GMfoodies's Profile

紅葉茶屋幾間分店我哋都幫襯過好多次，但今次真係恐怖體驗，喺佢哋IG留咗言但未有人睇或回應，暫時唔會再幫襯，亦會叫家人朋友唔好幫襯當時有至少兩個員工（一個負責水吧甜品吧、一個傳菜）唔戴口罩但不停打噴嚏同咳，兩個都近距離處理同接觸食物，但竟然有不適都唔自覺戴口罩，員工守則竟然亦冇寫明，其中一個員工仲企正我哋隔離一邊玩手機一邊咳咳咳咗一段時間，而我哋係用餐當中的。而且餐廳入面有好多好大隻嘅烏蠅飛來飛去，衛生情況欠佳。對紅葉茶屋同一般日式餐廳嘅印象係衛生水平、員工培訓都比較嚴謹，但今次真係非常失望。建議大家咪再幫襯…Read More

參觀嘉道理農場之前做咗功課，知道農場入面有一間低碳素食餐廳。一入農場就會見到大大個招牌，一眼見到唔需要周圍搵。做功課時見到有一篇好差嘅食評，所以都自備咗兩個飯糰以防萬一。食過慧食營後覺得要為餐廳平反！店員好有笑容、好有效率。是日便當主菜係紅燒豆腐，中間加咗紫菜，非常好味，配菜多色多款，有秋葵、南瓜、紅蘿蔔、紫椰菜，全部都有營健康又好食，配高纖藜麥飯，加配是日餐湯甘筍湯。飲品叫熱同凍嘅紫蘇檸檬，一樣咁好飲，紫蘇葉更加係餐廳自己種。甜點叫咗可可松露，香濃好味，一口大細啱啱好。兩款小食：薯角比較普通但都好味，清晒，鷹嘴豆泥塊超超超正，味道口感都好好，醬汁好夾。餐廳行低碳路線，所有醬汁都係自家製，新鮮無添加。慧食營雖然唔及主店慧食堂好食同多款，但絕對做到低碳、好味、健康，值得一試！…Read More

約咗朋友嚟食晚飯，佢食過尖沙咀分店不過覺得坐得唔舒服，見灣仔開咗新分店就嚟試吓。同朋友坐低咗研究餐牌冇耐，就搵咗經理點菜，留意返係經理本人。點咗5樣，佢亦都有即時覆單，係冇錯嘅。同朋友傾傾吓計發現原來已經過咗半個鐘，其他遲過我哋嚟到嘅人都已經食緊，但我哋一樣食物都未嚟。當朋友正想起身理論走人之時，經理本人笑笑口咁埋嚟問多次我哋係唔係叫咗呢樣呢樣呢樣呢樣同呢樣呀？我答係，佢就秧笑笑口咁話：哦係呀係呀，冇呀我check check啫，因為隔離枱又係叫咗一模一樣嘅嘢食哈哈哈哈哈然後佢急急腳埋去部電腦入單...............白白要我哋等咗半個鐘仲要扮晒嘢，但明明餐廳得6、7枱客，完成唔明佢哋點做嘢第一道菜終於嚟到：（圖左）炸脆球賣相、味道不過不失，同以前喺其他印度餐廳食嘅水準相若.........點知之後嘅菜色每況愈下........第二道：（圖右）samosa本人非常鐘意食samosa，samosa應該係我最愛嘅印度菜色，平嘅貴嘅samosa我都試過，咁難食嘅真係第一次。首先外皮又薄又淋冇口感，餡冇乜味仲要一pat pat咁，平時好怕點薄荷味醬汁但今次忍唔住，要點咗至擺得入口。第三、四道：paneer芝士咖哩、洋蔥餅paneer芝士我都好鐘意食，但呢個咖哩真心唔得，芝士完全冇味，唔知自己食緊咩，口感同食開嘅paneer唔一樣。洋蔥餅完全冇洋蔥、完全冇味，比平常嘅印度餅乾得多，非常難哽。第五道（已經冇心情影相）：蕃茄飯餐牌上面都幾多款飯，見蕃茄飯有圖又有兩款醬汁跟，所以就叫嚟試吓，點知嚟到時就係得一碟蕃茄飯，圖文不符！啲飯仲要非常爛，唔洗咬都吞到，飯得蕃茄顏色冇蕃茄味道，每食幾啖就會食到一塊咬唔到嘅香料葉，十分之騷擾。同朋友嘅結論就係唔洗再嚟呢間，服務、食物都唔得，又唔係特別平。埋單、等𨋢走人時，經理都兩度埋嚟笑笑口Ｒ吹想令我哋冇咁嬲，都算，竟然夠膽R我哋寫好評，真係要俾個叻佢…Read More

