天平貓貓的個人專頁

講咗咁耐，第一次幫襯，兩個人，叫咗個常餐、炒蛋多士、凍唂咕，炒蛋多士ok，但亦未至於好食到會掛住。通粉已經淋哂，味精湯，好難食，凍奶茶不過不失，凍唂咕好濃味，但啲粉未溶哂。最大問題係啲職員態度超差！講嘢黑口黑面又串，送食物嚟近附掉落枱！又坐得迫，仲要趕住食，趕客咁，食咗10分鐘就要走，唔走佢哋又眼望望，咁樣做生意，幾好食幾抵食都唔值囉！更何況我又唔覺真係好食到會上癮！又平又好食過佢嘅食肆大把！冇興趣再幫襯！！…查看更多

朋友生日, 有人揀咗嚟呢度食, 事前完全唔知食乜, 只係諗住當試新嘢,八個人食飯, 打開餐牌先知大鑊, 原來啲嘢都幾貴,而且冇idea新彊菜有咩好食, 唯有叫個六人餐再加幾個餸同飲品啦~我哋唔同既肉都叫一碟試吓, 有牛有豬有雞有羊有魚肉,有啲份量幾大, 但有啲份量就小食得好緊要, 同埋可能新彊菜唔係我杯茶, 對大部份菜色都麻麻, 因為大部份菜都比較乾身, 冇乜汁, 啲肉都係鞋啲, 醬料又唔多夠濃, 食咗咁多個菜, 係個蟹肉菜苗同碟唔知咩煮魚條(第11幅相)幾好味。呢度特別之處係會有幾個dancer喺度不停跳肚皮舞,如果生日嗰個人仲會走埋嚟喺佢面前跳一陣, 但真係一陣就跳完, 同埋可能我唔係咁鍾意喺太嘈既環境食嘢,所以感覺呢度實在過份地嘈, 嘈到有少少傾唔到計,成個環境又太黑, 根本睇唔到啲食物咩樣咩顏色......同埋有一半食物都好似唔多熱咁, 可能係我自己鍾意啲食物熱辣辣咁食先夠香啦~仲有加咗每人$10同我哋及dancer影張大合焄,點知幫我哋影相既職員好冇水準, 畀啲燈色遮咗我哋其中一個朋友成個人都可以照影,同埋影出嚟都係得一張4R, 咁樣$80影張相真係唔多值...同埋啲飲品又係幾貴, 普通一杯果汁梳打之類都要至少$50, 雖然食得飽, 但整埋食物味道真係普通...…查看更多

約咗班朋友夜晚喺K11食飯, 不過又未夠鐘又未齊人, 但又勁肚餓, 三個人忍唔住要入嚟食少少嘢先!最簡單就係食隻炸雞脾,老實真係完全冇期望,點知隻炸脾上枱就好驚喜,個皮炸得勁靚, 唔食雞皮既我都忍唔住食咗少少,又幾大件幾多肉, 啲肉亦唔似雪得太耐嗰隻,加埋杯熱杏霜 $31, 真係OK喎~ 份熱狗朋友食, 佢話都幾好, 呢個價錢($13)真係算抵食,坐得又舒服, 啲職員服務又唔錯,下次嚟試吓佢啲小菜先~…查看更多

book咗嚟中環呢邊畫畫,未係好肚餓又想食少少嘢,呢區最方便都係嚟翠華,好鍾意食佢哋度既淨紫菜四寶,雖然成$39真係幾貴, 但勝在啲紫菜幾多, 四寶既魚腐、墨魚丸、魚肉卷、潮式魚蛋都幾好味,仲有個魚湯底可以飲晒佢, good呀!另外個特長熱狗都OK好食呀, 條腸幾硊皮, 不過感覺好似細份咗少少...…查看更多

