lizloveseating的個人專頁

梗係要寫返篇食評啦，真係好耐冇動筆。今次要特別多謝 Grove 嘅員工，喺今日咁惡劣嘅天氣下，仲要開門為客人準備食物，真係值得一讚。今朝一出門口就見到天色灰沉沉，原來已經掛咗黑色暴雨警告 signal。本來打算返公司，但見到咁嘅天氣，心諗不如獎勵下自己，於是就喺附近搵間餐廳食個靚早餐。行過 Grove 門口，見到佢個玻璃屋設計好有格調，自然就被吸引住，行咗入去。一入到去就覺得環境好舒服，光線充足、空間感十足，仲有啲綠色植物點綴，氣氛好 chill。今次叫咗個豐富早餐拼盤，包括香脆煎蛋、肉味濃郁嘅紐倫堡腸、鹹香煙肉、烤到微焦嘅番茄、外脆內軟嘅焗薯角，仲有清新爽口嘅水耕菜、甜甜地嘅烤 BB 甘筍，同埋啖啖鮮味嘅烤白蘑菇，配埋香脆多士，真係一流。食物質素高，擺盤又靚，食完個人都精神晒。雖然外面落住大雨，但喺 Grove 入面就好似置身另一個世界，咁溫暖、咁舒服。多謝 Grove 嘅團隊，令我喺暴雨中都可以有個咁美好嘅早上。下次一定會再嚟！…查看更多

我諗呢間應該係我排隊等位最耐嘅餐廳，等咗足足2個鐘都有，簡直係挑戰緊我嘅耐性。好彩旁邊有座位，買咗雪糕坐係度食住等。所有菜式都只係提供原材料，然後自己落手落腳煮（我呢個大食懶女友就只會坐係度等食嘅姐，或者得閒幫手影下相囉）。為咗方便客人自己煮，每枱都印有清晰嘅 guidelines，教曉你每一道菜嘅唔同步驟，有埋圖片參考添！我知道我哋係抵食鬼，兩個人竟然叫咗 3 份大阪燒 Wakaka XD，但未食當前真係忍唔到口。三餅嘅都各有特色，有以肉為主嘅、有麵底嘅、亦有煎蛋喺面嘅：仲有炒雜菇添！講真我覺得幾好玩，份量已經調好晒又好少會失手。有機會返嚟再試嘅話，我會想食甜品 pancake，但要排多 2 個鐘嘅話就唔好搞我啦！…查看更多

一直未去過大圍屋子 Cafe，知道佢喺區內好出名，所以過嚟試下佢嘅分店，然而兩間分店感覺同裝修都大不同。馬鞍山呢邊分別有普通座位同埋 tatami 座位。今日人客唔多，所以我梗係揀角落頭嘅窗邊 tatami 位置啦。Menu 嘅 design 好特別，cover 用咗學生時代嘅單行簿，內文嘅字體刻意用咗類似手寫嘅，旁邊仲加咗唔少插畫，十足十以前喺簿入面畫公仔咁。餐單就似係以和風食品為主，第一次嚟唔知食咩好，都係揀廚師推介最穩陣。三文魚丼同行者比較細食，於是點咗呢個細細嘅三文魚丼。賣相係好樸素，簡簡單單都可以好美味。牛肉定食呢個定食嘅份量完全係丼飯嘅 5 倍。成個定食有麵豉湯、拌菜一小碟、牛肉冬粉、白飯配飯素，仲有嘢飲添。果碗牛肉嘅大小同丼飯差唔多，食完都飽咗一半啦，牛肉有做得好入味，我本人極力推介呀！蕉糖梨子窩夫甜品 梨子甜品唔係咁常見到，仲特別用咗軟淋淋嘅 waffle 做 base，淨係聽個名都引死人。味道清甜而且唔會膩，圓碌碌咁造型又可愛，為午餐作結就最恰當。聽講平時經常排長龍，我今日真係算好彩。用餐期間感覺到真係幾舒服、幾悠閒，我諗我會再返嚟，希望下次到唔駛排隊啦。…查看更多