已經有一段時間冇寫食評，但係呢一間慶記嘅服務質素同食物質量，令我唔可以唔寫。平時出街食飯，不論係酒店餐廳、茶餐廳，定係只係去麥當勞食個幾蚊嘅包，入門口，都會有人同你打招呼、量體溫、指示座位或者點餐機。慶記嘅服務，與別不同，令人深深感受到「㷫」。首先，入到去，完全冇人理，冇量體溫步驟，要自己搵位坐。坐咗一陣之後，都係冇人理，然後自己領悟到原來要喺櫃檯拎點餐紙自己圈食物，所以自己起身行出去櫃檯拎點餐紙。依然都係冇人理過我哋。圈左幾樣食物，同埋一杯玫瑰花蜜，問侍應攞兩杯水。侍應話：「我哋冇水供應，會比茶你哋，每人$3茶錢。你哋叫玫瑰花蜜？每人都要比$3茶錢喎，你哋仲要唔要？」我哋話要，但係佢張餐牌同點餐紙明明從來冇提過有$3茶錢呢一個收費，非常「CC叔叔」，除咗服務差，亦都覺得收費安排好奇怪。然後個侍應又再問：「有$3茶錢一定要俾，你哋都仲叫玫瑰花蜜？」我哋再答係，然後再講可唔可以轉頭俾杯茶我哋，好口渴。結果食物上菜後，都係未有茶飲。要比茶錢都唔係問題，但係又要求人哋俾錢，又唔比人哋飲，即係點。問咗四五次之後，終於有茶飲。點會唔㷫。服務差，茶錢奇怪，都唔緊要，食物都強差人意。麻醬雞絲冷麵，其實冇技巧，煮熟咗面同雞之後加麻醬，都冇乜討論價值。小籠包個皮非常之薄，薄到一掂就穿，完全唔煙韌，湯汁冇鮮味，肉餡唔新鮮，似超市街市買嗰啲冰到硬晒嘅雪藏小籠包。百花雲吞湯個湯偏咸，入邊啲豆卜更加咸到好似倒瀉鹽咁，啲百花雲吞餡料係墨魚同蝦，非常之實，一啲都唔新鮮，簡單啲講，灣仔碼頭係比佢好食大概10倍。至於得到Bloomberg認證嘅生煎胡椒包，即叫即整，味道正常，不過唔算特別突出，加上零服務同埋其他食物真係好難食，都冇心情享受。因為太難食，所以都食淨左幾多。搬咗鋪頭改埋名其實都掩蓋唔到服務差、食物差。與其擺錢宣傳裝修，不如先做好自身食物同服務質素。…Read More

平日午餐時段人頭湧湧，一個人的話都好快有位，收銀哥哥好有禮貌，高效率地安排大家排隊購票同入座單點左一個漢堡包，上菜時，職員主動俾杯水我，好貼心！「海陸空三堡」超。級。厚！由上而下：包面、奇趣醬、芝士、魚柳、豬柳、雞扒、奇趣醬、蕃茄、生菜、包底。淨係魚柳都已經1cm，需要兩個口至可以一次過由上到下咬晒成個包麵包應該係自家製，好重牛油香，烘到卜卜脆；即炸魚柳熱辣辣，1cm厚之餘，仲大塊到出晒界！豬柳唔會太咸；雞扒新鮮，簡單調味已好好食；加埋奇趣醬，成件事超夾！一邊食，個包一路流出肉汁，大大啖、啖啖肉 …Read More

