pang21的個人專頁

今日下午係尖沙咀睇完戲想食拉麵，就打算試下米芝連既金色不如歸。大概5:30pm黎到，無乜人，現場環境都比較暗，職員服務態度良好。我地叫左最出名既貝汁醬油拉麵，等左大概5-10分鐘就有得食！唔錯，湯底食到蜆味，幾特別，有2片豚肉，一肥一瘦，麵就個人中意食淋身啲，呢度就稍為硬左少少🤏整體感覺唔差的，不過價錢略貴。…查看更多

今日同同事係大尾篤附近做野，做完岩岩好時間食lunch，同事提議係大尾篤食埋先出返大埔啦！一行三人就去到呢度，可能12點零鐘岩岩開鋪，加上閒日，無咩客人都正常。睇左menu，好多選擇喎！加1x蚊可以轉特飲！我地最後叫左豬頸肉炒飯、海南雞飯同埋炒河（豬）。全部都好大份！都幾有獲氣！不過就有少少油！食食下，愈來愈多客，最後都滿座！應該大家都幾中意呢啲，下次再黎試下其他！…查看更多

今日放假約左朋友出灣仔，見到呢間韓國野食好似唔錯，所以入黎試吓！我地大概11:30到，起初無咩人，但隨著lunch hour 開始，愈來愈多人！自己手機落單，我地叫左2個釜山白肉湯飯（$78），本身想叫多份迷你紫菜包飯，可惜太早，餐廳未準備好！講下個湯飯先，好大碗，好多豬肉，湯底都夠味，不過我自己再倒啲泡菜落去，感覺更加惹味！整體唔錯！如果下次再黎，都想試埋其他，因為臨埋單見到隔離客人叫左雞湯麵，好似有成隻雞！…查看更多

一個悠閑嘅星期六下午，食完lunch 要hea時間，黎左呢間coffee shop。環境都幾舒適，夠大，有空間感，order左杯latte 坐左一個零鐘，好彩坐到窗口位仲可以睇下海，不過我地坐唔到，但都有植物係面前，幾chill…查看更多

本身係openrice見到啲comment話呢間野服務態度差，都已經扣左分，但個人真係幾中意佢個景，所以都試左佢最優惠嘅lunch。但真心，去過一次就夠！一入門口，其實個女侍應算幾好禮貌，但一坐低，變左個男侍應就⋯破壞晒成餐飯！落完order問我地叫唔叫野飲，我地話遲啲先，咁佢就即刻連杯收走。直到我地問有冇茶？佢先話：「有！你開未有囉！」咁你又收哂我地啲杯⋯個景係真心靚，野食都過得去，但服務真心唔好。千祈唔好為左個景，去令自己唔開心！…查看更多

今日出街搵地方做吓嘢，不過度度都有限時，所以黎到& Green，貪佢任坐唔嬲！今日星期日，大概中午1點黎到，都有9成坐滿，但都好快搵到二人位，於是坐低。最後order左2樣野食同2杯野飲！大家留意：：：：星期六日係無set lunch 架，所有野都只可以單點！Egg Salad Sandwich ($62)一舊好厚既蛋加丹麥麵包，算鬆軟，不過不失，伴碟有沙律，可以清下腸胃。Pork Udon ($88)湯夠熱，豚肉口感不錯，烏冬彈牙。Regular Coffee ($36) Chocolate ($40)飲品略貴，但屬一般水準，如果唔係誤會左跟餐送都唔會特別叫。整體來講，可以有個地方任坐一日真係唔錯，但希望食物質素可以有提升…查看更多

今日出開大埔，所以有一日睇下大埔有咩餐廳，見homeland係openrice有唔錯嘅comment，所以預約一試！我哋叫咗三樣嘢食同兩杯野飲。自製醬料酥炸雞翼，有三種醬料選擇，包括明太子、柚子蜜同松露忌廉芝士。我哋就揀咗松露忌廉芝士，因為好似最特別，雞翼岩岩炸起，食落係鬆脆同埋熱辣辣嘅，芝士味蓋過左松露味道，加上呢個松露配芝士都就比較滯，所以食完兩隻已經有啲飽。蒜香辣椒炒大蜆意大利粉啲蜆真係好大隻，啖啖肉，完全冇呃秤！不過意大利粉偏硬身，有啲難咬，同埋除咗辣味就冇其他味道，偏淡。香煎西班牙伊比利亞豬肩肉呢個豬肩肉幾出色，外面香脆，內裏鬆軟彈牙，配埋薯容同配菜，剛剛好！另外野食要左黑糖薑茶，同彩蛋海鹽朱古力啤酒🍻朋友話個薑茶好辣，我試一試，真心薑味太重，同好甜:(至於個啤酒，除左個名，都無咩特別⋯…查看更多

