食俾你睇的個人專頁

八十年代尾，香港有好多民歌餐廳，歌者喺小舞台上自彈自唱！記得有晚，一位大約20歲少女，手抱結他唱出呢首歌“應怎麼啟齒，讓我向你告知……”從此，我愛上呢首歌，仲有少少愛上呢位少女！你一定會問，邊解食評會寫呢D？唔得咩？因為呢個就係我食完【銀杏館】嘅感受！餸菜好唔好味已經係次要(其實都真係算OK)【銀杏館】幫助退休長者就業，都唔係重點(但又真係幾有意義)我一邊食一邊諗，當日嘅少女，今日都應該五十幾歲，再望吓台上唱緊歌嘅Auntie，唔會咁橋係佢吖嘛……但點都好，呢種食肆真係買少見少，絕對值得大家再三回味！…查看更多

早排同事話老細帶佢去食咗間隱世食肆講到有幾神乎其技，味道又有幾出色！問佢喺邊？答案係 「天馬苑」I beg your pardon 「天馬苑」哦……當晚…我地大家，在獅頭山下天馬苑」就試一試呢間「文苑」必叫【乳豬】就喺你面前肢解，皮脆！好味！但冇驚喜！「叉燒」可能我偏愛肥叉燶邊佢唔夠肥亦唔夠燶不過味道都OK！「經典白切雞」我一邊食 一邊搵佢有幾經典搵唔到 但味道都算唔錯居然有「釀苦瓜」同「蝦子柚皮」兩個都算功夫菜係滿意嘅炒飯OK懷舊甜品拼盤有噱頭 冇驚喜總結成件事如果唔係期望咁高其實係好味嘅不過價錢就…位位六百幾真係驚 多過喜…查看更多

好日都唔去吓中環，一場嚟到，梗係要搵食，行行吓…【蛇王芬】！！！真係聞名不如入去食！望望食午餐餐牌……蛇羹+糯米飯 $ 178燉湯+雙拼飯 $150我地兩女一男，女生又扮細食咁就各叫一份，另加多個蛇羹，雙拼飯就梗係臘腸同潤腸……蛇羹？相對其他地方，係好少少嘅燉湯？相對其他地方，係好少少嘅糯米飯？相對其他地方，係好少少嘅臘腸同潤腸？相對其他地方，係好少少嘅至於價錢？相對其他地方，又真係貴好多喎！芬姐！好難有下次喎………查看更多

先解釋一吓，愛上…係上網個上！上咗OpenRice咁多年，一向都冇乜留意當中嘅優惠！直至，早排朋友話book咗【帝京軒】，問我食唔食？梗係食！7個人，一坐低就點咗隻「北京填鴨」，朋友話訂咝隻「少爺手撕雞」又雞又鴨，不如一人一隻「焗蟹蓋」再叫個「咕嚕肉」加埋個「東坡肉」吖笨！臨尾叫埋個「啫啫芥爛」咁就真係飽到上天花板！道道菜都唔錯！服務又好！仲想點！臨埋單，睇睇個銀包，得五百零蚊，酒店喎！又雞又填鴨喎！又焗蟹蓋喎！八成唔夠俾啦！最後朋友埋完單，位位 420！吓！咁抵？佢話經OpenRice訂位有八折！有啲咁嘅事？點解我唔知嘅？朋友講咗五個字…「因為你背囉」以後搵飯食，點會唔愛上OpenRice？…查看更多

莊子【庖丁解牛】頭三句係咁…「吾生也有涯 而知也無涯以有涯隨無涯 殆已！」講白D就係條命有限，而知識係無限，夾硬一追再追？ 死得！食完【禾牛薈】，令我對人生有所頓悟！入到嚟環境唔錯，招呼又算周到，叫完鍋底同配料，重點梗係叫牛！問部長有咩推介，佢話「封門柳」同「牛頸脊」，咁就每款嚟一碟啦！唔爭在叫埋「牛柳粒」吖笨！一上枱，朋友話好精緻呀！有個招牌仔，仲寫埋要灼幾多秒，好細心呀！結果呢？牛味中上！有咬口得嚟又唔韌！仲想點？朋友一邊咬住肥牛邊話，有間鐵板燒仲堅！A5和牛，一人都係千五蚊咁上下……「吾生也有涯 而知也無涯以有涯隨無涯 死得！」…查看更多