本身勁鍾意食刺生壽司,朋友介紹嚟呢度試吓,初時諗住百幾蚊唔會好好食, 普普通通已經過得去,點知食過一次就上癮,啲刺生有成10款, 落order全部都會嚟,仲要幾新鮮, 特別係馬刀貝、蟹棒、劍魚腩、虎蝦等等,雖然寫得太多佢都唔會比足, 但都會每次嚟幾多份量, 再order都唔會特登唔嚟或比少啲,壽司就麻麻哋, 不過嚟食放題都費事食咁多飯啦~其他食物都幾多款揀, 啲燒物都幾好, 樣樣都合格好味,好似多春魚、粟米、雞翼、雞軟骨、燒菠蘿等都好好味!特別要再讚啲天婦羅,唔會勁多粉, 係正常喺啲日本料理店食到既水準。另外啲日式小食如炸豆腐、日式煮茄子、炸年糕都好味呀!仲有好多嘢食, 其實真係食唔晒, 不過要記得留肚食雪糕, 有綠茶、紅豆、芝麻, 三隻味都唔錯~一定會再幫襯! …查看更多

之前已經嚟食過佢既午餐, 已經覺得好抵, 睇過佢啲餐牌, 其他串燒食物都平呀,咁啱呢晚約咗朋友食飯唔知食乜好, 就走嚟呢間試吓。我哋叫咗成十幾款燒物呀,燒黑魚咀 - 正常, 好味芝士焗生蠔 - 超~~~~~~~~~~~~~~~~~~ 正!!!!! 爭啲想連個殼都食埋落肚! 雞中翼 - 普通, 唔夠肥, 乾咗少少雞軟骨 - 正常, 好味雞腎 - 一串乾啲, 一串大件少少就燒得啱啱好黑椒牛舌 - 夠冧夠野味, 好食呀!!鮮冬菇 - 正常, 好味, 唔太乾九菜 - 正常, 野味牛油粟米 - 好甜, 夠香蒜香茄子 - 正常, 好味燒蒜心 - 好新鮮爽口, 好好味招牌旋風腸 - 味道好好, 如果有得加辣仲正!煙肉年糕 - 口感好得意, 好野味, 唔膩, 正呀!燒百花魚 - 正常, 好味牛油焗花甲 - 夠香夠野味燒翠肉瓜 - 保持到爽口又野味飲咗三罐汽水, 埋單$263, 抵食呀!加上職員(老闆)服務都好好, 雖然環境細啲, 但又別有一番風味,特別要再讚多次個芝士焗生蠔, 其實好想再食多隻,但個旋風腸都幾飽肚(2個人食), 所以太飽食唔落,不過下次去一定會至少食兩隻!!…查看更多

本來都唔識呢間食店, 但朋友話睇雜誌見到大讚咕嚕肉好好食,而成班朋友其中一個又勁鍾意食咕嚕肉,所以二話不說即係約齊成班朋友一齊嚟試!初時諗住係雜誌介紹, 冇抱太大期望,我哋仲係特登坐的士過嚟食架!入到舖頭, 地方其實都幾細,我哋一行十人坐咗入最入嗰張大檯,齊人後嗱嗱聲叫餸, 主菜當然係咕嚕肉啦!仲有豉油王蒸豆腐、土魷蒸肉餅、咸魚煎肉餅、馬拉盞炒芥蘭豬頸肉、通菜啫啫煲、豬手煲同班腩豆腐煲。樣樣都好味, 咕嚕肉真係堅好好味,裡面全部都係瘦肉, 外面層炸皮非常之簿, 但又夠鬆脆, 汁既味道又啱啱好, 超美味呀!! 一人食咗一件後已立即決定re-order!豉油王豆腐夠香, 土魷蒸肉餅清清哋但味道夠, 咸魚煎肉餅就爭少少, 啲咸魚雖然咸但唔夠香, 不過送飯都唔錯,馬拉盞炒芥蘭豬頸肉夠辣, 豬頸肉幾爽幾香, 係啲芥蘭淋咗啲, 可能時節唔啱,通菜啫啫煲勁香口, 唔鍾意食菜既人都會鍾意食!豬手煲啲豬手夠晒淋身同入味, 正!班腩豆腐煲啲班腩肉真係有好香既魚味, 我勁鍾意食! 可惜係啲豆腐唔夠香同滑~食完八個餸, 我哋竟然唔夠喉, 立即再叫多四個餸, 當然其中一個係咕嚕肉啦~另外再叫咗個涼瓜煎蛋、咖喱牛腩煲同炒鮮奶,再re-order既咕嚕肉仍然好好味, 我諗再嚟多碟都食得晒...涼瓜煎蛋出奇哋唔苦喎~ 煎得幾香, 值得一試,咖喱牛腩煲用嚟送飯一流! 啲牛腩算合格幾淋, 個汁都夠味, 但個人鍾意食辣, 所以如果再辣啲會更鍾意!最後個炒鮮奶勁正呀! 原來呢個餸唔係咁易做,要有噃咁上下經驗既師傅先炒得到, 因為好易燶, 又係值得一試既餸!另外一定要讚一讚嗰度啲職員, 雖然個個都唔後生, 但啲服務質素超好,落單時都畀咗好多意見我哋, 又不停會斟茶同睇吓我哋要乜,見我哋話鍾意食咕嚕肉, 特登加大畀我哋,個豉油王蒸豆腐正常得八件, 但見我哋十個人,又特登落單叫人整夠十件畀我哋, 雖然最後師傅唔記得整, 但佢哋既誠意同禮貌都絕對嘉許!總括嚟講, 我超掛住個咕嚕肉囉~ 相信不久既將來我必定會嚟食多次!!…查看更多