趁住5.1黃金週出街支持一下黃店，事前見到呢間鋪有蛋餅，而朋友係十分中意食蛋餅，所以book左位試下佢。大概7:30黎到餐廳，見到另一間餐廳同樣係食台灣野，有好多人等位，但呢間就⋯，我承認個心有少少擔心既。坐低之後店員比左個QR Code我地自己落單，一黎緊係揀蛋餅，之後再揀左個養生雞鍋，一口小香腸滷肉飯，再加推薦既奶蓋八號奶茶。奶蓋八號茶茶：可能我地叫左少甜少冰，黎到個杯底仲係熱既，奶蓋味都夠既，不過唔係話好特別。一口小香腸滷肉飯：一食落口，啲飯好硬，扣哂分，香腸偏乾同硬⋯:(:(:(藥膳雞煲：算係正常既，不過魚片如果可以另上更好，因為一黎到已經浸左落湯度個啲已經淋哂，要逼住即刻食哂佢雞件都大件同滑，但湯底偏咸最期待嘅蛋餅，有2款，我地叫左芝士肉鬆，味道都ok既，因為啲料都正常，有肉鬆同芝士味，可能啲咸都係偏薄身，蛋餅黎到扁坦坦，同台灣漲卜卜既蛋餅爭好遠:(總括黎講，支持黃店係可以一試，但⋯試過就夠了。…查看更多

是日同朋友一齊放假，諗住支持一下黃店，揀左幾間之後，朋友就決定試試master room! 我地黎到既時候大概下午1點半，可能都過左少少lunch hour，唔使等位就入得，仲可以坐到我地想坐既window seat!!!😳😳😳我地揀左2個lunch set!1. 西班牙蛋餅+沙律+熱Earl Grey Tea:前菜揀左Green Salad, 配合柚子汁仲有柚子肉，幾開胃；蛋餅熱辣辣，記得攤下先食，如果唔係好易燙傷！初嚐西班牙蛋餅，內有薯仔粒同煙肉，仲有濃濃芝士，係幾有口感，唔怪之得個個黎到都一定試；Earl grey tea 係用茶包，唔太特別。2. 意大利煙肉青蘋果意大利飯+ 南瓜湯+ 凍elderflower tea餐湯係南瓜湯，南瓜味足夠。至於主食，意大利煙肉，口感似腊肉，都幾特別，以為青蘋果🍏加入飯度會怪怪的，但又出奇地夾，可能因為煙肉咸味較重，食返片青蘋果又幾refresh到口內既感覺，不錯。Elderflower tea亦都係清新，入口有淡淡既甜味，不錯！ 總括來說，係值得支持既黃店，環境舒適。…查看更多

平時去馬鞍山一定會黎屋子生活，因為貪佢有落地玻璃，環境舒適，坐得舒服。今日閒日放工過黎，竟然唔使等位，所以即刻入內坐低！我地一行二人叫左2個主食，加$25可以轉餐，有沙律、麵豉湯同野飲。七味雞唐揚丼：唐揚雞岩岩炸起，又熱又香脆，配埋白飯一流！明太子綜合茶泡丼：不過不失，叫得明太子都預左佢個味會偏咸，就算泡飯都唔會沖淡左啲味，不過食到最尾都係要飲多幾啖野飲！食完正餐，緊係要埋甜品，我地叫左木糠焙茶窩夫。因為出面好少食到焙茶既甜品，所以我地一眼就睇中佢！真係無失望，木糖好煙un!加埋冰凍既焙茶雪糕，再加熱辣辣既窩夫，各方互相配合，一凍一熱，甜度剛好，又有口感，好好食！我地非常滿意！…查看更多

