WSherry3949的個人專頁

從來未試過一間食物質素咁劣的餐廳，自己係屋企煮個壽桃牌面都仲好食過佢。一共叫左三個餐點：夢王低卡蒟蒻麵轉米線追加烤豬頸肉，夢王烤豬頸肉米線同埋鮑汁冬菇花膠鍋。其實原本想叫胡椒豬雜鍋，但個menu勁kam，唔知點解胡椒豬雜鍋係無飯/面跟餐，另外加碗飯加$10，但豬雜都唔夾食飯所以想加面，但係加個面就要＄22。落單姐姐見我黑人問號❓就推薦我可以另叫個雲吞面，到頭來雲吞面同豬雜都係太創新嘅配搭。最後我放棄左豬雜鍋，轉鮑汁冬菇花膠鍋，唔知點解尼個鍋又有埋面係入面。最 kam 係個 menu 將尼兩個鍋放埋同一頁推薦。精彩的來了，夢王低卡蒟蒻麵轉米線一上枱個人呆左，個碗size勁細，仲細過松屋細牛肉飯個碗。上面有栗米同紫菜，明顯D紫菜係中式煲湯個種嘅紫菜餅，廚房懶到無將D紫菜餅煮過，直接放上米線面等D湯浸濕佢。個湯好淡好淡，未試過出街食到咁無味嘅湯面，淡得嚟又有陣講唔出嘅怪味，栗米同中式紫菜又唔夾，成碗面食左幾啖就放棄左。夢王烤豬頸肉米線都好差，米線個湯底比夢王低卡蒟蒻麵好DD，好明顯只係將用嚟煮面嘅面水當係湯，但叫做有多少少咸味。譚仔清湯米線比佢出色唔少。但係姐姐漏上左個跟餐豬頸肉，提醒返先補上。兩個湯面套餐都好差劣，唯一可以放落口得個豬頸肉。鮑汁冬菇花膠鍋叫做無伏得咁勁，但好普通，個鮑汁鍋好水，明明係花膠鍋，個湯一D都無膠質的感覺，好似將D預製鮑汁冬菇嘅汁直接加水稀釋咁，花膠跟本無同鮑汁冬菇一齊煮，好淡口。鮑汁冬菇花膠鍋同朋友個兩碗米線比叫做正常放得落口。埋單時見到隔離枱叫左二人花膠餐，都係食剩好多野。尼個餐廳真係無下次，價錢唔係貴，$60至$70一個晚餐但難食到爆炸，劣過一般茶餐廳，劣過大學canteen，劣過自己係屋企煮個面，同小學飯商有得鬥！原本想普通出街食餐飯，點知食完仲衰，要出街再買野食填肚。睇返尼間餐廳無論係google 定係openrice 都係超多好評，永遠都只係講個夢王和牛丼5星好評，大家心知肚明！…查看更多

行街攰咗，求其入間cafe坐，咁就中伏啦！如果你唔係193粉絲，身為個正常食客，千萬唔好當係普通cafe咁入去坐。尼度野食收費進取，味道中下，服務講唔上，只係一個地方for粉絲課金俾佢哋嘅偶像嘅啫。入座20分鐘，D侍應茶餐廳格咁，叫左幾次先開左QR code可以叫野食，D餐具又要叫先有人準備。焗魚意粉，碟就大大碟，粉就得兩條，仲有件魚同意粉明顯分開煮最後放埋一齊，味道各自獨立。炸薯條咁普通都可以水準以下，一上枱我同朋友都呆呆，大拿拿50蚊好似M記中薯咁細份，個醬明顯係即製品。芝士拿鐵，只係磨碎左的芝士碎放左係latte上面，完全唔襯，杯咖啡又凍，D芝士碎完全唔溶係咖啡度，仲衰過街邊珍奶店D芝士奶蓋，起碼人地同杯茶都夾。無下次！Openrice勁多好評，一定係孝順好評。。。…查看更多