好耐冇寫過食平, 但為咗呢碗「越式鮮茄牛腩湯檬」,忍唔住要走上嚟寫噃次!今朝返工時已經心思思諗到呢碗「茄腩檬」, 放工返到梅窩立即走去食噃碗!加埋啲辣椒粒同檸檬汁, 個湯底酸酸辣辣勁開胃,啲牛腩又夠晒淋, 檬粉亦爽口少少彈牙, 正呀!!下次入開嚟梅窩既朋友記得要試吓,不過提一提, 呢個「茄腩檬」只喺星期六、日及假期供應架咋~~…查看更多

由於屋企人多, 次次一家人齊腳食飯都成廿人,之前去唔同既酒樓叫小菜套餐食飯, 人多之餘又限時限刻, 坐到鬼嘩迫仲要啲餸都唔多好食,buffet有啲老人家又唔多like,於是今次決定搞搞新意思, 走嚟打邊爐!銅記呢間都係第一次嚟幫襯,我哋分開兩圍檯, 每圍檯各自叫咗兩個煲,一個黑椒豬肚, 一個豬骨湯我坐嗰檯就一個豬骨湯, 一個台式麻辣+芫茜皮蛋,老實啲湯底唔多夠味, 好在啲餸都唔差, 唔會覺得好垃圾,最正都係個招牌麻辣牛根同鴨血,總括嚟講都算係幾抵食既火鍋店,約$120一位任食, 價錢合理火鍋料又足, 一定會再幫襯啦~…查看更多

呢個星期六要返工, 所以晏就同兩個同事去食咗餐好既!本來諗住求其飲吓茶就算, 點知周圍都勁多人要等位,我哋呢啲仲要返工既人當然唔可以等位啦,結果喺冇目標既情況下撞咗入嚟呢間上海菜食晏,因為話星期一至六午市所有小菜半價喎~入到去又坐得幾舒服喎, 環境亦算乾淨清靜, 職員服務都唔錯吖~結果我哋三個人好豪咁食咗三餸一湯兩麵,小菜有羊肉乾鍋、XX炒四季豆(個名好特別, 唔記得咗)、咕嚕肉,加一個鱔麵、一個牛肉炒上海麵, 另加每人一碗酸辣湯。羊肉乾鍋好正, 新鮮熱辣石鍋上, 啲羊夠腍唔蘇;四季豆用啲肉碎炒, 味道幾特別, 好香好爽口, 好好味;咕嚕肉又係意料之外好食, 好多時啲食店炒既咕嚕肉都好「銀」,但呢間都幾腍之餘仲食到豬肉味, 個汁夠味但又唔會過份酸,可能因為本身啲肉較新鮮, 所以唔洗用咁多酸汁遮咗啲肉味啦!鱔麵原來係湯麵, 但個湯又幾好味喎, 係啲鱔小咗啲, 個份量都係一個女仕既碗;牛肉炒上海麵油咗少少, 但都好味呀, 同埋幾大碟喎;酸辣湯係咁多樣算最普通既, 料都緊緊算足, 味道亦只係叫做合格,我食過更多地方好食過去, 但又入得口, 唔算係差既。茶每位$12, 前菜青瓜$18椒仔$15, 最後埋單約 $360, 好似平咗約二百蚊,咁既質素又真係好抵喎! …查看更多