「水門雞飯」黎到時其實呆左呆，堆成半圓嘅油飯上面蓋住幾件雞肉，一碟汁、一碗清湯，分量真係唔多，望上去普通不過，食落就感受到廚師深厚功力！雞油飯粒粒分明，口感煙韌，飯香油香撲鼻，乾爽唔黏膩雞肉全去骨，滑得黎有趙口，好有雞味，皮下冇乜脂肪；豉油汁入面有辣椒、薑片，只食到小辣嘅我都覺得好正！香辣惹味，同充滿雞味嘅雞肉簡直係perfect match！最大反差係雞湯，睇上去只係一碗平淡嘅清湯，飲落竟然有濃濃胡椒味，感覺有少少似肉骨茶，精神為之一振！「鳳尾蝦炒金邊粉」望落豐富好多，做到乾炒牛河果種鑊氣，煙煙韌韌，入面有炒到好香口嘅雞蛋同豆卜，支埋青檸汁、撈埋花生碎，好有層次鳳尾蝦有4隻，啖啖肉又爽口…Read More

餐廳位置唔太顯眼，要搵，亦因為咁唔係太多客，有啲可惜。地方好大，裝潢帶台灣原住民文化氣息，座位寬敞舒服「古早味滷白菜」有上湯浸住，面頭撒上魯肉飯嘅香菇肉粒，娃娃菜鮮甜爽口，調味適中，唔會過咸「宜蘭蔥餡餅」外皮超薄，煙煙韌韌，一咬落去仲爆出鮮味肉汁！外皮煎到好香口，入面有大量蔥，味道有啲似蔥油「台灣刈包」舊五花肉好。大。件！！！超厚切，大大塊夾喺煙韌又軟熟嘅蒸包之間，睇見已流晒口水五花肉嘅皮同脂肪好清爽，滿滿骨膠原，成舊肉肥同瘦嘅部分都整到好彈牙，再加上咸酸菜同花生碎平衡味道同咬口，簡直係畫龍點睛「豐收飯」超。抵。食！一碗飯配五款肉三款配菜，有牛展、豬腩肉、雞翼、鯖魚、台灣腸，配新香、滷蛋、菜，橫掃晒海陸空！　牛展同豬腩肉都係厚切，前者咬口好正，如果再多少少味會更好，後者半肥瘦但清爽爽口，一啲都唔油膩，鯖魚魚皮微脆，魚肉juicy，台灣腸唔會太濃，米飯粒粒分明有飯香，真係好有誠意！「燒仙草紅豆芋圓(熱)」叫起至上，粉團有芋頭、紫薯同蕃薯味三種，糖水個人覺得有點兒太甜，紅豆再多啲會更好~所有食物都係正宗、好味、抵食，而且完全唔會太咸同油，超高質！…Read More

午餐時段去，點左A餐，炙燒豚角醬油拉麵 + 煎餃子 + 飲品，另外再點多左一份枝豆。枝豆到先，係雪櫃拎出黎嘅，平時多數會加鹽，呢度就加胡椒粒，味道正常冇乜特別。落單後超過15分鐘碗拉麵至送到，隔離枱遲好多至坐低落單都已經食緊，舖面又唔係多客，咁都甩碗炙燒豚角醬油拉麵，先講賣相，都ok嘅，幾多肉，麵嘅分量相對較少，淨係食碗麵會唔多夠飽。個湯一啲醬油味都冇，係。一。啲。都。冇，得辣味，但餐牌冇寫明碗拉麵係辣嘅，完全唔明咩事，淨係得個辣字，冇其他味道，冇任何層次可言，食拉麵期待果種骨湯湯頭嘅鮮甜濃厚完全做唔到；麵條都彈牙有口感，但湯同麵控制不佳，未食到一半啲麵已淋晒，屬低質拉麵，又冇麥香；辣味就係黎自啲炙燒豚角，我中文唔好，乜炙燒即係辣咁解咩？有幾舊都幾大塊肥膏，煮得參差，某幾舊好淋，有啲就韌到咬唔到落單後超過20分鐘至有餃子，而且仲係唔熱嘅，都唔知等咁耐係等乜餃子皮幾煙韌，不過味道都係普普通通，唔值呢個價錢，亦唔值得等咁耐。跟餐個飲品係。從。來。冇。黎。過。少少嘢都可以甩漏成咁總結：冇原因再幫襯霸嗎…Read More

