doyleki的個人專頁

今晚同屋企人出街食，又係去返老豆話又大碟又抵食又有位泊車嘅嘉爵。好啦，去啦。呢度係全天候唔洗等位，又坐得唔逼，不過佢係一間老茶樓，裝修各樣都比較舊，不過我唔介意嘅。先講碟白果腐竹莧菜。莧菜好味好林。腐竹都ok, 但d白果就無味嘅！都唔知自己食緊乜。跟住個蒜香排骨都好好味，夠甜份量又夠多。最後個栗米斑塊都好好味，唔會成口粉，個汁送飯都好好入口，同埋係超大碟。呢度每碟野都係70幾蚊，係咪好抵食我唔知，不過食完週身痕又口渴其實都幾難受 （我對味精有敏感，食完會身痕，心跳快。。。）…查看更多

其實黎過好多次，不過就而家先記得寫食評。12點幾閒日直入唔洗等，坐底如常叫我最鍾意嘅蕃茄拉麵。面嘅質地好彈牙，湯要搞均先好飲，因為最濃嘅湯底都喺最底層。有少少酸又夠濃，蔥花夠多夠香，個湯超多蕃茄肉，叉燒肥瘦比例3:7，岩哂我。最好味就係隻蛋，好林好入味。平時有人幫我share d 面，今日自己一個人食哂飽到傻左！呢個係我食得最多次嘅拉麵，到而家都未厭…查看更多

星期日，老公特登上open rice 睇下有乜好brunch 食，佢知我鍾意食蕃茄湯嘅野，就帶我黎呢度試下。最後叫左個40蚊嘅通粉炒旦餐同埋一個焗豬扒飯。個通粉餐好快就到了。旦幾滑，但唔夠澳洲牛奶公司果d好味。 火腿幾好，最失敗就係個包。唔脆，牛油入面加左香草，但又唔夠多又唔夠香，不如唔好加了，味道好怪。到個蕃茄湯通粉。叉燒無乜特別，個湯底好好味，通粉都算爽口。但呢杯熱Horlick 就真係唔該哂！搞左90個圈都唔溶仲係一舊舊。淡到我都唔知自己飲緊乜。等多2-3個字就到呢碟焗豬扒飯。平時老公食完個飯都唔覺飽嘅佢，今次竟然俾呢碟飯上面嘅蕃茄汁ko 左！ 好甜好漏，佢怕食甜野，所以唔OK. 而我覺得係可以嘅，不過豬扒乾左d. 埋完單就出事了！ 我地買左2支水飲完都仲係好口渴，原來頭先咁好味都係因為味精作怪，無下次。…查看更多

2個人食個lunch +tea. 成日諗住黎呢間拉麵，但次次都要排隊。今日都有6-7個人排，但老公話好想食咁好啦，大熱天時30幾度就同你排下。。。排左約4-5個字，身水身汗，終於有得入去！侍應唔知係咪做得太辛苦，無乜禮貌，唔出聲淨係用手指叫你揀野。。。唔緊要啦，黎食野啫。 叫左一個白色拉麵同埋辛肉味噌。等面到時候周圍望下，d drawings好得意，係有心機嘅作品。面到了！白色湯底夠濃夠厚但唔會咸，叉燒係屬於瘦果隻，岩我。隻旦夠林但唔太有味。面係粗嘅，有少少硬，但我鍾意嘅係傳統果隻拉麵。 總括嚟講都算唔錯嘅。再黎辛肉拉麵。有少少辣，個湯好濃好好味。做掛面岩岩好。其他嘅同上面果碗差不多，如果以屯門區黎講，呢間都係數一數二㗎嘞！之前食過元朗間《彩》， d 面底好似係一樣。再問問其他人，好似係同一個老板的。同其他拉麵一樣，食完會好頸渴。…查看更多

今日自駕遊到大嶼山，去完貝澳肚餓就去食下齋。之前嚟過幾次都覺得好好味，雖然次次黎都加價，由69食到而家98蚊嘞今日係平日，無得食98蚊果個，得返138貴賓餐。一場黎到，貴就貴d啦！ 於是6個人就開始左一餐又貴又唔好食嘅午飯。。。呢碟叫做最正常，亦係最落本，因為有腰果麻。呢個生菜冬菇無乜特別，不過好多油囉！西檸雞，又係一般，情願佢煎左佢算。炸春捲，入面得耶菜，蘿蔔絲都無條，頂！芋頭魚，係唯一一個好好味嘅餸。好鬆好滑，但一人得一粒炸蓮藕餅。d汁已經浸到個餅無左炸嘅意思最後一個等左幾個字先黎，就係翅。又係果句，難食又唔係，好食就一定無佢份。仲有白飯任裝。138蚊，食咁嘅野，我覺得太唔抵嘞！同以前嘅質素差太多，無下次。…查看更多