其實之前已經幫襯過兩次, 但今次係第一次同家人一齊嚟食飯, 雖然冇咗生蠔, 又比起之前貴咗 $10, 不過以 $188 再加一呢個價錢嚟計, 仍然都算值食嚟幫襯既~魚生叫做合格, 仲有吞拿魚, 不過我戒咗冇食, 但其他人食過話個樣 OK, 不過冇乜味喎。另外個羊架都係緊緊合格, 味道夠蘇, 但肉唔夠腍。凱撒沙律啲菜好新鮮, 右下角既蕃薯咸牛肉沙律出奇地好好味!冷盤既凍蝦同青口都算OK, 青口細隻少少。熱盤菜色都唔錯, 其實好多嘢想食, 但個胃邊放到咁多嘢? 所以只係食咗呢幾樣菜,最鍾意前面嗰個忌廉焗薯仔, 好好味!呢次個餅燒得好靚仔呀~不過原來唔可以放咁耐, 最好一攞完就唔好再攞其他嘢返埋位食咗先,因為塊餅會黐住隻碟, 搞到爛晒架~當然唔少得嗰三粒朱古力泡芙, 依然好味! 其實好想食多幾粒, 但已經開始飽...呢度竟然有魚香茄子, 當然要試吓, 但可惜唔辣, 都係媽咪整既好食好多。朱古力噴泉啲朱古力都唔錯, 幾好味, 雪糕有三隻味, 朱古力、士多啤梨、雲呢拿,味道普通, 不過好在係有職員舀埋畀你, 唔會畀人搞到啲雪糕核核突突。…查看更多

其他嘢唔多講, 同之前一樣,但今次幫襯, 嚇然發現加晒價,加價都唔緊要, 但問題係加得太多太離譜囉! 好似平時食既既豬軟骨飯、滑蛋雞扒/豬扒飯等, 由 $48 加到 $59 !!至於我成日食既「七彩角切魚生飯」, 就由 $65 加到 $75 囉!其他所有嘢都大約加咗近 20%, 好過份喎!喂! 份量完全冇變, 咁既時世, 仲加價加到咁?!! 咁即係分別趕客啫!!!得啦! 唔會再去幫襯住囉! 直至價錢回復正常水平先啦! …查看更多

半年前開始間唔中會同理同事嚟 lunch,但由於早輪佢冇晒啲特價嘢, 所以已經有一段時間冇幫襯,5/28 埋數要返工, 因為假期, 其他食開既酒樓都冇得 book 位,得呢度可以 book, 所以又決定返嚟試一次!點知今次真係無限驚喜! 之前食過既"灌湯餃", 上次 $11.8 已經覺得勁抵, 今次早要只係 $6.8 咋!!! 嘩! 仲唔嗱嗱聲一人一盅!! 食落仲要味道質素冇變過, 勁熱, 正!!(今次冇影相, 上次既相可參考:http://hk.myblog.yahoo.com/joycewai616/article?mid=11456)另外又多噃好多特價點心, 如瑤柱雞包仔 $6.8 三個, 當然唔好對個"瑤柱"有咩期望, 但以一個幾好味既雞包仔嚟講, 勁抵呀!個正常 size 既鹹魚雞粒炒飯都係 $38 咋!最後埋單七個人食到勁飽, 乜都食唔落既情況都係 $295, 抵到吖!!以後可多噃間飯堂酒家啦!…查看更多