蒲開荃灣區嘅我，有新店開張我當然要首當其衝去試食啦！內部環境係深、淺粉紅同白色，仲有好多氣球添，擺明係女性主導（其實餐廳名都話咗你知）。點咗最多人 order 嘅 Royal Set，包好多嘢架：Appetizer x 2、Soup / Salad x 2、Main x 1、Pasta / Rice / Pizza / Burger x 2，咁分別有 full portion 同 half portion 嘅。 Royal set 平時係用 afternoon tea 嘅層架 serve，但佢話今晚太多人點呢個餐，所以就咁用碟上，否則就要慢慢等下。無層架基本上係 OK 嘅，上菜時先發現問題，就係張枱太細但隻碟太大...... 所以層架嘅功能不只在於 food presentation，實質係張枱唔夠位至真。哈哈烤大蝦沙律 (salad)就菜名嚟睇，佢隻蝦並唔算得上係咩大蝦，仲要得一隻好孤獨又唔知點分，又唔係好明白點解又要俾咁多 mustard sauce。三文魚柚子檸檬玻璃杯沙律 (salad)沙律嘅柚子醬汁係另上，比客人自己倒落玻璃樽仔再 shake shake。感覺 so refreshing，只不過我唔鐘意入面嘅 olives。意式薄切牛肉 (appetizer)無咩特別嘅菜式，三片薄薄嘅牛肉片，上面有一大堆我鍾意嘅 rocket leaves. 魚子蟹肉玉子燒 (appetizer)玉子燒上面印有 Girl Boss，算係有心思，不過字眼係唔清晰嘅。餡料份量適中，味道正常。燒一口安格斯牛 (main course)西冷牛柳粒好似平時串燒果啲細細粒，認真係一啖一口。粒粒安格斯牛，同埋薯仔粒、紅蘿蔔波波推埋一座山咁，係 colourful 嘅但賣相一般般。以為唔係咁好味，食落口反而係非常 juicy 同細嫩，令我喜出望外。龍蝦包（配薯條）(burger)龍蝦包本身同其他餐廳嘅差唔多，但係特別在薯條 mix 咗蕃薯條同普通薯條（蕃薯條係好味啲嘅）。海膽忌廉蟹肉意粉 (pasta)呢碟意粉係我今晚最鍾意嘅菜式，最令我驚喜嘅。蟹肉嘅份量係比較少，但海膽忌廉汁真係無敵！撈汁食海膽已經溶晒喺忌廉汁入面，而意粉亦都相當掛汁，所以係正嘅！Children’s Herbs 果香茶（凍） 個水樽的確太可愛，有少少似小朋友嘅奶樽。Drink list 未有列明係咩水果味，結果係士多啤梨，仲有藥水味添... 有啲唔開心，係呢餐飯入面唯一美中不足嘅地方。小月兔白桃茶（熱）茶壺、茶杯都好靚靚，仲有粒糖添。真係好香白桃味，喺茶杯甚至茶壺入面都桃嘅果肉，呢方面表示讚賞嘅。所謂嘅二人餐，份量足夠三個女仔食用，所以我哋決定下次叫多個閨密一齊嚟，抵食好多！題外話，食到最尾見到有人帶咗隻狗入嚟，細細隻松鼠狗用孭帶孭住，好可愛呀！感覺係員工或其親朋好友，咁唔知歡唔歡迎客人帶狗狗入嚟呢？…查看更多

今日下午約咗去南豐中心處理少少嘢，所以喺附近搵啲簡單 local 嘢食下。唔熟路嘅話應該比較難搵，因為係角落頭位置。呢度係半自助形式，門口先肯點嘢食，然後自己搵位坐低慢慢食。通常我都鍾意配雞肉，所以揀咗大撈，有雞扒、雞翼、腸仔、牛丸，我揀咗小辣。嘢飲就大多數係樽裝或紙包飲品。配料方面都係經過滷水醃製，非常入味，而且係可以自由配搭。唔好睇我果粒牛丸黑蚊蚊好核突，其實好好味，我仲食到陣甜甜地嘅蜜糖味，果然係有心機之作。…查看更多

最出名食芭菲嘅 Ufufu Cafe 終於有分店，仲要開咗喺屋企樓下。之前尖沙咀嘅 Ufufu Cafe 搖身一變俾人一種全新嘅感覺，新店感覺日本風比較重啲，裝修亦都 modern 少少，佢好似轉變咗形象，新裝修白白淨好光猛好舒服，first impression 感覺良好！Menu 少咗以前嘅 pizza，但係多咗丼飯， 睇得出有花心思重新設計，亦有多款新菜式！今次特登叫咗啲新菜式，好彩都無令我哋失望。帆立貝、松葉蟹腳海膽忌廉汁意粉唔知係咪我隻手太細，我覺得松葉蟹腳差唔多有兩個手掌咁長，大大隻咁好搶鏡，正過平時酒店 buffet 過啲呀。意粉感覺比起平時嘅煙靭彈牙，另外個海膽忌廉汁配返海鮮更加帶出鮮味！肉汁蛋包飯所有焗飯呀、蛋包飯呀，如果係炒飯底會無咁 dry，絕對會加分嘅。呢度唔會用炒飯，但內裡嘅飯係經醬汁處理過嘅。野莓菠蘿果茶通常餐廳都會調好特飲俾你，呢度比較特別係會跟糖漿俾你自己加。頭一啖未加糖漿，就好似凍檸茶走甜咁，味道怪怪的，加返糖漿後反而有驚喜。福岡八女抹茶紅豆拿鐵雖然我唔識貨，但一睇個名都知道係勁嘢！旁邊兩塊杏仁餅仔好香脆，亦唔會太甜。抹茶方面好濃味，如果你唔飲慣咁濃味就可以叫 latte，我估味道會唔錯！發現仲有好多嘢未有機會試到，誠邀各位沙田友一齊再戰！YEAH~!!…查看更多

