spencw的个人专页

一間好冇禮貌的店，只想俾人知道，今時今日咁樣對啲客，你估你真係鑲金嘅咩？以往食過呢間店好幾次，都係一個嚟嘅，嘢食正常，價錢正常，吾特別好，吾特別差，今日假期，諗住歎番一盅兩件，見佢都幾多人等位，即管攞飛睇下要等幾耐，好耐心咁等佢個收銀兼坐位安排做完面前嘅工作先開口問，點知換來一句好冇禮貌嘅回覆：「一位冇位！」完全冇講過可能要等幾耐，又或者半個唔好意思嘅態度，我問自己：「點解還要乞求幫襯你？」以後都唔會！…查看更多

新開見評語唔錯，一於去試吓啦！唔知係咪好少人知呢間嘢定咩其他原因，8點零去到冇乜人可以直入。雖然知道可能呢度吉列先係強項，但今日又好想食魚生飯，於是勇敢地叫了一個三文魚拼油甘魚魚生飯。一個字，劣！質素比爭x還要低，oh my god! 一上菜見到個樣就知唔新鮮，三文魚唔肥，啲油甘魚仲要腥鏗鏗！$98雖然唔算好貴，但都唔係俾啲咁嘅貨俾個客食呀嘛！真係唔應該喺度食魚生飯，深深後悔！試埋個茶碗蒸，得鹹味冇蛋味，似乎熟食都唔多掂！…查看更多

北角搵食，朋友想食好啲，就試吓呢間!即日打電話訂枱，有枱仲可以訂埋招牌菜威靈頓牛柳，一於試埋佢😉先叫一個香草忌廉燴海鮮，配Prosecco ，原來可以叫半份，secret menu呀！唔洗硬食太多，海鮮夠新鮮，味道唔錯呀👍🏻跟住到主菜威靈頓牛柳，叫咗medium，肉質鮮嫩有汁，酥皮夠鬆化，非常滿意😌配咗杯法國紅酒，係我最喜歡嘅泥土味，估唔到house wine有咁高水平，真係意外驚喜呀！👍🏻👍🏻👍🏻最後以甜品combo作結，三個甜品都有水準，唔錯唔錯😊…查看更多

觀塘放lunch隨意食，記得同伴喜歡食羊，又諗起呢間曾經見到有新殭手抓羊提供，就俾個機會試吓佢。點了最基本嘅手抓羊肉湯河，份量算ok啦，羊帶少少羶味，都正常嘅，預左食羊就係有羶味㗎啦，但羊肉又廋又鞋，真係唔合格囉，加上湯底完全冇特色，明明有芫荽但係唔香，普通過普通，好難俾正評佢喎！價錢盛惠$58，加埋涷飲加$6，一共$64。雖然不算特別貴，但呢啲價位喺觀塘大把選擇啦，回頭指數係零。其實唔算最差，只係平庸之惡吧😆…查看更多

星期五難得有假期，於是打算食好啲，成日行過呢間peko peko，見頗有人氣，又有露天座位，見天氣咁好，就決定去chill一chill啦！唔知係咪疫情關係，2pm去到好好彩唔使等位，有坐到心儀嘅露天位，可以望住過海食，心情即刻靚晒，不過等咗好一段時間，都未見有人招呼，唔緊要啦，反正都係嚟chill，可以乘機慢活一下。又過了一陣，終於有個男仔過嚟招呼，問我「係咪落單呀？」我話「係呀」佢話「等一陣」，於是乎又等咗3分鐘，佢返嚟話：「唔好意思，可以落單啦」，於是乎我叫啦，叫到一半，佢又用對講機同出面啲人講咗陣嘢，然後話「唔好意思先生，正話你叫乜嘢話？」我頂吖，你究竟有冇用心招呼你嘅客人？最後終於叫左個set lunch，幾坻食又幾好食，兩個頭盤，一個湯，再加一個主菜，再配飯或烏冬，都係$78（未計加一），仲附送一杯伯爵茶，不過送茶過嚟個女侍應又係大大力將杯茶放喺枱上，令我個感覺好似食緊茶餐廳咁🤦🏼‍♂️其實成餐飯個整體感覺真係唔差，希望佢哋個服務可以做好啲，咁就Perfect啦！…查看更多