上星期日同四個朋友食，叫左唔同品項，就得個咖央多士叫好食。海南雞飯套餐，得個油飯同湯過得去。D雞有一半都係肥皮，完全食唔落，走左皮後得幾啖肉又無咩味，咁收$78唔抵叫。我哋另加跟餐叫左個$28蚊馬拉盞炒椰菜苗，size得一碗飯咁細，幾棵菜，馬拉盞又落得少，唔知以為係少鹽少油餐廳，食到口淡淡，D菜又炒得老。$78 四串串燒，偏貴份量又少，好似大陸串串咁幾件肉，一般段。仲有咖喱牛腩牛筋加左錢轉薄餅，嚟到得兩件薄餅，四個人一人得半件送咖喱。D牛筋又煮得唔夠時間，好似食橡膠咁，有件大的牛筋仲要咬都咬唔到放棄左。最後椰子雞煲餐，完全做唔到佢餐牌所寫的香馥濃味的任何一只字，簡單D講，跟本就係椰子水快滾白烚雞。件雞要點豉油先有味，跟餐的油飯仲濃味過佢，但D雞又老又鞋，同屋企煲的湯渣點豉油食無分別。椰子雞湯十分之油，只有椰子水味無雞味，望落好似清水咁清。如果你想食濃味的椰子雞煲，出面是旦一間火鍋店的湯底都好過佢。D飲品又貴，可樂都要收$28蚊，焗住叫同樣價錢的特飲，上到枱仲細杯過茶餐廳凍奶茶，大熱天時飲兩啖就無左。最後晚市仲要收加一，落單又係手機落，埋單又係自己出去收銀埋，到唔知有咩服務。總括黎講，尼間餐廳收得貴，份量又少，仲要無服務又收加一，無下次。…查看更多

因為新年年初二，成條街都無開甜品店，開的都係甜牙牙自己店，無奈唯有食佢獨市生意，行左入去坐底。首先我已經好耐無食佢，價錢進取左好多，仲要收加一服務費 🌚。真係吹漲，又唔係高級餐廳，限時45分鐘，賣單又要自己行出去，唯一嘅服務就係一個西面女人行過埋嚟同我講夠鐘啦！憑咩收人加一服務費 😅叫左雪糕楊枝金露，抹茶錦錦冰，提拉米蘇鬆餅，三樣野都十分普通。雪糕楊枝金露，只有雪糕係凍嘅，其他配料，芒果、西柚、椰汁都係室溫。每樣野個味道都好獨立。傳統楊枝金露仲好食D，佢成碟拼埋D配料，$60蚊仲要加一。抹茶綿綿冰，口感一D都唔錦錦，就係碎冰。而家抹茶唔夠濃，紅豆仲係罐頭貨，小丸子無味都算佢連脆珠都無預先處理，又係無味。提拉米蘇鬆餅，個鬆餅中間係濕潤的，似未煮熟，所以質感一D尬唔鬆軟。提拉米蘇無落酒、唔夠咖啡味。加埋一成90蚊咁濟，我去K11食幸福pancake ，都係100蚊仲好食好多。所以我平時都係去同一條街的其他甜品店。新年無得揀，下次最多唔食。…查看更多

星期日下午同朋友坐底，食完就覺得尼間店係openrice 唔值咁多好評。首先食物好普通，由其是個明太子意粉，正常意少係要炒到D汁俾個粉吸引晒，或者收汁到意少可以掛汁咁先正常。佢居然烚熟D意粉，放中間再倒D汁係碟邊咁就出貨，食嘅時間要自己撈勻咁樣食。衰在個汁水汪汪，撈完仲濕過濕炒飯。唯一少少正常係個雞胸肉沙律，D雞肉剛好熟，唔柴口。甜品都麻麻，正正常常一個芝士蛋糕，一般係加果醬、生果令成件事味道清新D，佢就加黑醋，真係黑人問號… 另一道蘋果金寶，唔知佢焗到燶定係翻熱到燶，賣相好唔吸引，但個金寶唔知放左幾耐，入口係淋嘅，而且得一成係蘋果肉，唔食真D都食唔出，又無雪糕伴碟。咁做得cafe，咖啡正常係基本要求啦，點知連尼個要求佢都做唔到。我見到menu有個signature coffee - melon cuppincino ，諗住嘗下鮮啦，而且仲有推介icon係度。一上枱飲左啖，尼杯咖啡跟本唔應該存在係尼個世界上。蜜瓜同咖啡跟本唔可以一齊出現，唔明個咖啡師點解OK攞… 超級怪…尼間cafe食物飲品都麻麻地，要同朋友吹水，大把地方都未輪到佢，真係不了。…查看更多