店內環境好有地道特色，老牌舊店好有feel叫左乳豬三拼飯，乳豬拼咩係師傅決定，次次都唔同，令人聯想起omakase結果係乳豬拼叉燒、油雞:)從來冇食過咁正嘅乳豬！多數市面上啲乳豬其實都係乳豬「皮」，得塊脆皮癡住一層脂肪，有時仲唔脆嘅添...龍記嘅乳豬塊皮又薄又脆，咬落kok kok聲，皮底下層脂肪薄薄地食落一啲都唔油膩，重點係佢地嘅乳豬係連住好大塊嘅肉架！　而且唔會過咸過油過乾，調味適中，燒味界實屬罕有從來冇食過咁正嘅叉燒！肉夠林，蜜汁香甜度適中！平時食開嘅普通叉燒係一忽較乾較韌嘅瘦肉，連住一舊仔肥膏，呢度啲叉燒肉係完美結合肥同瘦，所以咬落好林好軟熟，啖啖肉香，改寫「肥瘦均勻」呢個term！油雞都係唔會太咸、肉質鮮嫩；三種肉分量都好多，一啲都唔姑寒，中環$80左右食得到，抵！…Read More

附近餐廳午市未加一都至少一百頭一個人，呢間價錢算中等。坐到滿晒好多人，但服務都好有效率，服務態度屬高水平跟餐麵包切成長方條形狀，有陣陣香草味，仲充滿誘人牛油味，咬落軟綿綿得黎又密度好高，所以亦有黏黏嘅口感，點埋黑醋橄欖油，正呀！餐湯蘑菇湯就比較遜色，太水，淨係得個咸字，面頭浮游幾條mozzarella芝士，牛頭不搭馬嘴，只飲左幾啖。主菜煎魚柳，餐牌冇講明咩魚，啲肉超滑，軟到咬落完全冇任何纖維咁，極嫩牛油檸檬汁非常creamy紅椒、紅蘿蔔都好有燒烤風味，南瓜新鮮juicy又林又香，不過貌似菜心嘅broccolini就有點兒太硬。配菜之中最欣賞係薯蓉，牛油味夠晒香濃，加埋意大利香草，大讚！餐飲叫熱茶，侍應好醒目咁跟埋牛奶:)喺呢個地段收呢個價錢，性價比都算高…Read More

後街小店，多數都好有特色，好平、好特別、好靚、自家製、好好食等等，就係咁，我中左伏。首先，自身經驗加觀察，啲店員落單極唔專心，算，通常對小店嘅容忍度高啲。香茅豬肉湯檬，$5X得果零零丁丁幾片肉仔，仲要有啲位比較暗沉，明顯係煮好擺左好耐，味道都ok但賣相、新鮮度同口感都非常之差。檬粉煮耐左好淋，湯底似加左鹽嘅滾水。呢碗粉，根本$20都唔值。鮮蝦卷個樣都加返少少分，至少材料方面都有啲誠意。粉皮煙韌，個醬汁都唔錯，不過呢兩樣嘢應該都係現成貨，冇技術可言，卷入面嘅蝦都爽嘅，香葉蔬菜檬粉冇咩特別，成件事好平凡又冇廚藝，但都收$5X。最反感係食到最後至見到個湯檬加送昆蟲，飽晒。…Read More

樓面寬敞，有大量卡位吧位，環境舒適乾淨睇緊餐牌時，店員好熱情咁打招呼同介紹熱門菜式點餐後好快就有得拎了關東煮配烏冬果然係日本直送！烏冬煙韌、有香味，一直浸喺濃度適中嘅鰹魚熱湯入面，不過到最後果啖都超有咬口！關東煮嘅獅子狗比一般長，密度高，有咬口，好似食緊高質靚魚肉燒賣咁年糕福袋由豆腐皮到年糕餡味道都好夾、入面超煙韌仲有芋絲同大大舊蘿蔔，蘿蔔做得好用心，全面浸滿湯味，可惜蘿蔔本身不太係時候，唔夠甜。而麵豉湯就太咸了，只飲了一啖（曰本朋友話麵豉湯係唔應該咁咸的）。揀左麻糬做甜品，外面沾滿黃豆粉，一夾落去已感覺到質感極級柔軟黏糯！！！　好食到尖叫！入面仲有淡淡嘅鮮忌廉，好感動呀燒鳥丼米飯都係日本直送，飯香＋口感就一定的了，面頭啲燒鳥味道有啲似日本黑色炭燒雞肉！而且仲夾雜雞軟骨，加埋新鮮檸檬汁。。。每個餐都只係$60左右，咁高質抵食嘅日本菜，實在難得！:)…Read More

