一休料理 (已結業)

今日一家人嚟試Omakasae,提前同店主講你想要嘅價錢（由200幾到千幾不等）然後由師傅發板。第一次嚟已經好有驚喜，由主菜到最後嘅冷麵全部都好滿意。前菜果個青瓜配蟹膏麵豉演出醬好特別，蟹膏味好籠郁；第二樣係日本番茄，師傅話日本人鍾意蘸鹽食，試過之後都覺得唔錯，不過我個人覺得鹽隔離個汁好食D；第三樣係刺身拼盤，有䲞魚、北極貝、牡丹蝦、鯖魚、帶子、三文魚腩同海膽魷魚，師傅仲專程教我哋應該由邊樣開始食，呢度D刺身比外面好多舖頭好好多，完全無雪味，尤其北極貝、帶子同海膽魷魚好鮮甜，另外鯖魚配姜蓉同蔥一齊食幾鮮味；第四係法國生蠔，海水味勁濃，入口好creamy,啱曬我呢個蠔癡，齋滴兩滴檸檬汁已經足夠；第五係多士配吞拿魚蓉同三文魚籽，第一次咁樣配搭食多士不錯，每一啖都食到魚蓉香同三文魚籽嘅咸味；第六係鰻魚玉子燒，玉子燒好香好滑，鰻魚夾埋玉子燒味道好夾；第七係鱈魚燒同薯蓉，鱈魚燒夠香夠滑，D薯蓉配埋D汁一齊食好味；最後係蕎麥冷麵，冷麵軟硬適中，仲有一個好似沾麵嘅醬汁，蘸嚟食唔錯總括嚟講絕對物有所值，下次一定會再嚟