本篇不適合怕黑怕鬼人士觀看，敬請留意……某一日，一位富貴朋友約食飯，仲訂埋【彤福軒】？！仲話佢請添！咁都唔去，真係冇天理兼會俾雷劈！當晚一入到去，已經Feel到有D似曾相識嘅靈異感覺……中得嚟又好西…西得嚟又好貴…無敵維港景…味道冇驚喜…埋單仲會嚇餐死！OMG！咪即係【六公館】？即時好似撞邪咁，平行時空，將兩間互相比拼……環境：兩間都係黑媽媽鬼咁有情調咁，不過【彤福軒】略勝一籌！服務：兩間嘅侍應都係鬼咁好笑容，但【彤福軒】自然好多，羸成個身位！食物：兩間嘅餸菜，都係鬼咁好睇得嚟又唔特別好食，各有春秋！價錢：兩間都鬼咁貴，但【彤福軒】更上一層樓！經過今次靈異事件之後，我得出嘅結論就係……「有人請，我唔介意再去！」…查看更多

未寫食評，例牌先睇睇其他食家評語…嘩！日本開到香港，米之蓮一星拉麵店！嘩！湯底層次鮮明，口感豐富！但係，點解我食唔出嘅……我唯一 嘩 一聲嘅就係埋單果一刻！嘩！百幾蚊一碗，仲鬼咁少份量！如果攞住呢百幾蚊，去旺角 深水埗掃街，嘩！咖哩魚旦呀！嘩！燒賣加腸粉呀！嘩！橙色豬生腸呀！嘩！雞蛋仔呀……應該滿足好多！…查看更多

以下，係我寫呢篇食評之前嘅 心理掙扎…內容非常沉悶，唔想睇？咪唔好睇囉！我個心一路反反覆覆，唔知應唔應該寫呢間「發記」嘅食評，因為呢間舖頭細細，喺新蒲崗工廠區，外貌又平平無奇服務麻麻，落單又立立亂嘅食店，居然D小炒有咁嘅質素，居然價錢又咁平，萬一我寫完食評之後，多咗人去，以後訂唔到位咪捉蟲……但諗深一層，我係唔係太自大呢？我啲POST，嚟嚟去去都係得果小貓三四隻睇，何來有咁大影響力！再諗深多一層，食到好食嘅嘢，上OpenRice推介，係天公地道嘅事！最後我決定，放兩個我去到必叫嘅菜，就係 蠔餅 同 豉油皇鵝腸你覺得啱睇嘅，咪去試試囉………查看更多

文青朋友約食晏，地點係佐敦Plato Café & Bistro，嘩！PLATO 咪即係柏拉圖！？梗係要去潮拜吓！四條友，一人叫一個SET LUNCH，再Share食，諗住樣樣都試吓好唔好味！居然有我最愛嘅Bagel，仲夾住我最愛嘅燒鰻魚，梗係要試！朋友M話想食All Day Breakfast，當然不妨一試！朋友H見到有個喇沙海鮮意粉，喇沙係著名男校，加意粉即係男校加女生！點解唔試！朋友C無肉不歡，為咗滿足佢嘅「肉」望，就叫咗個豬扒！幾個餐味道都唔錯，而最有驚喜嘅，就係 喇沙海鮮意粉！喇沙crossover意粉，味道出奇地夾！埋單原來仲有九折！親愛的柏拉圖，我發覺自己有少少鍾意你………查看更多

第一次去The CheeseCake Factory，之前都有少少心理準備，都應該似Dan Ryans TGI Friday呢類美國餐廳，大大份，成班人開開心心食一餐嗰隻，結果又係點呢……係大大大份，食完頂到上心口，再消化唔切攪到胃下垂！我地五個人，先叫幾個小食，釀蘑菇、炸蟹餅、Nachos同唔知炸乜嘢跟住加多份 五花腩小漢堡，請留意…係小食同小漢堡，但食完都已經飽飽地，但冇理由咁樣衰，俾幾碟小食大到！點都叫個Pasta先似樣！朋友揀咗個 雞肉蝴蝶粉，點知兜粉成個化寶盤咁大！好似蝴蝶谷擺咗上枱咁！食咗一半已經舉手投降，又有朋友話，嚟到CheeseCake Factory，冇理由唔食CheeseCake，好！我就同你玩大去！就係咁，個胃俾呢間工廠KO咗……你問我食得開唔開心？OK啦……你問我好唔好味？OK啦………查看更多

