一杯鐵板燒居酒屋 (已結業)

餐廳環境異常寬敞，有海量嘅座位，舖位亦都好大，疫情底下可以保持到好遠嘅社交距離，讚。軟殼蟹沙律柚子風味，軟殼蟹十分酥脆，沙律菜極度新鮮，襯埋底下嘅柚子汁一齊食，相當開胃。白身魚薄切18片，由於白身魚只可以喺天然嘅環境中成長，不能人工飼養，因此非常矜貴；白身魚嘅魚身光亮，魚皮滑溜，肉質鮮甜無比，加上極富膠質嘅口感，令人回味。鐵板香煎豆腐，煎豆腐豆味香濃，豆腐上面嘅係炒香咗嘅洋蔥同埋野菌，為豆腐起咗畫龍點睛之效。一杯關西燒，平時食大阪燒裏面有椰菜同埋豚肉就食得多喇，呢個以餐廳名稱命名嘅關西燒裏面竟然有牛筋就真係未試過，整體感覺非常創新，而且牛筋炆得好腍，絕對值得翻兜。味噌煮廣島蠔伴野菜鍋，廣島蠔個仔不少，蠔味濃郁，啱啱好嘅熟度令到口感水潤 juicy，以石窩盛載唔單止喺上枱嘅時候吱吱作響，最緊要係食到最後一啖都依然咁溫熱。凍蕎麥麵，蕎麥麵爽口彈牙，溫度冰爽，份量不少，加上新鮮芥末嘅加持，實屬水準以上。