之前一直想試，但好難book位，本身book到1月頭，點知因為疫情停晚市，又無得食！終於，事隔2個月之後，終於，book到了，終於，食到了！一坐低見到餐牌，好多都好吸引，不過，我地得2個人，所以最後都只係揀左4個餸，再加支啤酒！飛天通菜煲（$69）用煲盛載既通菜，非常翠綠，爽口，重點係熱辣辣，好惹味！金沙黃金白飯魚（$75）用咸蛋黃炸白飯魚，食到咸蛋黃味，但可能白飯魚太細，唔太有口感，似食緊炸粉多啲。菠蘿拔絲咕嚕肉（$88）呢個好出色，咕嚕肉好鬆軟有口感，酸甜度適中！新鮮滑雞粥（$79）粥底好綿，又好鮮甜，雞件好滑，正！…查看更多

又係時候食生日飯，今次朋友揀咗呢間！本身諗住叫一個主菜，再加一個甜品，不過我哋太肚餓，所以再叫多咗個小食。忌廉黑松露薯條：新鮮炸起，外脆內軟，就咁食都已經好好味，仲可以點下上面啲黑松露或者忌廉，加埋一齊個口感又特別左，基本上都唔使再點隔離嗰啲番茄醬！松葉蟹忌廉意粉：就咁睇相，以為好細碟，一上枱，原來都幾足份量個喎！啲意粉好幼細，又好好𡁻頭，配埋啲忌廉同埋蟹肉，係正嘅！不過可能始終有啲忌廉，好快我哋兩個就食滯左！但我哋都好努力咁食晒佢！士多啤梨藍莓香蕉班戟：從來都話甜品係有另一個胃，原來係真嘅，就算我哋食到好飽，但都仍然堅持叫多個甜品！原來班戟都可以咁軟熟，雖然叫班戟，但其實更加似三個細嘅疏乎厘，唔會太甜，又非常之易入口，生果黎講，士多啤梨比較似主角，藍莓同香蕉都係點綴，不過士多啤梨就酸左少少。但都值得一試既！…查看更多

趁今日星期日，喺銅鑼灣行到五點幾六點就搵嘢食，行行吓行到登龍街，而呢間餐廳係食牛，就入去試吓。見到個餐牌已經覺得好豐富啦， 有八個主菜可以選擇，我同朋友兩個人一人揀咗一個扒餐定食，一個係吉列炸牛扒，另一個係頂級板腱牛扒五成熟，見大家咁開心仲嗌咗兩個小食，一個係和風紫菜薯條，另一個係炸魷魚，最驚喜就係個吉列牛扒餐，吉列豬扒就食得多啦，估唔到吉列牛扒都咁好食，質感非常之鬆軟，燒紅左個爐先放牛扒上去，用牛油煎香，幾特別，重提供燒汁同鹽俾我哋自己調味。而板腱牛扒五成熟切開就啱啱好，好有牛味，中間一啲筋都冇，好好趙。個定食仲包沙律同埋豆腐，味素飯更加係令我呢個唔中意食飯既人都食哂成碗飯。板腱牛扒定食定價為$215，而吉列炸牛扒定食定價為$188，價錢合理。…查看更多

今日朋友請食飯，因為慶祝佢搵到份好工，咁佢話由我話事，喺開飯啦揀咗一陣，見呢間啲環境都唔錯，就決定試吓呢間!仲要二間晚市做緊食夠$600有88折，又幾吸引！前菜要咗個M3沙律，都幾特別，有辣肉腸，有煙三文魚，食正餐前食一食，都幾開胃！燒春雞，肉質嫩滑，配合醬汁，不過不失！但略微多了點油黑松露鵝肝意大利飯，黑松露味重，鵝肝份量也不少，入口即溶！焦糖布甸，正正常常，唔會好甜，食埋就岩岩好！呢度環境唔錯，下次可以再黎試下其他！…查看更多

朋友介紹呢間拉麵店最近(((((((做緊拉麵買一送一嘅優惠))))))，所以就嚟咗次食啦！不過提提大家，最好預先下載佢個app做咗會員，到時再出示返個app既QR code，就可以享用優惠價啦！金鶴雞白湯拉麵雞白湯嘅湯底非常之濃郁，附上炸牛蒡，其實就好香口嘅，不過我個人就麻麻地，所以都冇食晒。有兩篇戴戴嘅雞肉，非常之鮮甜同埋嫩滑，仲有仲有兩片豚肉，又係嫩滑可口，真係大滿足呀！黑蒜醬油拉麵朋友就點左黑蒜醬油拉麵，黑蒜味都幾重，但略嫌鹹咗少少，配料都非常之足夠，又係有雞同埋豚肉，麵都好彈牙爽口！…查看更多