天慶 (已結業)

早前約咗表姐食晚飯，黎到呢間位於中環嘅高級日本餐廳。 餐廳嘅裝修充滿日本風情，而且好有格調，有一種好chill嘅感覺，仲設有長吧枱，可以畀客人品嚐美酒。餐廳提供多款清酒同雞尾酒，食客可以小嚼一杯~ 我哋兩個人總共叫咗四道菜。 北海道帶子刺身薄片配牛油果青蘋果柚子醬、 軍艦壽司、牛面頰肉同埋鰻魚蛋包飯。 帶子刺身好鮮甜，配上牛油果蓉一齊食感覺好新鮮， 味道清新。 軍艦壽司有四款口味分別係海膽 吞拿魚蓉、蟹肉同帶子。 我哋覺得四款都好好味，因為食材好新鮮，唔會有腥味而且每款軍艦壽司都配上唔同嘅配料，廚師別出心裁嘅配搭，令到軍艦壽司食起上嚟味道好和諧。 牛面頰肉煮得好腍好入味， 食起上嚟有啲似牛，醬汁香濃得嚟又唔會蓋過牛味~ 鰻魚蛋包飯嘅份量好多，鰻魚大大份；蛋煮得夠香滑，炒飯粒粒分明，每粒飯都有醬汁包住，好好味！值得一讚嘅係每道菜嘅賣相都好靚，好似一件藝術品咁，可以話係色香味俱全。 想食日本菜，又想搵個地方飲番杯，呢間餐廳可以一次過滿足你兩個願望~