點都估唔到，青衣山頂上都係平民屋邨，當中竟有間頗 decent 嘅 cafe。餐廳嘅裝修係以藍白色為主，令人感覺好舒服。本以為屋村小店出品一般，可能本身期望唔大，食落反而有驚喜！好似佢嘅什菇帶子意粉就做得非常好，白汁味道剛好而且好入味，食得出唔係 hea hea 淋汁就算（呢一點可能好多連鎖店都做唔到）。雖然帶子細細粒，但其實又好多粒兼且有好多菇同洋蔥。Burger 都唔差架，漢堡扒唔係薄切切果啲，仲有大量蘑菇。加上麵包稍為烘熱咗，有脆脆嘅口感，仲吸收埋蘑菇汁。仲因為即時製作嘅關係，漢堡扒同蘑菇嘅熱力都將芝士溶化，入口果下真係非言語可以形容下，你自己下次嚟親身試下啦！…查看更多

今日公司 training, 所以叫咗 refreshment 俾大家中場可以食下嘢。我哋點咗盤沙律，仲有啲 assorted sandwiches & toast 之類，味道都唔錯。三文治、沙律入面，蔬菜嘅份量都算多，感覺清新健康啲。自己試過最鍾意蝦多士～推介推介！最衰 25 人份嘅早餐食唔得多，叫唔夠 $2000 就要另加 $200 運輸費，就算路程唔係好遠。另外所提供嘅自己餐具唔夠用，要自己另外再準備。不過服務員嘅態度係值得讚嘅，就算我柯打前一日臨時加單，又改過送貨時間，佢依然親切款待。…查看更多

今晚想食返個平民價嘅 steak，之前食過呢間唔錯，而家仲多咗個二人餐添！計返同其他套餐價錢差不多，但係多咗好多前菜同甜品。第一道前菜：Seafood platter & 鵝肝多士Seafood platter 望到都即刻加分，最吸引到我哋嘅當然係果隻成個手掌咁大嘅生蠔啦！相反，鵝肝多士煎得香噴噴，但食落唔係好夠熱。第二道前菜：響螺薯蓉 & 豆腐沙律點都估唔到響螺得一粒，旁邊嘅沙律都變成主菜了。豆腐沙律更是誇張，我本以為係日式豆腐沙律，點知嚟到係佳寶嘅豆腐。。。無話可說。。。主菜：牛扒薯菜 & 黑毛豬鞍扒 risotto 牛扒叫咗5成熟，好明顯係煮煮過籠了。豬扒反而比較正常，但我嫌個 risotto 太乾身。甜品：朱古力心太軟 & creme brulee（仲每人多送一球雪糕）我諗甜品係第一道前菜以外最好味架喇，味道 OK 而且心太軟就得唔錯。另外附送嘅雪糕球係我至愛嘅 Oreo 味道呢！…查看更多

平時閒閒地起碼10個8個排緊隊，今晚得2－3個就一於等一等啦！入到去同門面見到嘅一樣咁舒服，亦好好彩被安排到窗邊位置。我哋每人點咗個 main course，另加一個甜品開心 share!黑松露軟殼蟹意粉碟意粉的確有驚喜！平時食開細細件嘅軟殼蟹，今次佢係原隻上！意粉都令人滿意嘅。All Day Breakfast全日早餐多配多士或 pancake，佢呢款特別造型嘅 pancake 賣相吸引。Pancake 厚厚嘅有咬感，仲提供埋 cream 比你，叫做有花過啲心思。凍咖啡 & 凍檸茶飲品方面冇咩特別，但係睇得出佢喺選用餐具上嘅用心。例如凍咖啡嘅杯係圓碌碌好得意（雖然拎上手唔太方便），另外大部份餐具（例如杯墊）都有印上自家品牌嘅 logo。 抹茶心太軟（配抹茶雪糕）成碟都係綠色嘅抹茶，正呀！唯一 comment 係抹茶蛋糕個底唔平，好難切開嚟食架嘛。…查看更多

