竜王居酒屋 (已結業)

朋友住北角個頭，介紹話後街有間日式居酒屋好抵食，所以今日專登去試吓。由地鐵站行過去都要8分鐘左右，佢係間商場入面，所以都搵左一陣先見到。舖頭雖然唔太多位，但裝修好新淨，坐得都幾舒服。餐牌有好多類型嘅菜式，我哋兩個人去每樣都叫左少少分黎食。佢哋啲壽司同其他舖頭唔同，用撈左豉油嘅壽司飯，食落多左種鮮味，完全唔洗再點野。特別一提佢嘅燒左口魚壽司真係入口即溶味道好高級。仲有個海龍王壽司又睇得又食得，吞拿魚蓉配上蝦壽司同魚子，又係好鮮味嘅配搭！串燒叫左雞翼同牛舌，牛舌厚切得黎好juicy，雞翼鹽燒但又唔會燒過龍好嫩滑，食得出師傅嘅細心。海膽流心可樂餅新鮮炸起，一切開海膽真係流出黎！好香濃，但真係熱左啲，記得吹兩下分開食唔可以心急。整體來講價錢公道，質素超高！經過的話一定會再幫襯。