唔好以為茶餐廳就乜嘢都有得食，今晚我就中咗伏喇。本來諗住食個蒸鷄飯諸如此類嘅嘢，搵間比較大嘅連鎖店諗住冇衰，誰不知就係冇，唔單止冇蒸飯，甚至乎冇排骨，冇肉餅，冇雞柳，港式西餐係多選擇嘅，不過今晚唔想食，千揀萬揀，揀咗個香蔥蝦仁炒滑蛋飯。點知飯一嚟到，玻璃蝦嚟嘅！雖然個蛋炒得唔錯，可惜玻璃蝦已經扣晒分，其實唔介意俾多啲錢食啲好啲嘅食材，$56食個玻璃蝦炒蛋飯真係唔係好冧囉！仲有，呢間餐廳要排隊入座㗎，排咗我10分鐘，出面仲成浸臭臭味，唔知係咪樓上爆屎渠，感覺衛生環境好差！…查看更多

晚上7:45分去到，諗住買個外賣：「文昌雞脾飯吖」點知店員問廚房，「係咪冇飯喇？」然後對我說：「冇飯喎！」考慮了10秒，冇飯就買半邊雞自己返屋企煮飯啦：「半邊文昌鷄吖咁」店員又問廚房，「係咪冇雞呀？」然後對我說：「冇雞喎！」「😑」呢間文昌雞飯，冇飯冇文昌雞，最正嘅係，店員態度仲要好似覺得係你唔啱，似乎我諗住幫襯你，真係好唔啱囉！完。其實之前食過，雞ok，個秘醬好食嘅，可惜今次之後，恐怕再冇回頭了😖…查看更多

鼎爺出晒名... 貴㗎啦，試吓呢間平民版，睇吓佢啲嘢食配唔配得上佢個大名...7:00pm入到去冇乜人任坐，心知伏伏地，侍應介紹是日晚餐，好，就試吓佢個基本盤，招牌蜜汁叉燒拼貴妃雞飯！飯到，外觀ok啦，先試一口飯，係軟熟嘅，亦係熱嘅，算係本人喜愛嘅口味！再試叉燒，第一啖咬落去，又幾淋喎，不過食落去，又發覺其實似一舊本身乾柴嘅肉，然後用方法令佢啲纖維變鬆軟，好唔好食？見仁見智啦，本人就較喜歡真正的半肥瘦叉燒喇！貴妃雞被分配雞背及雞胸位置，相信雞髀或已留給肯加錢轉脾的人，部位不是我杯茶，味道又冇乜特別...整體而言，唔可以話唔好食，但呢個價錢絕對係唔抵食…查看更多

星期日想輕輕鬆鬆，搵間舒服嘅cafe慢慢食慢慢飲，於是揀咗呢間位於南豐紗廠嘅咖啡店其實之前下午茶時間嚟過一次，可能上次嚟係平日下午，整體感覺算係唔錯今次大慨兩點嚟到，原來星期日冇lunch set，叫咗個輕食炸雞bagel$78，職員說冇晒bagel包要轉漢堡包得唔得，好，算啦，然後加點了一杯cappuccino, 收正價$36，原來周末冇得食物加點，一個包加杯咖啡總共$114都算幾貴包味道好一般，唔可以話難食，但又同好食扯唔上關係，咖啡算係唔錯，對得住佢嘅價錢嘅全程自助冇服務，店員態度也不友善，整體來說吃了不大滿意嘅一餐…查看更多

想食魚生丼，見呢間幾多好評，一於試吓！店最大特色，應該係可以自選配搭，雖然可以自選，但其實可以選擇的魚生並唔多，基本上只得三文魚同吞拿魚兩個選擇。其他肉嘅選擇其實係熟食來的，有蝦，雞肉之類。揀了蒜片三文魚彩虹飯，飯賣相唔錯，不過食落啲配搭有啲古怪，有好多果仁之類的硬物，一心期望可以食一個軟綿綿啖啖魚香日本米的丼飯，點知大失所望！三文魚ok啦，配咗蒜油算幾香。配菜亦唔覺得特別新鮮，$80呢個質素應該唔會回頭了！…查看更多