早幾日行經北帝街, 先發現食開間平價粥店冇咗喇!變成呢間雲南米線店, 又一間...不過睇佢門面都似行高檔少少格局, 反正又勁肚餓, 好啦! 就試一次啦! 又係嗰句, 唔好食最多都係一次啫!最後叫咗個自選兩餸米線 ($26), , 即係紅燒炆肉炸醬酸辣湯米線, 扣底,話晒第一次試佢啲嘢, 首先梗係要搵啲招牌嘢試,見佢個紅燒炆肉好似唔錯咁, 當然要試一試, 然後就試噃一個最基本既餸「炸醬」, 試吓呢間嘢啲功架去到邊嘛!一嚟到, 見到啲炆肉, 都知應該得得哋, 炸醬都合格,嚟到時好似清湯底咁, 亞姐都補充咗句話啲酸辣喺底喎~搞起個酸辣湯底睇吓先, 色水都有, 但估到唔算好重味,食落, 炆肉果然得, 仲有成五片咁多, 份量足呀!啲炸醬食落亦合格, 雖然未至好好味, 但味道都唔錯呀!啲米線都合格, 唔會食落好粉, 都幾爽口。午市加 $5 仲有杯豆漿或凍檸賓, 杯豆漿唔凍唔熱, 但反而我鍾意, 又唔太甜!總括嚟講, 成碗米線絕對好食過過兩間舖既《新富盈》,不過同《譚仔》仍然有一段距離, 但冇得選擇吓, 呢間《阿糊》用嚟止吓米線癮都還可以呀! Ref : http://hk.myblog.yahoo.com/joycewai616/article?mid=13304…查看更多

之前聽兩個朋友講過話呢間嘢唔掂,但我仍然想試吓, 唔親身試過點知係咪真係咁差?!5月7日已經試過佢既早餐, 但冇影相, 所以唔特登寫多個食評喇!其實已經覺得唔多掂, 個早餐成 $25, 有一個芝士煙肉奄列包, 一個薯粒, 同埋要咗杯靚啲既熱啡,個包細到... 得麥記魚柳包三分一左右, 味道極度普通, 唔覺得 juicy!薯粒同麥記薯餅冇分別! 最離譜係杯熱啡, 雖然職員已講咗杯靚啲既熱啡得半杯, 但其實只係三分一杯外賣熱飲咁大杯囉! 嘩! 真係一啖就飲晒! 仲要好普通咋喎!食完幾個鐘之後我仲肚餓, 但又唔多肯定同佢有關既...好啦! 我決定再畀多次機會試吓佢既晚餐,首先服務已經有啲問題, 我都唔明點解遲過我兩個人買嘢既客可以仲快過我拎食物走囉!我只係叫咗個煙肉漢寶餐加一杯朱古力雪糕飲熱奶茶啫! 冇咩特別架喎!!跟住佢哋仲要搞鬼到一開波就整定杯雪糕畀我先,嘩! 大佬呀! 你又要執嘢畀我執得慢, 又要一早整定杯雪糕喺度等, 乜都溶啦!!我梗係要求佢再整過杯畀我啦!跟住拎到返屋企開啲嘢嚟食, 杯朱古力雪糕就得個甜字, 冇乜朱古力味,個包.... 嘩! 勁失望, 細到離晒譜!! 計晒畀佢成個包都係得 3.5 吋厚!仲要個汁唔得, 濃得嚟唔好味, 片煙肉又食唔出, 個包同片肉都極普通,杯奶茶又係普普通通, 但只係畀咗一盒仔奶我, 冇糖, 所以勁淡,至於加一蚊既洋蔥圈, 都係好麻麻, 唔多好食...唉! 佢既食物質素同服務真係仲差過麥記, 仲要貴人哋咁多, 以後都唔會再幫襯啦!!…查看更多