酒，開瓶費袛收五十大元，每次都帶平平支威士忌直至飲完，十分盡慶。4)  非常方便(煙民)，街鋪有時可以坐出面食煙十分自在，就算坐室內都係兩步之遙，方便方便。好可惜店主同我講做埋呢個月會結業，突然覺得無左啲街坊場可以輕輕鬆鬆，好少唔捨得一個地方，唯有係凈餘日子多多去幫襯幫襯，希望江湖再見...順道一問，有無好嘅地方介紹呢…查看更多

事原噚晚同幾位朋友去呢度食任食火鍋，真心講我食唔晒啲野係唔啱（凈左兩三碟野），經理早喺大半個鐘前已喺度鬧，我哋都盡量食同道歉，朋友話不如計番錢啦⋯⋯但好明顯飲醉酒嘅經理咬住唔放開，朋友袛係一句話：咁你想點？（我地真係無講一粒字粗口）佢開始不斷粗口問候老母，失去理性嘅經理被同事拉住，跟住醉酒經理話：你唔好走！又繼續一輪粗口（再喺度襟電話示意想call人打我哋...），其他員工襟lift叫我哋快啲走，事情就係咁。我唔覺得香港服務業係咁差，真心講浪費食物係我哋錯，但點解要去到咁嘅地步？點解經理又可以飲酒醉？我真係好唔明？但我以後唔敢再嚟喇....…查看更多