本身地點好似喺LCX，而家搬去左灣仔碼頭，其實都幾冷清冇乜人流，除非係搭船或者特別行去。款式選擇都多，店員亦好快手。點左凍嘅紅茶鮮奶歐蕾加手工珍珠(即係珍珠奶茶)，走冰、微微糖。茶都幾香，但唔覺得係鮮奶，都係比較重奶精味。手工珍珠有透明色同藍綠色，大小不一，有啲要好大力咁至啜得入飲管，味道唔會太甜太濃，但其實唔知咩色係咩味(唔同色係唔同天然材料做，日日不同)。冇乜特別，一般般，可一試，不過試過就算，因為都唔係平。…Read More

幫襯過灣仔分店好多次，今次試下尖沙咀分店。平日夜晚都幾少客，唔到10個。Staff亦明顯比灣仔店少好多，得一個staff喺樓面，一個人做晒收銀、夾沙律、夾包，所以唔太得閒理啲客，等好耐至嗌到嘢食落到單。自選四式沙律用黑椒、橄欖油、醋等調味，食落味道天然，口感爽脆，非常refreshing最欣賞couscous沙律，充滿咖哩香味，配埋芫茜，極上癒！法式洋蔥湯燉雞腿燉窩面頭係一塊索滿晒雞湯汁嘅邪惡芝士法包，啲芝士有塊包一半咁厚，拉絲效果超強！！！洋蔥湯熱辣辣，惹味得黎唔會太濃原隻雞腿大大件，燉到離晒骨，啲肉好易咬，已經同啲湯融為一體燉窩免費配兩塊黑麥包同意粉，黑麥包烤到又熱又脆，密度高，有合桃，食落好香麥味，就咁食又得，點湯食亦得；意粉只有黑椒同少量牛油/橄欖油調味，分量剛剛好，不過有少少過左火，淋淋地唔夠咬口，整體都係OK嘅。…Read More

金銀蒜原隻吉品鮑有成10隻咁多鮑魚全部大大隻，可蓋過湯匙，蒸到剛剛好，鮮美易咬啖啖肉，一口食晒一隻超滿足！金銀蒜好惹味，粉絲索晒豉油，全部撈埋一齊食絕對係正解！就咁食金銀蒜同粉絲就會太咸了。芝士上湯焗大花蝦冇花冇假，真係手掌咁大隻大花蝦！蝦肉爽口彈牙勁新鮮、非常鮮甜，蝦膏從蝦頭爆出，芝士上湯都好正不過一稍為冇咁熱就立即「擎」晒，所以後尾碟嘢有點兒難分難解好難夾。豉蒜翠玉爆鴛鴦:)翠玉瓜真係好爽脆！火喉剛剛好豬頸肉啲汁太濃味了，豆腐就有啲辣。煎蓮藕豆皮卷望落有啲似天婦羅，食落有驚喜！咬落唔會有好油炸好熱氣嘅感覺，蓮藕同豆皮融合晒一齊，味道咬口都夾，有啲似芋絲春卷，點埋喼汁，正呀黑白胡椒雞落單時完全估到會係咩，結果原來係上面加左黑胡椒粒嘅白切雞，冇乜特別，亦冇乜技巧，都幾嫩滑。錦繡冬瓜盅超。清。甜！好耐冇試過喺茶樓飲到又唔會杰撻撻、面頭又唔會浮晒油嘅湯了！　仲要勁多冬瓜肉，配埋金華火腿同瘦肉鮮冬菇扒翡翠冬菇得幾粒，又唔係咩貴嘢，俾多啲會再開心啲，生菜油水比例非常好，好味道～花膠蝦乾浸翡翠苗:)唔講都唔知面頭白色細細條嘅就係花膠，冇乜味又爽爽地，似豬皮魚肚多啲。翡翠苗份量好多，不過唔夠嫩，咬落韌，有渣，蝦乾同上湯好鮮味，救返全碟餸柚子伏苓糕黑媽媽嘅伏苓糕其實同龜苓糕同類，食落似涼粉，上面嘅柚子汁就係大家飲開嘅柚子茶，呢種甜品唔係個個鐘意，我就麻麻地喇。…Read More