早餐都無食等12點開門食過夠。2個人先睇下餐牌。拉麵叫左一個海老一個䐁肉我老公大食，所以再叫埋一隻旦，一個芝士豚肉同蒜蜜味叉燒。等左約5-10分鐘，個芝士豚肉就到嘞。同圖片一樣，得1塊用大量味精放喺芝士上面。好味嘅，但太漏，食一啖就夠哂。跟住就係蒜蜜味叉燒。又唔咸又唔甜咁，完全唔係我杯茶豚肉拉麵嚟嘞！ 湯有d咸，但幾好味，面一般，無乜特別，不過食到最後幾啖真係食唔落。唔係因為份量多，而係好油隻旦無味，旦黃唔夠流心，實在麻麻。就咁都睇到隻旦係偏硬。最後就係海老拉麵。個味係好味嘅，但面質唔ok. 同其他拉麵舖嘅幼面有d距離。豚肉份量都算足，都幾好味。235呢個價錢差不多啦，不過性價比真係唔高，同埋服務一般。…查看更多

今晚同老爺奶奶阿哥阿嫂我老豆老公等人去食飯，同之前一樣，有d餸要提早訂先有，咁位就當然都要book 啦！7點到有枱直入，已經有不少人食緊。有幾張吉枱都寫左留位。上次好似都唔見呢對對聯齊人後上菜，等左幾分鐘上左個豬肺杏汁湯掛住食飲到一半先影相，豬肺好味，好香杏味，不過我覺得有少少咸。呢個湯要預訂的。呢個我無食，係蝦丸，屋企人話好彈好有蝦味！粟米班塊，同其他餐廳差不多，唔會難食，反正我好鍾意食呢個餸呢個唔知叫乜名。有冬菇，蔥，豬肉片，豆腐，豬潤等等。豬肉豬潤好爽好味唔會太咸。魚香茄子煲，呢個好味，唔覺漏，分量足。燒肉例牌，可能我唔識食燒肉，覺得同出面嘅差不多，無乜特別。金銀蛋油麥菜。葉夠林，莖夠爽，d皮旦細細粒平均分佈好入味！最後上嘅係八寶鴨。我未食過的。入面有鴨肉，蓮子，粟子，冬菇等材料。因為之前食得好飽，所以我食左一啖就無食。之前無食過，第一次食嘅感覺就係好味但有d漏，材料好林。因為唔係我俾錢，所以唔知幾多錢嘞！…查看更多

因為好耐無試過新嘅小店食物，每次行過見到呢間韓國野都有人等位，就2個人去試食下。因為都2點幾，所以都唔洗等位，但入面都係坐滿嘅。見到好多人食部隊鍋，但我爆瘡唔食得，就叫左一個豬肉伴飯，一客飯圈同一罐野飲。等左一陣，野飲同伴飯就黎嘞。伴飯（68元）我第一次食，佢俾支好似油咁嘅野去撈d飯。如果無左支油，成個飯基本係無味嘅。不過都食得出食物本身係新鮮嘅。Peach味果汁（12元）都幾好飲，唔會太甜又夠凍，係細罐d囉！再等左差不多半小時先黎個飯圈不過店員都勁講sorry了。佢入面卷左d旦，青瓜，煎過嘅午餐肉都炸過嘅蟹柳。又唔算唔好食，但又講唔上勁正，不過佢飯嘅味都校得幾好。2個人食左百幾蚊，小店經營不易應該要支持下…查看更多

平時行過見到永遠都有人排隊嘅lady m, 今日見到得10幾個人排就一於試下。排左約3-4個字就有位。先落柯打，再攞牌坐低。三個人叫左3件cakes, 呢度d蛋糕每件約58-80蚊，我就覺得好貴嘞等左約1-2個字d蛋糕就到嘞。士多啤梨千層： 最貴嘅一件。好香士多啤梨有少少酒香，千層果d皮好軟好林好好食。收得咁嘅價錢好彩都無失望。綠茶千層： 最好味嘅一個！唔怪得幾乎枱枱都有叫。綠茶cream好味唔會漏！朱古力： 好香好濃嘅朱古力味，好滑，不過就真係有d漏。總結就係，食一次就好，要排隊又貴嘅野係唔岩我嘅…查看更多

星期六食個午飯，三個人等左5分鐘就有位。叫左2個牛肉麵，一個魚香肉躁飯同一個餃子。 餃子一般，夠滑，唔難食但又唔覺得好好味，37蚊我覺得有d貴。 牛肉麵無得輸，牛肉夠多，湯味濃但唔會漏，麵質夠爽，好想飲哂全部湯。 魚香肉躁飯，足一條茄子，但我唔鍾意佢條茄子係炸過，雖然惹味但好肥。肉躁好味，個飯夠哂食，到7點幾都唔覺餓。…查看更多