突然想食越南菜，朋友話不如去【越老】！又玩食字，開頭真係唔係好明點解，咁緊係上OpenRice睇睇，哦！原來係社企「銀杏館」開嘅，終於明白晒！一入到去，發現所有動作，都變成慢---動---作---好有禮貌嘅長者侍應，慢慢帶我地入座，跟住慢慢遞上餐牌，再慢慢Take Order…咁我地都不甘後人，慢慢咁點咗越式春卷酸辣鳳爪炸魷魚串燒大頭蝦 等等等等不過…都唔算等好耐！其實味味菜都不過不失，唔可以話好好味，亦好似唔算好道地！但成餐飯又感覺好有意思，間唔中又有一兩位長者侍應，好幽雅咁行埋嚟同你傾幾句，而更有意思嘅係，原來佢地每日都會派飯俾有需要嘅人士，食客仲可以捐錢支持！我一邊慢慢食，一邊望住啲長者，一邊諗起莫文蔚首【慢慢喜歡係】你話點會唔係 【越老】越可愛^^…查看更多

唔知莎士比亞定愛因斯坦講過…「要留住男人個心，先要留住佢個胃」【留家飯店】老闆係劉健威，佢偏偏棄「劉」而取名「留家」，又會唔會有少少咁嘅意思……意思還意思，主角始終係餸菜，究竟又留唔留到我呢位顧客呢？四個人，普普通通一餐，冇海鮮，冇貴價嘢，魚蝦蟹金錢葫蘆通通欠奉，不過味道一啲都唔普通，每一味，都食得出心思，而且服務貼心，價錢又合理，加埋甜品，一人三百都唔使！又點會「留」唔住我個心？…查看更多

我其實對食鴨麻麻地，但又鬼咁鍾意食填鴨！第一次喺【松竹樓】食，驚為天鴨！但已經係上世紀嘅事！最有驚喜一次，喺北京【大董烤鴨】，鴨皮夠脆！女侍應又夠索！回味無窮！之後 鹿鳴春 北京樓 泰豊廔御膳 美利堅 唐人館 新榮記 便宜坊 全聚德 金滿庭 大都……通通食過今次試埋【沙田18】裝修幽雅、食物質素中上、服務亦OK、樣樣都有4分，唯一……就係冇乜大驚喜！好嘞！又到反省嘅時候，究竟係填鴨變咗，定係我要求變咗？抑或而家嘅食肆，愈嚟愈集團化？冇晒自己嘅風格？鴨大十八變，原來，都不離其中！…查看更多

我的名字叫 食俾你睇我的志願，是希望入讀「皇仁書院」，為什麼？因為……早幾晚，我朋友個阿SIR，帶我地去皇仁舊生會開飯，未坐定先睇睇個餐牌……「糖桂花餞桶蠔」微甜中帶桂花香，好味！重點推介，「佛跳牆」淨係睇見咁多料都知冇得輸！「海班兩味」兩味都咁和味！「抽皮鵝掌」非常入味，問你死未？未死？嚟多個「荷葉飯」同「伊麵」，即時舉手投降！最後加多碗香濃「腰果露湯丸」真係完滿嘅結局！一人六百蚊唔使，唔平但又唔算貴，梗係想訂位再Encore點知…原來要係Member……請問，皇仁書院幾時招生呀？…查看更多

唔係好明個標題？正常！睇晒成段食評，自然真相大白！做咗咁多年人，食咗咁多年嘢，得出一個真理，就係永遠預咗唔好太高預期，咁又有另一番滋味！燒鵝，皮唔特別脆肉唔特別嫩…哦…OK啦！蝦多士，預咗D蝦唔大隻…哦…可以囉！小炒皇，預咗冇乜特別…哦！真係冇乜特別！其他D炒菜呀！海蜇呀！勝瓜呀！糯米飯呀！哦！通通不過不失！其實都係預期之內！環境都算OK，似高級茶餐廳！服務亦唔錯！價錢又算幾抵！四個人，食咗六七個菜，都只係七百幾！又真係有少少超出預期，仲想點！如果你居然有耐性睇到呢句，你應該明白個標題…至於34545？咪就係要俾嘅星星！…查看更多