一早係openrice book左 時間食啦。去到遲左10分鐘，一般店都會 hold 枱 15分鐘，咁同朋友到左就直接去counter報到啦。佢間店現場都已經有十幾位的人等緊枱。一個類似店長的男人就睇返資料，講嘢有骨咁答：「你都遲啲15分鐘啦，當你哋唔嚟架啦，等陣啦！」我打左個突🙄，睇返手機時間絕對無遲15分鐘咁多，望一望佢店入面個鐘，原來係校快左成5分鐘有多 🫴。但係講完野之後，無比任何飛就走左去，等左十分鐘，佢就叫有飛的客人入座。咁即係準時嚟都要等位，我book枱有咩意思呢！最後同朋友去左另一間泰國野食，無咁多人等，態度都好好多，成個用餐過程都良好過尼間野，未食就寸寸貢 🙄，入去食都背脊骨落呀。…查看更多

周六共三位朋友約左諗住食餐海鮮，但係成個用餐體驗就比一個老細搞wan晒🤷縱觀全部海鮮都新鮮、味道正常，姐姐都幾好服務，就係個老細態度有問題。食左成餐，個老細就鬧左D員工咁耐，明明個姐姐執緊其中一個客的碗碟，個老細一把老牛聲：「呀X，你擺低D野過嚟！！」叫走左個姐姐鬧！！？？我見到個客個樣當堂「吓？」左出嚟😨。老細成晚就係走嚟走去，老點D員工去邊枱邊枱做野。佢一定覺得間店多得佢睇實，其實成日打斷姐姐D工作就真，而且忙極佢都係出把口only。老細一定覺得自己運籌帷幄，好enjoy掌控全局的感覺。因為本身我張枱睇到廚房門口，見到老細唔係淨係樓面鬧，佢廚房門口又鬧，員工洗緊海鮮又要比佢鬧，仲要係嗰種不可一世的態度，大大聲比客聽到咁鬧：「我叫左你做咩就做咩，照我講咁做，唔好做多做少，你明唔明呀？！」咁嘅意思重複左兩三次咁鬧。下次應該又會話「你見到個枱要幫手就醒水啦，唔好一look木咁！」🤷最慘就係D姐姐跟著個咁嘅老細，返工勁大壓力。講返餐飯，我哋要左$398價位的套餐，但係個粥好搵苯，要另加$78先有，本身個餐有埋烏冬，三個女仔夠食有突就無加到，但係成$400一個餐連粥都唔包就唔係咁合理啦。而且去到賣單，原來仲收茶芥（D茶淡如水）同小食錢（花生、蕎頭） ，加加埋埋每人$459總共$1377，佢仲要求$1500以下要比現金，正常咁大金額點會比現金呀，收埋咁多附加費，夠老細比信用卡手續費有突啦！跟住我哋咪話無咁多現金攞，個老細先肯收信用卡，仲要當住我哋面前反左個大大白眼🙄。一開始上左一碟刺身先，其他三文魚嗰D都好正常，帶子仲甜甜地添，但個象拔蚌就麻麻地。師父切得厚，而且個色又唔係平時白雪雪嗰D，應該係尾位，食落仲有少少腥，所以我哋蒸熟左先食，反而正路D😂之後的蒸海鮮都好正常，不過佢係行無調味風格。佢就有個醬料吧，比客人調豉油點海鮮食。其實只要海鮮新鮮加少少咸味就好好食。不過跟帶子的粉絲同最後的蒸雞蔬菜烏冬盤的栗米，始終要蒸多次先夠熟食得落。老老實實，成500蚊一餐，老細又咁趕客，真係無下次。…查看更多