今日星期六，中午約1點鐘等左唔夠一分鐘就有3人位。未食早餐，可以點多幾樣點心。 茶位2蚊真係好抵，如果你對茶無要求的話，反正出去飲茶8-10蚊位茶錢嘅茶葉都係麻麻。 呢個鳯爪排骨飯細細dull,好乾身，好味。 糯米雞係我最愛，一樣夠乾身，d肉唔好爛容容咁。 一打開已經好香荷葉味！ 再黎個豬潤腸粉，豬潤味濃，腸粉夠薄，好味。 好快就無左2粒，唔知點形容佢嘅好味程度。 呢個傳統馬拉糕唔會太甜，又夠鬆軟。 食到一半嘅樣。呢個價錢，有咁嘅質素，唔怪得成日有咁多人排隊。…查看更多

4 個人去食午餐，唔太餓就去食個麵。呢間麵店已經係第二次黎，見到飲食男女介紹就試下。呢度對我黎講比較遠（近李鄭屋邨），二次去到都係比想像中少人（雖然都9成滿座）。裝修有點舊，一眼就睇到係老店。擺位同其他麵店差不多，有2-3個人做野。今次我地叫左2個豬扒担担麵，一個牛腩麵，一個雲吞麵，一碟腐乳通菜同2支水（共126元）。 豬扒担担麵：豬扒大塊，但唔係厚豬扒，我覺得好好味，炸得岩岩好又唔會有雪味。麵嘅分量足，d麵唔係果d梘水麵，担担唔同出面成pat 油果d，成個配搭都好味又唔漏。牛腩麵：屋企人話一般雲吞麵：無問，不過見佢係自己包，好似好好食。通菜：10蚊黎講佢嘅分量算多，腐乳醬係自己較過，有甜味。整體來說，好味又抵食，會再去的。我們建議閣下加入更多有關食物的味道或賣相等的描述 --> 豬扒担担麵好脆, 味道岩岩好, 唔會好SALTY但夠入味. 賣相好吸引, 因為豬扒都幾大塊下, 但就唔厚O既!…查看更多

一早book左星期五夜晚食放題。呢間星期一至四138一個人，而且其他時間都有同月生日全單88折，可惜我地2個優惠都用唔到！最後7點前入座，158一個人。野食款式都可以，仲有火鍋，唔食生野嘅人都可以去，當然配料就唔算多。 燒蝦好新鮮，雞串味道唔錯，不過好多汁，唔係乾身果隻。 天婦羅蝦爽口新鮮炸的，要等約20分鐘，不過真係值。 炸雞翼係其中一樣最好味嘅野食，小丸子我無食，蕃薯丸好味好甜但唔算漏。 火鍋主要食菜，乾淨好食，仲有叫肥牛，半肥瘦的。 呢個都唔錯。 呢個牛舌味道ok但整到好細粒。只見到蘿蔔看不到牛舌。 洋蔥肥牛好味！ 叫左好多雞翼。 芝士燒蠔毎芝士味幾好，但隻蠔好細粒。燒波蘿好難會唔好食啦！ 刺身可以，但帶子麻麻。鮑片好甜好味。 刺身温度岩岩好。 壽司都好味。總括黎講，出食物快，好少漏單，服務好，飲品最基本的都有，仲有梅酒飲，有甜品雪糕雪條，前半個鐘會提你last order, 坐得好舒服。呢個價錢，好抵！…查看更多

今日星期五同深圳同事一行6個人去大嶼山玩，上到昂坪行完大佛又有人唔想食齋，就是旦去左呢間拉麵店食。裡面唔單只有拉麵，仲有日式/西式食set同小食飲品等。睇個裝修就似快餐店，舒適度一般。果日有d熱但店內無開冷氣，食完野真係焗到死！我叫左個滑旦豬排定食。 d旦唔滑，裡面有洋蔥同什菇，味道一般，唔會難食但又唔係好食。我同事叫左個咖哩豬排飯定食。 都係一般。每個set都係86蚊加一。呢d地方呢個價錢食得飽你都算係咁，不過好似大澳d野食好味d!…查看更多

牛涮鍋唔係第一次食，之前在荃灣都有食過2次，呢次係第一次到葵芳食。環境好過荃灣果間，無咁多人等，我地book左730，早20分鐘到，到左730就可以入去了，唔似荃灣果間，就算book左都要等好耐。90分鐘嘅放題，我屋企人勁叫牛。我地揀左178個set，因為有買4送1coupon, 再用埋積分換左200蚊coupon。牛肉好好味（佢地話，因為我無食牛），豬肉都好味呀！雞就ok啦。湯底我地揀左醫油同昆布，醫油好濃味，昆布同清湯差不多。其他buffet 配料好似菇類，菜，丸，烏冬，白蘿蔔都好乾淨，好新鮮。 食完邊爐仲可以食雪糕，都好好味！ 飲料方面，佢都有汽水同果汁，我淨係飲橙汁，都ok嘅，起碼唔似藥水。8個人食，埋單1050。有咁嘅食物+服務+環境，真係好抵食。…查看更多