 環境氣氛都很寫意，而且尖沙咀呢個地理位置夠晒方便。餐單有好多選擇，但我哋今晚選擇咗簡簡單單食個 vegetarian pasta，番茄汁加少少香草感覺好清新。（咁簡單嘅餸菜都煮得好食，我估瞇起雙眼求其點都無問題！）另加酥炸魷魚鬚，醬汁有少少 mayonnaise 嘅感覺，味道同魷魚鬚非常夾！結果我哋仲叫職員俾多碟醬汁我哋（有啲誇張吧）！講到底，最令我印象深刻嘅反而係個開心果甜品。街外真係非常少有發現開心果味嘅甜品，所以我決定試下！甜品的確有好豐富嘅開心果味，仲估唔到開心果可以同 raspberry 咁夾！…查看更多

開咗冇幾耐嘅 burger 店，每次經過都好多吉位，今次真係太肚餓所以先入黎試下。呢度正正係商場入口，而且大部份係落地玻璃對街，所以感覺比較開揚，都舒服嘅。我欣賞佢都會用心為客人即時製作所有食品同飲品，但係動作的確係慢咗少少。我哋分別點咗 mushroom burger & hotdog，都係有跟炸薯條同飲品嘅。Hotdog 一般冇乜特別。不過好在 Mushroom burger 係唔錯嘅，portobello mushroom 厚而多汁，正呀喂！…查看更多

每次經過都座位爆滿，今次真係好好彩，今次竟然有位。不過坐底咗唔夠 10 分鐘有開始多人 lu～ 留意到門口嘅貼紙，原來真係米芝蓮推介嚟架！呢度雪糕口味唔算多，得 8－10款，但店員都好貼心俾你慢慢試食。嚟得呢度就試下佢嘅 choux 啦！好好呀，原來係可以自己揀雪糕口味架！三個人分別叫咗 Red velvet, popcorn & rocks, parline noir。Red velvet 果個係見佢紅色，影相一流非常 instagrammable。Popcorn 果個我哋唔想要咖啡雪糕，轉左 chocolate crisp 之類嘅。唔好睇少佢細細件，實質係好大個雪糕球，睇過我拳頭呀！有少少驚喜，雪糕球入面有餡架，就例如 parline noir 入面有麥提莎醬！比較特別係佢用咗貓頭鷹做主題，無論係雪糕杯、門口甚至店內裝飾都見到好多貓頭鷹。真係諗唔明貓頭鷹同意大利雪糕究竟有咩關係呢？哈哈！另外我覺得佢張卡片都幾得意下，你下次有機會去攞返張嚟睇吓呀！…查看更多

平時嚟到都10幾廿人排隊，可能咁啱今日打風又落雨，前面只係得 2 個人排隊，點都試下啦！我哋試咗 2 款，分別係『蟲草花薑酒湯雞肉米線』同埋『麻辣湯米線』。『蟲草花薑酒湯雞肉米線』湯底比較特別，所以覺得應該要試下。為咗唔想配料影響到湯底嘅味道，呢個米線係唔俾加配料。湯底唔錯，清清地又帶點藥材味道，不過雞肉就好似梅梅地。『麻辣湯米線』因為第一次食，所以試小辣。湯底味道 OK，但略嫌佢唔夠辣（可能真係要中辣或大辣先夠），反而好麻。食完大大碗米線，我哋仲加咗小食『招牌酥炸雞球』，每件雞件都好夠份量呀！本身想試埋招牌嘅『魚肉響鈴』，但真係食唔落啦！…查看更多

Dinner Set for Two 包 2 snacks，2 main courses，仲有餐飲都係 $300 左右。部份餐廳嘅套餐份量會比起平時細，所以你可以享用較優惠嘅價格。Applegreen 呢個 2 人餐每道菜嘅份量都同 a la carte 一樣！小食揀咗焗薯皮同沙律。我叫咗我每次嚟都會食嘅香橙脆脆沙律，喜歡佢嘅 citrus 味道夠開胃，大量脆脆又好有口感。Main course 揀咗 pizza 同 steak & fries。薄派 Pizza 做得好出色，材料充足所以每一啖都食到海鮮，醬汁加咗 custard 芥末醬味道酸酸甜甜嘅，上面仲灑咗脆脆添！Steak 就做得一般啦，吸引嘅反而係伴菜用咗烤菠蘿。你知道啦，燒烤過嘅菠蘿係特別甜架嘛！雖然我哋 2 個都係大食怪，最後都係打包咗半個 pizza 返屋企，可想而知，我絕對有理由相信，佢果個所謂 2 人餐係足夠 3 個人食嘅。…查看更多