見食評一致讃好，又咁啱開正喺我屋企樓下，冇理由唔試吓佢㗎😆叫了6件壽司set，北海道帶子壽司👎🏻，珍寶甜蝦壽司👌🏻，火炙左口魚邊壽司👌🏻，深海池魚壽司👍🏻，碎蔥吞拿魚腩軍艦👌🏻，蟹肉蟹膏軍艦👌🏻，再追加左中吞拿魚腩壽司👍🏻，同海膽軍艦👌🏻平均評分只係ok，比起上次喺如心食「鮨x」，後者完勝！唯一優點坐喺壽司吧，可以對住師傅食，不過坐位偏窄，容易同隔離位有親蜜接觸😅…查看更多

好耐冇幫襯，因為越來越貴，喺荃灣想食牛腩飯，去開嘅嚮腩忽然休息一天，於是就畀次機會生龍啦！清湯牛腩飯原來已經加到$72 ，加凍飲仲要加$13，好貴姐！算啦，如果牛腩真係好食，一餐半餐貴啲都冇問題，因為以前確係ok好食的。飯到，食第一啖，嘩，乜個湯咁咸嘅？仲要係味精喊，好難食呀🤮啲蘿蔔仲要有一浸怪味🤮🤮食完覺得一定要寫番篇食評，以免其他人同我一樣咁上當！點知睇見原來之前已經充滿負評，怪只怪自己冇睇清楚先幫襯，發誓唔會再去！…查看更多

依家晚黑冇堂食，唯有晏晝出去搵吓食。喺荃灣想食日本嘢，上網睇發現呢間幾多正評。一入餐廳，搓手掖奉上，再用消毒液噴上全身，感覺衞生意識好高，令客人好放心👍🏻環境方面，枱與枱間距闊落，店雖然不大，但絕對跟足1.5米規定👍🏻 加上店開張冇幾耐，感覺好新好乾淨👍🏻再睇menu，啲嘢食唔貴，叫咗個吞拿魚溶便當，啲沙律菜好新鮮，魚生也好新鮮，可能係荃灣區最好的日本食物，絕對係物超所值👍🏻👍🏻👍🏻服務方面，侍應禮貌周周，加水頻密，很能照顧客人需要👍🏻設備也很齊全，乾濕紙巾，牙簽等等，全在桌上，不用廢心👍🏻寫到好似膳稿咁😅從來未試過畀5個5分，不過呢個時勢，遇到一間好店，覺得一定要支持吓，加油呀💪🏻利申：本人絕對係一個普通顧客😊…查看更多

幾個月前，見新開咗間台灣野，好多人排隊，有啲興趣想試，今晚咁啱想食台灣野，雖然見食評麻麻，都比次機會佢啦。叫咗鹽酥雞便當同珍珠咖啡，原來有免費冬瓜茶提供。鹽酥雞咬落質感正常，但味道偏淡，勉勉強強咁啦，最大鑊係個飯，珍珠米嚟嘅，但係我未食過咁硬嘅珍珠米，加上唔夠熱，好似食緊冷飯咁🤮魯肉汁又少，又乾又硬，真係想像唔到咁嘅垃圾可以俾人客食😓仲有間餐廳有好多蚊滋，不時飛下飛下，令人感覺好唔衛生，成餐飯食落好似受罪咁👿唯一可喜嘅係杯珍珠咖啡，味道幾好，可惜挽救唔到成餐飯味道嘅評分🤷🏼‍♂️…查看更多

搬咗新舖，畀多次機會佢，叫了五花腩片石窩飯。窩蛋上賣相唔錯，唔難食，但同好味又好似扯唔上關係。優點係夠熱，五花腩不過不失，配菜可以啦，用嚟撈飯嘅甜醬味道正常。以$52一個石窩飯嚟講，合格有餘，但又唔好期望過高。服務態度認真麻麻，侍應冇眼神接觸，可能太忙已唔敢直望顧客，所以落單或者要求服務時會有啲困難。最唔滿意餐廳沒有餐紙提供，今時今日食肆大忌，因為衞生需求，餐廳連提供餐紙抹下啲餐具都冇，感覺好差！…查看更多