因為朋友都唔係好敢食醬油蟹，難得見到有間韓國餐廳有一人份就過嚟試。尼排香港熱到痴線，點知尼間店都一樣。成間的冷氣開左好似無開咁，每次有人出入門口都有一大陣熱氣沖入嚟，行行吓街想坐低涼冷氣食野真係千祈唔好食尼間。🥵🥵佢D野食都唔錯，不過價錢真係偏貴。叫左水冷面、雪花牛肉、厚切五花腩、醬油蟹。水冷面個湯好清爽好清甜，而家食真係唔錯。雖然間店咁熱但係都堅持食燒肉😂，個人覺得五花腩比牛更出色。由於無係韓國食過醬油蟹，所以無得比較，但佢一D都唔腥，紫菜飯的紫菜同麻油好香。…查看更多

約了一大班中同食飯，因為想食潮州菜，但係好幾間都book唔到位，最後唯有食尼間。首先個門口就好難搵，地址煮砵蘭180+商場，但係真正的門口寫為食坊。搞到個個中同淨係搵門口都搵左10分鐘。終於攞左位入座，叫了 蠔餅，蠔仔粥，鹵水鵝雜和鵝片。蠔餅比較厚，好多碎碎，個底仲好多油；蠔仔粥都多蠔，不過不失，無咩鮮甜味；鵝片未夠淋，要咬多幾下，最失望係居然無豆腐墊底。其他小菜都不過不失，焗花甲煲係無沙夠鮮甜，椒鹽鮮魷無咩椒鹽味，海鮮豆腐煲好細份，豆腐都無幾件，但蝦同魷魚都爽滑的。最慘係個場仲噪過地盤，明明想同中同傾偈，但噪到坐對面都聽唔到。…查看更多

這條小巷有很多外賣食店，近期卻有很多泰國菜、海南雞飯店氾濫成災開到成行成市，因此這間食肆在這裡別樹一幟。奇怪的是別的食店均有人群光顧外賣，它卻不見人潮。它的裝修遠比其他專門外賣的食店乾淨利落又感覺衛生，經常路過的我剛好今晚有機會，於是就把心一橫試一次。首先這外賣碗別出心裁，配菜與面一層、湯一層，外賣碗有足夠的空間保持湯面可以完好無缺外帶到家。首先要試藥膳湯底，一嚐就食到杞子、紅棗及龍眼的甜，藥材味剛剛好，不會太搶風頭，亦有蟲草菇味。在冰冷的冬天，有這碗面真的滋補暖上心頭。配菜有四件大大的醉雞卷，一口都咬不盡，品嚐中有淡淡的花 雕酒味，啖啖肉！另外加配了$3麻辣菜脯，是最令我驚嘆的三塊錢！食落有麻香，咸味適中，不過太辣，還有很多香辛料味。怪不得另有一樽樽菜脯售賣，絕對有市場！小小一間店，臥虎藏龍，希望日後有更多食客欣賞，它值得更多！…查看更多

星期六幾個朋友諗住去間黃cafe hea 吓，點知有個不愉快經歷。去到門口有本「請在此登記」的簿仔，店員都無個係門口，要客人自己登記！？寫左位，企左係出面等，隔離仲有一對情侶比我哋仲早就企係度等。由於朋友未到齊就等住先，由全場滿坐到終於有人走左，有吉枱。由頭到尾都無店員出門口叫人入去坐，淨係幾個圍埋係收銀吹水，終於對情侶走左唔等。後來朋友到齊左，入面再走左幾張枱，但都係無店員安排我哋入座。我仲走左入店入面，先係玄關企左一陣，無店員諗住過嚟問咩事:(，照係收銀吹水。我再去入去搵店員問，佢居然都係叫我係出面登記，明明店入面已經有幾張吉枱。 到想走的時候，先有個店員出嚟話有吉枱，入面會有員工執枱，但一眼睇到班員工都係吹緊水，無人有行動。最後我同朋友都嬲爆爆唔想係尼度食，唔理黃藍，咁嘅服務態度真係唔要得，唔係做生意咁款的。…查看更多