直燒和牛商店位於長沙街，大家可能對長沙街印象唔多，但其實店鋪位置就係響信和對面﹑創興廣場後方﹑桔梗附近既7-11旁，地理位置上非常方便。(門口仲有紅色小巴特快去荃灣西地區)
由於實在太抵食既關係，晚市基本上無訂位既話係無可能等到枱(最起碼小編與朋友們離開餐廳個陣都見到最少2組人被拒於門外了)，小編本身都響1星期前訂枱先有，所以強烈建議大家要先打電話確認及留枱。
由於只有1小時用餐時間，加上石燒要時間煮熱關係，睇到其他朋友響入座前都會緊張諗定用餐既策略；但其實唔駛太擔心既，店員會響大家入座前預先準備晚市定食用既沙津﹑冷泡白桃烏龍茶 (晚市定食+$38)，以及為你響石燒板上預先以和牛脂肪塗上牛油。
除左點選任食既1人前吉列牛脷($98)外，本身姊妹店作為批發和牛商鋪既關係，小編都特登點選A4和牛厚燒 ($148)，感受下A4和牛既油脂感吧!
等左5分鐘左右，吉列牛脷﹑紫菜月見飯﹑以及和牛厚燒都上枱喇。吉列牛脷每碟有14件，抵食既程度完全係超出左小編既想像；而和牛厚燒有6塊，雖然唔係想像中咁厚，但睇到油脂平均而密麻麻既分佈，已經令小編好期待喇。
牛脷本身已經響炸既過程中大概整熟，所以大家食個陣只需將牛脷響石板上輕輕翻熱1分鐘左右就得 (除非大家想燒出焦熱既感覺)；至於和牛小編就以表面剛變色為目標 (即5成左右)，食個陣就可以食到表面既油脂同時，亦可以食到內裡和牛散發出既牛肉味!
大家可能會想像到，1小時既用餐時間不斷食牛脷會唔會令人有厭惡的感覺? 其實又唔會既，紫菜月見飯就正正為大家可以響牛以外有實際既澱粉質落肚而唔會有空虛感 - 月見 (即蛋黃)味道算濃郁，響大量紫菜及醬油輔以攪拌下，口感基本上同大家響牛角食既牛角飯味道一致，甚至會令你有一刻既感覺想追加!
響1小時既用餐過程中，店員非常有禮咁為我地加茶﹑亦會主動關心我地需唔需要追加牛脷，響呢個抵食既環境下，仍然保持到服務水準係抵讚既。 最終小編同2位朋友食左4碟牛脷 (共48件)，A4和牛厚切，連埋月見飯既情況下，個肚已經飽到行唔郁喇!
小編會建議如果有同行既朋友，可以點選1份牛脷，另外再點選其他既牛肉一併去燒，既唔會因為食得太多牛脷而悶，亦可以試到佢地唔同質素既牛肉，一舉多得! 當然，如店鋪響牆上既燈牌所言 - No Beef! No Life! 值得推薦大家去試下!
